மூலிகை ரெசிப்பிக்கள்

ஓரிதழ் தாமரை ரசம் 
பச்சிலைச் சப்பாத்தி 
மஞ்சள் கரிசலாங்கண்ணி அடை
வல்லாரை ரொட்டி 
சிறுகீரைக் கம்பு அடை 
வெண்தாமரை பானம் 
அருகம்புல் பருப்புக் குழம்பு 
மூலிகை உளுந்தங்களி 
செம்பருத்திக் கஷாயம்
அசுவகந்தி பானம்

டலைக் குளிர்ச்சியாக்கும் அருகம்புல், சத்துக்களுக்குப் பெயர் பெற்ற கரிசலாங்கண்ணிக்கீரை என மூலிகைகளில் இருந்து தயாரிக்கப்பட்ட ரெசிப்பிக்கள் இங்கே இடம் பெற்றிருக்கின்றன. இங்கே குறிப்பிடப்பட்டிருக்கும் மூலிகைப் பொருட்கள் எல்லாம் நாட்டுமருந்துக் கடைகளில் எளிதாகக் கிடைக்ககூடியவையே.

* இந்த ரெசிப்பிக்களை வழங்கியவர் செஃப் மணிவண்ணன்


ஓரிதழ் தாமரை ரசம்

தேவையானவை:
 ஓரிதழ் தாமரை இதழ்கள் - ஒரு கைப்பிடி (அ) ஓரிதழ் தாமரைப் பொடி - 2 டீஸ்பூன்
 தக்காளிப் பழம் - 3
 பருப்பு வேகவைத்த தண்ணீர் - 3 டம்ளர்
 தட்டிய பூண்டுப் பல் - 6
 மிளகு - ஒரு டீஸ்பூன்
 சீரகம் - ஒரு டீஸ்பூன்
 கறிவேப்பிலை - சிறிதளவு
 கடுகு, உளுத்தம் பருப்பு - தலா ஒரு டீஸ்பூன்
 நெய் - 2 டீஸ்பூன்
 உப்பு - தேவையான அளவு

செய்முறை:
வாணலியில் நெய் விட்டு சூடானதும் கடுகு, உளுத்தம் பருப்பு, மிளகு, சீரகம், கறிவேப்பிலை சேர்த்து தாளித்து, பூண்டுப்பல் சேர்த்து வதக்கவும். இதில் தக்காளியை மசித்து சேர்த்து 5 நிமிடம் வதக்கவும். இத்துடன் ஒரு டம்ளர் தண்ணீரை ஊற்றி, ஓரிதழ் தாமரை இதழ்கள் (அ) பொடியைச் சேர்த்து 10 நிமிடம் கொதிக்க விடவும். தேவையான அளவு உப்பு, பருப்புத் தண்ணீர் சேர்த்து ஒரு கொதி வந்ததும் இறக்கி, பரிமாறினால் ஓரிதழ் தாமரை ரசம் தயார்.


பச்சிலைச் சப்பாத்தி

தேவையானவை:
 கோதுமை மாவு - 500 கிராம்
 தயிர் - 60 மில்லி
 பழுத்த வாழைப்பழம் - 1
 நெய் - 2 டீஸ்பூன்
 கல்யாண முருங்கை இலை - 5
 வல்லாரை இலை - 10
 நெல்லிக்காய்த்தூள் - 10 சிட்டிகை
 சுக்குத்தூள் - 5
 புதினா இலை - 10
 கொத்தமல்லித்தழை - சிறிதளவு
 எண்ணெய் - தேவையான அளவு
 உப்பு - தேவையான அளவு

செய்முறை:
கல்யாணமுருங்கை, வல்லாரை, புதினா மற்றும் கொத்தமல்லித்தழையை நன்கு கழுவவும். இதை அம்மியில் (அல்லது மிக்ஸியில்) நன்றாக அரைத்து, சிறிதளவு தண்ணீரில் கரைத்து வடிகட்டிக் கொள்ளவும். கோதுமை மாவுடன் தயிர், வாழைப்பழம், நெய் ஆகியவற்றைச் சேர்த்துப் பிசைந்து, சுக்கு, நெல்லிக்காய்த்தூள், உப்பு, வடிகட்டிய பச்சிலைத் தண்ணீரை சிறிது சிறிதாகச் சேர்த்து சப்பாத்தி மாவு பதத்துக்குப் பிசைந்து ஒரு மணி நேரம் மூடி வைக்கவும். இதை சிறு சிறு உருண்டைகளாக்கி, சப்பாத்தியாகத் தேய்த்தெடுக்கவும். இதை சப்பாத்தியாக சுட்டெடுத்தால் ஆரோக்கியமான பச்சிலைச் சப்பாத்தி தயார்.

