Published:Updated:

போட்டித் தேர்வுகளில் பொருளாதாரம்

டாக்டர் சங்கர சரவணன்VAO முதல் IAS வரை! - 20

போட்டித் தேர்வுகளில் பொருளாதாரம்

டாக்டர் சங்கர சரவணன்VAO முதல் IAS வரை! - 20

Published:Updated:

ரூபாய் - 1

போட்டித் தேர்வுகளில் கேட்கப்படும் பொருளாதாரக் கேள்விகளில் தொழில் துறை சார்ந்த கேள்விகள் மிகுந்த முக்கியத்துவம் வாய்ந்தவை. இந்தியாவின் தேசிய வருமானத்துக்கு பங்களிப்புச் செய்யும் முதன்மைத் துறை (Primary Sector), இரண்டாம் நிலைத் துறை (Secondary Sector) மற்றும் மூன்றாம் நிலை துறைகளில் (Tertiary Sector), இரண்டாம் நிலைத் துறை என்பது தொழில் துறையைக் குறிக்கும்.
தொழில்துறை குறித்த கலைச் சொற்களில் பங்கு விலக்கல் (Disinvestment), மூலதனத் திரட்சி (Capital Formation), துணிகர முதலீடு (Venture capital) போன்ற சொற்கள் மிகவும் முக்கியத்துவம் வாய்ந்தவை. பங்கு விலக்கல் என்பது அரசாங்கத்தின் பொறுப்பில் இருக்கும் பொதுத்துறை நிறுவனங்களின் பங்குகளை மக்களுக்கு  விற்பனை செய்வதைக் குறிக்கும்.

மூலதனத் திரட்சி என்பது தேசிய பொருளாதார வளர்ச்சிக்கு பெரிதும் உதவக்கூடியது. உற்பத்தித் துறை நாட்டில் வளர வேண்டும் எனில், அதற்கு மூலதனம் மிக அவசியமானது. இந்த மூலதனம் உள்நாட்டில் இருந்தும் வரலாம்; வெளிநாட்டில் இருந்தும் வரலாம். உள்நாட்டில் மூலதனம் பெருக வேண்டும் எனில், சேமிப்பு பெருக வேண்டும். இதைத்தான் மூலதனத் திரட்சி என்று குறிப்பிடுகிறார்கள். நாட்டில் மூலதனத் திரட்சியைப் பெருக்கவே  சேமிப்புக்கு வருமான வரி விலக்கு அளிக்கிறது நம் அரசாங்கம். 

துணிகர முதலீடு என்பது புதிய துறை களில் அல்லது லாபம் பெறுவதற்கான ரிஸ்க் அதிகம் உள்ள துறைகளில் அல்லது தொழிலில் அதிக அனுபவம் இல்லாத முதல் தலைமுறை தொழில் முனைவோரை நம்பி செய்யப்படும் முதலீட்டை குறிக்கும்.

போட்டித் தேர்வுகளில் பொருளாதாரம்

ரூபாய் - 2

மொத்த உள்நாட்டு உற்பத்தியில் இந்திய தொழில் துறையின் பங்கு 28.4 சதவிகிதமாகும். தொழில்துறை 17%  பேருக்கு வேலை வாய்ப்பளிக்கிறது. நாட்டின் 60 சதவிகிதத்துக்கும் மேலானோர் வேளாண்மையைத் தொழிலாகக் கொண்டிருந்தாலும்,  வேளாண்மையில் உற்பத்தித் திறன் எதிர்மறை அளவிலேயே உள்ளது. சுதந்திரத்துக்குப்பின், வேளாண்மையே முக்கியத் தொழிலாகக் கருதப்பட்டு, முதலாவது ஐந்தாண்டுத் திட்டத்தில் முக்கியத்துவம் தரப்பட்டது. பின்னர் இரண்டாவது ஐந்தாண்டு திட்டத்தில், தொழில் துறைக்கு முக்கியத்துவம் அளிக்கப்பட்டது.

