Published:Updated:

தரம்... சொகுசு... இரண்டில் எது ரவுசு?

Hero Xtreme, Suzuki Gixxer
பிரீமியம் ஸ்டோரி
Hero Xtreme, Suzuki Gixxer

போட்டி: ஹீரோ எக்ஸ்ட்ரீம் 200S Vs சுஸூகி ஜிக்ஸர் SF

தரம்... சொகுசு... இரண்டில் எது ரவுசு?

போட்டி: ஹீரோ எக்ஸ்ட்ரீம் 200S Vs சுஸூகி ஜிக்ஸர் SF

Published:Updated:
Hero Xtreme, Suzuki Gixxer
பிரீமியம் ஸ்டோரி
Hero Xtreme, Suzuki Gixxer

ஜிக்ஸர் SF... சுஸூகியின் இந்த பைக், ‘ஃபுல் ஃபேரிங் கொண்ட விலை குறைவான பைக்’ என்ற பெருமையைத் தன்வசம் இன்றுவரை வைத்திருக்கிறது. இதன் ஃபேஸ்லிஃப்ட் மாடல் முன்பைவிட அதிக விலையில் வந்திருந்தாலும், ஃபுல் பேரிங் கொண்ட மற்றுமொரு 155சிசி பைக்கான யமஹா R15 V3.0 பைக்குடன் ஒப்பிடும்போது இது குறைவுதான்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

இந்த நாள்வரை தன் செக்மென்டில் தனிக்காட்டு ராஜாவாக வலம் வந்த ஜிக்ஸர் SF பைக், தற்போது புதிய போட்டியாளரைப் பெற்றிருக்கிறது. 200சிசி இன்ஜின் - ஃபுல் ஃபேரிங் காம்போவுடன் வந்திருக்கும் எக்ஸ்ட்ரீம் 200S பைக்கை, சுஸூகியை விடக் குறைவான விலையில் களமிறக்கியுள்ளது ஹீரோ. லேட்டாக, ஆனால் லேட்டஸ்ட்டாக வெளியாகியிருக்கும் எக்ஸ்ட்ரீம் 200S, கரிஷ்மாவுக்கு மாற்றானதொரு தயாரிப்பாக இருக்குமா? ஜிக்ஸருக்குக் கடும் சவால் அளிக்குமா?

டிசைன் மற்றும் எர்கனாமிக்ஸ்

இரு பைக்குகளையும் அருகருகே நிற்க வைத்துப் பார்த்தாலே, ஜிக்ஸர் SF ஸ்போர்ட்டியான லுக்கைக் கொண்டிருப்பது தெரிகிறது. ஆனால் எக்ஸ்ட்ரீம் 200S பைக்தான் பலரது கவனத்தைக் கவர்கிறது. இதற்கு அகலமான ஃபேரிங் மற்றும் வித்தியாசமான LED ஹெட்லைட்டைத் (வெளிச்சம் ஓகே) தாண்டி, அதன் பளிச் சிவப்பு நிறம்தான் பிரதான காரணி. (கறுப்பு - பிரவுன் கொஞ்சம் டல்தான்).

எக்ஸ்ட்ரீம் 200S பைக்
எக்ஸ்ட்ரீம் 200S பைக்

1. ஜிக்ஸரில் தெளிவான டிஜிட்டல் மீட்டர், படிக்க வசதி.

2. ஸ்ப்ளிட் சீட் ஸ்போர்ட்டி, ஆனால் சின்னது.

3. டூ பீஸ் ஹேண்டில்பார், பல்க்கியான பெட்ரோல் டேங்க் என டிரைவிங் கம்ஃபர்ட் சூப்பர்.

4. ஜிக்ஸரில் LED ஹெட்லைட்ஸ் ஓகே ரகம்.

கரிஷ்மாவின் ஃபுல் ஃபேரிங், கலவையான விமர்சனங்களைப் பெற்றதால், இந்த ஏரியாவில் ஹீரோ இம்முறை கொஞ்சம் கூடுதல் கவனம் செலுத்தியிருக்கிறது. ஆனால் அதிக உயரத்தில் இருக்கும் சிங்கிள் பீஸ் ஹேண்டில்பார் மற்றும் அதில் வைக்கப்பட்டிருக்கும் மிரர்கள் ஆகியவை, இது கம்யூட்டர் பைக் என்பதைக் குறிப்பால் உணர்த்திவிடுகின்றன. ஃப்ளாட் ஹேண்டில்பார் மற்றும் கொஞ்சமாகப் பின்னோக்கி வைக்கப்பட்டிருக்கும் ஃபுட் பெக்ஸ் காரணமாக, சொகுசான அனுபவம் ரைடருக்குக் கிடைத்துவிடுகிறது. ஆனால் இந்த ரிலாக்ஸ்டான எர்கானமிக்ஸ், பைக்கின் கையாளுமையைப் பாதிக்கவில்லை என்பது செம! சிங்கிள் பீஸ் சீட்டின் குஷனிங் மென்மையாக இருப்பதுடன், இடவசதியும் அதிகமாக இருக்கிறது.