குறிப்பு:
இந்த சப்பாத்தி, சளியை அகற்றுவதுடன், வயிற்றுப் புண், நரம்புத் தளர்ச்சி ஆகியவற்றைப் போக்கவல்லது. வைட்டமின் ‘சி’ சத்து நிறைந்தது. இதை சிறுவர்களுக்கு அடிக்கடி செய்து கொடுக்கலாம்.


மஞ்சள் கரிசலாங்கண்ணி அடை

தேவையானவை:
 மஞ்சள் கரிசலாங்கண்ணி - 150 கிராம்
 காளான் - 50 கிராம்
 பெரிய வெங்காயம் - 150 கிராம்
 தக்காளிப் பழம் - 100 கிராம்
 பச்சரிசி மாவு - 100 கிராம்
 கேழ்வரகு மாவு - 100 கிராம்
 கடலை மாவு - 50 கிராம்
 பொட்டுக்கடலை மாவு - 50 கிராம்
 சைனா பூண்டு - 25 கிராம்
 குடமிளகாய் - 1
 அருகம்புல் பொடி - ஒரு டீஸ்பூன்
 நெல்லிக்காய்ப் பொடி - 2 டீஸ்பூன்
 அதிமதுரப் பொடி - ஒரு டீஸ்பூன்
 மஞ்சள் கரிசலாங்கண்ணிப் பொடி - ஒரு டீஸ்பூன்
 தூதுவளைப் பொடி - ஒரு டீஸ்பூன்
 வசம்புத்தூள் - கால் டீஸ்பூன்
 மிளகுத்தூள் - ஒரு டீஸ்பூன்
 சீரகத்தூள் - ஒரு டீஸ்பூன்
 எண்ணெய் - தேவையான அளவு
 உப்பு - தேவையான அளவு

செய்முறை:
வெங்காயத்தை நீளவாக்கில் மெல்லியதாக நறுக்கிக் கொள்ளவும். தக்காளியைக் கழுவி நன்றாகப் பிசைந்து கொள்ளவும் அல்லது மிக்ஸியில் அரைத்து பேஸ்டாக செய்து கொள்ளவும். பூண்டுப்பல்லை நன்றாகத் தட்டிக் கொள்ளவும். மஞ்சள் கரிசலாங்கண்ணி மற்றும் காளான்களை குக்கர் தட்டில் வைத்து அரை அவியலாக வேகவைத்து எடுக்கவும். மெல்லியதாக சீவிக் கொள்ளவும். குடமிளகாயில் உள்ளே இருப்பதை நீக்கிவிட்டு, பொடியாக நறுக்கி வைத்துக்கொள்ளவும். ஒரு பாத்திரத்தில் எல்லா மாவுகளையும் சேர்க்கவும். இத்துடன் அத்தனை பொடி வகைகள், தூள் வகைகள், நசுக்கிய பூண்டு, வேகவைத்த கரிசலாங்கண்ணி, காளான் மற்றும் நறுக்கிய காய்கறிகளைச் சேர்க்கவும். இத்துடன் உப்பு, தண்ணீர் சேர்த்து தளதளவென கரைத்துக் கொள்ளவும்.  அடுப்பில் தோசைக் கல்லை வைத்து எண்ணெய் விட்டு சூடானதும், மாவுகளை அடைகளாக வார்த்து இரண்டு பக்கமும் பொன்னிறமாக வேகவிட்டு எடுத்தால் சுவையான மஞ்சள் கரிசலாங்கண்ணி அடை தயார்.

குறிப்பு:
அடையுடன் தொட்டுக்கொள்ள சைட் டிஷ் எதுவும் தேவையில்லை. வெறும் அடையாகவே சாப்பிடலாம்.


