Published:Updated:

VAO முதல் IAS வரை!

போட்டித் தேர்வுகளில் பொருளாதாரம்! டாக்டர் சங்கர சரவணன்

VAO முதல் IAS வரை!

போட்டித் தேர்வுகளில் பொருளாதாரம்! டாக்டர் சங்கர சரவணன்

Published:Updated:

ரூபாய் 1

ஒரு சுவாரஸ்யமான கேள்வி!

ஐ.ஏ.எஸ். தேர்வில் வரும் கேள்விகள் எல்லாம் கருத்தாக்கமும் கலைச் சொற்களும் நிரம்பியதாக இருக்கிறதே! எல்லாரும் விடை சொல்கிற மாதிரி சுவாரஸ்யமான கேள்வி ஏதும் வராதா என சில வாசகர்கள் கேட்டிருக்கிறார்கள். வாசகர்களின் இந்தக் கோரிக்கையை நிறைவேற்றுகிற மாதிரி ஒரு கேள்வியைத் தருகிறேன்.  

1. இந்தியாவில் காமன்வெல்த் விளையாட்டுப் போட்டி நடந்தது (கூடவே பெரிய ஊழலும் நடந்தது!). அதைக் காண்பதற்காக வெளிநாட்டுப் பயணிகள் பலர் இந்தியாவுக்கு வந்தார்கள். அவர்கள் வருகையால் இந்திய அரசாங்கத்துக்குக் கிடைத்த வருமானம் எந்த வகையைச் சேரும்? இதற்கான ஆப்ஷன்கள்...

a. ஏற்றுமதி (Export)
b. இறக்குமதி (Import)
c. உற்பத்தி (Production)
d. நுகர்வு (Consumption).

இந்தக் கேள்வி 2011-ம் ஆண்டு நடந்த ஐ.ஏ.எஸ் தேர்வில் கேட்கப்பட்டது. இந்தக் கேள்விக்கு சரியான விடை a) ஏற்றுமதி என்பதாகும். வெளிநாட்டுக்காரர்கள் நம் நாட்டுக்கு வந்து தந்துவிட்டுபோன வருமானம் என்பதால், அது இறக்குமதியில் வருமோ என்று சிலர் யோசிக்கலாம். விளையாட்டுப் போட்டிகளை கண்டு ரசிப்பதால் அது நுகர்வாகக் கருதப்படுமோ என்று யோசிக்கவும் வாய்ப்புண்டு. ஆனால், இரண்டுமே சரியல்ல. பொருளாதாரக் கோட்பாடு களின்படி, இது சேவைத் துறை வருமானத்தின் ஒருபகுதியான (A Part of Service Sector Income) ஏற்றுமதி வருமானமாகவே (Export Income)  கொள்ளப்படும்.

VAO முதல் IAS வரை!

ரூபாய்  2

ஐ.நா. பொருளாதார மேம்பாட்டு அறிக்கைகள்!

1990-ம் ஆண்டு தொடங்கி ஐ.நா. மேம்பாட்டுத் திட்டம் (United Nations Development Programme - UNDP) மனித மேம்பாட்டு அறிக்கையை   (Human Development Indicators – HDI)  வெளியிட்டு வருகிறது. பாகிஸ்தானைச் சேர்ந்த பொருளாதார அறிஞர் மஹபூப் உல்ஹக் மற்றும் இந்தியப் பொருளாதார வல்லுநர் அமர்தியா சென்னும் ஐ.நா.வில் மனித மேம்பாட்டுக் குறியீட்டை உருவாக்குவதில் முக்கிய பங்காற்றினர்.

ஒரு நாட்டின் தலா வருமானம், எழுத்தறிவு விகிதம், மக்களின் சராசரி வாழ்நாள் ஆகியவற்றின் அடிப்படை யில் நாடுகளின் தரவரிசையை மனித மேம்பாட்டு அறிக்கை வெளியிட்டு வந்தது. 2010-ம் ஆண்டு முதல் மூன்று முக்கிய புதிய குறியீடுகளையும் அந்த அறிக்கை அறிமுகப்படுத்தியது. பல்பரிமாண வறுமைக் குறியீடு        (Multidimensional Poverty Index – MPI),  சமத்துவமின்மை சரிசெய்யப்பட்ட மனித  மேம்பாட்டு குறியீடு  (Inequality – adjusted Human Development Index – IHDI), பாலின சமமின்மைக் குறியீடு (Gender Inequality Index – GII)  என்பவையே அவையாகும்.

பல்பரிமாண வறுமைக் குறியீடு உடல் நலம், கல்வி, வருமானம் ஆகிய மூன்றிலும் வஞ்சிக்கப்பட்ட, பின்தங்கியுள்ள மக்களின் நிலையை அடிப்படையாகக் கொண்டது. ஓர் ஆச்சர்யமான உண்மை என்னவெனில், 2010-ம் ஆண்டு வெளியிடப்பட்ட பல்பரிமாண வறுமை குறியீட்டின்படி, 8 இந்திய மாநிலங்களும், 26 ஆப்பிரிக்க நாடுகளும் ஒரே குறியீட்டை பெற்றுள்ளன (MPI = 0.32). ஆப்பிரிக்க நாடுகள் அளவுக்கு வறுமையில் பின்தங்கிய இந்திய மாநிலங்கள் சில இருக்கின்றன என்ற கருத்து கசப்பாகவே இருக்கிறது.

VAO முதல் IAS வரை!

பாலின சமமின்மை குறியீடு பெண்களின் மகப்பேறு நலம், பெண்களுக்கு அதிகாரம் அளித்தல், வேலைவாய்ப்பில் பெண்களுக்கான இடம் ஆகியவற்றின் அடிப்படையில் ஒருநாட்டில் நிலவும் பாலின சமத்துவத்தையும் பொருளாதார மேம்பாட்டையும் கணக்கிடுகிறது. இந்தக் குறியீட்டின்படி, 0 என்பது ஆண், பெண் சமத்துவத்தையும், 1 என்பது ஆண் - பெண் சமத்துவமின்மையின் உச்சநிலையையும் குறிக்கும்.

VAO முதல் IAS வரை!

இந்தக் குறியீட்டில் 2010-ம் ஆண்டு அறிக்கை இந்தியாவுக்கு வழங்கியுள்ள மதிப்பு 0.748 ஆகும். நாடாளுமன்ற அளவில் பெண்கள் இடம்பெற்று இருப்பதையே இந்தக் குறியீடு கணக்கில் எடுத்துக்கொள்கிறது. பஞ்சாயத்து அளவில் பெண்களின் பங்களிப்பை இந்தக் குறியீடு கணக்கில் எடுத்துக்கொள்வதில்லை.

சமத்துவமின்மைக்கு சரிசெய்யப் பட்ட மனித மேம்பாட்டு குறியீடு நாட்டின் மேம்பாடு அனைத்து தரப்பு மக்களையும் சமமாகச் சென்றுள்ளதா என்பதை அளவிடுகிறது. கல்வியில் 41 சதவிதமும், மருத்துவ வசதியில் 31 சதவிதமும், இந்தியாவில் சமத்துவமின்மை நிலவுவதாக 2010-ம் ஆண்டுக்கான இந்தக் குறியீடு மூலம் அறிகிறோம்.  

ரூபாய் 3

போட்டித் தேர்வில் கேட்கப்படும் பொது அறிவு பொருளாதாரக் கேள்விகள். சில சமயங்களில் நமக்கு தெரிந்திருக்கவேண்டிய சில எளிமையான விஷயங்கள் குறித்தோ அல்லது தெரிந்த ஒரு விஷயத்தில் பரவலாக அறியப்படாத நுணுக்கமான தகவல்கள் குறித்தோ அமையலாம். அப்படிப்பட்ட இரண்டு கேள்விகள் இதோ.

1. The cheque which is under  circulation for more than three month is
a) Crossed cheque
b) Uncrossed cheque
c) Post dated cheque
d) Stale cheque

மூன்று மாதங்களுக்குமேல் புழக்கத்தில் இருக்கும் காசோலைக்குப் பெயர் யாது?

a) கீறலிடப்பட்ட காசோலை

b) கீறலிடப்படாத காசோலை

c) பின்தேதியிட்ட காசோலை

d) செல்லாத காசோலை

2. Consider the following statements about Income tax.

1. In India Income tax is levied and collected by the central Government; but it's income sharable between Central and State.

2. In India, the authority to levy tax on agricultural income lies with the State Government.
Among these statements

a) 1 alone correct
b) 2 alone correct
c) Both 1 and 2 are correct
d) Both are in correct
 
வருமானவரி குறித்த பின்வரும் கூற்றுகளைக் கவனிக்கவும்.

1. இந்தியாவில் மத்திய அரசு வருமான வரியை விதித்து வசூல் செய்தாலும், அந்த வருமானம் மத்திய, மாநில அரசுகளுக்கு இடையே பகிர்ந்துகொள்ளப்படுகிறது.

2. இந்தியாவில் வேளாண்மை வருவாய் மீது வருமான வரி விதிக்கும் அதிகாரம் மாநில அரசுக்கு உரியது.

மேலே தரப்பட்ட கூற்றுகளில்

a) 1 மட்டும் சரி

b) 2 மட்டும் சரி

c) 1 - 2 இரண்டுமே சரி

d) இரண்டுமே தவறு

இனி. இந்த இரண்டு கேள்விகளுக்கும் சரியான விடையையும், விளக்கத்தையும் பார்க்கலாம்.

1. சரியான விடை d) செல்லாத காசோலை. 2010-ம் ஆண்டு வி.ஏ.ஓ. தேர்வில் கேட்கப்பட்ட கேள்வி இது.

VAO முதல் IAS வரை!

மூன்று மாதத்துக்குமேல் புழக்கத்தில் இருக்கும் காசோலை செல்லத்தக்கது அல்ல. இந்த காசோலையைத்தான் ஆங்கிலத்தில் 'ஸ்டேல் செக்’ என்பார்கள். 'போஸ்ட் டேட்டட் செக்’ என்பது பின்தேதியிட்ட காசோலையாகும். இந்தவகை காசோலை அதில் குறிப்பிடப்பட்ட எதிர்வரும் தேதி யில்தான் செல்லத்தக்கதாக மாறும். 'கீறலிடப்பட்ட காசோலை’ என்பது ஒரு காசோலை யாருக்கு வழங்கப் படுகிறதோ, அவர் மட்டுமே மாற்றத்தக்க வகையில் காசோலையின் வலது முனையில் இரு இணை கோடிட்டு வழங்கப்படுவதாகும். அதிலும், கோடு களுக்கு நடுவே A/c payee only என எழுதி காசோலை பெறுபவர், தன் வங்கிக் கணக்கு மூலம் மட்டுமே மாற்றத்தக்க வகையில் பாதுகாப்பாக வழங்கப்படுகிறது.

2. சரியான விடை C). 1 - 2 இரண்டுமே சரி. இது, ஐ.ஏ.எஸ் முதல்கட்டத் தேர்வு ஒன்றில் கேட்கப்பட்டது.  இந்தியாவில் வருமான வரி விதிக்கும் அதிகாரம் மத்திய அரசிடம் உள்ளது. ஆனால், அந்த வருமானத்தில் மாநில அரசுகளுக்கும் பங்கு தொகை வழங்கப்படுகிறது. அதாவது, வருமான வரி என்பது மத்திய மற்றும் மாநில அரசுகளுக் கிடையே பகிர்ந்துகொள்ளப்படும் வரியாகும். இந்தியாவில் விதிக்கப்படும் வரிகளை மத்திய வரிகள் (Central Taxes), மாநில வரிகள் (State Taxes),  மத்திய - மாநில அரசுகளுக்கிடையே பகிர்ந்துகொள்ளப்படும் வரிகள் (Taxes shared between Central and State) என மூன்றாகப் பிரிக்கலாம்.  

