Published:Updated:

அசத்தல் ஐ.டி. துறை வேலை வாய்ப்புகள்!

ஒட்டுமொத்த விகடனுக்கும் ஒரே ஷார்ட்கட்

Use App
அசத்தல் ஐ.டி. துறை வேலை வாய்ப்புகள்!
அசத்தல் ஐ.டி. துறை வேலை வாய்ப்புகள்!

நாணயம் எம்ப்ளாய்மென்ட்! - 1ஞா.சக்திவேல்முருகன்

பிரீமியம் ஸ்டோரி
அசத்தல் ஐ.டி. துறை வேலை வாய்ப்புகள்!

ஐடி துறையில் புதிய வேலைவாய்ப்புகள் என்றதும், ‘‘சான்ஸே இல்லை! ஏற்கெனவே பல ஆயிரம் பேரை வேலையிலிருந்து வெளியே அனுப்பும்போது அந்தத் துறையில் புதிதாக என்ன வேலை கிடைக்கும்’’ என்றுதானே நீங்கள் நினைக்கிறீர்கள்.

உங்கள் எண்ணம் தவறு. தற்போது இந்தத் துறையின் பணிகள் ஆட்டோமேஷன் செய்யப் படுவதினாலும், அமெரிக்கா மற்றும் ஐரோப்பிய நாடுகளில் நிலவிவரும் பொருளாதாரப் பிரச்னை போன்றவற்றினாலும்  ஐடி துறை கொஞ்சம் பின்னடைவைச் சந்தித்ததாலும், பல்வேறு புதிய பிரிவுகளில் அதிகளவில் வேலைவாய்ப்பை வழங்கி வருகிறது.

முன்பு, பொறியியல் படித்தவர்களுக்கு மட்டுமே வேலைவாய்ப்பினை வழங்கிய ஐ.டி. நிறுவனங்கள், தற்போது அறிவியல் மற்றும் கலைக் கல்லூரியில் படித்தவர்களுக்கும் வேலைவாய்ப்பினை வழங்கி வருகிறது. தற்போது கல்லூரிகளிலும், பல்கலைக்கழகங்களிலும் கேம்பஸ் இன்டர்வியூ ஆரம்பமாகி இருக்கின்றன. இந்த நிலையில், எந்தப் பிரிவுகளில் வேலைவாய்ப்பு அதிகம் கிடைக்கிறது என்பது குறித்தும், எதிர்காலத்தில் வேலைவாய்ப்பினை வழங்கும் பிரிவுகள் குறித்தும் இந்தத் துறையில் உள்ளவர்களிடம் கேட்டோம். விளக்கமாக எடுத்துச் சொன்னார்கள். முதலில் நாஸ்காம் அமைப்பின் தென் இந்திய மண்டல இயக்குநர் புருஷோத்தமனைச் சந்தித்தோம்.

‘‘ஐடி துறை இந்தியாவில் காலுன்றி 25 வருடங்களாகிவிட்டன. பெருமளவில் சேவை சார்ந்த பணியினை செய்து, பலருக்கும் வேலை வாய்ப்பினை வழங்கி இருக்கிறது. இந்தியா முழுவதும் 35 லட்சம் பேருக்கு வேலை வாய்ப்பினை வழங்கி இருக்கிறது. தமிழ்நாட்டில் நான்கு லட்சம் பேர் ஐடி துறையில் பணியாற்று கிறார்கள்.

தற்போது தகவல் தொழில்நுட்பத் துறையில் ஆட்டோமேஷன் டெக்னாலஜி பயன்பாடு அதிகரித்து வருகிறது. உலக அளவில் காணப்படும் பொருளாதார தேக்கநிலையால் ஐடி துறையின் வளர்ச்சி, சராசரி நிலையில் இருக்கிறது.  தற்போது தமிழ்நாட்டில் ஒவ்வொரு ஆண்டும் 30,000 பேர் நேரடியாகவும் 20,000 பேர் மறைமுகமாகவும் வேலைவாய்ப்பினை பெறும் நிலை உருவாகி வருகிறது. அமெரிக்காவில் அமெரிக்கர்களுக்கு அதிக வேலைவாய்ப்பினை வழங்க வேண்டும் என்ற கோரிக்கையால், அந்நாடு விசா கட்டுப்பாடுகளை அதிகரிக்க வாய்ப்பு இருக்கிறது.

பிரெக்ஸிட் ஐடி துறையில் பாதிப்பு இருக்கவே செய்யும் என்றாலும், சில பிரிவுகள் நல்ல வளர்ச்சி உள்ளவையாகவே இருக்கின்றன. இத்தகைய பிரிவுகளில் கவனம் செலுத்தினால் நல்ல வேலை வாய்ப்பினைப் பெறலாம்” என்றவர், இனி ஐடி துறையில் என்ன மாதிரியான வேலை வாய்ப்புகள் உருவாகும் என்பதையும் சொன்னார்.