வல்லாரை ரொட்டி

தேவையானவை:
 வல்லாரை - 50 கிராம்
 மைதா மாவு - 200 கிராம்
 சர்க்கரை - 75 கிராம்
 வெண்ணெய் - 75 கிராம்
 ஏலக்காய்த்தூள் - அரை டீஸ்பூன்
 பேக்கிங் பவுடர் - கால் டீஸ்பூன்
 நெல்லிக்காய்த்தூள் - 2 டீஸ்பூன்
 எண்ணெய் - தேவையான அளவு
 உப்பு - தேவையான அளவு

செய்முறை:
வல்லாரைக் கீரையை சுத்தம் செய்து கழுவி மிக்ஸியில் சிறிது தண்ணீர் விட்டு அரைத்துக் கொள்ளவும். சர்க்கரையைப் பொடியாக்கி வெண்ணெயுடன் சேர்த்துக் குழைத்துக் கொள்ளவும். இதில் மைதா மாவு, பேக்கிங் பவுடர், நெல்லிக்காய்த்தூள், ஏலக்காய்த்தூள், உப்பு, வல்லாரை மசியலையும் சேர்த்துப் பிசையவும். இதில் தேவையான அளவு தண்ணீர் விட்டு, சப்பாத்தியாகப் பிசைந்து, தோசைக்கல்லில் இருபுறமும் வேகவைத்து சுட்டெடுக்கவும்.


சிறுகீரைக் கம்பு அடை

தேவையானவை:
 சிறுகீரை - 200 கிராம்
 பச்சரிசி மாவு - 100 கிராம்
 கம்பு மாவு - 300 கிராம்
 முந்திரிப் பருப்பு - 50 கிராம்
 நெய் - 50 கிராம்
 மிளகு - ஒரு டீஸ்பூன்
 சீரகம் - ஒரு டீஸ்பூன்
 பெரிய வெங்காயம் - 2 (பொடியாக நறுக்கவும்)
 தக்காளிப் பழம் - 3
 பூண்டுப்பல் - 8
 கொத்தமல்லித்தழை - ஒரு கைப்பிடி
 எண்ணெய் - தேவையான அளவு
 உப்பு - தேவையான அளவு

செய்முறை:
தக்காளியை மிக்ஸியில் நன்றாக அரைக்கவும். வெங்காயத்தை மெல்லியதாக நறுக்கிக் கொள்ளவும், பூண்டுப்பல்லை நன்றாகத் தட்டி வைத்துக் கொள்ளவும். கொத்தமல்லித்தழையைப் பொடியாக நறுக்கிக்கொள்ளவும். முந்திரி, மிளகு, சீரகம் ஆகியவற்றை ஒன்றாக வறுத்து, பொடியாக்கிக் கொள்ளவும்.
கீரையை நறுக்கி கழுவி, தண்ணீரை வடிக்கவும். அடுப்பில் வாணலியை வைத்து சூடானதும், கீரையைச் சேர்த்து மிதமான தீயில் வதக்கவும். கீரையில் இருக்கும் தண்ணீர் முழுவதுமாக சுண்டியதும், நெய் சேர்த்துக் கிளறி நன்கு வதக்கி இறக்கவும். ஒரு பாத்திரத்தில் பச்சரிசி மாவு மற்றும் கம்பு மாவைக் கொட்டி, இத்துடன் வதக்கிய கீரையைச் சேர்த்து, மெலிதாக நறுக்கிய வெங்காயம், கூழாக்கிய தக்காளி, நன்றாகத் தட்டியப் பூண்டுப்பல், பொடியாக நறுக்கிய கொத்தமல்லித்தழையுடன், வறுத்துப் பொடித்தவற்றை சேர்த்து, தேவையான அளவு உப்பு சேர்த்து தளதளவென கரைத்துக் கொள்ளவும். (மாவை கெட்டியாகக் கரைத்தால் கம்பு மாவு வேகாது). இதை எண்ணெய் விட்டு அடையாக இருபுறமும் வேகவைத்து எடுத்துப் பரிமாறவும்.

குறிப்பு:
வெங்காயம் அல்லது தக்காளித் துவையலுடன் இந்த அடையைச் சாப்பிட்டால் நன்றாக இருக்கும்.


வெண்தாமரை பானம்

தேவையானவை:
 வெண்தாமரை - 2
 பொடித்த பனங்கற்கண்டு - 200 கிராம்
 ஏலக்காய் - 6 (பொடித்துக் கொள்ளவும்)

செய்முறை:
வெண்தாமரையின் இதழ்களைச் சுத்தம் செய்துகொள்ளவும். அடுப்பில் மண்சட்டியை வைத்து சூடானதும், இதில் தாமரைச் இதழ்களைச் சேர்த்து, இவற்றுடன் இரண்டு லிட்டர் தண்ணீர் ஊற்றி (குளோரின் கலக்காத நீராக இருக்க வேண்டும்) மிதமான சூட்டில் காய்ச்சவும். தண்ணீர் ஒரு லிட்டராக சுண்டியதும், சுத்தமான பாத்திரத்தில் வடிகட்டி, பொடித்த பனங்கற்கண்டு, ஏலக்காயைக் கலந்து மறுபடியும் வடிகட்டவும். வடிகட்டிய பானத்தை, பாட்டில் (அ) பாத்திரத்தில் ஊற்றி வைத்துகொண்டு காலை, மாலை என இருவேளைகளிலும் அருநதலாம். வேக வைத்த வெண்தாமரை இதழ்களுடன் மறுபடியும் அரை லிட்டர் தண்ணீர் சேர்த்து, சற்று சுண்ட வைத்து வடித்துச் சேர்த்துக் கொள்ளலாம்.

குறிப்பு:
மூளையில் உள்ள செல்களுக்கு நல்ல வலுவை அளித்து, நரம்பு மண்டலத்துக்கு உரமூட்டக்கூடிய அபூர்வ ஆற்றலும், இதயத்துக்கு பலமளிக்கும் ஒப்பற்ற சக்தியும் வெண்தாமரைக்கு உண்டு.


அருகம்புல் பருப்புக் குழம்பு

தேவையானவை:
 அருகம்புல் வேர்ப்பொடி - 2 டீஸ்பூன்
 வெந்தயம் - கால் டீஸ்பூன்
 கடுகு, உளுத்தம் பருப்பு - அரை டீஸ்பூன்
 சீரகம் - அரை டீஸ்பூன்
 மிளகாய்த்தூள் - ஒரு டீஸ்பூன்
 மல்லித்தூள் (தனியாத்தூள்) - 2 டீஸ்பூன்
 எலுமிச்சைசாறு - 2 டீஸ்பூன்
 துவரம் பருப்பு - 200 கிராம்
 தக்காளி - 150 கிராம்
 சின்னவெங்காயம் - 200 கிராம்
 தேங்காய்த்துருவல் - கால் மூடி அளவு
 கறிவேப்பிலை, கொத்தமல்லித்தழை - சிறிதளவு
 எண்ணெய் - தேவையான அளவு
 உப்பு - தேவையான அளவு

செய்முறை:
துவரம் பருப்பை வேகவைத்துக் கடைந்துகொள்ளவும். தக்காளி, சின்னவெங்காயத்தைப் பொடியாக நறுக்கிக் கொள்ளவும். தேங்காய்த்துருவலுடன் அருகம்புல் வேர்ப்பொடியைச் சேர்த்து மையாக அரைத்துக் கொள்ளவும். அடுப்பில் வாணலியை வைத்து சூடானதும் எண்ணெய் விட்டு காய்ந்ததும் வெங்காயம், தக்காளி சேர்த்துக் கரைய வதக்கி, சிறிது உப்பு சேர்த்துக் கிளறவும். இத்துடன் சிறிதளவு தண்ணீர் சேர்த்து, மிளகாய்த்தூள், மல்லித்தூள் (தனியாத்தூள்) கலந்து கொதிக்க விடவும். 10 நிமிடம் கழித்து, அரைத்த தேங்காய்விழுது, கடைந்த பருப்பு ஊற்றி, ஒரு கொதி வந்ததும் இறக்கவும். இதில் எலுமிச்சைச்சாறு, சேர்த்துக் கலக்கி, தேவையான அளவு உப்பு சேர்க்கவும்.
அடுப்பில் மற்றொரு வாணலியை வைத்து எண்ணெய் விட்டு காய்ந்ததும் கடுகு, உளுத்தம்பருப்பு, வெந்தயம், சீரகம், கறிவேப்பிலை போட்டுத் தாளித்து குழம்பில் ஊற்றி, கொத்தமல்லித்தழை தூவிப் பரிமாறவும்.

குறிப்பு:
வாதம், பித்தம், சிலேத்துமம் ஆகியவற்றால் உடலில் ஏற்படக்கூடிய முப்பிணிகளையும் போக்கக்கூடியது, அருகம்புல். புல்லை விட வேர் அதிக அளவு சக்தியுள்ளது.


மூலிகை உளுந்தங்களி

தேவையானவை:
 வெள்ளை உளுத்தம் பருப்பு - 300 கிராம்
 வெல்லம் - 250 கிராம்
 நெய் - 200 கிராம்
 சுக்குத்தூள் - ஒரு டீஸ்பூன்
 ஏலக்காய்த்தூள் - ஒரு டீஸ்பூன்
 அதிமதுரப் பொடி - ஒரு டீஸ்பூன்
 நெல்லிக்காய் பொடி - ஒரு டீஸ்பூன்
 வெந்தயக் கீரைப் பொடி - 3 டீஸ்பூன்
 ஆடாதொடைப் பொடி - ஒரு டீஸ்பூன்
 தேங்காய்ப்பால் - ஒரு டம்ளர்.
தாளிக்க:
 கடுகு - அரை டீஸ்பூன்
 வெந்தயம் - 5
 உடைத்து தோல் நீக்கிய உளுந்து -
  ஒரு டீஸ்பூன்
 எண்ணெய் - ஒரு டீஸ்பூன்
 பெருங்காயத்தூள் - சிறிதளவு

செய்முறை:
உளுத்தம் பருப்பைக் களைந்து 3 மணி நேரம் ஊற வைத்து மாவாக அரைத்துக் கொள்ளவும். கனமான அடிப்பகுதி உள்ள ஒரு பாத்திரத்தை அடுப்பில் வைத்து, நெய் விட்டு, தேங்காய்ப்பாலையும், தட்டிய வெல்லத்தையும் போட்டுக் கொதிக்க விடவும். அது கொதித்ததும், தூள் மற்றும் பொடிகளைக் கலந்து, உளுந்துமாவைக் கொட்டி நன்றாகக் கிளறிக் கொண்டிருக்கவும். மாவு வெந்து சுருண்டு வரும் பதத்தில் இறக்கவும். தாளிக்க வேண்டியவற்றைச் சேர்த்துத் தாளிக்கவும். நெய் தடவிய பாத்திரத்தில் கொட்டி, தாளித்ததைச் சேர்த்து கலந்து ஆறியதும் உருண்டை பிடித்தால் களி ரெடி.


செம்பருத்திக் கஷாயம்

தேவையானவை:
 செம்பருத்திப் பூ - 10
 தண்ணீர் - தேவையான அளவு

செய்முறை:
10 செம்பருத்திப் பூக்களில் இருந்து இதழ்களை மட்டும் பிரித்து சுத்தம் செய்யவும். அடுப்பில் மண் சட்டியை வைத்து சூடானதும், செம்பருத்தி இதழ்களைப் போட்டு, இரண்டு டம்ளர் தண்ணீர் விட்டு, மிதமான தீயில் தண்ணீர் பாதியாகச் சுண்டுகிற அளவு காய்ச்சவும். அடுப்பை அணைத்து மூடி போட்டு அரை மணி நேரம் கழித்து, வடிகட்டி காலையிலும் மாலையிலும் சம அளவு எடுத்துக்கொண்டு சாப்பிடலாம்.
குறிப்பு: இதயத்தை வலுப்படுத்தி இதயநோய்கள் ஏற்படாமல், ஆரோக்கியமாக வாழ, செம்பருத்திக் கஷாயம் உதவும்.


அசுவகந்தி பானம்

தேவையானவை: 
 பசும்பால் - 200 மில்லி
 அசுவகந்திப் பொடி - அரை டீஸ்பூன்
 பேரீச்சைக் கூழ் - 3 டீஸ்பூன்
 தேன் - 2 டீஸ்பூன்
 ஜாதிக்காய்த் தூள் - 4 சிட்டிகை

செய்முறை:
அடுப்பில் வாணலியை வைத்து சூடானதும், பால் ஊற்றி அதனுடன் ஜாதிக்காய்த் தூளைக் கலந்து 15 நிமிடம் காய்ச்சவும். பிறகு அசுவகந்திப் பொடியைக் கலந்து
5 நிமிடம் காய்ச்சி, பேரீச்சைக் கூழ், தேன் கலந்து சாப்பிடவும். படத்தில் இருக்கும் தண்ணீர்தான் இந்த பானம். உருண்டைகள் அனைத்தும் பட்டன் மஸ்ரூம். மேலே வெள்ளையாக இருப்பது ஃப்ரெஷ் க்ரிம், இதைப் பயன்படுத்தி அலங்கரிக்கலாம்.

Do you like the story?

Please Appreciate the Author by clapping!

Editor’s Pick