Published:Updated:

`இது சரியாக இருந்தால்தான் கடன் கிடைக்கும்!' - கடன் தகவல் அறிக்கை `ரகசியம்' என்ன? #LoanVenumaSir - 8

#LoanVenumaSir
#LoanVenumaSir

கிரெடிட் பீரோ ரிப்போர்ட்டை வைத்துதான் வங்கிகள் உங்களுக்குக் கடன் தரலாமா, கூடாதா என்பதை முடிவு செய்கின்றன. அப்படி இதில் என்ன ரகசியம் இருக்கும் என்று கேட்கிறீர்களா?

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

கடந்த அத்தியாயத்தை முடிக்கும்போது ஒரு கேள்வி கேட்டிருந்தேன். KYC என்பதன் விரிவாக்கம் என்ன என்று. Know Your Customer என்று பல வாசகர்கள் மிகச் சரியான விடையைச் சொல்லி இருந்தார்கள். அவர்களுக்குப் பாராட்டுகள். இனி, இந்த அத்தியாயத்துக்குள் நுழைவோம்.

கிரெடிட் பீரோ ரிப்போர்ட்

எல்லா வகையான கடன்களுக்கும் எப்படி கே.ஒய்.சி ஆவணங்களும், வட்டி விகிதக் கணக்கீடுகளும் கட்டாயமாக இருக்கிறதோ, அதேபோல் தங்களின் கடன் தகவல் அறிக்கை அல்லது `கடன் பணியக அறிக்கை’யும் ஒரு பொதுவான அம்சமாக இருக்கிறது. ஆங்கிலத்தில் இதை கிரெடிட் பீரோ ரிப்போர்ட் (Credit Bureau Report) என்று சொல்வார்கள். உங்களுக்குக் கடன் தரலாமா, கூடாதா என்பதை வங்கிகள் இதை வைத்துதான் முடிவு செய்யும். அப்படி இதில் என்ன ரகசியம் இருக்கும் என்று கேட்கிறீர்களா?

நான்கு அமைப்புகள்

பொதுவாக, பேச்சு வழக்கில் இதை சிபில் ரிப்போர்ட் (CIBIL Report) என்றும் கூறுவார்கள். இதை `சிபில் ரிப்போர்ட்’ என்று கூறுவது சரியல்ல. ஏனென்றால் சிபில் என்பது எல்லா தனிநபர்கள் மற்றும் நிறுவனங்கள் வாங்கிய கடன்களின் மொத்த தகவல்களையும் வைத்திருக்கும் ஓர் அமைப்பு ஆகும். இதுபோன்று இன்னும் மூன்று அமைப்புகள் உள்ளன. அவை, ஈக்விஃபேக்ஸ் (Equifax), கிரீப் ஹைமார்க் (Crif High mark) மற்றும் எக்ஸ்பீரியன் (Experian).

#LoanVenumaSir
#LoanVenumaSir

மாதம்தோறும் தகவல்

ரிசர்வ் வங்கி நெறிமுறைகளின்படி, எல்லா வங்கிகள் மற்றும் வங்கிசாரா நிதி நிறுவனங்களும் தாங்கள் வழங்கும் கடன்கள் மற்றும் ஏற்கெனவே வழங்கியுள்ள கடன்களின் மாதாந்தர நிலவரத்தை மொத்தத் தகவலாகப் பிரதி மாதம் இந்த மேற்கூறிய நான்கு அமைப்புகளுக்கும் தர வேண்டும். இந்த நான்கு அமைப்புகளும் இந்த மொத்தத் தகவல்களையும் அவர்களுடைய தகவல் சேமிப்புக் கிடங்கில் பாதுகாப்பாக வைத்துக் கொள்வார்கள். இந்தத் தகவல்கள் ஒவ்வொரு மாதமும் புதுப்பிக்கப்படும்.

இந்த மொத்தத் தகவல்களை அடிப்படையாகக் கொண்டு ஒவ்வொரு தனிநபர் மற்றும் நிறுவனங்களுக்கும் கடன் தகவல் அறிக்கை கொடுக்கப்படும். இந்தக் கடன் தகவல் அறிக்கையை வங்கிகள் மற்றும் வங்கிசாரா நிதி நிறுவனங்கள், தனிநபர்களுக்கும் நிறுவனங்களுக்கும் கடன் வழங்கும்போது இந்த அமைப்புகளின் வலைப்பக்கங்களில் இருந்து எடுத்துக் கொள்ளலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கட்டணம் கட்டி பெறலாம்

தனிநபர்களும் நிறுவனங்களும் ஒரு குறிப்பிட்ட கட்டணத்தைச் செலுத்தி அவர்களின் தனிப்பட்ட முறையில் இந்தக் கடன் தகவல் அறிக்கையை கேட்டுப் பெறலாம். வங்கி மற்றும் வங்கிசாரா நிதி நிறுவனங்கள் எடுக்கும் கடன் தகவல் அறிக்கையும், தனிநபர்களும் நிறுவனங்களும் எடுக்கும் கடன் தகவல் அறிக்கையும் ஒன்றாகவே இருக்கும்.

