Published:Updated:

அன்று ₹5 லட்சம் முதலீடு; இன்று ஆண்டுக்கு ₹5,000 கோடி வருமானம்... சீரம் நிறுவனத்தின் கதை!

COVID-19 vaccine at the Serum Institute of India
COVID-19 vaccine at the Serum Institute of India ( AP Photo/Rafiq Maqbool )

சில ஆண்டுகளுக்கு முன்பு வரை சீரம் அல்லது பாரத் பயோடெக் உள்ளிட்ட நிறுவனங்கள் குறித்து யாருக்கும் எதுவும் தெரியாது. சன் பார்மா, டாக்டர் ரெட்டீஸ், பயோகான் உள்ளிட்ட பார்மா கம்பெனிகள் குறித்து தெரிந்த அளவுக்கு தடுப்பூசி நிறுவனங்கள் குறித்து நமக்கு தெரியாது என்பதே உண்மை!

தடுப்பூசி போட்டாச்சா? கோவிஷீல்டா, கோவாக்சினா என்று கேட்கும் அளவுக்கு தற்போது விழிப்புணர்வு வந்திருக்கிறது. ஆனால், சில ஆண்டுகளுக்கு முன்பு வரை சீரம் அல்லது பாரத் பயோடெக் உள்ளிட்ட நிறுவனங்கள் குறித்து யாருக்கும் எதுவும் தெரியாது. சன் பார்மா, டாக்டர் ரெட்டீஸ், பயோகான் உள்ளிட்ட பார்மா கம்பெனிகள் குறித்து தெரிந்த அளவுக்கு தடுப்பூசி நிறுவனங்கள் குறித்து நமக்கு தெரியாது என்பதே உண்மை.

ஆனால், தடுப்பூசி நிறுவனங்கள் பல ஆண்டுகளாக வெற்றிகரமாக செயல்பட்டு வருகின்றன. சீரம் இன்ஸ்டிடியூட் நிறுவனம் 45 ஆண்டுகளுக்கும் மேலாக இந்தியாவில் செயல்பட்டு வருகிறது. இந்தியா மட்டுமல்லாமல் சர்வதேச அளவில் பல நாடுகளுக்கும் ஏற்றுமதி செய்துவருகிறது.

தடுப்பூசி
தடுப்பூசி

சில நாள்களுக்கு முன்பு வந்த தகவல் ஆச்சர்யமளித்தது. 2020-ம் ஆண்டில் ரூ.5,000 கோடிக்கு மேல் வருமானம் ஈட்டிய நிறுவனங்களில் அதிக லாப வரம்பு உள்ள நிறுவனமாக சீரம் திகழ்கிறது.

கேபிட்டல்லைன் என்னும் நிறுவனம் இந்தத் தகவலை வெளியீட்டிருக்கிறது. 2020-21-ம் நிதி ஆண்டில் 418 நிறுவனங்கள் ரூ.5,000 கோடிக்கு மேல் வருமானம் ஈட்டி உள்ளன. இதில் அதிகபட்சமாக சீரம் நிறுவனத்தின் லாப விகிதம் 41.3 சதவிகிதமாகும். அதாவது ரூ.5,446 கோடி வருமானத்தில் ரூ.2,251 கோடி அளவுக்கு லாபம் ஈட்டி இருக்கிறது.

ஆனால் ரூ.5,000 கோடிக்கு மேல் வருமானம் ஈட்டும் பார்மா நிறுவனங்களின் நிகர லாபம் குறைவாகவே இருக்கிறது. அதிகபட்ச லாப விகிதம் 28 சதவிகிதம் மட்டுமே.

எளிய தொடக்கம்...

பூனாவாலாவின் குடும்பம் பெரிய குதிரை பண்ணை வைத்திருந்தார்கள். குதிரையின் ஆன்ட்டிடாக்ஸின் சீரம் (Antitoxin serum) மூலமாகத் தடுப்பூசி கண்டுபிடிக்க முடியும் என்பதை தெரிந்துகொண்டு தடுப்பூசி தயாரிக்கும் நிறுவனத்தைத் தொடங்கினார்கள். 1966-ம் ஆண்டு ரூ.5,00,000 முதலீட்டில் இந்த நிறுவனத்தைத் தொடங்குகினார் சைரஸ் பூனாவாலா.

 சீரம் இன்ஸ்டிடியூட்
சீரம் இன்ஸ்டிடியூட்

நமக்கெல்லாம் கோவிட் பெருந்தொற்றுக்குப் பிறகுதான் சீரம் நிறுவனம் குறித்து தெரியும். ஆனால், அதற்கு முன்பாகவே தடுப்பூசி சந்தையில் பெரும் தாக்கத்தை ஏற்படுத்தி இருக்கிறது. ஆண்டுக்கு 150 கோடி டோஸ் தடுப்புசி தயாரிக்கும் திறன் உடையது இந்த நிறுவனம். சர்வதேச அளவில் 170 நாடுகளுக்கு பல விதமான நோய்களுக்கு தடுப்பூசியை உற்பத்தி செய்கிறது. போலியோ, மூளைக்காய்ச்சல், தட்டம்மை உள்ளிட்ட பல நோய்களுக்கான தடுப்பூசி தயாரிக்கப்படுகிறது. சர்வதேச அளவில் மூன்றில் இரண்டு குழந்தைகளுக்கு சீரம் தடுப்பூசிகள் போடப்பட்டிருக்கும்.

