Published:Updated:

கோபம், சந்தோஷம்... நம் உணர்ச்சிகளை ஆபீஸில் எந்தளவுக்குக் காட்டலாம்? வழிகாட்டுகிறார் நிபுணர்

ஆபீஸ்
பிரீமியம் ஸ்டோரி
News
ஆபீஸ்

H R I S S U E S

ஒரு நிறுவனத்தில் பணிக்குச் சேரும்போதே பாராட்டுகள், பொறுப்புகள், அடுத்தடுத்த வளர்ச்சி என்பதே ஒவ்வொருவரின் லட்சியமாகவும் எதிர்பார்ப்பாகவும் இருக்கும். ஆனால், உணர்ச்சிகளைச் சரியாகக் கட்டுப்படுத்த முடியாத காரணத்தால் உடன்பணிபுரிபவர்களுடன் சுமுகமான உறவை வளர்த்துக் கொள்ளாத நிலை, தலைமையிடையே விரோதம் போன்ற சூழல் ஏற்பட்டு நிறுவனத்திலிருந்தே விலகிவிடு வார்கள். அடுத்தடுத்து எத்தனை நிறுவனங்கள் மாறினாலும் அவர்களின் பிரச்னைக்குத் தீர்வு கிடைக்காது. இவர்களைத் திறமை யில்லாதவர்கள் என்று சொல்லிவிட முடியாது. உணர்வுகளைச் சரியாகக் கையாளத் தெரியாதவர்கள் என்றே சொல்ல வேண்டும்.

‘‘பணிபுரியும் அலுவலகத்தில் நம்முடைய எமோஷனல்களைத் தேவையான இடத்தில் தேவையான நேரத்தில் பயன்படுத்தத் தெரிந்திருப்பது அவசியம். இதை ‘எமோஷனல் இன்டலிஜென்ஸ்’ என்பார்கள். மனிதமனம் சந்தோஷம், கோபம், அழுகை, ஆர்வம், வருத்தம் என பாசிட்டிவ் மற்றும் நெகட்டிவ் உணர்ச்சிகளை உள்ளடக்கியது. ஒவ்வொருவருக்கும் அவர்கள் இருக்கும் சூழ்நிலையைப் பொறுத்து உணர்ச்சிகள் வெளிப்படுத்தும் தன்மை மாறுபடும். ஆனால், எல்லாச் சூழ்நிலையிலும் சரியான உணர்வுகளை வெளிப்படுத்து பவர்களே அடுத்தகட்ட வளர்ச்சியை எட்ட இயலும்’’ என்று சொல்லும் மனிதவள மேம்பாட்டு வளர்ச்சி மையமான ரெடி ஃபைன் நிறுவனத்தின் சி.இ.ஓ ஜாஃபர் அலி, உங்களின் உணர்ச்சிகளைப் பணியிடத்தில் எப்படிக் கையாள வேண்டும் என்பது தொடர்பான வழிகாட்டல்களை வழங்குகிறார்.

ரெஸ்பான்ஸ் பண்ணுங்க...

அலுவலகத்தில் உள்ளவர்கள் உங்களைப் பாரட்டினாலும், குறை கூறினாலும் உடனே மகிழ்ச்சியையும் கோபத்தையும் வெளிக்காட்டதீர்கள். அப்படி உணர்வுகளை வெளிப் படுத்துவதை ரியாக்ட் செய்வது என்று சொல்வார்கள். ஒருவரின் கருத்துக்கு உடனடியாகக் கோபமா, மகிழ்ச்சியோ, வருத்தமோ என உங்களின் உணர்வுகளை ரியாக்ட் செய்யாமல் அவர்கள் என்ன சொல்ல வருகிறார்கள் என்பதை முழுமையாகக் கேளுங்கள். அதன்பின் அது உங்களுக்கு சாதகமான விஷயம் எனில், அந்த மகிழ்ச்சியிலேயே நின்றுவிடாமல் அந்தத் திறனை அடுத்தகட்டத்துக்கு எப்படி எடுத்துச் செல்வது என்பது பற்றி யோசியுங்கள்.

உங்களின் மைனஸ் பற்றி சொன்னால், நீங்கள் செய்துகொள்ள வேண்டிய மாற்றம் ஏதேனும் இருக்கிறதா என்பதை ஆராயுங்கள். அப்படி இருக்கும்பட்சத்தில் அதைக் கூறியவருக்கு ‘நன்றி’, ‘நிச்சயமாக மாற்றிக்கொள்ள முயற்சி செய்கிறேன்’ என்று பாசிட்டிவாகப் பதில் அளியுங்கள். இதை மற்றவர்களின் கருத்துக்கு ரெஸ்பான்ஸ் செய்வது என்று சொல்வார்கள். அலுவலகத்தைப் பொறுத்தவரை, நீங்கள் எடுக்கும் எந்த முடிவும் உணர்வுபூர்வமாக இல்லாமல் சிந்தனையின் அடிப்படையில் இருந்தால் பாசிட்டிவ் மனிதராக எப்போதும் திகழலாம்.