வேளாண்மை தொடர்பான வருமான வரி விதிக்கும் அதிகாரம் மாநில அரசுக்குரியது. பெரும்பாலான இந்திய மாநிலங்களில் வேளாண் வருவாய்க்கு வருமான வரி கிடையாது. உத்தர்கண்ட் மாநிலத்தில் அதிக லாபம் தரும் தோட்டப் பயிர்களிலிருந்து கிடைக்கும் வருவாய்க்கு வருமான வரி உண்டு. இந்தியாவில் வருமான வரி குறித்து ஆராய்ந்த ராஜ் கமிட்டி நில உடைமையாளர்கள் வைத்திருக்கும் நில அளவுக்கேற்ப வேளாண்மை நிலபரப்பு வரி (Agricultural Holding Tax)ஒன்றை விதிக்கலாம் என்று ஆலோசனை வழங்கியது.

இந்த நிலப்பரப்பு வரி வந்தால்தான் பெரிய விவசாயிகளிடமிருந்து சிறு, குறு விவசாயிகளை சரியாக இனம்கண்டு பிரித்து அவர்களுக்குக் கூடுதல் சலுகை வழங்க முடியும் என்று சமூக ஆர்வலர்கள் கூறிவருகின்றனர். வேளாண்மை வருமானத்துக்கு வருமான வரி கிடையாது என்பதால் சிலர் பிற வருமானங்களை வேளாண் வருமானமாக கணக்குக் காட்டி வரி ஏய்ப்பு செய்வதும் கண்டுபிடிக்கப் பட்டுள்ளது.  

தற்போதைய இமாச்சலபிரதேச முதலமைச்சர் வீரபத்திர சிங், ஆப்பிள் தோட்டங்களிலிருந்து கிடைத்த வருமானத்தை வேளாண் வருவாயாகக் காட்டி, பல கோடி ரூபாய்க்கு வரி ஏய்ப்பு செய்த வழக்கில் நீதிமன்றம் அவருக்கு எதிராக தீர்ப்பு வழங்கியது.

வேறொரு வழக்கில் உச்ச நீதிமன்றம், வேளாண்மை என்பதற்கான வரையறையையும் தந்துள்ளது. அதன்படி மண்ணில் பயிர் விளைவிப்பதே விவசாயமாக கருதப்படுகிறது. ஆய்வு கூடங்களில் ஊட்டச்சத்து கரைசலிலோ (Hydroponics),திசு வளர்ப்பு முறையிலோ

(Tissue culture methods)  பயிர் வளர்ப்பது வேளாண்மையாகக் கருதப்படுவதில்லை. உற்பத்தியாகவே (Manufacturing) கருதப்படுகிறது.

(தயாராவோம்)
படம்: சோ.கேசவசுதன்

 ?வி.ஏ.ஓ. தேர்வு குறித்த விவரங்களை நான் எப்படி பெறுவது? மேலும், அடுத்த தேர்வு எப்போது என்பது குறித்த விவரம் வேண்டும்.

@ஷக்தி, மதுரை.

''ஒவ்வொரு ஆண்டும் வி.ஏ.ஓ. தேர்வு எப்போது நடைபெறுகிறது என்ற விவரம் www.tnpsc.gov.in/annual-planner.html என்ற இணையதளத்தில் வெளியிடப்படும். அதனைத் தொடர்ந்து கவனித்து வந்தாலே போதும்.

2014-15ம் ஆண்டுக்கான தேர்வு ஜூன் 14-ம் தேதி நடைபெற உள்ளது. அதனால் அடுத்த தேர்வுக்கு நீங்கள் அடுத்த ஆண்டுதான் விண்ணப்பிக்க முடியும். ஆனால், அந்தத் தேர்வுக்கு நீங்கள் இப்போதிருந்தே தயாராக வேண்டியது அவசியம்.''