ஒரே ஒரு வித்தியாசம், வங்கி மற்றும் வங்கிசாரா நிதி நிறுவனங்கள் எடுக்கும் கடன் தகவல் அறிக்கையில் தனிநபர்கள் மற்றும் நிறுவனங்கள் எடுத்த கடன் பற்றிய தகவல்கள் இடம்பெற்றிருக்கும். ஆனால், கடன் வழங்கிய வங்கி மற்றும் வங்கிசாரா நிதி நிறுவனங்களின் பெயர் இடம்பெற்றிருக்காது. ஆனால், தனிநபர்கள் மற்றும் நிறுவனங்கள் தனிப்பட்ட முறையில் கேட்டு பெரும் கடன் தகவல் அறிக்கையில் அந்த விவரங்களும் இடம்பெற்றிருக்கும். மேலும் கடன் தகவல் அறிக்கையில் கடன் தகவல் அறிக்கை மதிப்பெண்ணும் இடம்பெற்றிருக்கும்.

#LoanVenumaSir
#LoanVenumaSir

மதிப்பெண்ணைப் பொறுத்து கடன்

இந்த மதிப்பெண்ணைப் பொறுத்து உங்களுக்கு வழங்கக்கூடிய கடன் தொகை, வட்டி விகிதம் மற்றும் கடனைத் திரும்பச் செலுத்தும் காலம் போன்றவற்றை வங்கி மற்றும் வங்கிசாரா நிதி நிறுவனங்கள் முடிவு செய்வார்கள். நீங்கள் வாங்கி உள்ள கடன்களை சரியாகத் திருப்பிச் செலுத்தும்பட்சத்தில் உங்களின் கடன் தகவல் அறிக்கையில் தங்களின் கடன்களை பற்றிய எந்த விதமான எதிர்மறைத் தகவல்களும் இடம்பெற்றிருக்காது. மேலும், கடன் தகவல் அறிக்கை மதிப்பெண்ணும் கூடுதலாக இருக்கும். இது தங்களுக்கு வழங்கப்படக்கூடிய கடன் தொகை மற்றும் வட்டி விகிதத்தை நிர்ணயம் செய்வதிலும் முக்கிய பங்கு வகிக்கிறது. தற்போது பல வங்கிகள் கடன் தகவல் அறிக்கை மதிப்பெண்ணை வைத்து வட்டி விகிதத்தை குறைவாகவோ, கூடுதலாகவோ கொடுக்கப்படும் கடனுக்கு நிர்ணயிக்கின்றன.

எப்படிப் பெறுகிறார்கள்?

இந்தக் கடன் தகவல் அறிக்கையை வங்கி மற்றும் வங்கிசாரா நிதி நிறுவனங்கள் நீங்கள் அளிக்கும் கே.ஒய்.சி ஆவணங்களை அடிப்படையாக வைத்தே உருவாக்குகின்றன. அதாவது, உங்களின் பெயர், பிறந்த தேதி, இருப்பிட முகவரி, பான் எண், ஆதார் எண் போன்ற இந்த விவரங்களைப் பயன்படுத்தி, உங்களின் கடன் தகவல் அறிக்கையை அந்தக் கடன் தகவல் அமைப்பிடம் இருந்து ஆன்லைன் மூலமாக கேட்டுப் பெறுவார்கள். ஆகவே, மேற்சொன்ன விவரங்களில் எந்தவித குளறுபடிகளும் இல்லாமல் பார்த்துக்கொள்வது மிக நல்லது.

Rupee
Rupee
Image by Free stock photos from www.rupixen.com

கடனைத் திரும்பச் செலுத்தவில்லை எனில்...

மேலும், நீங்கள் ஏற்கெனவே சில பல கடன்களைப் பெற்றிருந்து, அந்தக் கடன்களை சரியாகத் திருப்பிச் செலுத்தாமல் இருக்கும்பட்சத்தில், இந்த விபரங்கள் கடன் தகவல் அறிக்கையில் இல்லாமல் இருப்பதற்காக, மறைப்பதற்காக எந்தவிதமான தவறான முயற்சிகளிலும் தயவுசெய்து ஈடுபட வேண்டாம். அவை எம்மாதிரியான தவறான முயற்சிகள் என்பதை இங்கே குறிப்பிட விரும்பவில்லை. ஏனெனில் இது பற்றி தெரியாதவர்களும் தெரிந்துகொள்ள வாய்ப்பு கொடுத்தது போல் ஆகிவிடும். ஆகவே, யாரேனும் உங்களைத் தவறாக வழி நடத்தும்பட்சத்தில் அதிலிருந்து விலகி இருப்பது நல்லது.

வங்கிகள் கண்டுபிடித்துவிடும்!

அவ்வாறு தவறான வழிகளில் முயற்சி செய்தாலும் அவற்றைப் பல்வேறான உத்திகளையும் வழிமுறைகளையும் கையாண்டு வங்கிகள் கண்டுபிடித்துவிடும்.

சிபில் ஸ்கோர்
சிபில் ஸ்கோர்

கேள்விக்கென்ன பதில்?

சரி, அத்தியாயத்தின் முடிவில் வழக்கம்போல கேட்கப்படும் கேள்விக்கு வருவோம்.

பின்வரும் கடன்களில் எதற்கு வட்டி குறைவு?

1. கல்விக் கடன்

2. தனிநபர் கடன்

3. வீட்டுக் கடன்

4. கார் கடன்

- வாங்குவோம்.
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு