Published:Updated:

கிரெடிட் கார்டு... தவிர்க்க வேண்டிய 8 முக்கிய தவறுகள்..! கடன் வலையில் சிக்காமல் இருக்க...

C R E D I T C A R D

பிரீமியம் ஸ்டோரி

ஆர்.செல்வகுமார், சர்டிஃபைடு ஃபைனான்ஷியல் பிளானர், www.finselva.com

நம்மில் பெரும்பாலானோர் கடன் அட்டையைப் (கிரெடிட் கார்டு) பயன் படுத்தத் தொடங்கி இருக்கிறோம். இதன் மூலம் வாங்கப்படும் பொருள்களுக்கு சுமார் 50 நாள்கள் வட்டி கிடையாது என்பது மிகவும் கவர்ச்சிகரமாக இருக்கிறது. அதே நேரத்தில், கிரெடிட் கார்டு நிலுவை தொகையைச் சரியாகத் திருப்பிச் செலுத்தாவிட்டால் ஆண்டுக்குக் கிட்டத்தட்ட 45% வட்டி கட்ட வேண்டி வரும். எனவே, கிரெடிட் கார்டை மிகச் சரியாகப் பயன்படுத்துவது முக்கியம்.

ஆர்.செல்வகுமார் 
சர்டிஃபைடு 
ஃபைனான்ஷியல் 
பிளானர், 
www.finselva.com
ஆர்.செல்வகுமார் சர்டிஃபைடு ஃபைனான்ஷியல் பிளானர், www.finselva.com

1. கிரெடிட் கார்டு நிலுவைத் தொகையத் தாமதமாகச் செலுத்துதல்...

கிரெடிட் கார்டு நிலுவைத் தொகையைத் தாமதமாகச் செலுத்துவது மிகப் பெரிய தவறாகும். அப்படிச் செய்யும்பட்சத்தில் அதிக வட்டி (ஆண்டுக்கு 36% - 48%) மற்றும் அபராதம் செலுத்த வேண்டிவரும். அது மட்டுமல்லாமல், இந்தச் செயல் உங்கள் கடன் மதிப்பெண்ணையும் (கிரெடிட் ஸ்கோர்) பாதிக்கும்.மாதம்தோறும் கிரெடிட் கார்டு நிலுவைத் தொகையை முன்கூட்டியே செலுத்துவதை உறுதி செய்து கொள்வது கட்டாயம்.

2. ஒவ்வொரு மாதமும் குறைந்தபட்ச கட்டணம் செலுத்துதல்...

ஒவ்வொரு மாதமும் குறைந்தபட்ச கிரெடிட் கார்டு நிலுவைத் தொகையை மட்டுமே மீண்டும் மீண்டும் செலுத்துவது உங்களை கடன் வலையில் சிக்க வைக்கும். இதன் மூலம் நீங்கள் நிலுவைத் தொகையை முழுவதுமாகத் திருப்பிச் செலுத்தும் வரை தேவையற்ற வட்டி கட்டி வர வேண்டியதாக இருக்கும்.

கிரெடிட் கார்டு
கிரெடிட் கார்டு

3. கிரெடிட் கார்டு... அறிக்கையைச் சரிபார்த்தல்...

கிரெடிட் கார்டின் பரிவர்த்தனை களின் பட்டியலை மதிப்பாய்வு செய்ய மாத இறுதி வரை காத்திருக்க வேண்டாம். உங்கள் கிரெடிட் கார்டில் தவறான கட்டணங்கள் மற்றும் எந்தவொரு தவறான பதிவையும் அடையாளம் காண கிரெடிட் கார்டின் அறிக்கையைத் தவறாமல் சரிபார்க்க வேண்டும்.

4. கிரெடிட் கார்டு மூலம் பணம் எடுத்தல்...

உங்கள் கிரெடிட் கார்டு மூலம் பணம் எடுப்பதைத் தவிர்ப்பது நல்லது. அது மிகப்பெரிய தவறு. கிரெடிட் கார்டு மூலம் எடுக்க கட்டணம் இருக்கிறது. மேலும், அதற்கு உடனடியாக வட்டி போட ஆரம்பித்துவிடுவார்கள். அதிக வட்டி (ஆண்டுக்கு 42% வரை) கட்ட வேண்டிவரும். ஒருவர் பணத்தை எடுத்த நாளிலிருந்து திருப்பிச் செலுத்தும் தேதி வரை வட்டி வசூலிக்கப்படும் என்பதை மறக்கக் கூடாது.

5. கடன் பயன்பாட்டு சதவிகிதத்தை 30 சதவிகிதத்துக்கு மேல் வைத்திருத்தல்...

உங்கள் கடன் மதிப்பெண்ணை நிர்ணயிப்பதில் கடன் பயன்பாடு மிக முக்கியமான காரணிகளில் ஒன்று ஆகும். அதிகபட்ச கடன் பயன்பாட்டு விகிதத்தை 30 சதவிகிதத்துக்கும் குறைவாகப் பராமரிப்பது முக்கியம்.

6. கிரெடிட் கார்டில் தேவையற்ற செலவுகள் செய்தல்...

உங்கள் கிரெடிட் கார்டை இலவசப் பணமாக நினைப்பதைத் தவிர்க்கவும். நீங்கள் வாங்கும் அனைத்துப் பொருள்களுக்கும் உரியத் தொகையைத் திருப்பிச் செலுத்த வேண்டும் என்பதை நினைவில் கொள்ளுங்கள்.

7. கிரெடிட் கார்டு நிலுவைத் தொகையைக் கட்ட உரிய தேதி வரை காத்திருத்தல்...

உங்கள் கிரெடிட் கார்டு நிலுவைத் தொகையைச் செலுத்த வேண்டிய தேதி வரை காத்திருக்க வேண்டாம். பல நேரங்களில் பணம் செலுத்த வேண்டிய தேதி மறந்துபோகும். இதனால் அதிக வட்டி கட்ட வேண்டியிருக்கும்.

8. கிரெடிட் கார்டின் வெகுமதிகளைப் பற்றி எச்சரிக்கையாக இருங்கள்...

பெரும்பாலான கிரெடிட் கார்டுகள் விமான நிலைய ஓய்வறைச் சலுகைகள், ஹோட்டல் உணவு மற்றும் பிற சலுகைகளை இலவசமாக வழங்குகிறது. நீங்கள் கிரெடிட் கார்டின் வெகுமதித் (ரிவார்ட்) திட்டத்தைப் பார்த்து அதற்குத் தகுந்தவாறு உங்கள் செலவுகளை மேற்கொள்ள வேண்டியது அவசியம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு