ரைடிங் ஜாக்கெட் எவ்வளவு அவசியம்?

த லைக் கவசத்தின் அவசியம் தெரிந்திருக்கும் அளவுக்கு நம்மில் பலருக்கும் ரைடிங் ஜாக்கின் முக்கியத்துவம் தெரிவதில்லை. தலை மட்டும் பாதுகாப்பாக இருந்தால் போதுமா? நமது உடம்பிலும் கொஞ்சம் அக்கறை வேணும் பாஸ். அதற்காகத்தான் இருக்கு ரைடிங் ஜாக். இது நம் உடலைக் காக்கும் கவசம். ஜெர்க்கின் தானே என்று நினைத்தால், தப்பும் இல்லை; சரியும் இல்லை. . DOT ஹெல்மெட் அணிந்து ஊட்டி, கொடைக்கானலுக்கு லாங் டிரைவ் அடிக்கும் இளசுகள்கூட குளிருக்கு ஜெர்க்கின் மட்டுமே அணிகிறார்கள். ஜெர்க்கினுக்கும் ரைடிங் ஜாக்குக்கும் நிறைய வித்தியாசங்கள் உண்டு. ஜாக், என்னென்ன விதங்களில் எவ்வளவு கிடைக்கிறது எனப் பார்ப்பதற்கு முன்னர், அது ஏன் முக்கியம் என்பதைத் தெரிந்து கொள்வோம்.

உடம்பில் தலைக்கு அடுத்து மிகவும் முக்கியமானது ஸ்பைனல் கார்டு. உடற்கூறியலில், மற்ற பாகங்களைக் காட்டிலும் முதுகெலும்பின் தனித்துவம் என்னவென்றால், இதன் ஒவ்வொரு பகுதியும் தனித் தனி எலும்புகளால் ஆனது.

முதுகெலும்பின் மேல் பகுதியான கழுத்தில் உள்ள ஏழு முதுகெலும்பு ஊடாக மின் நீரோட்டங்கள் மேலேயும் - கீழேயும் பயணிக்கும். இவைதான் உடலை மூளையுடன் இணைத்து, செய்திகளை மற்ற பகுதிகளில் இருந்து மூளைக்குக் கொண்டு சென்று மூளையைச் செயலாற்ற அனுமதிக்கிறது. மூளைக்கு நெருக்கமாக உள்ளதால், இந்தப் பகுதி பாதிக்கப்பட்டால், உடலின் பெரும்பகுதியை அது பாதிக்கும்.

. முதுகெலும்புக் கால்வாயின் முடிவில் இருக்கும் நரம்புகளில் சேதம் ஏற்பட்டால் - ஒத்திசைவு அல்லது பக்கவாதம், கைகள், விரல்கள், கால்கள் அல்லது கால்விரல்களில் உணர்வின்மை, கூச்ச உணர்வு அல்லது உணர்வு இழப்பு, சிறுநீர்ப்பை அல்லது குடல் கட்டுப்பாட்டை இழத்தல் போன்று விளைவுகள் ஒவ்வொன்றும் ஒவ்வொரு ரகமாக இருக்கும். முதுகெலும்பு பலமாக முறியும்போது, காயம் ஏற்பட்ட இடத்திற்குக் கீழே உணர்வு மற்றும் செயல்பாடு நிரந்தரமாகத் தடைப்படுகின்றன.

. முதுகுத்தண்டு வடம் இவ்வளவு சிக்கலாக இருப்பினும், மோட்டோ ஜீபி ரேஸர்கள் அதிவேக விபத்தின்போதும் பல பல்டி அடித்துக் கீழே விழுந்து,அடுத்த கணமே எழுந்து நடந்து செல்வதைப் பார்த்திருப்பீர்கள். காரணம், அவர்களின் ரேஸ் சூட்கள். லட்சங்களில்தான் இதன் விலை ஆரம்பிக்கும். இது நமக்கு ஓவர்டோஸ் என்றாலும், நெடுஞ்சாலைப் பயணங்களுக்கென பயன்படுத்தக்கூடிய ரைடிங் ஜாக்கெட்டுகள் ஐந்தாயிரம் ருபாய் முதலே கிடைக்கும்.

. ஹெல்மட்டுகளைப்போல ரைடிங் ஜாக்கெட்டுகளையும் நம் பயன்பாட்டிற்கு ஏற்ப கம்யூட்டர், ஸ்போர்ட், டூரிங் என மூன்று வகைகளாகப் பிரிக்கலாம்.

. கம்யூட்டர் ஜாக்கெட்ஸ்

கம்யூட்டர் வகை ரைடிங் ஜாக்கெட்டுகள், அன்றாடம் பயன்படுத்தக்கூடிய வகையில் கொசு வலை போன்று மேஷ் அமைப்பில் பின்னப்பட்டிருக்கும். இவ்வகை ஜாக்கெட்டுகள் Scimitar பிராண்டில் 5,000 ரூபாய் முதல் கிடைக்கும்.

. ப்ளஸ்: நம்ம ஊர் கொளுத்தும் வெயிலுக்கு இது ஏற்றது. எடை குறைவு என்பதால், ஸ்கூட்டர் பாக்ஸில் கூட இதைச் சுருட்டி வைத்துவிட முடியும்.

மைனஸ்: முதுகுக்கு மட்டும் மெலிதான பேடிங் கொடுக்கப்பட்டிருப்பதால், அதிவேகங்களில் போதுமான பாதுகாப்பை இதில் எதிர்பார்க்க முடியாது.

. ஸ்போர்ட்ஸ் ஜாக்கெட்ஸ்

இந்த ரைடிங் ஜாக்கெட்ஸ் உடம்போடு ஒட்டியபடி ஃபிட்டாக இருக்கும். R15, RC பார்ட்டிகளுக்கு 8,000 ரூபாய் முதல் Aspida வில் உள்ளது. BMW, டுகாட்டி ஓனர்களுக்கு 60,000 வரை Dianese-ல் கிடைக்கிறது.

ப்ளஸ்: ரேஸிங் சூட்டுக்கு அடுத்து, இந்த வகை ஸ்போர்ட்ஸ் ரைடிங் ஜாக்கெட்தான் பாதுகாப்புக்குப் பெயர் பெற்றது.

மைனஸ்: ஜாக்கெட் முழுவதும் பேடிங் இருப்பதால் எடை அதிகம். எனவே தூக்கிச் செல்வது கொஞ்சம் சிரமமாக இருக்கும்.

. டூரிங் ஜாக்கெட்ஸ்

காடு, மலை, பாலைவனம் என உலகம் சுற்றும் வாலிபர்களுக்கு பெஸ்ட் சாய்ஸ் இந்த டூரிங் ஜாக்கெட்டுகள். பெரும்பாலான டூரிங் ஜாக்கெட்டுகளில் மூன்று லேயேர்கள் இருக்கும். ஜாக்கெட்டுக்கு உள்ளே கழட்டி மாட்டக் கூடிய வகையில் கொடுக்கப்பட்டிருக்கும் தெர்மல் லைனர், குளிர்காலங்களில் கதகதப்பாக வைத்திருக்கும். மழை பெய்யும்போது ஜாக்கெட்டுக்கு வெளியே போட்டுக் கொள்ள ஒரு ரெயின் கவரும் இதனுடன் வரும். ஹிமாலயன், டொமினார் போன்ற பைக்குகளுக்கு BBG - ல் 7,000 முதல் கிடைக்கிறது இது. பெரிய டூரிங் பைக்குகளுக்கு ஏற்ற வகையில் Macna-வில் 14,000 ருபாய் அளவில் தரமான டூரிங் ஜாக்கெட்டுகள் கிடைக்கும்.

ப்ளஸ்: வெயில், மழை, புழுதி என எதையும் தாங்குவதுதான் இதன் ஸ்பெஷல். டூரிங் ஜாக்கெட்டுகளின் வெளிப்புறம் உள்ள ரெஃப்ளெக்டிவ் ப்ரின்ட்டிங், இரவு நேரப் பயணங்களில் உதவியாக இருக்கும்.

மைனஸ்: கிட்டத்தட்ட அனைத்து பிராண்டிலும் கிடைத்தாலும், விலை கொஞ்சம் கையைக் கடிக்கும்.

முதுகெலும்பில் பெரிய அளவிலான முறிவு ஏற்பட்டால், அறுவைச் சிகிச்சைக்குப் பணம் பழுப்பது மட்டும் அல்லாமல், மீதி வாழ்க்கையை உதவிச் சாதனங்கள் கொண்டோ, மற்றவரைச் சார்ந்தோ வாழ நேரிடலாம். அதற்கு சில ஆயிரங்கள் செலவழிப்பதில் தப்பில்லை.

. TSCI பற்றித் தெரிஞ்சுக்கோங்க!

. மு துகெலும்பில் அடிபட்டால் Traumatic Spinal Cord Injury எனப்படும் காயம் ஏற்படக்கூடும். சாலை விபத்துகளில் இதுபோன்று பாதிப்படைந்த 127 நோயாளிகளிடம் 2018-ம் ஆண்டு ஆய்வு மேற்கொள்ளப்பட்டது. `ஈரானிய ஜர்னல் ஆஃப் நியூரோ சர்ஜரி'யில் வெளியான ஆய்வறிக்கையின் முடிவுகள் தெரிவிப்பது என்னவென்றால்:

127 நபர்களில் 93 பேர் எந்தப் பாதுகாப்புச் சாதனத்தையும் பயன்படுத்தவில்லை.

கார்கள் / பிக்-அப்களுடனான விபத்துதான் 76.9% TSCI எனப்படும் இந்தப் பாதிப்புக்குக் காரணமாக இருந்தது.

TCSI பாதிப்பு ஏற்பட்டவர்களில் 72.1% ஓட்டுநர்கள். மீதமுள்ள 27.9% சதவிகித்தினர் பயணிகள்.

84.3% விபத்துகள் நகரங்களிலும், 5.5% நெடுஞ்சாலைகளிலும் நிகழ்ந்தன.

விபத்துகளில் சிக்கி, முதுகெலும்பில் காயம் ஏற்பட்டவர்களில் 78% ஆண்கள், 28% பெண்கள்.

TCSI-யால் பாதிப்படைந்தவர்களில் 91.2% முழுமையாக மீண்டனர். 3.1% மிதமான இயலாமைக்கும், மேலும் 3.1% கடுமையான இயலாமைக்கும் தள்ளப்பட்டனர். நிரந்தர கோமாவில் 0.8% கிடந்தனர். 1.6% பேர் TCSI-யால் இறந்தனர்.

ரைடிங் ஜாக்கெட் எவ்வளவு அவசியம்?

விநாயக் ராம்