‘‘இதுவரை சேவைப் பிரிவில் மட்டுமே கவனம் செலுத்திவந்த ஐடி துறை, இனிவரும் காலங்களில் தொழில்நுட்ப சார்ந்த பணியினைப் பெருமளவில் மேற்கொள்ள வேண்டிய நிலையில் இருக்கிறது. ஆகையால், கிளவுட் கம்ப்யூட்டிங், இன்டர்நெட் ஆஃப் திங்ஸ், டேட்டா சயின்ஸ் மற்றும் அனலிட்டிக்ஸ் குறித்த பிரிவுகள் அதிக முக்கியத்துவம் பெறுகின்றன.

அசத்தல் ஐ.டி. துறை வேலை வாய்ப்புகள்!



இந்தப் பிரிவுகளில் நிறைய வேலைவாய்ப்பு இனிவரும் காலத்தில் ஏற்படும். கோடிங் எழுதினால் பிழைத்துக் கொள்ளலாம் என்கிற நிலை இப்போது மாறி, டெக்னாலஜி யும் தெரிந்திருக்க வேண்டும் என்கிற நிலை வந்திருக்கிறது. இனிவரும் காலங்களில் தொழில்நுட்ப நிறுவனங்களும், ஸ்டார்ட் அப் நிறுவனங்களும் முன்னேற்றம் காணும். இத்தகைய நிறுவனங்களில் புராடெக்ட் மற்றும் டெக்னாலஜி சார்ந்த பிரிவுகளில் கவனம் செலுத்தலாம்.

மேலும், பேக் ஆபீஸ் பணிகள் குறிப்பாக, ஃபைனான்ஸ், இன்ஜினீயரிங், டெலிகாம், பார்மா, ரீடெய்ல் போன்ற பிரிவுகள் வளர்ச்சி பெற்று வருகின்றன. வெளிநாட்டில் உள்ள கம்பெனிகள் இங்கு அதிக அளவில் பேக் ஆபீஸ் பணியினை மேற்கொள்வதால், வணிகவியல், சட்டம், புவியியல் போன்ற படிப்பைப் படித்தவர்களுக்கும் வேலை வாய்ப்பு கிடைக்கும்” என்றார் புருஷோத்தமன்.

ஐடி துறையில் இருக்கும் எதிர்கால வேலை வாய்ப்புகள் பற்றி ஹெச்சிஎல் நிறுவனத்தின் உயர் அதிகாரி ரவிசங்கரிடம் கேட்டோம். “இனிவரும் காலங்களில் இளைஞர்களுக்கு அதிக வேலைவாய்ப்பு கிடைக்கும் துறைகளில் மிக முக்கியமானது ஃபைனான்ஸ் இன்டஸ்டரி, ரீடெய்ல் மற்றும் லாஜிஸ்டிக்ஸ், இன்ஃப்ராஸ்ட்ரக்சர், ஐ.டி. இண்டஸ்டரிகளைக் குறிப்பிடலாம். ஐ.டி. துறையில் சோஷியல் மற்றும் டிஜிட்டல் டெக்னாலஜி, அனாலிட்டிக்ஸ், மொபைல் டெக்னாலஜி என பல புது டெக்னாலஜி பிரிவுகள் வந்திருக்கின்றன இந்த டெக்னாலஜி பிரிவுகளில் தேவை அதிகமாக இருக்கிறது.

வேலைவாய்ப்பும் நல்ல முறையில் கிடைத்து வருகிறது. வாடிக்கையாளர்கள் இந்தப் பிரிவு சார்ந்த வேலைகளில் கவனம் செலுத்துகிறார்கள். இத்தகைய பிரிவுகளில் திறனை வளர்த்துக்கொண்டால், நல்ல சம்பளத்துடன் வேலைவாய்ப்பு கிடைக்கும். தற்போது கல்லூரியில் படிப்பவர்கள் இந்த டெக்னாலஜி குறித்து ஏதேனும் எலெக்டிவ் கோர்ஸ் இருந்தால், அதில் சேர்ந்து கற்றுக்கொள்ளலாம். ஆன்லைனில் கோர்ஸ்கள் நிறைய இருக்கின்றன. இதனை எளிதில் கற்றுக்கொண்டு வேலைவாய்ப்பினை பெறலாம்.

சென்னையில் நாற்பதுக்கும் மேற்பட்ட அனலிட்டிக்ஸ் நிறுவனங்கள் இருக்கின்றன. இங்கு வேலைவாய்ப்பு காத்திருக்கிறது. அனலிட்டிக்ஸ் குறித்து கொஞ்சம் அறிந்திருந்தாலும், வேலை கிடைக்கும் வாய்ப்பு இருக்கிறது. இன்னும் பத்து வருடங்களில் ‘ஆர்ட்டிஃபிஷியல் இன்டெலிஜென்ஸ்’ என்ற பிரிவு பெரிய அளவில் ஐ.டி. துறையில் மாற்றத்தை உண்டு செய்யும். இதன் முன்னோட்டமாக ஒட்டுநர்கள் இல்லாமல் ஓடும் கார், விமானம் இயக்குவது போன்றவை நடந்து வருகின்றன. இவற்றில் கவனம் செலுத்தினால், எதிர்காலத்தில் மிகப் பெரிய வேலைவாய்ப்பினைப் பெறலாம்” என்கிறார் ரவிசங்கர்.

ஐ.டி. வேலைகள் மீது தீராத மோகம் கொண்டவர்கள், நம்பிக்கையோடு கொஞ்சம் முயற்சிக்கலாமே!

வங்கிகளில் 4,122 சிறப்பு அதிகாரி பணி வேலை வாய்ப்பு

பணியின் பெயர் : பல்வேறு பிரிவுகளில் சிறப்பு அதிகாரிகள் (335 ஐ.டி. ஆபீஸர், 2580 அக்ரிகல்சரல் பீல்டு ஆபீஸர், ராஷ்ட்ர பாஷா பிரிவு ஆபீஸர் 65 பேர், 115 சட்ட அதிகாரி, 81 மனித வளம் / பர்சனல் அதிகாரி, 946 மார்க்கெட்டிங் அதிகாரி)கல்வித் தகுதி : ஐ.டி., கம்ப்யூட்டர் சயின்ஸ், கம்ப்யூட்டர் அப்ளிகேஷன், இன்ஃபர்மேஷன் டெக்னாலஜி, எலெக்ட்ரானிக்ஸ், டெலி கம்யூனிகேஷன்ஸ், எலெக்ட்ரானிக்ஸ் கம்யூனிகேஷன், இன்ஸ்ட்ரு மென்டேஷன் ஆகிய பிரிவுகளில் பொறியியல் பட்டம் பெற்றவர்கள், அக்ரிகல்சர் ஆபீஸர், வேளாண்மை, மீன்வளம், கால்நடை அறிவியல், கூட்டுறவு, இந்தி மற்றும் சமஸ் கிருதத்தில் முதுகலை பட்டப்படிப்பு, மனித வளம் மற்றும் மேலாண்மை படித்தவர்கள்.

வயது வரம்பு : 20 முதல் 30 வயதுக்கு உட்பட்டவராக இருக்க வேண்டும்.

விண்ணப்பக் கட்டணம் : பொதுப் பிரிவினருக்கு ரூ.600. தாழ்த்தப்பட்ட மற்றும் பழங்குடி வகுப்புச் சார்ந்தவர்களுக்கும், மாற்றுத் திறனாளிகளுக்கும் ரூ.100 விண்ணப்பிக்க கடைசி நாள்: 2-12-2016

தேர்வு நடைபெறும் நாள்: எழுத்துத் தேர்வு 28.01.2017 மற்றும் 29.01.2017

அசத்தல் ஐ.டி. துறை வேலை வாய்ப்புகள்!

தமிழக மருத்துவ சேவைப் பிரிவில் 1,079 பேருக்கு வேலை வாய்ப்பு!

பணி : உதவி அறுவை சிகிச்சை மருத்துவர் (பொது)

கல்வித் தகுதி : எம்பிபிஎஸ் பட்டப்படிப்புடன், முதுநிலை மருத்துவப் படிப்புகள், மேற்படிப்புகள், சிறப்புப் படிப்புகள் படித்தவர்கள் விண்ணப்பிக்கலாம். இவர்கள் மருத்துவக் கழகத்தில் பதிவு செய்திருக்க வேண்டும்.

வயது வரம்பு: ஒவ்வொரு பிரிவுக்கும் வயது வரம்பு வேறுபடுகிறது. பொதுப் பிரிவினராக இருந்தால், 35 வயது வரை உள்ளவர்கள் விண்ணப்பிக்கலாம். பொதுப் பிரிவில் முன்னாள் ராணுவத்தினர் 48 வயது வரையிலும், இதர பிரிவினர் 57 வயது வரையிலும்  விண்ணப்பிக்கலாம். 

விண்ணப்பக் கட்டணம் : பொது மற்றும் பிற்படுத்தப்பட்ட வகுப்பைச் சார்ந்தவர்களுக்கு ரூ.750. தாழ்த்தப்பட்ட மற்றும் பழங்குடியினர், மாற்றுத் திறனாளிகளுக்கு ரூ.375.

விண்ணப்பிக்க கடைசி நாள் : 30-11-2016.

அசத்தல் ஐ.டி. துறை வேலை வாய்ப்புகள்!

ராணுவ அகாடமியில் 463 பேருக்கு வேலை வாய்ப்பு!

பணி : அதிகாரி

கல்வி தகுதி: ஏதேனும் பட்டப்படிப்பு படித்திருக்க வேண்டும். கடற்படை மற்றும் விமானப்படையில் சேர, இன்ஜினீயரிங் பட்டப்படிப்பு படித்தவர்கள் விண்ணப்பிக்கலாம்.

வயது வரம்பு : 20 வயது முதல் 24 வயதுக்கு உட்பட்டவராக இருக்க வேண்டும்.

விண்ணப்பக் கட்டணம் : பொது மற்றும் பிற்படுத்தப்பட்ட வகுப்பைச் சார்ந்தவர்களுக்கு ரூ.200. தாழ்த்தப்பட்ட மற்றும் பழங்குடி வகுப்பைச் சார்ந்தவர்களுக்கு கட்டணம் கிடையாது.

விண்ணப்பிக்க கடைசி நாள்: 2-12-2016.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு