<p><strong>மா</strong>ருதி சுஸூகியின் நெக்ஸா கார்களில் ஒன்றாக இக்னிஸ் மாடலின் ஃபேஸ்லிஃப்ட் அப்டேட், ஆட்டோ எக்ஸ்போவில் வெளியிடப்பட்டு அதன் முன்பதிவுகளும் தொடங்கப்பட்டன. 4.89 லட்சம் ரூபாய் எக்ஸ்ஷோரூம் விலையில் விற்பனைக்கு வந்துள்ள இக்னிஸ் ஃபேஸ்லிஃப்ட்டில், என்னென்ன அம்சங்கள் புதிதாக இருக்கின்றன?</p>.<p>பழைய இக்னிஸை ஒப்பிடும்போது, டிசைனில் பெரிதாக மாற்றங்கள் இல்லை. பக்கவாட்டிலிருந்து காரைப் பார்த்தால் புதுசா, பழசா என்பதுகூட தெரியாது. ஆனால், முகப்புப் பகுதியில் மாறியிருக்கும் பம்பர், ஸ்கஃப் பிளேட், ரியர் பம்பர் இதெல்லாம் இது ஃபேஸ்லிஃப்ட் மாடல் என்பதைக் கண்டுபிடித்துவிடலாம்.</p>.<p>இக்னிஸ் ஃபேஸ்லிஃப்ட் மாடலில், இரண்டு புதிய நிறங்களையும், மூன்று டூயல்டோன் கலர் ஆப்ஷன்களையும் கொடுத்திருக்கிறார்கள். டூயல்டோன், ஆல்ஃபா, ஜீட்டா வேரியன்ட்களில் மட்டுமே! காரின் அழகை மேலும் கூட்ட, இரண்டு கஸ்டமைசேஷன் ஆப்ஷனும் கொடுக்கிறார்கள்.</p>.<p>இந்தக் காரில் இருப்பது, 1.2 லிட்டர் K12 BS-6 பெட்ரோல் இன்ஜின். இது 83bhp பவர் - 11.3kgm டார்க்கைக் கொடுக்கும். 5 ஸ்பீடு மேனுவல் - 5 ஸ்பீடு AMT கியர்பாக்ஸ் ஆப்ஷனும் உண்டு. பவர் - மைலேஜ் இரண்டுமே இந்த BS-6 இன்ஜினில் மாறவில்லை. இன்டீரியரிலும் பெரிய மாற்றங்கள் இல்லை. ஆனால், மாருதியின் ஸ்மார்ட் ப்ளே இன்ஃபோடெயின்மென்ட் அப்டேட் ஆகிவிட்டது. வாய்ஸ் கமாண்ட் மற்றும் நேவிகேஷன் வசதிகள் புதிதாகச் சேர்க்கப்பட்டுள்ளன. தேவையென்றால், மாருதியின் கனெக்ட்டிவிட்டி சர்வீஸான, S கனெக்ட்டை வாங்கிக்கொள்ளலாம். </p><p>இக்னிஸ் - சிக்மா, டெல்ட்டா, ஜீட்டா, ஆல்ஃபா என நான்கு வேரியன்ட்டில் கிடைக்கிறது. டாப் 3 வேரியன்ட்டில் மட்டும் AMT ஆப்ஷன் உண்டு. BS-4 மாடலை ஒப்பிடுகையில், அனைத்து வேரியன்ட்டும் 6,000 ரூபாய் வரை விலை கூடியுள்ளது.</p>