பிரைவேட் ஈக்விட்டி...

2011-ம் ஆண்டு தற்போதைய தலைவர் அடார் பூனாவாலா பொறுப்பேற்றுக்கொண்டார். ``அப்போது நிறுவனத்தின் மதிப்பு மிக அதிகமாக இருக்கிறது. அப்போது சில சதவிகித பங்குகளை விற்பதன் மூலம் நிறுவனத்தின் மதிப்பை தெரிந்துகொள்ள முடியும் என்பது போன்ற கருத்துகள் வந்தால் அதற்கான முயற்சியில் இறங்கினோம். அதேபோல அந்தப் பணத்தை வைத்து நாங்கள் சில நிறுவனங்களில் முதலீடு செய்யலாம் எனத் திட்டமிட்டோம். நாங்கள் முதலீடு செய்ய நினைத்த நிறுவனங்களில் சந்தை மதிப்பு அதிகமாக இருந்ததால் நாங்களும் எங்களுடைய பங்குகளை விற்கவில்லை.

சீரம் நிறுவன தலைவர் பூனவல்லா
சீரம் நிறுவன தலைவர் பூனவல்லா

இப்போது நினைக்கும்போது அந்த டீல் வெற்றியடையாமல் போனது நல்லதுக்கு என்றே நினைக்கத் தோன்றுகிறது. ஒரு வேளை பிரைவேட் ஈக்விட்டி முதலீடு செய்திருந்தால், ஐ.பி.ஓ செல்ல வேண்டிய சூழ்நிலை உருவாகி இருக்கும். அப்போது அனைத்து முதலீட்டாளர்களுக்கும் பதில் சொல்ல வேண்டிய சூழலும், நிதிநிலை அறிக்கையை வெளியிட வேண்டிய சூழலும் உருவாகும்.

ஒருவேளை அப்படி நடந்திருந்தால் தற்போது கோவிட் தடுப்பூசி தொடர்பான ஆராய்ச்சி மற்றும் முதலீட்டை செய்திருக்க முடியாது. தற்போது அனைத்து முடிவுகளும் என்னுடைய தனிப்பட்ட ரிஸ்காக எடுக்கலாம். அப்படி எடுத்துதான் இந்தத் தடுப்பூசியைக் கொண்டுவந்தோம்" என அடார் பூனாவாலா சில மாதங்களுக்கு முன்பு பேட்டி கொடுத்திருந்தார்.

தொடரும் பற்றாக்குறை   

தற்போது தடுப்பூசி பற்றாக்குறை ஏற்பட்டிருக்கும் சூழலில் பல அரசுகளில் இருந்து எனக்கு மிரட்டல் வருகிறது என இங்கிலாந்து ஊடகத்துக்கு பேட்டியளித்திருக்கிறார். கடந்த ஜனவரி மாதத்தில் கொரோனாவின் தாக்கம் குறையத்தொடங்கியதால் அரசிடம் இருந்து எங்களுக்கு ஆர்டர் வரவில்லை. அதனால் தடுப்பூசி தேவைப்படாது என நினைத்தோம். தற்போது பல தரப்பில் இருந்தும் ஆர்டர்கள் குவிகின்றன. ஆனால், தடுப்பூசி உற்பத்தியை ஓர் இரவில் உயர்த்த முடியாது.

தடுப்பூசி
தடுப்பூசி

``தடுப்பூசிக்கான அரசின் அனுமதி கிடைக்கும் முன்பு சில கோடி தடுப்பூசிகளை நாங்கள் தயாரித்து வைத்திருந்தோம். ஒரு வேளை எங்களுக்கு அரசின் அனுமதி கிடைக்கவில்லை என்றால் நாங்கள் எடுத்து ரிஸ்க் வீணாகி இருக்கும். இந்தச் சூழலில் ஒட்டுமொத்த பழியையும் எங்கள்மீது போடக் கூடாது'' என அடார் பூனாவாலா தெரிவித்திருக்கிறார்.

பற்றாக்குறை சரியாக இன்னும் மூன்று மாதங்கள் ஆகலாம் எனத் தெரிகிறது. மக்களின் பயத்தை போக்கி இயல்பு நிலைக்கு திரும்ப தடுப்பூசி அவசியம். ஆனால், தடுப்பூசி தயாரிக்கும் நிறுவனத்தை அச்சத்திலிருந்து இயல்புநிலைக்கு திருப்புவது அரசின் கைகளில்தான் இருக்கிறது!

அடுத்த கட்டுரைக்கு