என் வீட்டை அலங்கரிக்கும் தங்க ரதம்!

சுமார் 57 ஆண்டுகளுக்கு முன்பு வெளிவந்த ‘நார்ட்டன் டாமினேட்டர்’ என்ற பழைய பைக்கை, இரண்டரை லட்ச ரூபாய்க்கு வாங்கி அதைப் பொக்கிஷமாய் பாதுகாத்து வருகிறார், விண்டேஜ் பைக் காதலரான சுதாகர் இமானுவேல்.

‘‘எனது அப்பா, அசோக் லேலண்டில் வேலை பார்த்தவர். விண்டேஜ் பைக் பிரியராக... இல்லை, வெறியராகவே இருந்தார் என் அப்பா!

காலை, மாலை, ராத்திரி என எந்த நேரமும் விண்டேஜ் பைக் பின்னால் அலையும் அப்பாவைப் பார்த்து, எரிச்சல் அடைந்த நானே இப்போது அவரைப் போல விண்டேஜ் பைக்குகளுக்கு அடிமையாகிவிட்டேன்.

இரண்டு ஆண்டுகளுக்கு முன் நான் வாங்கிய இந்த நார்ட்டன் பைக்கை, என் வீட்டை அலங்கரிக்கும் ஒரு தங்க ரதம் என்றே சொல்லலாம். என் வீட்டுக்கு வருபவர்கள் என் கார்களைப் பற்றி கேட்பதைவிட ‘இந்த பைக்கை எங்கே வாங்கினீர்கள்? விலை எவ்வளவு’ என்றுதான் கேட்கிறார்கள்’’ - தன் பைக் பற்றி சிலிர்க்கும் சுதாகரின் வீட்டில் டொயோட்டா லாண்ட் குரூஸர் பராடோ, மெர்சிடீஸ் பென்ஸ், பிஎம்டபிள்யூ, ஸ்கோடா என்று வெளிநாட்டு கார்கள் வரிசைக் கட்டி நிற்கின்றன. காரணம், சுதாகர் வெளிநாட்டு கார்களை இந்தியாவில் விற்பனை செய்யும் டீலர்.

‘‘ஜப்பானில் தயாரிக்கப்படும் ஹோண்டா, யமஹா, சூஸுகி பைக்குகளைவிட எனக்கு இங்கிலாந்தில் தயாரிக்கப்படும் பைக்குகள்தான் ரொம்பப் பிடிக்கும். ஏனென்றால், இந்த பைக்குகளின் பாரம்பரியம், சொகுசான உணர்வு, ஸ்டைல், பர்ஃபாமென்ஸ், தரம் என அடுக்கிக்கொண்டே போகலாம். மேலும், இந்த பைக்கில் இருக்கும் நுணுக்கமான, உபயோகமான ஒவ்வொரு விஷயமும் என்னை காந்தமாக ஈர்க்கின்றன’’ என்று பைக் பெருமையை அடுக்கினார்.

‘‘1950-ம் ஆண்டு வெளிவந்த இந்த நார்ட்டன் டாமினேட்டர் மோட்டார் சைக்கிளில் டிரிப்

மீட்டர், பேட்டரி சார்ஜ் இண்டிகேட்டர், ஆயில் இண்டிகேட்டர் என அப்போதே காலத்தைக் கடந்து சிந்தித்து வடிவமைத்திருக்கிறார்கள். இதில் இருக்கும் ஸ்பீடோ மீட்டர் ‘மைல்’ அளவைக் குறிப்பவை. 500 சிசி திறன்கொண்ட இந்த பைக், இரண்டு சிலிண்டர் இன்ஜினைக்கொண்டது. அதனால், இதில் இரண்டு சைலன்சர்கள் இருக்கின்றன. மேலும், முன் பக்க ஃபோர்க்கை அட்ஜஸ்ட் செய்துகொள்ளும் வசதியும் இருக்கிறது. ஆனால், ஒருவர் மட்டுமே இதில் அமர முடியும். இது 6000 ஆர்பிஎம்மில் 29 bhp சக்தி அளிக்கிறது’’ என நார்ட்டன் பைக் டெக்னிக்கல் விவரங்களைக் கூறிய சுதாகரிடம், ‘‘இப்போது கேட்டால் இதை எவ்வளவுக்கு விற்பீர்கள்?’’ என்று கேட்டோம்.

‘‘இப்போது இந்த பைக்கை நான்கு லட்ச ரூபாய்க்கு கேட்கிறார்கள். ஆனால், என் தங்கத் தேரை விற்கும் எண்ணம் இல்லை. எத்தனை ஆண்டுகள் ஆனாலும் இந்த பைக் என்னிடமே இருக்கும்’’ என்கிறார் பெருமிதமாக!