Election bannerElection banner
Published:Updated:

இந்தியன் ஓவர்சீஸ் உள்பட நான்கு வங்கிகள்... இந்த முறையும் குறைவான மதிப்புக்கே விற்குமா அரசு?

Nirmala Sitharaman
Nirmala Sitharaman ( Photo: AP / Manish Swarup )

இதுபோன்ற பொதுத்துறை வங்கிகள் மக்களின் வரிப்பணத்தில்தான் தோற்றுவிக்கப்பட்டன. அந்த வரிப்பணத்தைக் கொண்டு வாங்கிய சொத்தை அதன் உண்மையான மதிப்பைவிட பல மடங்கு குறைவாக விற்பனை செய்வது நாட்டு மக்களுக்கு எந்த பயனும் தராது.

மத்திய பட்ஜெட்டில் நிதி அமைச்சர் நிர்மலா சீதாராமன் சில பொதுத்துறை வங்கிகள் தனியாருக்கு வழங்கப்பட இருப்பதாகத் தெரிவித்திருந்தார். தற்போது பேங்க் ஆஃப் மகாராஷ்டிரா, தமிழகத்தைச் சேர்ந்த இந்தியன் ஓவர்சீஸ் வங்கி, சென்ட்ரல் பேங்க் ஆஃப் இந்தியா, பேங்க் ஆஃப் இந்தியா ஆகிய வங்கிகள் தனியாருக்கு விற்கப்படுவதாக செய்திகள் வந்துள்ளன. இதுபற்றிய அதிகாரபூர்வ அறிவிப்பு இதுவரை வரவில்லை. ஆனால், இந்த வங்கிகளின் பங்குகள் விலை பங்குச் சந்தையில் தொடர்ந்து உயர்ந்து வருகிறது.

ஹெச்.டி.எஃப்.சி, ஆக்ஸிஸ் போன்ற தனியார் வங்கிகள் கடந்த 20 ஆண்டுகளில் சிறப்பான வருமானத்தை அதன் முதலீட்டாளர்களுக்கு கொடுத்துள்ளன. பல மடங்கு லாபம் இந்தப் பங்குகளில் முதலீடு செய்து இருப்பவர்களுக்குக் கிடைத்துள்ளது. ஆனால், இதற்கு நேர்மாறாகப் பெரும்பான்மையான பொதுத்துறை வங்கிகளின் பங்குகள் பல மடங்கு விலை குறைந்து அதில் முதலீடு செய்துள்ள முதலீட்டாளர்களுக்கு பெரிய நஷ்டத்தைக் கொடுத்துள்ளன.

நிர்மலா சீதாராமன்
நிர்மலா சீதாராமன்
தனியார் மயமாகிறதா இந்தியன் ஓவர்சீஸ் வங்கி? - 4 வங்கிகள் குறித்து அரசின் முடிவு என்ன?

இதன் காரணமாகத்தான் பொதுத்துறை பங்குகள் தனியாருக்கு கொடுக்கப்படுவது நல்ல விஷயமாக பங்குச் சந்தையில் பார்க்கப்படுகிறது. ஆனால், இதன் மறுபக்கம் பொதுத்துறை வங்கிகளின் மோசமான செயல்பாடுகளைத் தோலுரித்துக் காட்டுவதாக இருப்பதுதான் வருத்தப்பட வேண்டிய விஷயம்.

மத்திய அரசுக்கு இவ்வாறு பொதுத்துறை வங்கிகளைத் தனியாருக்குக் கொடுப்பது ஆதாயம் அளிக்கக்கூடியதுதானா என்று பார்த்தால் அதுவும் இல்லை என்ற கருத்தே நிலவுகிறது. இதைப் பற்றித் தெரிந்துகொள்வதற்கு நிறுவனத்தின் மதிப்பு மற்றும் பங்கு விலை ஆகிய இரண்டுக்கும் உள்ள தொடர்புகளை சற்று விரிவாகப் பார்ப்போம்.

ராஜா என்பவருக்கு 2 சொத்துகள் இருக்கின்றன. ஒன்று சென்னைக்கு அருகில் உள்ள காலி மனை. இந்த மனை 10 கோடி ரூபாய் விலை போகும். இந்த மனை காலியாக இருப்பதால் அவருக்கு இதிலிருந்து எந்த வருமானமும் கிடைக்காது.

அவருடைய மற்றொரு சொத்து நகரில் முக்கிய இடத்தில் உள்ள சலூன் ஆகும். இந்த சலூன் வாடகைக் கட்டடத்தில் இயங்கி வருகிறது. ஆனால், இது மக்களின் நன்மதிப்பைப் பெற்றிருக்கிறது. ஒரு மாதத்துக்கு 20 லட்சம் ரூபாய் அளவுக்கு வியாபாரம் ஈட்டும் நகரின் முக்கிய சலூன் அது. மாத லாபம் மட்டும் 5 லட்சம் ரூபாய் வருகிறது.

வங்கி
வங்கி

இந்த இரண்டு சொத்துகளும் தனித்தனியாகப் பங்குச்சந்தையில் பட்டியலிடப்பட்டு இருப்பதாக வைத்துக்கொள்வோம். முதல் உதாரணமான காலிமனை அதிக சொத்து மதிப்பு இருந்தாலும் மாத வருமானம் எதுவும் கொடுக்கக்கூடியதாக இல்லை. இதைப் பங்குச் சந்தையில் யாரும் விரும்ப மாட்டார்கள்.

அதனால் இந்தக் காலி மனை பங்குச் சந்தையில் பட்டியலிடப்பட்டு இருந்தால் அந்தப் பங்கின் விலை மிக குறைவாக இருக்கும். 5 கோடி ரூபாய் மனையின் விலையாக இருந்தாலும் பங்கின் விலை மதிப்பு 2 கோடிக்கு குறைவாகக்கூட இருக்கலாம். இதற்குக் காரணம் சொத்தை விற்று பணம் பங்கு முதலீட்டாளருக்கு கிடைக்காது. நிறுவனத்தின் லாபத்தைப் பொறுத்தே பங்கு விலையில் மாற்றம் இருக்கும்.

மற்றொரு உதாரணமான சலூன் நிறுவுவதற்கு ரூ. 1 கோடி முதலீடு செய்யப்பட்டது என்று வைத்துக்கொள்வோம். இந்த நிறுவனத்தைப் பங்குச் சந்தையில் பட்டியலிட்டிருந்தால் அந்தப் பங்கின் விலை 10 கோடி ரூபாய் அளவுக்குக்கூட இருக்கும். இதற்குக் காரணம் ஒவ்வொரு மாதமும் அதிக வருமானம் கிடைப்பதுதான்.

இவ்வாறு பங்குச் சந்தையில் சில பங்குகளில் உண்மையான மதிப்பு அதிகமாக இருக்கும். பங்கின் விலை குறைவாக இருக்கும். இதற்கு மாறாக சில பங்குகளில் உண்மையான மதிப்பு குறைவாக இருக்கும். பங்கின் விலை அதிகமாக இருக்கும். இதில் பொதுத்துறை வங்கிகள் தொடர்ந்து நஷ்டத்தில் இயங்கி வருவதால் முதல் வகையில் வருகின்றன. ஆனால், இந்தப் பொதுத் துறை வங்கிகளுக்கு அதிக சொத்துகள் இருக்கின்றன. பல வங்கிகள் 50 ஆண்டுகளுக்கு மேல் இயங்கும் கிளைகளை வைத்திருக்கின்றன. அந்த வங்கிகள் சொந்த இடத்தில் இயங்கி வருகின்றன. பல கிளைகள் நகரின் மத்தியில் இருப்பதால் மிக அதிக மதிப்பு கொண்டதாக இருக்க வாய்ப்புள்ளது.

இரண்டாவது வகை பங்குகளுக்கு உதாரணம் வேண்டுமென்றால் தகவல் தொழில்நுட்பத்துறை பங்குகளை எடுத்துக் கொள்ளலாம். இந்த நிறுவனங்களில் சொத்து மதிப்பைவிட பங்கின் விலை எப்போதும் அதிகமாகத்தான் இருக்கும்.

share market
share market

இப்போது ராஜா தமது தேவைக்காக வருமானம் தராத தனது காலி மனையை விற்க விரும்புகிறார் என்று வைத்துக் கொள்வோம். அவர் எந்த விலையில் தனது மனையை விற்பனை செய்வார். உண்மையான சந்தை மதிப்பின் அடிப்படையிலா அல்லது பங்கின் மதிப்பிலா? பங்கின் விலையில் அவர் விற்பனை செய்தால் 5 கோடி ரூபாய் மனையின் விலை சல்லிசாக 2 கோடி ரூபாய்க்கு விற்பனை செய்ய வேண்டும். இதற்கு ராஜா ஒப்புக் கொள்வாரா?

ஆனால், துரதிர்ஷ்டவசமாக அரசு பங்கின் விலை அடிப்படையில்தான் பொதுத்துறை வங்கிகளைத் தனியாருக்கு தாரை வார்த்து வருகிறது.

இதற்கு பஞ்சாப் நேஷனல் வங்கியை உதாரணமாக எடுத்துக் கொள்வோம்.

தகுதி வாய்ந்த நிறுவன முதலீட்டாளர்களுக்கான ஒதுக்கீட்டு முறையில் (Qualified Institutional Placement - QIP) 36.5 ரூபாய் என்ற மிகக் குறைந்த அளவில் பஞ்சாப் நேஷனல் வங்கியின் ஒரு பங்கு விற்பனை செய்யப்பட்டது. ஆனால், உண்மையில் பங்குச் சந்தையில் பஞ்சாப் நேஷனல் வங்கியின் உண்மையான சொத்து மதிப்பு 60 ரூபாய் என்னும் அளவுக்கு தற்போது உள்ளது. இதைப் புத்தக மதிப்பு (book value) என்று அழைப்பார்கள். 60 ரூபாய் சொத்து மதிப்பு கொண்ட பஞ்சாப் நேஷனல் வங்கி 36.5 ரூபாய்க்கு விற்கப்பட்டது.

Bank ATM
Bank ATM

பொதுத்துறை வங்கிகளைத் தனியாருக்கு விற்பனை செய்வது என்பது அரசின் பொறுப்பைத் தட்டிக்கழிக்கக்கூடியதாக இருக்கிறது. இவ்வளவு பெரிய நிறுவனம் நஷ்டத்தில் இயங்கினால் அதைச் சரிசெய்து தன்னிறைவு பெற்ற நிறுவனமாக அரசியல் கலப்பு ஏற்படாமல் முன்னேற்றத்தை ஏற்படுத்த வைப்பது அரசின் கடமை ஆகும். அவ்வாறு செய்ய முடியாவிட்டால் வேறு வழியில்லாமல் தனியாருக்குக் கொடுக்க வேண்டும் என்று முடிவு செய்யும் பட்சத்தில், அதன் உண்மையான மதிப்புக்காகவாவது விற்க வேண்டும்.

இவை இரண்டுமே பஞ்சாப் நேஷனல் வங்கி தமது பங்குகளை கியூ.ஐ.பி முறையில் விற்கும்போது நடைபெறவில்லை. ராஜா அவர்களின் ஐந்து கோடி ரூபாய் சொத்து 2 கோடி ரூபாய்க்கு விற்பனை செய்யப்பட்டுவிட்டது. இதைத்தான் அரசு இப்போது செய்து வருகிறது.

பஞ்சாப் நேஷனல் வங்கி பங்குச்சந்தை ஆணையமான செபிக்கு ஒவ்வொரு காலாண்டிலும் தனது பங்குகளை யார் வைத்திருக்கிறார்கள் என்று தகவலை அளிக்கும். அந்தத் தகவலை சரி பார்த்த பொழுது பஞ்சாப் நேஷனல் வங்கி விற்ற பங்குகளை வெளிநாட்டு முதலீட்டாளர்கள் பலர் வாங்கி இருப்பது தெரிகிறது.

இந்த நிலையில் பொதுத்துறை வங்கிகளைத் தனியாருக்கு வழங்கும் இந்த அறிவிப்பு வெளியாகியுள்ளது. இதற்கு வங்கித் தொழிலாளர் சங்கங்கள் தொடர்ந்து தமது எதிர்ப்பை பதிவு செய்து வருகின்றன. இது உடனடியாக நடக்கக்கூடிய விஷயம் இல்லை. பல நடைமுறை சிக்கல்கள் இதில் உள்ளன என்றாலும் அரசின் முடிவான தனியாருக்கு விற்கப்படுவது என்பதில் மாற்றம் இருப்பதுபோல தெரியவில்லை.

பஞ்சாப் நேஷனல் வங்கி
பஞ்சாப் நேஷனல் வங்கி
`பெட்ரோல், டீசல் ஜி.எஸ்.டி-க்குள் கொண்டுவரப்படுமா?’ - நிர்மலா சீதாராமன் பதில்

அவ்வாறு விற்கப்படும் சொத்து உண்மையான மதிப்புக்கு விற்கப்பட்டால் அது நம் நாட்டுக்கு நல்லது செய்யக்கூடியதாக இருக்கும். அரசு தனியார் வங்கிகளுக்கு எவ்வாறு விலை நிர்ணயம் செய்ய இருக்கிறது என்று இன்னும் உறுதியான தகவல்கள் இல்லை.

இதுபோன்ற பொதுத்துறை வங்கிகள் மக்களின் வரிப்பணத்தில்தான் தோற்றுவிக்கப்பட்டன. அந்த வரிப்பணத்தைக் கொண்டு வாங்கிய சொத்தை அதன் உண்மையான மதிப்பைவிட பல மடங்கு குறைவாக விற்பனை செய்வது நாட்டு மக்களுக்கு எந்த பயனும் தராது. தற்போது இந்தியன் ஓவர்சீஸ் வங்கி உள்பட நான்கு வங்கிகள் அரசின் பரிசீலனையில் இருப்பதாகத் தெரிகிறது. எனவே இந்தமுறை மத்திய அரசு இந்த விஷயத்தை உணர்ந்து நடக்க வேண்டும் என்பதே சாதாரண குடிமகனின் விருப்பமாக உள்ளது.

Election bannerElection banner
அடுத்த கட்டுரைக்கு