எக்ஸ்ட்ரீம் 200S பைக்கில் இருக்கும் 17 இன்ச் MRF டியூப்லெஸ் டயர்கள், திருப்பங்களில் சிறப்பான ரோடு கிரிப்புக்கு வழிவகை செய்கின்றன.

Hero Xtreme, Suzuki Gixxer
Hero Xtreme, Suzuki Gixxer

ஷார்ப்பாகக் காட்சியளிக்கும் ஜிக்ஸர் SF, அதற்கேற்ற அம்சங்களால் நிறைந்திருக்கிறது. Trident வடிவ LED ஹெட்லைட் (வெளிச்சம் ஓகே), தாழ்வாக வைக்கப்பட்டிருக்கும் க்ளிப் ஆன் ஹேண்டில்பார், உயரமான பின்பக்க ஸ்ப்ளிட் சீட், அகலமான பின்பக்க டயர் என இதற்கான உதாரணங்கள் அதிகம். எனவே பைக் பார்க்க எப்படி ஸ்போர்ட்டியாக இருக்கிறதோ, அது போன்றதொரு ஓட்டுதல் அனுபவமே ரைடருக்குக் கிடைப்பது பெரிய ப்ளஸ். எனவே பைக்கின் ஹேண்ட்லிங் சிறப்பாக இருக்கும் என்றாலும், சொகுசு விஷயத்தில் கொஞ்சம் சமரசம் செய்து கொள்ள வேண்டியிருக்கும். (முதுகு பத்திரம்)!

தரம் மற்றும் வசதிகள்

ஜப்பானிய நிறுவனத்தின் தயாரிப்பு என்பதைப் பறைசாற்றும் விதமாக, ஜிக்ஸர் SF பைக்கின் கட்டுமானத் தரம் அற்புதம். ஸ்விட்ச்சின் தரம் நன்றாக இருப்பதுடன், LCD Backlit டிஸ்ப்ளேவும் தெளிவாக உள்ளது.

Hero Xtreme, Suzuki Gixxer
Hero Xtreme, Suzuki Gixxer

இதனுடன் ஒப்பிட்டால், எக்ஸ்ட்ரீம் 200S பைக்கின் கட்டுமானத் தரம் ஓகே ரகம்தான். வெளியே இருந்து பார்க்க ஃஃபுல் ஃபேரிங் நன்றாக இருந்தாலும், அதன் உட்பகுதியின் ஃபினிஷிங் சுஸூகி அளவுக்கு இல்லை.

தரம்... சொகுசு... இரண்டில் எது ரவுசு?

ஸ்விட்ச்களின் தரம், ஹேண்டில்பாரில் வைக்கப் பட்டிருக்கும் choke லீவர், ஜிக்ஸர் SF போலவே ஸ்ப்ரிங் இல்லாத ஃபுட் ஃபெக்ஸ் ஆகியவை, இந்த பைக்குக்குப் பொருத்தமாக இல்லை. தவிர, இன்ஜின் கேஸிங் பகுதியில் ஆங்காங்கே துருப்பிடித்திருந்ததும் நெருடல். ஜிக்ஸர் SF பைக் போலவே, எக்ஸ்ட்ரீம் 200S பைக்கிலும் டிஜிட்டல் மீட்டர் இருந்தாலும், Turn By Turn Navigation உடனான ப்ளூடூத் கனெக்ட்டிவிட்டி புதிது.

இன்ஜின் பர்ஃபாமன்ஸ் மற்றும் மைலேஜ்

பல்ஸர் NS200 மற்றும் அப்பாச்சி RTR 200 போன்ற 200சிசி பைக்குகளுடன் ஒப்பிடும்போது, எக்ஸ்ட்ரீம் 200S பைக் பவரில் பின்தங்கிவிடுகிறது. ஆனால் இங்கே ஜிக்ஸர் SF பைக்குடன் ஒப்பிடும்போது, 45சிசி - 3.4bhp பவர் - 0.31kgm டார்க் அதிகமாகக் கிடைக்கிறது. எனவே, எதிர்பார்த்தபடியே 0 - 100 கி.மீ வேகத்தை, எக்ஸ்ட்ரீம் 200S - 3 விநாடிகள் முன்பாகவே எட்டிவிடுகிறது.

ஹீரோ எக்ஸ்ட்ரீம் 200S Vs சுஸூகி ஜிக்ஸர் SF
ஹீரோ எக்ஸ்ட்ரீம் 200S Vs சுஸூகி ஜிக்ஸர் SF

மேலும் கியர்களுக்கு இடையேயான பர்ஃபாமன்ஸும், எக்ஸாஸ்ட் சத்தமும் ரசிக்கும்படி அமைந்திருக்கின்றன. ஆனால் இது கார்புரேட்டரைக் கொண்டிருப்பதை இங்கே குறிப்பிட்டாக வேண்டும்.

ஏனெனில் BS-6 அவதாரத்தில், ஜிக்ஸர் SF போலவே ஃப்யூல் இன்ஜெக்‌ஷன் இங்கே இடம்பெறும். BS-4 இன்ஜின் கொஞ்சம் கரகரவென இயங்குவதால், அந்த நிலை அப்போதாவது மாறலாம். நகரத்தில் 37.9 கி.மீ மற்றும் நெடுஞ்சாலையில் 51.1 கி.மீ என மைலேஜ் தருகிறது எக்ஸ்ட்ரீம் 200S. ஆரம்பகட்ட வேகத்தை மனதில் வைத்துத் தயாரிக்கப்பட்டிருக்கும் ஜிக்ஸர் SF, 0 - 60 கி.மீ வேகத்தில் எக்ஸ்ட்ரீம் 200S பைக்கை நெருங்குகிறது (5.24 விநாடிகள்). இந்த ஃப்யூல் இன்ஜெக்டட் இன்ஜின், ஸ்மூத். பவர் குறைபாடு இருப்பதால், அதிக வேகங்களில் இன்ஜின் திணறுகிறது.

தரம்... சொகுசு... இரண்டில் எது ரவுசு?

ஹீரோவிடம் பர்ஃபாமன்ஸில் விட்டதை, மைலேஜில் சரிக்கட்டிவிட்டது சுஸூகி (நகரம் - 46.7 கி.மீ; நெடுஞ்சாலை - 53.1 கி.மீ). ஆனால் இந்த இரு பைக்குகளுமே 100 கி.மீ வேகத்தில் டாப் கியரில் க்ரூஸ் செய்வதற்கு வாட்டமாக இல்லை என்பது மைனஸ். இவற்றில் சிங்கிள் சேனல் ஏபிஎஸ் உடனான டிஸ்க் பிரேக்ஸ் இருந்தாலும், ஹீரோதான் பிரேக்கிங் விஷயத்தில் முன்னிலை வகிக்கிறது.

முதல் தீர்ப்பு

இந்த இரு பைக்குகளுமே பைக் ஆர்வலர்களைத் திருப்திப்படுத்தினாலும், இரண்டிலுமே குறைகள் இருக்கத்தான் செய்கின்றன. ஸ்போர்ட்டி டிசைன் மற்றும் ஒட்டுமொத்தத் தரம் என ஜிக்ஸர் SF அசத்தினால், சொகுசு மற்றும் பர்ஃபாமன்ஸில் எக்ஸ்ட்ரீம் 200S கவர்கிறது. ஹீரோவின் ஒட்டுமொத்தத் தரம் மற்றும் சுஸூகியின் அதிகவேக பர்ஃபாமன்ஸ் ஆகியவை சுமார் ரகம்.

சென்னை ஆன்-ரோடு விலையான 1,31,419 ரூபாய்க்குக் கிடைக்கும் ஜிக்ஸர் SF, எக்ஸ்ட்ரீம் 200S பைக்கைவிட ஏறக்குறைய 11 ஆயிரம் ரூபாய் அதிகமாக இருக்கிறது (1,20,564 ரூபாய்)! ஆனால் BS-6 அவதாரத்தில் வரும்போது, ஹீரோவின் விலை தோராயமாக 7,000 - 9,000 ரூபாய் அதிகரிக்கப்பட வாய்ப்புள்ளது.

ஜிக்ஸர் SF
ஜிக்ஸர் SF

1. எக்ஸ்ட்ரீமில் புளூடூத் கனெக்ட்டிவிட்டி, அருமை!

2. சிங்கிள் சீட்தான்... ஆனால் சொகுசுக்கு கேரன்ட்டி.

3. ஹேண்டில்பாரிலேயே மிரர்கள்... நிறைய பேருக்குப் பிடிக்குமா?

4. LED ஹெட்லைட்... டிசைனே வித்தியாசமாக இருக்கிறது எக்ஸ்ட்ரீமில்.

சுஸூகியில் ஏற்கெனவே ஃப்யூல் இன்ஜெக்‌ஷன் இருப்பதால், இங்கே விலை உயர்வு கட்டுபடியாகக்கூடிய அளவில்தான் இருக்கும். கொடுக்கும் காசுக்கான மதிப்பு மற்றும் டீலர் நெட்வொர்க் விஷயத்தில் அசத்தும் எக்ஸ்ட்ரீம் 200Sதான், இந்த ஒப்பீட்டின் வெற்றியாளர்.