‘மேடம் என்கூட நடிக்கமாட்டாங்க’னு ரஜினி கிண்டல் பண்ணுவார்!

நினைத்தாலே இனிக்கும்கு.ஆனந்தராஜ்

“ஆந்திராவில் பேரும் புகழுமா இருந்தாலும், என்னிக்குமே நான் தமிழ்ப் பொண்ணுதான். அதில் எனக்கு அளவில்லா பெருமையும் சந்தோஷமும்’’ என்று இனிமையான தமிழில் பேசுகிறார் ஜெயசுதா. 1970, 80-களில் தென்னிந்திய சினிமாவில் குறிப்பிடத்தக்க நாயகி. நடிகை, தயாரிப்பாளர், அரசியல்வாதி எனப் பன்முகங்களுடன் மிளிர்பவர். மணிரத்னம் இயக்கிவரும் ‘செக்கச் சிவந்த வானம்’ படத்தின் படப்பிடிப்புக்கு சென்னை வந்திருந்தவரைச் சந்தித்துப் பேசிய இனிமையான தருணத்திலிருந்து...

திரையுலக அறிமுகம்!

``பிறந்தது வளர்ந்தது எல்லாம் சென்னை தான். என் அத்தை விஜயநிர்மலா பிரபல தெலுங்கு நடிகை. என் 12 வயசுல, மாமா தயாரிச்ச ‘பண்டன்டிக புரம்’ படத்தில் என்னை நடிக்க வெச்சாங்க. ஜமுனா, சரோஜாதேவி, தேவிகா, விஜயநிர்மலானு அப்போ பீக்ல இருந்த நாலு சீனியர் நடிகைகளோடு சேர்ந்து அந்தப் படத்துல நடிச்சேன். அடுத்து ‘பெத்த மனம் பித்து’ படத்தின் மூலமாக தமிழ்ல அறிமுகமானேன். அப்போ தமிழ்ல ஏற்கெனவே நடிகை சுஜாதா இருந்ததால, என் இயற்பெயரான சுஜாதாவை, ஜெயசுதானு தயாரிப்பாளர் மாத்தினார். என் 16 வயசுல ‘ஜோதி’ங்கிற தெலுங்குப் படத்தில் கதாநாயகியானேன். ‘அரங்கேற்றம்’, ‘அபூர்வ ராகங்கள்’, ‘சொல்லத்தான் நினைக்கிறேன்’, ‘தீர்க்கசுமங்கலி’ உட்பட 35-க்கும் அதிகமான தமிழ்ப் படங்களில் நடித்திருக்கிறேன்.

விளையாட்டு வீராங்கனையாகியிருப்பேன்!

சின்ன வயசுல படிப்பில் பெரிசா நாட்டமில்லை. விளையாட்டில்தான் அதிக ஆர்வம். அப்புறம் நடிக்க வந்துட்டதால, எட்டாவதுக்குப் பிறகு ஸ்கூல் போக முடியலை. நடிச்சுகிட்டே கரஸ்ல ப்ளஸ் டூ முடிச்சுட்டேன்; காலேஜ் படிக்கலை. சென்னை சேப்பாக்கம் மைதானம் பக்கத்துல தான் எங்க வீடு இருந்தது. அப்போ எங்க வீட்டு மாடியிலேயிருந்து கிரிக்கெட் மேட்சஸ் பார்த்து ரசிப்பேன். ஸ்டேடியத்துக்குள் போயும் பார்ப்பேன். 2004-ம் வருஷம் வரை சென்னையில இருந்தோம். அப்புறமாதான் ஹைதராபாத் ஷிஃப்ட் ஆனோம். இப்போ வரை, இரவு எத்தனை மணி ஆனாலும் தவறாம கிரிக்கெட் உள்ளிட்ட பல விளையாட்டுப் போட்டிகளையும் டி.வி-யில் பார்த்துடுவேன். இதனால், என் மற்ற பிரச்னைகளின் தாக்கத்திலிருந்து என்னை ரிலாக்ஸ் பண்ணிக்க முடியுது. சினிமா ஃபீல்டுக்கு வரலைனா, நிச்சயம் விளையாட்டு வீராங்கனையாகியிருப்பேன்.

Do you like the story?

Please Appreciate the Author by clapping!

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்