ஆபீஸ்
ஆபீஸ்

கலந்துரையாடுங்கள்...

ஓர் அலுவலகத்தில் ஒன்றாகப் பணியாற்றும்போது, சக பணியாளர் களுடன் சின்னச் சின்ன மனக்கசப்புகள் வர வாய்ப்புகள் அதிகம். அதுபோன்ற சூழலில் சம்பந்தப்பட்ட நபர் பற்றி மற்றவர்களிடம் பேசுவதைத் தவிர்த்து விட்டு, அவரையே அழைத்துப் பிரச்னை குறித்துப் பேசலாம். உங்கள் மீது தவறு இருக்கும்பட்சத்தில் அதைத் திருத்திக் கொள்ளலாம். அதே போன்று உங்களைப் பற்றித் தவறான கருத்துகளை மற்றவர்கள் பரப்புகிறார்கள் என்றால், உடனே கோபப்பட்டு கத்தாமல், சம்பந்தப்பட்ட நபரை அழைத்து, பொறுமையாகப் பேசி, இதுபோன்ற பிரச்னை எதிர்காலத்தில் நிகழாமல் பார்த்துக் கொள்கிறேன் என்று பேசி, பிரச்னைக்கு முற்றுப்புள்ளி வைக்கலாம். இதனால் உங்களின் ஆளுமைத் திறன் அதிகரிப்பதுடன், சக ஊழியர்களிடம் சுமுகமான உறவை வளர்த்து, அலுவலகத்தில் பணியாற்ற நிம்மதியான சூழலை உருவாக்கித்தரும்.

நோ சொல்லிப் பழகுங்கள்...

ஒரு வேலையைச் செய்துமுடிப்பதற்கு கால அவகாசம் இருக்கிறதா என்பதைக் கணக்கிடாமல் பல்வேறு வேலைகளைச் செய்து முடிக்க ஒப்புக்கொள்ளும்போது, அதிக நெருக்கடிக்கு ஆளாக நேரிடும். இதனால் பணியில் காலதாமதம் ஏற்படலாம். நீங்கள் அதிகமான வேலை செய்தாலும்கூட காலதாமதமாகச் செய்பவர் என்ற எண்ணம் உங்களின் மீது பதியும். இது தேவையில்லாத பதற்றத்தை உங்களுக்குள் உருவாக்கும். பணிகளைத் திட்டமிட்டுச் செயல் படுத்தும்போது எப்போதும் கூல் பெர்ஷனாகவும், சரியான நேரத்துக்கு முடித்துக் கொடுப்பவராகவும் நிறுவனம் உங்களை அங்கீகரிக்கும்.

வேலைப்பளு அதிகமாக இருக்கும்பட்சத்தில் ஒருவர் கொடுக்கும் பணியை, ‘இதைச் செய்ய முடியாது’ என்று அதிகாரத் தொணியில் கூறாமல், ‘இப்போது என்னிடம் செய்து முடிக்க வேண்டிய வேலை அதிகமாக இருக்கிறது; வேறு யாருக்கேனும் இந்தப் பணியை மாற்றிவிட முடியுமா’ என்று கோரிக்கையாக வைக்கலாம். அல்லது அந்த வேலையைச் செய்து முடிக்க வேண்டிய அவகாசத்தைத் தரும்படி கேட்கலாம். எனவே, உங்களால் செய்ய இயலாத பணிக்கு நோ சொல்லிப் பழகுதல் ஆரோக்கியமான வளர்ச்சி யாகவே இருக்கும்.

உறவுமுறைகள் வேண்டாமே...

அலுவலகத்தில் பணிபுரிபவர் களைச் சிலர், அண்ணன், அக்கா, போன்ற உறவுமுறைகளைச் சொல்லி அழைப்பார்கள். இது சில நிறுவனகளில் ஏற்றுக் கொள்ளக்கூடிய ஒன்றாக இருந்தாலும், பெரும்பாலான நிறுவனங்கள் உறவுமுறை சொல்லி அழைப்பதை விரும்பு வதில்லை. மேலும், உறவுமுறை சொல்லி சக பணியாளர்களை அழைக்கும்போது, சில நேரங்களில் அவர்களின் காலதாமதத்தை தட்டிக்கேட்க இயலாது.

மேலும், அடுத்தடுத்த வேலைப் பளுக்களை அவர்கள் திணிக்கும் போது, தட்டிக்கழிக்க முடியாமல் திணற வேண்டியிருக்கும். இது போன்ற சூழல் தேவையில்லாத மன அழுத்ததைத் தரும் என்பதால், அலுவலகத்தில் சகபணியாளர் களை உறவுமுறை சொல்லி அழைப்பதைத் தவிர்த்து, அவரின் பெயரைச் சொல்லியோ, அலுவலகத்தின் நடைமுறையின் அடிப்படையில் ‘சார்’, ‘மேடம்’ என்றோ அழைக்கலாம்.