தொழில்துறையில் கொண்டு வரப்பட்ட தொழிற்கொள்கைகளும், திருத்தங்களும் இந்திய தொழில்  துறையின் வளர்ச்சிக்கு உந்துகோலாக அமைந்தது. இந்தியாவில் கொண்டு வரப்பட்ட தொழில் கொள்கைகளில் 1948-ம் ஆண்டு கொண்டுவரப்பட்ட தொழில் கொள்கைக்குப்பின் 1966-ம் ஆண்டு ஹசாரி அறிக்கைப்படி, கொண்டுவரப்பட்ட தொழில் உரிமக் கொள்கை (Industrial Licensing Policy) ஆகியவை முக்கியமானவை ஆகும். தொழில்துறையில் உழைப்பின் உற்பத்தித் திறன் அதிகம். தொழில்வளம் பெருகினால் நாட்டின் மொத்த உற்பத்தியும், வருமானமும் அதிகரிக்கும்.

1987-ம் ஆண்டு சுபிமல் தட் தலைமை யில் தொழில் உரிமக் கொள்கை ஆய்வுக்குழு (Industrial Licensing Policy enquiry Committee) அமைக்கப்பட்டது. 1969-ம் ஆண்டு முற்றுரிமை, கட்டுப்பாடு, வணிக நடவடிக்கைகள் தடைச் சட்டம் (Monopoly and Restrictive Trade Practices Act) கொண்டு வரப்பட்டது.

போட்டித் தேர்வுகளில் பொருளாதாரம்

1982-ம் ஆண்டு தேசிய முக்கியத்துவம் வாய்ந்த சில அடிப்படைத் தொழில் களுக்கு, கட்டுப்பாடு, வணிக நடவடிக்கைகள் தடைச் சட்டத்தில் (MRTP) விலக்கு அளிக்கப்பட்டது.

1985-ம் ஆண்டு 25 வகையான தொழில் களுக்கு அனுமதி வழங்குவது தாராளமய மாக்கப்பட்டது. மேலும், 82 வகையான தொழில்களைத் தொடங்கவும் அரசு அனுமதி தேவை இல்லை என அறிவிக்கப்பட்டது. எந்தவொரு நிறுவனத்தின் சொத்து மதிப்பும் ரூ.20 கோடிக்கு அதிகமாக இருக்குமானால், அது MRTP சட்டத்துக்கு உட்பட்டதாகக் கருதப்படும். இந்த வரம்பு ரூ.100 கோடியாக உயர்த்தப்பட்டது.

1991-ல் கொண்டு வரப்பட்ட பொருளாதாரச் சீர்திருத்தங்களுக்குப் பின், பல பன்னாட்டு நிறுவனங்கள் இந்தியாவில் தொழில் தொடங்க முன்வந்தன. தாராளமயமாக்கப்பட்ட பொருளாதாரக் கொள்கைக்குப்பின், லைசென்ஸ் ராஜ்யம் பெருமளவுக்கு ஒழிக்கப்பட்டு அந்நிய முதலீட்டை ஊக்குவிக்கும் வகையிலும், தனியார் செயல்பாடுகளை ஊக்குவிக்கும் வகை யிலும் பல சீர்திருத்தங்கள் கொண்டுவரப் பட்டன. போட்டிச் சட்டம் (Competition Act) கொண்டு வரப்பட்டபின் முற்றுரிமை, வணிக நடவடிக்கைகள் தடைச் சட்டம் செயலிழந்தது.

ரூபாய் - 3

இந்திய தொழில்துறை குறித்து ஐஏஎஸ் தேர்வில் கேட்கப்பட்ட இரண்டு கேள்விகளை இப்போது பார்க்கலாம்.

1.Why is the Government of India disinvestment its equity in the Central Public Sector Enterprises(CPSEs)?

1. The Government intends to use the revenue earned from the disinvestment mainly to pay back the external debt.

2. The Government no longer intends to retain management control of the CPSEs.

Which of the statements given above is/are correct?

(a) 1 only
(b) 2 only
(c) Both 1 and 2
(d) Neither 1 nor 2
இந்திய அரசாங்கம் எதற்காக மத்திய பொதுத்துறை நிறுவனங்களில் இருந்து பங்குகளை விற்பனை செய்கிறது?

போட்டித் தேர்வுகளில் பொருளாதாரம்

1. அரசாங்கம் பங்குகளை விற்பதன்மூலம் வரும் வருவாயை வெளிநாட்டுக் கடனை அடைக்க விரும்புகிறது.
2. அரசாங்கம் மத்திய பொதுத்துறை நிறுவனங்களின் மேலாண்மையைத் தொடர்ந்து வைத்துக்கொள்ள விரும்பவில்லை.

மேலே உள்ள கூற்றுகளில் எது/எவை சரியானவை?

(a) 1 மட்டும்
(b) 2 மட்டும்
(c) 1 மற்றும் 2 மட்டும்

(d) 1 மற்றும் 2 இரண்டுமே தவறானவை

போட்டித் தேர்வுகளில் பொருளாதாரம்

2. With reference to the National Investment Fund to which the disinvestment proceeds are routed, consider the following statements:

1. The assets in the National Investment Fund are managed by the Union Ministry of Finance.

2. The National Investment Fund is to be maintained within the Consolidated Fund of India.

3. Certain asset Management Companies are appointed as the fund managers.

4. A certain proportion of annual income is used for financing select social sectors.

Which of the statement given above is/are correct?

(a) 1 and 2
(b) 2 only
(c) 3 and 4
(d) 3 only

பங்கு விலக்கல் நிதி சென்று சேர்வதற்காக உருவாக்கப்பட்ட தேசிய முதலீட்டு நிதி பற்றிய பின்வரும் கருத்துக் களைக் கவனிக்கவும்

1. தேசிய முதலீட்டு நிதியின் சொத்துக்கள் மத்திய நிதி அமைச்சகத் தால் மேலாண்மை செய்யப்படுகின்றன.

2. தேசிய முதலீட்டு நிதி இந்திய திரள் நிதிக்குள் பராமரிக்கப்படுகிறது.

3. தேசிய முதலீட்டு நிதியை மேலாண்மை செய்வதற்காக சில சொத்து மேலாண்மை நிறுவனங்கள் நியமிக்கப்பட்டுள்ளன.

4. தேசிய முதலீட்டு நிதியின் வருடாந்திர வருவாயில் ஒரு குறிப்பிட்ட பங்கு தெரிவு செய்யப்பட்ட சில சமூகத் துறைகளின் செலவுக்காகப் பயன் படுத்தப்படுகிறது.

(a) 1 மற்றும் 2 மட்டும்
(b) 2 மட்டும்
(c) 3 மற்றும் 4 மட்டும்
(d) 3 மட்டும்

மேலே தரப்பட்ட கேள்விகளில் முதல் கேள்வி 2011-ம் ஆண்டு ஐஏஎஸ் தேர்விலும், 2-வது கேள்வி 2010-ம் ஆண்டு ஐஏஎஸ் தேர்விலும் கேட்கப் பட்டது. முதல் கேள்விக்கான விடை (d) 1 மற்றும் 2 இரண்டுமே தவறு என்பதாகும். ஏனெனில், மத்திய அரசு பொதுத்துறை நிறுவனங்களை நவீனப்படுத்தவும், அவற்றில் தனியார் முதலீட்டை அதிகரிப்பதன் மூலமும் அந்த நிறுவனங்களின் வளர்ச்சி மற்றும் நாட்டின் மேம்பாட்டுக்கு உதவவுமே பங்கு விலக்கல் செய்கிறது. அதேசமயம், அரசு பொதுத்துறை நிறுவனங்கள் மீது தனக்கிருக்கும் மேலாண்மை கட்டுப்பாட்டை இழந்துவிட விரும்ப வில்லை. எனவே, அதற்கேற்றாற்போல பங்கு விலக்கலுக்கான விதிமுறைகளை உருவாக்கியுள்ளது. சமீப காலத்தில் பொதுத்துறை மற்றும் தனியார் கூட்டு நடவடிக்கை (Public - Private Partnership) மூலமாகவும் பொதுத்துறை நிறுவனங் களை மேம்படுத்த முனைந்து வருகிறது. எனவே, கொடுக்கப்பட்ட இரண்டு கருத்துக்களும் தவறானதாகும். வாய்ப்பு விடை (d) தான் சரியானது.

இரண்டாவது, கேள்விக்குச் சரியான விடை (c) 3 மற்றும் 4 மட்டும் என்பதாகும். தேசிய முதலீட்டு நிதி 2005-06-ம் ஆண்டில் உருவாக்கப்பட்டது. புதிய பொருளாதாரக் கொள்கை அறிமுகப் படுத்தப்பட்ட 1991-ல் தொடங்கி 2000-ம் ஆண்டு வரை பங்கு விலக்கல் மூலம் கிடைத்த நிதியை அரசாங்கம் பட்ஜெட்டின்போது ஏற்படும் நிதிப் பற்றாக்குறையை சரிசெய்ய பயன் படுத்தியது. அரசு நிறுவனங்களின் பங்குகளை விற்று அரசாங்கம் நாட்டின் அன்றாடச் செலவுகளை நடத்துவதற்கு எதிராக ஊடகங்களில் கடும் விமர்சனங்கள் முன்வைக்கப்பட்டன. நாடாளுமன்றத்திலும் இதுதொடர்பான பிரச்னையை எதிர்க்கட்சிகள் எழுப்பின.
 
இதனால் 2005-06-ல் அரசு  பொதுத் துறை நிறுவனங்களின் பங்கு விற்பனை மூலம் கிடைக்கும் நிதியைப் பராமரிக்க  தேசிய முதலீட்டு நிதி ஏற்படுத்தப்பட்டது. இந்த நிதியை ஏற்படுத்தியதில், 1996-ம் ஆண்டு பொருளாதார நிபுணர் ஜி.வி.ராமகிருஷ்ணா தலைமையில் அமைக்கப் பட்ட ஐந்து உறுப்பினர்கள் கொண்ட பங்கு விலக்கல் ஆணையத்தின் பரிந்துரைகள் மிக முக்கியப் பங்காற்றின. இதை அடிப்படையாகக்கொண்டு, 1999-ம் ஆண்டு மத்திய அரசு பங்கு விலக்கலுக்கென்று தனித்துறையை உருவாக்கியது. மேலும், 2002-ல் பங்கு விலக்கல் தொடர்பான புதிய பங்கு விலக்கல் கொள்கை அறிவிக்கப்பட்டது.

இதன் தொடர்ச்சியாகவே தேசிய முதலீட்டு நிதி 2005-06ம் ஆண்டு நடைமுறைக்கு வந்தது. மத்திய பொதுத் துறை நிறுவனங்களின் பங்குகளை விற்பனை செய்வதால் கிடைக்கும் நிதியைக் கொண்டு தேசிய முதலீட்டு நிதி உருவாக்கப்பட்டது. இந்த நிதி இந்திய அரசாங்கத்தின் திறள் நிதிக்கு வெளியே பராமரிக்கப்படுகிறது. இந்த நிதியின் மேலாளர்களாக (Fund Managers) யூடிஐ சொத்து மேலாண்மை நிறுமம், எஸ்பிஐ நிதி மேலாண்மை நிறுமம் மற்றும் எல்ஐசி பரஸ்பர நிதி சொத்து மேலாண்மை நிறுமம் ஆகியவை கூட்டாகச் செயல்பட்டு இந்த நிதியை செபியின் விதிமுறைகளுக்கு ஏற்ப பராமரிக்கின்றன.

இந்த நிதியின் வருடாந்திர வருவாயில் இருந்து 75% கல்வி, நலவாழ்வு, வேலை வாய்ப்பு போன்ற சமூக வளர்ச்சித் திட்டங்களுக்கு ஒதுக்கீடு செய்யப் படுகிறது. மீதமுள்ள 25%  வருடாந்திர வருவாய், பொதுத்துறை நிறுவனங்களை மறுசீரமைக்கப் பயன்படுத்தப்படுகிறது.

(தயாராவோம்)
படம்: ர.சதானந்த்

மியூச்சுவல் ஃபண்டில் குவியும் முதலீடு!

கடந்த ஆகஸ்ட் மாதத்தில் மியூச்சுவல் ஃபண்டில் எஃப்ஐஐகளைவிட இந்திய மியூச்சுவல் ஃபண்ட் நிறுவனங்கள் அதிகம் முதலீடு செய்துள்ளன. கடந்த ஆகஸ்ட் மாதத்தில் 1.05 பில்லியன் டாலர் அளவுக்கு எஃப்ஐஐகள் முதலீடு செய்துள்ளனர். ஆனால், இந்திய மியூச்சுவல் ஃபண்ட் நிறுவனங்கள் 1.14 பில்லியன் டாலர் அளவுக்கு முதலீடு செய்துள்ளன.

 இதனைத் தொடர்ந்து, இந்திய மியூச்சுவல் ஃபண்ட் நிறுவனங்கள் நிர்வகிக்கும் மொத்த தொகை 10.13 லட்சம் கோடி ரூபாய் என்கிற புதிய உச்சத்தை எட்டியுள்ளது. கடந்த மே மாதம் 10.11 லட்சம் கோடி ரூபாயைத் தொட்டபின், இப்போது 10.13 லட்சம் கோடி ரூபாயாக உயர்ந்துள்ளது.