<p><strong>ரெ</strong>னோ நிறுவனம், தனது ட்ரைபர் AMT மாடலை ஆட்டோ எக்ஸ்போவில் காட்சிப்படுத்தி இருந்தது. இந்த கார் ஏப்ரல் மாதத்துக்குப் பிறகு விற்பனைக்கு வரும் என்று எதிர்பார்க்கப்படுகிறது. தற்போது இருக்கும் மேனுவல் கியர்பாக்ஸ் மாடலுடன் ஒப்பிடும்போது, இதன் விலை 30,000 ரூபாய் வரை அதிகமாக இருக்கும்.</p>.<p>ட்ரைபரின் ஆட்டோமேட்டிக் வேரியன்ட்டுக்கு `Easy-R’ என்று பெயர் வைத்துள்ளது ரெனோ. காரின் பின்பகுதியில் வரும் இந்த பேட்ஜைத் தவிர, வெளிப்புறத்தில் வேறு எந்த மாற்றமும் இல்லை. சமீபத்தில்தான் ட்ரைபரின் 1.0 லிட்டர் இன்ஜின் BS-6 ஆக மாற்றப்பட்டது. இந்த இன்ஜின் 72bhp பவரையும், 9.6kgm டார்க்கையும் வெளிப்படுத்துகிறது.</p>.<p>காரின் உள்ளே, AMT கியர்பாக்ஸைப் பயன்படுத்த க்விட்டில் வரும் வட்ட டயல் இல்லாமல், டஸ்ட்டர்போல கியர் லீவர் வருகிறது. கியர்பாக்ஸ் மாறுவதால், ட்ரைபரின் மைலேஜ் மாறுவதற்கு வாய்ப்புகள் இருக்கின்றன.</p>.<p>இந்த AMT வெர்ஷனுடன் சேர்த்து ரெனோ 16 இன்ச் வீல் கொண்ட ட்ரைபர் ஒன்றையும் காட்சிக்கு வைத்திருந்தது. டூயல் டோன் நிறங்களும், நீல நிற இன்ட்டீரியரும், கூடவே சில ஆக்ஸசரிகளும்கூட இதில் பொருத்தப்பட்டிருந்தன. ஏற்கெனவே இந்த சிறிய 7 சீட்டருக்கு நல்ல வரவேற்பு. இப்போது, AMT வேறு. நிச்சயம் ரெனோவுக்கு இந்த ட்ரைபர் `Easy-R' நல்ல பெயரைப் பெற்றுத்தரும் என்று நம்புவோம். டர்போ பெட்ரோலுக்கு வி ஆர் வெயிட்டிங்!</p>