குறைகளைத் தவிருங்கள்...

அலுவலகத்தில் எப்போதும் மற்றவர்களைக் குறை கூறுவதைத் தவிருங்கள். மற்றவர்களை எப்போது குறைசொல்லிக் கொண்டே இருக்கும்போது, பொறமைக் குணம் உள்ளவர் என்றோ, மற்றவர்களின் வளர்ச்சியைப் பிடிக்காதவர் என்றோ, பாரட்டத் தெரியாதவர் என்றோதான் உங்களின் அடையாளம் உருவாகும். எனவே, கூடுமானவரை மற்றவர் களின் செயல்களைப் பாரட்டுங்கள். மற்றவர்களைப் பாராட்டும்போது உங்களின் பாசிட்டிவ் எனர்ஜி அதிகமா வதுடன், தலைமைப் பண்பும் அதிகரிக்கும்.

ஜாஃபர் அலி
ஜாஃபர் அலி

அப்டேட்டாக இருங்கள்...

எத்தனை வயதானாலும் கற்றலுக்கு மட்டும் தடையே இல்லை. இது எல்லாத் துறைக்கும் பொருந்தும். நீங்கள் எந்தத் துறையில் பணியாற்றி னாலும், அந்தத் துறையில் அடுத்தடுத்த வளர்ச்சி இருந்து கொண்டேதான் இருக்கும். அதற்கேற்ப உங்களை நீங்களும் அப்டேட் செய்துகொள்வது நல்லது.

அப்டேட் இல்லாமல் இருக்கும்போது உங்களை அறியாமலே ஒரு தாழ்வு மனப்பான்மை உங்களுக்குள் இருந்துகொண்டே இருக்கும். இது அடுத்ததடுத்த கட்டத்துக்குச் செல்லும்போது, எதற்கெடுத் தாலும் மற்றவர்களைச் சார்ந்து இருக்க வேண்டிய சூழல் வரும், இது சக பணியாளர்கள் மீது கோபம், பொறமை போன்ற உணர்வுகள் உருவாக காரணமாக அமையும். இதிலிருந்து தப்பிக்கக் கற்றலுக்கு எப்போதும் வயதைத் தடையாக எண்ணாதீர்கள்.

குழுவாக இயங்க தயக்கம் வேண்டாம்...

குழுவாக இணைந்து செயல்படும்போது, தலைமைப்பண்பு, பணியாளர்களைக் கையாளும் விதம், சூழலைக் கையாளும் விதம் போன்ற திறன்கள் நிச்சயம் அதிகரிக்கும். எனவே, இப்போது தனித்து இயங்காமல் குழுவாக இயங்குங்கள். உயர் பொறுப்புகள் உங்களுக்கு வழங்கப் படுகிறது எனில், நிச்சயமாக நிறுவனம், உங்களின் ஆளுமைத்திறனை அலசி ஆராயும். எனவே, குழுவாக இயங்க எப்போதும் தயக்கம் காட்டாதீர்கள்.

மன்னிப்பு கேட்கலாம் பாஸ்...

பணியாற்றும் இடங்களில் சின்னச் சின்ன தவறுகள் நடப்பது இயல்பான ஒன்றுதான். சில நேரங்களில் அது பெரிய பிரச்னைகளுக்கு வழிவகுக்கும். எனவே, உங்களையும் அறியாமல் ஒரு தவறு நிகழ்ந்துவிட்டது எனில், அடுத்தவர்களைக் குற்றவாளிகள் ஆக்கிவிட்டு பிரச்னையிலிருந்து விலக முயற்சி செய்யாதீர்கள்.

தவறு நடந்துவிட்டால் அந்தத் தவற்றுக்கு மன்னிப்புக் கேட்கத் தயங்காதீர்கள். அதன் பின் அந்தத் தவற்றைச் சரிசெய்யலாம் என்பதை சக பணியாளர்களுடனோ, தலைமையுடனோ கலந்துபேசி நிவர்த்தி செய்யலாம். இது உங்களின் பொறுப்புணர்வை நிறுவனத்துக்குக் காட்டுவதுடன், தலைமை வரை நிச்சயம் அழைத்துச் செல்லும்’’ என்றார் ஜாபர் அலி.

இந்த விஷயங்களை எல்லாம் நீங்கள் கவனத்தில் கொண்டு செயல்பட்டால், அடுத்த ஆண்டு உங்களுக்கு புரொமோஷன் நிச்சயம்.

பிட்ஸ்

ம் நாட்டின் உள் கட்டமைப்பு வசதிகள் தொடர்பாக சிறப்பான பல அறிவிப்புகள் வெளியானதை தொடர்ந்து ஃபாரின் போர்ட் ஃபோலியோ நிறுவனங்கள் ரூ.24,000 கோடி அளவுக்கு இந்தியாவில் முதலீடு செய்துள்ளன!