Published:Updated:

VAO முதல் IAS வரை!

போட்டித் தேர்வுகளில் பொருளாதாரம் டாக்டர் சங்கர சரவணன்

VAO முதல் IAS வரை!

போட்டித் தேர்வுகளில் பொருளாதாரம் டாக்டர் சங்கர சரவணன்

Published:Updated:

ரூபாய்-1

பொருளாதாரப் பாடத்தில் மக்கள் தொகை பற்றிய கருத்துக்களையும், அது தொடர்பாகப் போட்டித் தேர்வில் கேட்கப்படும் கேள்விகளையும் குறித்து இந்த வாரம் பார்க்கலாம்.

ஒரு நாட்டின் மக்கள்தொகை பெருக்கத்தின் மாற்ற நிலைகள், ஆங்கிலத்தில் ‘Demographic Transition’ எனப்படும். இது மூன்று நிலைகளைக் கொண்டது. முதல் நிலையில் நாட்டின் பொருளாதாரம் பழைமையானதாகவும், வேளாண்மையை அடிப்படையாகக் கொண்டதாகவும் இருக்கும். எழுத்தறிவு விகிதம், மருத்துவ வசதி போன்றவை போதுமான அளவுக்கு இருக்காது. அப்போது அந்த நாட்டில் பிறப்பு விகிதம் மற்றும் இறப்பு விகிதம் ஆகிய இரண்டுமே அதிகமாக இருக்கும்.

இந்தியா 1921-ம் ஆண்டு முதல் நிலையில் இருந்து, இரண்டாம் நிலைக்கு வந்தது. இதனால்தான், 1921-ம் ஆண்டை இந்திய மக்கள்தொகையைப் பொறுத்தமட்டில் பெரும் பிரிவு ஆண்டு (Year of Great Divide) என்று அழைப்பர்.

இரண்டாவது நிலையில், ஒரு நாட்டின் பொருளாதார வளர்ச்சியும்; பிறப்பு விகிதம் அதிகமாகவும், இறப்பு விகிதம் குறைவாகவும் இருக்கும். இந்த நிலை அந்த நாட்டில் மருத்துவ வசதிகள் ஓரளவுக்கு வளர்ந்துவிட்டதையும், எழுத்தறிவு விகிதம் இன்னும் போதிய அளவுக்கு வளரவில்லை என்பதையும் காட்டும். இந்தியா தற்போது இந்த நிலையில்தான் உள்ளது.

மூன்றாவது நிலை, மிகவும் பொருளாதாரம் வளர்ச்சி அடைந்த நிலையாகும். இந்த நிலையின்போது பிறப்பு விகிதம், இறப்பு விகிதம் இரண்டுமே குறைந்துவிடும்.

மிக வளர்ந்த நாடுகளே இந்த மூன்றாம் நிலையில் காணப்படும்.

VAO முதல் IAS வரை!

ரூபாய்-2

இந்தியா அதிக மக்கள்தொகைக் கொண்ட உலக நாடுகளில் இரண்டாம் இடத்தை வகிக்கிறது. இந்தியாவின் மக்கள்தொகை உலக மக்கள்தொகையில் 17.5%. தற்போதைய மக்கள்தொகையான 125 கோடி தொடர்ந்து பெருகிக்கொண்டே இருக்கிறது. இந்த நிலை தொடர்ந்து 2050-ம் ஆண்டில் இந்தியா மக்கள்தொகை யில் சீனாவைப் பின்னுக்குத்தள்ளி, உலகத்தின் முதல் இடத்துக்கு வந்துவிடுமாம்.

உலக அளவில் ஐந்தாவது பெரிய மக்கள்தொகைக் கொண்ட நாடான பிரேசிலின் மக்கள்தொகை இந்தியாவில் அதிக மக்கள்தொகைக் கொண்ட மாநிலமான உத்தரப்பிரதேசத்தின் மக்கள்தொகைக்கு சமம்.  தமிழ்நாட்டின் மக்கள்தொகை தாய்லாந்தின் மக்கள்தொகைக்கு சமம். இந்தியாவில் மக்கள்தொகையை நெறிப்படுத்தவும், முறைப்படுத்தவும், மக்கள்தொகைக் கொள்கை அவசியம் என்பதை அரசாங்கம் நன்றாக உணர்ந்து உள்ளது. மக்கள்தொகை கொள்கையை உருவாக்குவதற்கு அடிப்படைத் தேவை மக்கள்தொகை கணக்கெடுப்பாகும்.

இந்தியாவில் முதல் மக்கள்தொகை கணக்கெடுப்பு மயோ பிரபு வைஸ்ராயாக இருந்தபோது, 1872-ம் ஆண்டில் நடை பெற்றது. ஆனால், இந்தக் கணக்கெடுப்பு முறையாக அனைத்து இடங்களிலும் நடத்தப்படவில்லை. பின்னர், 1881-ம் ஆண்டில் ரிப்பன் பிரபு வைஸ்ராயாக இருந்தபோதுதான் மக்கள்தொகை கணக்கெடுப்பு முறையாக இந்தியாவில் நடத்தப்பட்டது. அதைத் தொடர்ந்து பத்தாண்டுக்கு ஒருமுறை மக்கள்தொகை கணக்கெடுப்பு நடத்தப்பட்டு வருகிறது.

இந்தியாவில் முதல் சென்சஸ் கமிஷனர் டபிள்யு.பி.பிளாடன் ஆவார்.  சென்சஸ் கமிஷனராக இருப்பவர்தான் 1881 முதல் 1941 வரை இந்தியாவில் மக்கள்தொகை கணக்கெடுப்புக்கு பொறுப்பானவராக இருந்தார். 1949-ல்  மக்கள்தொகை கணக்கெடுப்புப் பொறுப்பு மத்திய உள்துறை அமைச்சகத்தின் கீழ் இயங்கும் ரிஜிஸ்டர் ஜெனரல் & சென்சஸ் கமிஷனரிடம் ஒப்படைக்கப்பட்டது. சுதந்திர இந்தியாவில் இந்தப் பணியை முதன் முதலாக ஏற்றவர் யேட்ஸ் என்பவர் ஆவார்.

VAO முதல் IAS வரை!

சமீபத்தில் நடைபெற்ற மக்கள்தொகை கணக்கெடுப்பு 2011-ம் ஆண்டு நடைபெற்றதாகும். ‘நமது சென்சஸ் நமது எதிர்காலம்’ (Our census Our future) என்ற குறிக்கோளுடன் நடத்தப்பட்ட 2011-ம் ஆண்டு மக்கள்தொகைக் கணக்கெடுப்பில் தேசிய மக்கள்தொகை பதிவேடு (National Population Register) என்ற புதிய ஆவணம் உருவாக்கப்பட்டது. ஆண்டுதோறும் பிப்ரவரி 9-ம் நாள் இந்தியாவில் மக்கள்தொகை கணக்கெடுப்புத் தினமாக (Census Day) கடைப்பிடிக்கப்படுகிறது.

2011-ல் நடைபெற்ற மக்கள்தொகை கணக்கெடுப்பு 15-வது மக்கள்தொகை கணக்கெடுப்பாகும். இந்தக் கணக்கெடுப்பு சுதந்திரத்துக்குபின் ஜாதி வாரியாக நடத்தப்பட்ட முதல் கணக்கெடுப்பு என்ற வகையிலும் முக்கியமானதாகிறது. இதற்கு முன்பு 1931-ல் ஆங்கிலேயர் ஆட்சி காலத்தில் ஜாதி வாரியான கணக்கெடுப்பு நடத்தப் பட்டது. அதன்பின் இந்த 2011-ல்தான் ஜாதி வாரியான கணக்கெடுப்பு நடைபெற்றுள்ளது. (1968-ல் கேரள மாநிலத்தில் மட்டும் ஜாதி வாரியான கணக்கெடுப்பு நடத்தப்பட்டது)

ரூபாய் - 3

மக்கள்தொகை பற்றி ஐஏஎஸ் தேர்வில் கேட்கப்பட்ட இரண்டு கேள்விகளை இப்போது பார்க்கலாம்.

1. India is regarded as a country with
‘Demographic Dividend’. This is due to
(a) Its high population in the age group below 15 years.
(b) Its high population in the age group above 15-64 years.
(c) Its high population in the age group above 65 years
(d) It's high total population

VAO முதல் IAS வரை!

இந்தியா மக்கள்தொகை பங்கு வளம் மிக்க நாடு என்று அழைக்கப்படுவது ஏன்?

(a) இந்தியாவில் அதிகமான மக்கள் 15-க்கு கீழான வயதில் இருக்கிறார்கள்.
(b) இந்தியாவில் அதிகமான மக்கள் 15 - 64 வயதுக்குரியவர்களாக இருக்கிறார்கள்.
(c) இந்தியாவில் அதிகமான மக்கள் 65 வயதுக்கு மேற்பட்டவர்களாக இருக்கிறார்கள்.
(d) இந்தியாவில் ஒட்டுமொத்தமாக அதிக மக்கள்தொகை காணப்படுகிறது.

2. As per India’s National Population Policy 2000, by which one of the following years is it our long-term objective to achieve population stabilization?

(a) 2025
(b) 2035
(c) 2045
(d) 2055

இந்தியாவின் மக்கள்தொகை கொள்கை 2000-த்தின்படி, இந்தியா பின்வரும் எந்த வருடத்துக்குள் மக்கள்தொகை சமநிலைப்படுத்துதலை அடைவதை தனது நீண்ட காலக் குறிக்கோளாக அறிவித்தது.

(a) 2025 (b) 2035 (c) 2045  (d) 2055

VAO முதல் IAS வரை!

முதல் கேள்வி 2011-ம் ஆண்டு ஐஏஎஸ் தேர்விலும், இரண்டாவது கேள்வி 2008-ம் ஆண்டு ஐஏஎஸ் தேர்விலும் கேட்கப்பட்டவை. முதல் கேள்விக்கான சரியான விடை (b). இந்தியாவில் அதிகமான மக்கள் 15 - 64 வயதுக்குரியவர்களாக இருக்கிறார்கள். இந்திய மக்கள்தொகையின் சிறப்பு அம்சங்களில் ஒன்றாக இந்த மக்கள்தொகை பங்கு வளம் பார்க்கப்படுகிறது. 1980-களில் இருந்து இந்தியாவில் இந்த இளம் வயது மக்கள்தொகை அதிகரித்து வருகிறது. இது ஆண்டொன்றுக்கு மொத்த உள்நாட்டு உற்பத்தியில் இரண்டு சதவிகிதப் புள்ளிகளை உயர்த்துகிறது என்கின்றனர் பொருளாதார வல்லுநர்கள். இந்த மக்கள்தொகை பங்கு வளத்தால் பணிபுரிவோர்களின் எண்ணிக்கை அதிகமாகி அதன்காரணமாக நாட்டின் மூலதனத் திரட்சியும் அதிகமாகிறது.

இரண்டாவது கேள்விக்கான சரியான விடை (c) 2045.  இந்தியாவில் முதல் தேசிய மக்கள்தொகை கொள்கை 1976-ல் கொண்டுவரப்பட்டது. இதன்படி, பிறப்பு விகிதத்தைக் குறைக்க மத்திய அரசு பல்வேறு நடவடிக்கைகளை எடுத்தது. இந்தியாவின் புதிய மக்கள்தொகை கொள்கை 2000-ல்  கொண்டுவரப்பட்டது. அதன்படி 2010-ல் அடைய வேண்டிய சமுதாய மக்கள்தொகை  குறித்த இலக்குகள் நிர்ணயிக்கப் பட்டன.

(தயாராவோம்)
படங்கள்:  ரா.வருண் பிரசாத்.