Published:Updated:

மஹிந்திரா எக்ஸ்யூவி700 ஸ்மார்ட் காரா?

மஹிந்திரா எக்ஸ்யூவி700
பிரீமியம் ஸ்டோரி
மஹிந்திரா எக்ஸ்யூவி700

ஃபர்ஸ்ட் ரைடு: மஹிந்திரா எக்ஸ்யூவி700

மஹிந்திரா எக்ஸ்யூவி700 ஸ்மார்ட் காரா?

ஃபர்ஸ்ட் ரைடு: மஹிந்திரா எக்ஸ்யூவி700

Published:Updated:
மஹிந்திரா எக்ஸ்யூவி700
பிரீமியம் ஸ்டோரி
மஹிந்திரா எக்ஸ்யூவி700

கடந்த வருடத்தில் இருந்தே எக்ஸ்யூவி 500-ஐ மார்க்கெட்டில் அறிமுகப்படுத்துவதற்கான வேலைகளில்தான் மும்முரமாக ஈடுபட்டிருந்தது மஹிந்திரா. ஆனால், யாரும் எதிர்பார்க்காத வகையில் எக்ஸ்யூவி 700-யைக் களமிறக்கியிருக்கிறது. விலை, தரம், பெர்ஃபாமன்ஸ் என அனைத்திலும் கில்லியாக இருக்க வேண்டும் என்று மஹிந்திரா முனைந்திருப்பது தெரிகிறது.

மஹிந்திராவின் இரட்டைச் சிகர லோகோ இந்த எக்ஸ்யூவியில் இருந்து புதுசு.
மஹிந்திராவின் இரட்டைச் சிகர லோகோ இந்த எக்ஸ்யூவியில் இருந்து புதுசு.

ஸ்டைல், வெளித்தோற்றம்:

புத்தம் புது ப்ளாட்ஃபார்மில் தயாரிக்கப்பட்டிருக்கிறது எக்ஸ்யூவி 700. முன்பக்கம் நான்கு பார்களுடன் கூடிய அழகான கிரில், சாலைகளில் இந்த எக்ஸ்யூவியைத் தனித்துக் காட்டும். கிரில்லில் பொருத்தப்பட்டிருக்கும் கடைசி பாரானது வளைந்து முகப்பு விளக்குகளுடன் சேர்ந்ததுபோல் வடிவமைக்கப்பட்டிருப்பது சிறப்பு. இந்த எக்ஸ்யூவியில்தான் தனது புதிய லோகோவையும் அறிமுகப்படுத்துகிறது மஹிந்திரா. இரண்டு சிகரங்களைச் சேர்த்து வைத்ததுபோல் இருக்கும் இந்த லோகோதான் இனி மஹிந்திரா எஸ்யூவிக்களின் முன்பக்கத்தை இனி அலங்கரிக்கும்.

பக்கவாட்டைப் பொறுத்தவரை 'க்ளீனான' டிசைனைக் கொடுத்திருக்கிறது மஹிந்திரா. கதவின் கைப்பிடிகள் புதுமையாக இருந்தாலும் தக்கையாக இருப்பதைப்போன்ற ஒரு உணர்வை கொடுக்கிறது. ஆனால், பயன்படுத்தும்போது, `ஆஹா நல்லா இருக்கே' என்றுதான் தோன்றும். ஹை-எண்ட் மாடல்களில் நாம் அருகில் சென்றாலே கைப்பிடிகள் பாப்-அப் ஆகி வெளியே வருகின்றன.

பின்பக்கம் கொடுக்கப்பட்டிருக்கும் அம்பு வடிவிலான டெய்ல் லைட் ட்ரெண்டியாக இருந்தாலும், இந்தக் காருக்குப் பொருந்தாதது போலவே இருக்கிறது. வீல் ஆர்ச் டிசைன் செய்யப்பட்ட விதம், 18-இன்ச் வீல்களைச் சிறியதாகக் காட்டுகிறது. வெளித்தோற்றத்தைப் பொருத்தவரை புதுமைகளைச் செய்ய நினைத்திருக்கிறது மஹிந்திரா. அதைச் சரிவரச் செய்வதில் ஓரளவு வெற்றியும் பெற்றிருக்கிறது.

மெர்சிடீஸ் பென்ஸ் கார்களில் இருப்பதுபோல டூயல் 10.25 ஸ்க்ரீன், கார் முழுதும் வியாபித்திருக்கிறது.
மெர்சிடீஸ் பென்ஸ் கார்களில் இருப்பதுபோல டூயல் 10.25 ஸ்க்ரீன், கார் முழுதும் வியாபித்திருக்கிறது.

உள்ளலங்காரம்:

உள்ளே செல்ல கார் கதவைத் திறந்தால் டிரைவர் சீட் பின்நோக்கி நகர்ந்து நமக்கு உட்கார வசதி செய்து கொடுக்கிறது. அதே போல கார் ஸ்விட்சை ஆஃப் செய்துவிட்டு உள்ளே இருந்து கார் கதவைத் திறந்தால் டிரைவர் சீட் நம் வசதிக்காகப் பின்நோக்கி நகர்கிறது.

அடுத்து நம்மைக் கவர்வது இன்ஸ்ட்ரூமென்ட் க்ளஸ்ட்டரும் இன்ஃபோடெயின்மென்ட் சிஸ்டமும்தான். அந்த இரண்டும் வெவ்வேறுதான் என்றாலும் ஒரே ஸ்க்ரீன்போலக் காட்டுகிறது இந்த இரண்டையும் இணைக்கும் பேனல்.

டேஷ்போர்டில் பயன்படுத்தப்பட்டிருக்கும் ப்ளாஸ்டிக்கின் தரம் ஓகே. மேலும் அதில் கொடுக்கப்பட்டிருக்கும் ஃபினிஷ் ஒரு ப்ரீமியம் ஃபீலைக் கொடுக்கிறது. இந்த ப்ரீமியம் ஃபீலைக் கதவுகளுக்கும் கொண்டு சென்றிருந்தால் இன்னும் சிறப்பாக் இருந்திருக்கும்.

அதேபோலத்தான் இன்ஃபோடெய்ன் மென்ட் யூனிட்டில் கொடுக்கப்பட்டிருக்கும் ப்யானோ பிளாக் கலர் ஃபினிஷும். எக்ஸ்யூவி 500-ல் இருக்கும் HVAC கன்ட்ரோல்களை அப்படியே எக்ஸ்யூவி 700-க்கும் எடுத்து வந்திருக்கிறது மஹிந்திரா. நடுவில் கொடுக்கப்பட்டிருக்கும் ரோட்டரி கன்ட்ரோல்கள் பயன்படுத்துவதற்கு எளிதாக இருக்கின்றன. எல்லா வேலைகளுக்கும் டிஜிட்டல் ஸ்கிரீனையே பயன்படுத்த வேண்டிய அவசியம் இல்லை. இரண்டு மொபைல் போன்கள் வைக்கும் அளவு இடவசதியை முன்பக்கம் அளித்திருக்கிறது மஹிந்திரா. ஒன்று இடவசதியாக மட்டும் இருக்கிறது, மற்றொன்று வயர்லெஸ் சார்ஜிங் பேடுடன் இருக்கிறது.

உயரமான பயணிகளுக்குக்கூட 2-வது வரிசை சூப்பர்.
உயரமான பயணிகளுக்குக்கூட 2-வது வரிசை சூப்பர்.

வசதிகள்:

AdrenoX இன்ஃபோமேட்டிக் சிஸ்டத்தை இந்த எக்ஸ்யூவியில்தான் அறிமுகம் செய்கிறது மஹிந்திரா. விலை உயர்ந்த செக்மென்ட்களில் பயன்படுத்தப்படும் அட்வான்ஸ்டு இன்ஃபோடெய்ன்மென்ட் சிஸ்டம் இது. சோனியின் 3டி ஆடியோ சிஸ்டத்தை இந்த எக்ஸ்யூவியில் அறிமுகப்படுத்தியிருக்கிறது மஹிந்திரா. கார் முழுவதும் அனைத்துப் பக்கங்களிலும் சேர்த்து 12 ஸ்பீக்கர்கள் தெறி காட்டுகின்றன. அதோடு அலெக்ஸா வாய்ஸ் அசிஸ்டன்ட் வசதியும் இருக்கிறது. அலெக்ஸா வசதியுடன் வெளியாகும் முதல் கார் எக்ஸ்யூவி 700.

வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளே கனெக்டிவிட்டி, வயர்லெஸ் சார்ஜர், பனோரமிக் சன்ரூஃப், ஆட்டோ பூஸ்டர் முகப்புவிளக்குகள், டூயல் ஸோன் ஆட்டோமேட்டிக் க்ளைமேட் கண்ட்ரோல், ஏர் ப்யூரிஃபயர் மற்றும் எலெக்ட்ரானிக் பார்க்கிங் ப்ரேக் என பல வசதிகளைக் கொட்டியிருக்கிறது மஹிந்திரா.

பின்னால் அமர்பவர்களுக்குத் தனி ஏசி வென்ட்.
பின்னால் அமர்பவர்களுக்குத் தனி ஏசி வென்ட்.

இடவசதி மற்றும் சொகுசுத்தன்மை:

எக்ஸ்யூவி 700, 5 சீட்டர் மற்றும் 7 சீட்டர் என இரண்டு வகைகளில் வெளியாகியிருக்கிறது. முன்பக்க சீட்களில் எவ்வளவு நேரம் பயணித்தாலும் அலுப்பே தெரியாத வகையில் நன்றாக இருக்கிறது. நடுவில் இருக்கும் சீட்களில் கால்களை வைப்பதற்கான இடவசதி ஹெக்டர் மற்றும் சஃபாரி ஆகியவற்றில் இருக்கும் அளவுக்குத் தாராளமாக இல்லை. உயரமானவர்கள் அமர்ந்தாலும் போதுமான அளவு இடவசதி தான் இருக்கிறது; தாராளமாக இல்லை. எக்ஸ்யூவி 500-ஐ விட 50 மிமீ அதிகமான வீல்பேஸைக் கொண்டிருந்தாலும், கடைசி சீட்களில் நல்ல இடவசதியை மஹிந்திரா அளித்திருக்கிறது என்று கூற முடியாது. பின்னால் அமர்பவர்களுக்குத் வசதியாக தனி ஏசி வென்ட் கொடுக்கப்பட்டுள்ளது. 7 சீட் மாடலில் கடைசி வரிசையில் இரண்டு சீட்கள் இருப்பதால், பூட் ஸ்பேஸ் குறைகிறது. மூன்றாவது வரிசை சீட்களை மடக்கி விட்டுக் கொண்டால் பூட் ஸ்பேஸ் ஓரளவு கிடைக்கிறது. முன்பு ஸ்பேர் வீலை பூட் ஸ்பேஸிலேயே கொடுத்து வந்த மஹிந்திரா, இந்கப் புதிய எக்ஸயூவியில் சேஸியின் கீழ் நகர்த்தியிருக்கிறது. இதனாலும், பூட் ஸ்பேஸ் பிரச்சினை ஓரளவு குறைந்திருக்கிறது. ஆனால், டயர் பழுதாகும்போது சேஸியின் கீழ் இருக்கும் ஸ்பேர் வீலைச் சுலபமாக வெளியே எடுத்துவிட முடியுமா?

மஹிந்திரா எக்ஸ்யூவி700
மஹிந்திரா எக்ஸ்யூவி700

இன்ஜின்:

எக்ஸ்யூவி 700-ன் பெட்ரோல் மற்றும் டீசல் என இரண்டுமே 6 ஸ்பீடு மேனுவல் மற்றும் ஆட்டோமேட்டிக் வேரியன்ட்களில் கிடைக்கின்றன. எக்ஸ்யூவி 700 டீசலின் பேஸ் வேரியன்ட் மட்டும் எக்ஸ்யூவி 500-ன் 155 bhp பவரை வெளிப்படுத்தக்கூடிய அதே இன்ஜினைப் பெற்றிருக்கிறது. ஆனால், டீசலின் ஹை-எண்ட் வேரியன்ட்டோ மிகவும் பவர்ஃபுல்லான 2.2 லிட்டர் mHawk இன்ஜினைப் பெற்றிருக்கிறது. 185 bhp பவரை வெளிப்படுத்தும் இந்த இன்ஜின், அல்கஸார் (115 bhp, 1.5 லிட்டர் டீசல்), ஹெக்டர் ப்ளஸ் மற்றும் சபாரியைவிட (170 bhp, 2.0 லிட்டர் டீசல்) பவர்ஃபுல்லாக இருக்கிறது.

சிறப்பான செய்கை என்றால், அது மஹிந்திராவின் பெட்ரோல் இன்ஜின்தான். 200 bhp பவரை வெளிப்படுத்துகிற 2.0 லிட்டர் டர்போ பெட்ரோல் `mStallion' இன்ஜின்தான் கெத்து. சஃபாரியில் பெட்ரோல் வேரியன்ட் இல்லை. அல்கஸார், 159 bhp பவரை வெளிப்படுத்தக் கூடிய 2.0 லிட்டர் பெட்ரோல் இன்ஜினைக் கொண்டிருக்கிறது. ஹெக்டர் ப்ளஸ்ஸோ 143 bhp பவரை மட்டுமே வெளிப்படுத்தக் கூடிய 1.5 லிட்டர் பெட்ரோல் இன்ஜினைக் கொண்டிருக்கிறது. mStallion இன்ஜின், மற்ற போட்டியாளர்களான சஃபாரி, அல்கஸார் மற்றும் ஹெக்டர் ஆகியவற்றைவிட பவர்ஃபுல்லான காராக எக்ஸ்யூவி 700-ஐ மாற்றுகிறது.

மஹிந்திரா எக்ஸ்யூவி700
மஹிந்திரா எக்ஸ்யூவி700

பெர்ஃபாமன்ஸ்:

200 bhp பவர் கொண்ட பெட்ரோல் இன்ஜின்தான் மஹிந்திரா எக்ஸ்யூவி 700-ன் ஹைலைட் என முன்பே கூறியிருந்தோம், பெர்ஃபாமன்ஸ் மூலம் அது ஏன் என நிரூபிக்கிறது mStallion. ஆக்ஸிலரேஷன் கொடுத்த உடனேயே 1,400 ஆர்பிஎம்-லேயே நம்மால் அதன் பவரை உணர முடிகிறது. 0 - 100 கிமீ வேகத்தை 9.32 நொடிகளிலேயே எட்டிப் பிடிக்க முடிகிறது. 2 டன் எடை கொண்ட கார் 10 நொடிகளுக்குள் 100 கிமீ வேகத்தை அடைகிறது என்பது, தரம்.

சென்னையை அடுத்து காஞ்சிபுரத்தில் அமைந்திருக்கும் மஹிந்திராவின் ட்ராக்கில் 190 கிமீ வேகம் வரை எங்களால் இதை ஓட்டிப் பார்க்க முடிந்தது.

ஆனால், மேனுவல் மற்றும் ஆட்டோமேட்டிக் என இரண்டு வேரியன்ட்களிலும் கியர் ஷிஃப்ட்டிங் அவ்வளவு வேகமாக இருக்கிறது என்று கூற முடியாது. நெடுஞ்சாலைகளில் வேகமாகப் பயணிக்கும்போது, கியர் ஷிஃப்ட்டிங் வேகம் போதவில்லையோ என்று தோன்றலாம். மற்றபடி, தினசரிப் பயன்பாட்டுக்கும் சிட்டிக்குள் ஓட்டுவதற்கும் சரியாகவே இருக்கும். காருக்குள் அமர்ந்து பயணிக்கும்போது அதிர்வுகள் தெரியவே இல்லை. ரீஃபைன்மென்ட் ஒரு வேரியன்டில் மட்டுமல்லாமல், எல்லா வேரியன்ட்டிலும் சிறப்பாகவே இருக்கிறது. ஸ்மூத்தான ஒரு டிரைவை விரும்புபவர் என்றால், இந்த விலைக்கு எக்ஸ்யூவி 700-ஐ விட சிறப்பான கார் இருக்க முடியாது.

மைலேஜ் தொடர்பான விபரங்களை மஹிந்திரா இன்னும் பகிர்ந்து கொள்ள வில்லை. ஆனால் இதன் வகையிலேயே அதிக மைலேஜ் கொடுக்கக்கூடிய காராக எக்ஸ்யூவி 700 இருக்கும் என்று மட்டும் கூறியிருக்கிறது.

மஹிந்திரா எக்ஸ்யூவி700
மஹிந்திரா எக்ஸ்யூவி700

ரைடு மற்றும் ஹேண்ட்லிங்:

எக்ஸ்யூவி 500-ல் இருந்ததைவிட எக்ஸ்யூவி 700-ல் டைனமிக்ஸ் நன்றாகவே மேம்பட்டிருக்கிறது. ஹேண்ட்லிங்கிலும் இந்த மாற்றத்தை நம்மால் உணர முடிகிறது. இதற்கு முதன்மையான காரணமாக சஸ்பென்ஷன் சிஸ்டத்தைக் கூறலாம். ஜீப் காம்பஸைப்போல எக்ஸ்யூவி 700-ன் முன்பக்கமும் பின்பக்கமும் Frequency Selective Dampers-ஐ உபயோகப்படுத்தியிருக் கிறார்கள். அதனால் கார்னரிங் சிறப்பாக இருக்கிறது. ரோடு கிரிப்பும் சிறப்பு. அதிவேகமாகச் செல்லும்போது கார் ஸ்டேபிளாகவே இருக்கிறது.

பாதுகாப்பு அம்சங்கள்:

எக்ஸ்யூவி 700-ஐப் பற்றிப் பேசும்போது, அதன் பாதுகாப்பு அம்சங்களைப் பற்றிப் பேசாமல் இருக்க முடியாது. எக்ஸ்யூவி 700-ன் க்ராஷ் ரேட்டிங் இன்னும் வெளியாகவில்லை. எனினும் பாதுகாப்பில் பல அம்சங்களை மஹிந்திரா முன்வைக்கிறது. ஃபார்வர்ட் கொலிஷன் கன்ட்ரோல், அட்டானமஸ் எமர்ஜன்ஸி பிரேக், அடாப்டிவ் க்ரூஸ் கன்ட்ரோல், ஸ்மார்ட் பைலட் அசிஸ்ட், ADAS சிஸ்டம், டிரைவர் ட்ரௌசினஸ் டிடெக்ஷன், ஆட்டோ ஹைபீம் அசிஸ்ட் ஆகியவற்றுடன் ஏழு ஏர்பேக்குகள் என நீள்கிறது எக்ஸ்யூவி 700-ன் பாதுகாப்பு அம்சங்களின் பட்டியல்.

மஹிந்திரா எக்ஸ்யூவி700
மஹிந்திரா எக்ஸ்யூவி700

முதல் தீர்ப்பு:

டாடா, ஹூண்டாய் ஆகிய நிறுவனங்கள் கொஞ்சம் கொஞ்சமாக எஸ்யூவி மார்க்கெட்டையும் சேர்த்து ஆக்கிரமிக்கத் தொடங்கிய நேரத்தில், சரியாக எக்ஸ்யூவி 700-உடன் என்ட்ரி கொடுத்திருக்கிறது மஹிந்திரா. கொஞ்சம் கொஞ்சமாக அப்டேட் ஆவோம் என்று இல்லாமல், தான் கற்றுக்கொண்ட மொத்த வித்தையையும் இதில் காட்டியிருக்கிறது மஹிந்திரா. போட்டியாளர்களுடன் போட்டி போடுவது அதன் நோக்கமாகத் தெரியவில்லை, போட்டியாளர்களைக் காலி செய்வதற்காகவே இந்த எக்ஸ்யூவி 700-ஐக் களமிறக்கியிருக்கிறது மஹிந்திரா. ஆங்காங்கே சின்னச் சின்னக் குறைகள் இருந்தாலும், இன்ஜின், பெர்ஃபாமன்ஸ் மற்றும் பாதுகாப்பு அம்சங்களில் அனைத்தையும் மாற்றி எஸ்யூவி செக்மென்ட்டின் ராஜாவாக எக்ஸ்யூவி முடிசூட்டிக் கொண்டாலும் ஆச்சர்யப்படுவதற்கில்லை.