கார்ஸ்
பைக்ஸ்
Published:Updated:

உள்ளே ஜிம்… வெளியே டிராகன்! இது மற்ற சீனத் தயாரிப்பு மாதிரி இல்லை!

BYD Atto 3
பிரீமியம் ஸ்டோரி
News
BYD Atto 3

ஃபர்ஸ்ட் லுக்: பிஒய்டி அட்டோ 3 எலெக்ட்ரிக் (BYD Atto 3)

BYD Atto 3
BYD Atto 3

எதிர்பார்க்கப்படும் விலை: சுமார் 30 – 35 லட்சம்

பொதுவாக, சீனத் தயாரிப்புகளைப் பற்றி ஒரு குறைபாடு இருந்து வருகிறது. பில்டு குவாலிட்டி சுமார் ரகம், தரம் ஜெர்மனியத் தயாரிப்புகள் அளவுக்கு இருக்காது என்று. ஆனால், BYD நிறுவனத்தின் புத்தம் புதிய ‘அட்டோ 3’ கார் அப்படி இருக்காது என்று நினைத்தேன். அதன் லாஞ்ச் முடித்துவிட்டு வந்த மறுநாள், செய்திகளில் அடிபட்டது அட்டோ 3. ‘‘சீனத் தயாரிப்பான அட்டோ 3 கார், யூரோ என்கேப்பின் பாதுகாப்பு க்ராஷ் டெஸ்ட்டிங்கில் 5 ஸ்டார் ரேட்டிங் வாங்கியிருக்கிறது!’’

நிஜம்தான்! ‘அட்டோ 3’, BYD–க்கு ஒரு நல்ல ஃப்ளாக்ஷிப் மாடலாக ஆனாலும் ஆச்சரியமில்லை. `Build Your Dreams’ என்பதுதான் BYD–ன் விரிவாக்கம். ஏற்கெனவே BYD–ல் இருந்து E6 எனும் எலெக்ட்ரிக் எம்பிவி ஒன்று வெளிவந்தது. ‘1.60 ரூபாய்க்கு 1 கிமீ’ எனும் தலைப்பில் நம் அட்டைப் படத்தில்கூட வசீகரித்தது BYD E6. ஆனால், அது ஃப்ளீட் மார்க்கெட்டுக்கான கார். இப்போது பேசஞ்ஜர் மார்க்கெட்டில் ஓர் அற்புதமான எஸ்யூவியை (அப்படித்தான் சொல்கிறார்கள்) வெளியிட்டிருக்கிறது, சீனாவைச் சேர்ந்த BYD நிறுவனம்.

‘BYD Atto 3’ எனும் அந்த எஸ்யூவியின் லாஞ்ச்சுக்கு டெல்லி வரை சென்றிருந்தேன். அவசர அவசரமாக வாக் அரவுண்ட் வந்தேன் அட்டோவை.

அதென்ன அட்டோ?

நான்கூட முதலில் ஒரு எலெக்ட்ரிக் ஆட்டோவைத்தான் லாஞ்ச் செய்யப் போகிறது BYD என்று நினைத்திருந்தேன். ஆனால், அது ‘அட்டோ 3’ எனும் எலெக்ட்ரிக் எஸ்யூவி எனும்போது இன்னும் உற்சாகமாக இருந்தது. அதென்ன அட்டோ?

(Atto) அட்டோ பற்றி இயற்பியல் மாணவர்களுக்கு நன்றாகவே தெரிந்திருக்கும். Atto Second, Zepto second, Pico Second என்று இயற்பியல் மாணவர்களைக் கேட்டால் உற்சாகமாகி விடுவார்கள். 1×1018 of a second – இதுதான் அட்டோவின் விளக்கம். அதாவது, ஒரு விநாடியின் quintillionth மதிப்புதான் இது. அதாவது ‘பில்லியன் பில்லியன்’தான் க்வின்ட்டில்லியன். ஓகே! விஷயத்துக்கு வரலாம்.

வேகத்தைக் குறிப்பிடும்விதமாக, அட்டோ செகண்டின் நினைவாக இதற்கு Atto 3 என்று பெயர் வைத்திருக்கிறது BYD. நிஜம்தான்; இது பெர்ஃபாமன்ஸை முன்னிறுத்தியே இதைச் செதுக்கியிருக்கிறார்கள். இது 0–100 கிமீ–யை 7.3 விநாடிகளில் கடக்கும் என்கிறது BYD. ஒரு எலெக்ட்ரிக் காருக்கு இத்தகைய பெர்ஃபாமன்ஸ் வேண்டுமென்றால், பேட்டரியும் மோட்டாரும் கொஞ்சம் வெயிட்டாக இருந்தால்தான் சாத்தியம்.

அதென்ன பிளேடு பேட்டரி?

சில எலெக்ட்ரிக் கார் நிறுவனங்கள், மற்ற பேட்டரி நிறுவனங்களிடம் கையேந்தும். ஆனால், BYD அப்படிச் செய்யவில்லை. சொந்தமாகவே பேட்டரித் தயாரிப்பையும் கவனித்துக் கொள்கிறது BYD.

BYD பற்றி நம் ஊருக்கு வேண்டுமானால் தெரியாமல் இருக்கலாம். ஆனால், உலகப்புகழ் பெற்ற அமெரிக்காவின் டெஸ்லாவுக்குச் சிம்ம சொப்பனம் என்றால், அது BYDதான். ட்ரக், பஸ், பேட்டரித் தயாரிப்பு என்று எலெக்ட்ரிக் மொபிலிட்டியில் BYD, ஆண்டுக்குப் பல மில்லியன் டாலர்களை டர்ன்ஓவர் செய்கிறது என்பது கவனிக்கப்பட வேண்டிய விஷயம்.

அந்த பேட்டரியிலும் விழி விரிய வைக்கிறது BYD. ‘பிளேடு பேட்டரி’ (Blade Battery) என்று சொல்லக்கூடிய, சக்தி வாய்ந்த லித்தியம் அயன் பேட்டரியைச் சொந்தமாகத் தயார் செய்து இதில் பொருத்தி இருக்கிறது. இது நம் ஊர் வெப்பநிலையைச் சமாளிக்கும் அளவுக்கு, தெர்மல் ரன்அவே தீ விபத்துகளிலிருந்து விதிவிலக்காக இருக்கும் என்கிறது BYD. இதற்காக நம் எதிரேயே Nail Penetration என்று சொல்லக் கூடிய ஒரு சோதனையைச் செய்து காட்டினார்கள்.

பேட்டரி பவர் மற்றும் சார்ஜிங்

இந்த பேட்டரி பேக்கின் பவர் 60.48kWh. இதிலுள்ள எலெக்ட்ரிக் மோட்டாரின் பவர், 150kW. அதாவது 204Bhp பவர் கிடைக்கும். இது இந்த செக்மென்ட்டின் ஹூண்டாய் கோனா (176bhp), எம்ஜி ZS (136bhp) போன்ற கார்களைவிட அதிகம். இதன் டார்க் 310Nm. இது கோனாவைவிடக் குறைவுதான். ஆனால், எம்ஜியை விட அதிகம்.

7kW கொண்ட AC ஸ்லோ சார்ஜிங் வசதி இருக்கிறது. கோனா, எம்ஜியைப்போல் நம் வீட்டில் சாதாரண 3 பின் பிளக் பாயின்ட்டில் இதை சார்ஜ் செய்யும் ஆப்ஷன் இல்லை. ஆனால், அதற்குப் பதிலாக AC Fast Charging ஆப்ஷன் உண்டு. இதிலுமே 100% சார்ஜ் ஏறுவதற்கு சுமார் 9 – 10 மணி நேரம் ஆகும். இத்தனை பெரிய காஸ்ட்லி காரில் ஃபாஸ்ட் சார்ஜிங் இல்லாமல் இருக்குமா? 80kW ஃபாஸ்ட் DC சார்ஜர் ஆப்ஷனும் இதில் கொடுத்திருக்கிறார்கள். இது 80% சார்ஜை வெறும் 50 நிமிடங்களில் ஏற்றி விடுகிறது.

அட்டோவின் பேஸ் வேரியன்ட்டில் எக்ஸ்ட்ராவாக ஒரு பேட்டரி பேக்கும் உண்டு. அதன் பவர் குறைவு. 49.92kWh பவர்தான் கொண்டிருக்கும் அது. இதற்கு சார்ஜிங் நேரம் கொஞ்சம் குறைவாக இருக்கும்.

டோர் ஹேண்டில்கள் தரம் அருமை.
டோர் ஹேண்டில்கள் தரம் அருமை.
உள்ளே ஜிம்… வெளியே டிராகன்! இது மற்ற சீனத் தயாரிப்பு மாதிரி இல்லை!
ஜிம் ரிஸ்ட் வெப்பனைப் போல கியர் லீவர்...
ஜிம் ரிஸ்ட் வெப்பனைப் போல கியர் லீவர்...

டிசைன்

BYD அட்டோ, கிட்டத்தட்ட 4.5 மீட்டர் நீளத்தில் ஒரு படகுபோல் செமயாக இருக்கிறது. இதன் நீளம் 4,455 மிமீ. இதன் அகலம் 1,875 மிமீ. உயரம் 1,615 மிமீ. வீல்பேஸ்தான் இதில் ஹைலைட்டே… 2,720 மிமீ. இது சுமார், 1,750 கிலோ எடை கொண்டிருக்கிறது. இதன் கிரவுண்ட் கிளியரன்ஸ் 175 மிமீ.

இதை e Platform 3.0 எனும் கட்டுமானத்தில் ரெடி செய்திருக்கிறது BYD. கட்டுமானம் உறுதியாக இருக்க வேண்டும் என்பதற்காக, உறுதி வாய்ந்த ஹை ஸ்ட்ரென்த் ஸ்டீல் உலோகம் பயன்படுத்தி இருக்கிறார்கள். இதன் ஸ்டீல் சேஸியை மட்டும் பார்வைக்கு வைத்திருந்தார்கள். சும்மா கிண்ணென்றே இருந்தது. யூரோ என்கேப்பில் 5 ஸ்டார் ரேட்டிங் வாங்கியதற்கு ஹேட்ஸ் ஆஃப் BYD. இதன் எடையை சுமார் ஒண்ணே முக்கால் டன்னுக்குள்… இத்தனை கட்டுறுதியாக டிசைன் செய்ததற்குக் கிடைத்த பரிசு.

சீனாவின் ஃபேவரைட்டான டிராகனை இன்ஸ்பயர் செய்தே இதை வடிவமைத் திருக்கிறது BYD. ஆம், டாப் ஆங்கிளில்… லாங் ஷாட்டில் என்று எப்படிப் பார்த்தாலும், டிராகனின் முகத்தைப் போலவே இருக்கிறது இதன் முன் பக்கம். இரண்டு எல்இடி ஹெட்லைட்களும் டிராகனின் கூர்மையான கண்களைப்போலவே தெறிக்கின்றன. இதில் கிரிஸ்டல் கிளியர் ஹெட்லைட்ஸ்… வெளிச்சம் சும்மா பீய்ச்சியடிக்கிறது. வழக்கமாக Blanked Out கிரில்லாக இல்லாமல், ஸ்டைலாக இதன் கிரில்… லோகோ… ஹெட்லைட்ஸ், எல்இடி இண்டிகேட்டர்ஸ், டிஆர்எல் என்று பக்காவாக வடிவமைத்திருக்கிறார்கள்.

பின் பக்கம் அந்த குவார்ட்டர் கிளாஸில், ஒரு மாதிரியான தண்ணீரில் ஏற்படும் Ripple எஃபெக்ட் அருமை. இதுகூட ஏரோ டைனமிக்ஸுக்கு ஏற்றபடி டிசைன் செய்திருப்பதாகச் சொல்கிறது BYD. மேலும், இந்த அட்டோ 3 கார், ஏரோ டைனமிக்ஸ் Drag Value 0.29 CD வேல்யூவில் செதுக்கியிருக்கிறார்கள். பென்ஸைவிடக் குறைவுதான். ஆனால், இந்த செக்மென்ட்டில் இது அருமை!

இதன் ஸ்டைலான 18 இன்ச் வீல்கள், இந்த காருக்குப் பக்கா எஸ்யூவியாக ஜொலிக்க வைக்கிறது. இது கோனா, எம்ஜியைவிட 1 இன்ச் அதிகம். பின் பக்கம் இப்போதெல்லாம் எஸ்யூவிகளுக்கே உரித்த… கார் முழுதும் நீளும் அந்த சிங்கிள் ஸ்ட்ரிப் டெயில் லைட் அசெம்பிளி… இந்த அட்டோவிலும் தொடர்கிறது. ஸ்டைலிஷ் ஆகவே இருக்கிறது. அதற்கு மேலே Build Your Dreams என்று நீளமான பேட்ஜையே வைத்திருப்பது ஸ்டைல். லைட் அசெம்பிளிக்குக் கீழே இடதுபுறம் EV என்றும், வலதுபுறம் Atto 3 என்றும் ஒரு பேட்ஜ். சைலன்ஸர் இல்லாததை வைத்து சில கார்களைக் கண்டுபிடிக்கச் சிரமமாக இருக்கும். இதில் அந்தத் தேவை இல்லை.

இதன் பூட் இடவசதியை மேஜிக் ஸ்பேஸ் என்கிறது BYD. சிங்கிள் டச் கொண்ட இதன் பூட் ட்ரங்க்கைத் திறந்தால்… இதன் இடவசதி 440 லிட்டர் விசாலமாக வரவேற்கிறது. இந்த எஸ்யூவிக்கு இது ஓகேதான். 60:40 ஸ்ப்ளிட் சீட்கள் உண்டு. சீட்களை மடக்கினால்… 1,340 லிட்டர் இடவசதி கிடைக்கிறது.

உட்புறம் மற்றும் வசதிகள்

வெளியே டிராகன் என்றால்… உள்ளே ஒரு ஜிம்முக்குள் நுழைவதுபோல் இருந்தது. ஆம், இந்த இன்டீரியரை ஒரு ஃபிட்னெஸ் சென்டரை இன்ஸ்பயர் செய்தே வடிவமைத்திருப்பது புதுமை. கியர் லீவரிலேயே அது தெரிந்து விடுகிறது. அதன் கியர் லீவரைப் பிடித்தால்… ஜிம்மில் அந்த ரிஸ்ட் வெப்பனைப் பிடிப்பதுபோலவே இருக்கிறது. அட, இதன் ஏசி வென்ட்களைக் கவனித்தேன். அதுவும் டம்ப்பெல்களைப்போலவே உருண்டை வடிவத்தில் ரசனையாகச் செய்திருக் கிறார்கள். இதன் டோர் ஹேண்டிலிலும் ஏதோ ஒரு ஃபிட்னஸ் கருவிபோல்தான் இருக்கிறது. திறந்து மூடவே ஜாலியாக இருக்கிறது. நான் அடிக்கடி திறந்து மூடி… திறந்து மூடி ஃபன் செய்து கொண்டேன்.

ஜிம் அட்டூழியம் இன்னும் முடியவில்லை. டிரைவர் சீட்டுக்குப் பக்கத்தில் உள்ள ஆர்ம்ரெஸ்ட்டைக் கவனித்தால்… அது ஒரு ட்ரெட்மில்லைப்போலவே இருந்தது. பீஜ், கிரே என்று கலந்து கட்டி ஒரு ப்ளெசன்ட்டான தீமில் இருந்தது இன்டீரியர். இதன் ஆம்பியன்ட் லைட்டிங்கும் ஃபிட்னஸ் சென்டர் எஃபெக்ட்தான் போங்கள். அருமை!

இதில் 12.8 இன்ச் அடாப்டிவ் டச் ஸ்க்ரீன் இருந்தது. இதன் ரெஸ்பான்ஸ் அருமையாக இருந்தது. பல ஆக்சுவேட்டர்கள் இருக்கலாம் போல! இதில் இன்னொரு புதுமை என்னவென்றால்… இது ஒரு ரொட்டேட்டிங் டச் ஸ்க்ரீன். ஃப்ளாட் பாட்டமில்… உருண்டை வடிவ ஸ்டீயரிங் வீல் செம ஸ்போர்ட்டி! இது ஒரு மல்ட்டி ஃபங்ஷனல் ஸ்டீயரிங் வீல். இதற்குப் பின்னால்…5 இன்ச் இன்ஸ்ட்ரூமென்ட் கிளஸ்ட்டர் இருந்தது. பொதுவாக, டச் ஸ்க்ரீன்களைத்தானே பாப் அப் வடிவில் வைத்திருப்பார்கள். இதில் இந்த இன்ஸ்ட்ரூமென்ட் கிளஸ்ட்டர், பாப்அப் டிசைனில் இருந்தது இன்னும் புதுமை.

காரை ஆன் செய்தால்… வித்தியாசமாக ஒளிர்கிறது கிளஸ்ட்டர்.

சன்ரூஃப், ஒயர்லெஸ் போன் சார்ஜிங், ஆர்ம்ரெஸ்ட், டிரைவருக்கு 6 வே பவர்டு அட்ஜஸ்ட் சீட்கள், கோ டிரைவருக்கு 4 வே பவர்டு சீட்கள் கொடுத்திருந்தார்கள். பனோரமிக் சன்ரூஃப் என்பதால், கார் நல்ல விசாலமாக இருப்பதுபோல் இருக்கிறது.

இதற்கு இன்னொரு காரணம், இதன் வீல்பேஸ், 2,720 மிமீ என்பது இந்த செக்மென்ட்டில் அதிகம். இது கோனாவைவிட 120 மிமீ–யும், எம்ஜி ZS-யைவிட 135 மிமீ–யும் அதிகம். பின் பக்க இடவசதி ஆஹா ஓஹோ என்றே சொல்லலாம். கால்களை நீட்டி மடக்க நல்ல இடவசதி. ஹெட்ரூமும் பக்கா! பின் பக்கப் பயணிகளுக்கும் ஆர்ம்ரெஸ்ட் இருந்தது. ரியர் ஏசி வென்ட், ரியர் டோர் ஹேண்டில்களிலும் அந்த ஜிம் அட்டகாசம்!

மேலும் 8 ஸ்பீக்கர் சிஸ்டம், சுற்றக்கூடிய டச் ஸ்க்ரீன், 360 டிகிரி கேமரா, NFC கார்டு கீ, எலெக்ட்ரானிக் பார்க்கிங் பிரேக் என ஏகப்பட்ட வசதிகள் உண்டு. பாதுகாப்பைப் பொருத்தவரை 7 காற்றுப்பைகள், டயர் ப்ரஷர் மானிட்டர் சிஸ்டம், ஏபிஎஸ் உடன் இபிடி, ஹில் டிஸென்ட் கன்ட்ரோல், ட்ராக்ஷன் கன்ட்ரோல், ஆட்டோ ஹோல்டு போன்ற பல வசதிகள் உண்டு.

அட, இப்போதெல்லாம் ADAS வந்தால்தான் மரியாதையே! இதிலும் Advanced Driver Assistance System லெவல்–2 வசதி உண்டு. இதை DIPILOT என்கிறார்கள். ஆட்டோமேட்டிக் எமர்ஜென்சி பிரேக்கிங் சிஸ்டம், லேன் டிப்பார்ச்சர் வார்னிங், மல்ட்டி கொலிஷன் வார்னிங், அடாப்டிவ் க்ரூஸ் கன்ட்ரோல், லேன் கீப்பிங் அசிஸ்ட், அடாப்டிவ் ஹைபீம் லைட்ஸ், பிளைண்ட் ஸ்பாட் டிடெக்ஷன், ரியர் க்ராஸ் டிராஃபிக் அலெர்ட் என்று ஏகப்பட்ட பாதுகாப்பு வசதிகள் உண்டு.

இன்டீரியர், ஜிம்மை இன்ஸ்பயர் செய்து டிசைன் செய்திருக்கிறார்கள். 12.8 இன்ச் அடாப்டிவ் ரொட்டேட்டிங் டச் ஸ்க்ரீன் அருமை.
இன்டீரியர், ஜிம்மை இன்ஸ்பயர் செய்து டிசைன் செய்திருக்கிறார்கள். 12.8 இன்ச் அடாப்டிவ் ரொட்டேட்டிங் டச் ஸ்க்ரீன் அருமை.

ரேஞ்ச்

பொதுவாக, சீன நிறுவனங்கள் எக்கனாமிக்கலாகவும் கலக்கும். அதேபோல்தான் இந்த BYD அட்டோவிலும். இதன் ரேஞ்சைக் கவனியுங்கள். இதன் பெரிய பேக்கான 60.48kWh பேட்டரியின் சிங்கிள் சார்ஜ் ரேஞ்ச், சுமார் 521 கிமீ என்று அராய் மூலம் க்ளெய்ம் செய்கிறது. இதன் WLTP (Worldwide harmonised Light duty vehicle Test Procedure) ரேஞ்ச் – சுமார் 420 கிமீ என்கிறார்கள். இதை நாம் ஓட்டிப் பார்க்க முடியவில்லை. அப்படியென்றால், ரியல் டைமில் இது சுமார் 400 கிமீ தந்தால்… சூப்பர். அதேநேரம் விலையிலும் இந்தச் சீன நிறுவனம் கொஞ்சம் மனது வைக்க வேண்டும். காரணம், இது நமது சென்னையில் உள்ள ஒரகடம் தொழிற்சாலையில்தான் SKD முறையில் அசெம்பிள் செய்யப்பட்டு விற்பனை செய்யப்பட இருக்கிறது. இப்போதே இதன் புக்கிங்கைத் தொடங்கிவிட்டது BYD. விலையைக் கருத்தில் கொண்டு மலிவாகவும், ரியல் டைமில் இதன் ரேஞ்சும் கணிசமாகவும் இருந்தால்… எம்ஜி ZS-யும் கோனாவும் கொஞ்சம் ஷாக் ஆவார்கள்!