Published:Updated:

முதல்வர் காமராஜர், ஜனாதிபதி வெங்கட்ராமன் பயணித்த மோரிஸ் மைனர்!

மோரிஸ் மைனர்
பிரீமியம் ஸ்டோரி
மோரிஸ் மைனர்

வின்டேஜ் கார்: மோரிஸ் மைனர்

முதல்வர் காமராஜர், ஜனாதிபதி வெங்கட்ராமன் பயணித்த மோரிஸ் மைனர்!

வின்டேஜ் கார்: மோரிஸ் மைனர்

Published:Updated:
மோரிஸ் மைனர்
பிரீமியம் ஸ்டோரி
மோரிஸ் மைனர்

நெல்லை மேலப்பாளையம் பகுதியில் எப்போதாவது செல்லும் `மோரிஸ் மைனர்’ காரின் அழகால், சாலையில் செல்வோர் ஒரு நிமிடம் நின்று அந்தக் காரை வியப்பாகப் பார்த்துச் செல்கிறார்கள். பழைமையின் சுவடுகளைத் தன்னுள்ளே கொண்டிருந்த போதிலும் புதியது போன்ற கம்பீரத்துடன் சாலையில் பயணிக்கிறது மோரிஸ் மைனர்.

சாலை செல்லும்போதே சுண்டி இழுக்கும் வசீகரம் கொண்ட அந்த காரின் உரிமையாளர், ஒரு புரவலர், அரசியல்வாதி, விவசாயி எனப் பன்முகத் தனிமை கொண்டவரான எல்.கே.எஸ்.முகம்மது மீரான் மைதீன். 72 வருடங்களுக்கு முந்தைய அந்தக் காரின் உரிமையாளரான அவர், ஒரு குழந்தையைப் போல தனது காரைப் பராமரிக்கிறார்.

``இங்கிலாந்தில் தயாரிக்கப்பட்ட மோரிஸ் மைனர் காரை, அந்தக் காலத்தில் சென்னையில் உள்ள அடிசன் அண்ட் கம்பெனி இறக்குமதி செய்து விற்பனை செய்தது. இந்த காரை 1950-ல் முன்னாள் சபாநாயகரான செல்லப்பாண்டியன் வாங்கினார். வழக்கறிஞராகவும் காங்கிரஸ் கட்சியின் நிர்வாகியாகவும் இருந்த அவரே நெல்லை நகரப் பகுதிகளில் இந்த காரை ஓட்டிச் செல்வார். கொக்கிரகுளத்தில் இருந்த கோர்ட்டில் இந்த கார் கம்பீரமாக நின்று கொண்டிருப்பதைப் பார்த்திருக்கிறேன்.

தமிழக சட்டமன்றத் தலைவராக 1962-ல் பதவி வகித்த அவர், தமிழகம் முழுவதும் இந்த காரிலேயே சுற்றுப் பயணம் செய்திருக்கிறார். செல்லப்பாண்டியன் நல்ல டிரைவர். அவர் டிரைவிங் செய்யும்போது காரின் முன் இருக்கையில் காமராஜர், முன்னாள் ஜனாதிபதியான ஆர்.வெங்கட்ராமன், முன்னாள் மகாராஷ்டிரா கவர்னராக இருந்த சி.சுப்பிரமணியன் என முக்கியப் பிரமுகர்கள் பலரும் பயணம் செய்திருக்கிறார்கள்.

எல்.கே.எஸ்.முகம்மது மீரான் மைதீன்
எல்.கே.எஸ்.முகம்மது மீரான் மைதீன்

நான் சின்னப் பையனாக இருந்தபோது ஒருமுறை வழக்கறிஞராக இருந்த என்னுடைய மாமா எல்.கே.எம்.அப்துல் ரஹ்மானுடன் மாநிலத் தமிழ்ச்சங்கத்துக்குப் போனேன்.

அதன் தலைவரான செல்லப்பாண்டியன் மோரிஸ் மைனர் காரில் வந்தார். அவருடன் என் மாமா பேசிக் கொண்டிருந்தார். நான் இந்த காரையே மெய்மறந்து பார்த்துக் கொண்டிருந்தேன். அதைக் கவனித்து விட்ட செல்லப்பாண்டியன், ‘என்னப்பா காரையே அப்படிப் பார்க்குற.. கார் மேல அவ்வளவு பிரியமா?’னு கேட்டார்.

காரைத் திறந்து விட்டு உட்காரச் சொன்னார். ஆசையோடு ஏறி அமர்ந்தேன்.அப்போது எனக்குத் தெரியாது, அந்த கார் என்னிடம்தான் வரப் போகிறது என்று!” என்று பேசத் தொடங்கியவர் சற்று நிறுத்திவிட்டுத் தொடர்ந்தார்.

“இந்த காரில் முன்பக்கத்தில் மட்டுமே கதவுகள் இருக்கும். பின் இருக்கைக்குச் செல்ல வேண்டுமானால், முன்பக்க இருக்கையை மடக்கிய பிறகு உள்ளே செல்ல வேண்டும். ஆனால் உள்ளே சென்றதும் சுகமாக அமர்ந்து கொள்ளலாம்.

காரின் பின் பக்கத்தில் லக்கேஜ் வைக்கவும் ஸ்டெஃப்னி டயரை வைக்கவும் விஸ்தாலமாக இடம் உண்டு. எங்கள் தாத்தா காலத்திலேயே வீட்டில் பிஎம்டபிள்யூ மெர்குரி, ஸ்டூடி பேக்கர், செவர்லே கார்கள் இருந்தன. என் அப்பா எல்.கே.எஸ்.ஷேக் மைதீனும் விவசாயி. அவரிடம் அம்பாசிடர் கார் இருந்தது. ஆனால் அந்த கார்களை விடவும் எனக்கு மோரிஸ் மைனர் காரைப் பார்த்ததுமே பிடித்துப் போனது. சின்னப் பையனாக இருந்த என் மனவோட்டத்தைப் புரிந்து கொண்டு, காரில் ஏறச் சொன்னார்.

Morris Minor Vintage Car
Morris Minor Vintage Car
Morris Minor Vintage Car
Morris Minor Vintage Car

நானும் மாமாவும் பின்னால் ஏறிக் கொள்ள, ஐயா செல்லப்பாண்டியன் காரை ஒரு ரவுண்ட் அடிச்சு நிறுத்தினார். அப்போது என் மனதில் ஏற்பட்ட கனவு இப்போது நான் இதில் ஏறி உட்கார்ந்ததும் வந்துவிடும்.

ஐயா செல்லப்பாண்டியன் மறைவுக்குப் பிறகு இந்த கார் அவரோட உறவினரிடம் இருந்தது. நான் சின்ன வயசில் நேசித்த இந்த கார் 2003-ல் என்னிடமே வந்து சேர்ந்தது. நான் இந்த காரில் சென்னை, பாண்டிச்சேரி, நாகப்பட்டினம் என்று பல ஊர்களுக்குப் போயிருக்கிறேன். ஒரு முறை பாடகர் நாகூர் ஹனீபாவைப் பார்த்தபோது, இதைப் பார்த்துவிட்டு, ‘இந்த மாதிரி காரில் ஏறினாலே கற்பனை சிறகு விரிக்கும். எனக்கும் இப்படியொரு காரை வைத்துக்கொள்ள விருப்பம்தான்’ என்று நெகிழ்ச்சியாகப் பேசினார்.

ஒரு முறை முன்னாள் சபாநாயகர் ஆவுடையப்பனைச் சந்திக்கப் போயிருந்த போது, இந்த காரைப் பார்த்து அவரும் ஆச்சரியப்பட்டார். நான் செல்லப்பாண்டியன் ஐயாவிடம் ஜூனியர் வக்கீலாக இருந்தபோது, அவரோடு இதில் பயணம் செய்திருக்கிறேன். அவர் காரை ஓட்டிக்கொண்டே டிக்டேட் செய்யுறதை நான் குறிப்பெடுப்பேன்’’ என்று பழைய நினைவுகளில் மூழ்கியபடியே காரை நேசத்துடன் தடவினார்.

``எனக்கு இந்த காரோடு நெருக்கமான உறவு இருக்கறதாக நினைக்கிறேன், அதனால் தான் இந்த காரை வாங்க நிறைய பேர் வந்தபோதும், நான் கொடுக்க மறுத்துவிட்டேன். வின்டேஜ் கார் ராலியில் இந்த கார் பங்கேற்பது வழக்கம். இந்த காருக்கு நிறைய ரசிகர்கள் உண்டு. தற்போது வெளிவந்துள்ள புதிய வாகனச் சட்டப்படியும் இத்தகைய வின்டேஜ் கார்களுக்கு பாதிப்பு இல்லை என்பது எனக்கு மகிழ்ச்சியாக இருக்கிறது. இவற்றுக்கு தேசிய அளவில் புதிய பதிவு எண் கொடுக்க வேண்டும். இதுபோன்ற வின்டேஜ் கார்களுக்குச் சாலை வரி விதிவிலக்கு கொடுக்க வேண்டும். காரணம், இந்த கார்கள் சாலையில் நீண்ட தூரம் செல்வதல்ல! பழையவற்றைப் பாதுகாக்க அரசு உதவ வேண்டும்” என்று கோரிக்கை விடுத்தார்.