Published:Updated:

குடும்ப பட்ஜெட் போடுவது ஏன்... எதற்கு..? அடிக்கடி கேட்கப்படும் கேள்விகள்...

குடும்ப பட்ஜெட்
பிரீமியம் ஸ்டோரி
குடும்ப பட்ஜெட்

FAQ

குடும்ப பட்ஜெட் போடுவது ஏன்... எதற்கு..? அடிக்கடி கேட்கப்படும் கேள்விகள்...

FAQ

Published:Updated:
குடும்ப பட்ஜெட்
பிரீமியம் ஸ்டோரி
குடும்ப பட்ஜெட்

குடும்ப பட்ஜெட்’ குறித்து அடிக்கடி கேட்கப்படும் கேள்விகளுக்கு பதில் தருகிறார் நிதி ஆலோசகர் லலிதா ஜெயபாலன்.

லலிதா ஜெயபாலன்
லலிதா ஜெயபாலன்

குடும்ப பட்ஜெட் போடுவதால் என்ன பயன்..?

‘‘உங்கள் குடும்பத்தின் செலவுகளை பட்ஜெட் போட்டு மேற்கொள்ளும் போது, பணத்தைத் திட்டமிடலுடன் செலவு செய்வீர்கள். இது அநாவசியச் செலவுகளைக் குறைக்க ஏதுவாக இருக்கும். மேலும், சேமிப்புக்கும் வழிவகுக்கும். உங்கள் குடும்பத்தின் வருமானம் எந்தெந்த விதங்களில் எல்லாம் செலவிடப்படுகிறது என்பதை அறிய இந்த ‘குடும்ப பட்ஜெட்’ கைகொடுக்கும்.’’

நான் ஏன் ‘பட்ஜெட்’ போட்டு செலவு செய்ய வேண்டும்..?

‘‘நிதி ரீதியில் நாம் பாதுகாப்பாக உணர்வதற்கு முக்கிய காரணம், ‘சேமிப்பு.’ உங்கள் கையில் இருக்கும் சேமிப்பு மட்டுமே முதலீடு மாதிரியான அடுத்தகட்ட நிதிக் கட்டங்களை நோக்கி உங்களை நகர வைக்கும். அத்தியா வசியமான செலவுகள் போக, பணத்தை மிச்சப்படுத்திச் சேமிக்க ‘பட்ஜெட்’ உதவுகிறது. ஒருவேளை, நீங்கள் பட்ஜெட் போடாமல் செலவு செய்யும் பட்சத்தில் பணம் அநாவசிய செலவுகளில் விரயமாகலாம்! ஆக, நீங்கள் நிதி ரீதியில் பாதுகாப்பாக உணர வேண்டுமெனில் பட்ஜெட் போட்டு செலவு செய்யுங்கள்!’’

பட்ஜெட் போட்டு செலவு செய்யாதபட்சத்தில் ஏற்படும் நஷ்டம் என்ன?

‘‘ஒருவர் பட்ஜெட் போட்டு செலவு செய்யாதபட்சத்தில், தன் வருமானம் பற்றிய முறையான ‘வரவு - செலவு’க் கணக்கு குறித்த தெளிவு அவருக்கு இருக்காது. இதே நிலை தொடர்ந்தால், அநாவசியச் செலவு களுக்கு அதிக மான பணம் விரய மாகலாம். இதனால் அத்தியாவசியத் தேவைக்குக் கடன் வாங்கும் நிலைகூட ஏற்படலாம். இதனால் பொருளாதாரப் பாதுகாப்பின்மை என்பதே இல்லாமல் போய்விடும்.’’

பட்ஜெட்
பட்ஜெட்

வருமானம் குறைவாக இருப்பவர்களும் பட்ஜெட் போட்டு செலவு செய்வது அவசியமா..?

‘‘கண்டிப்பாக அவசியம். நாம் பெரும்பாலும் நமக்கு அவசியமான பொருள்களை வாங்கப் பணத்தைச் செலவிடுவதைவிட, நாம் ஆசைப்பட்ட பொருள்களை வாங்கவே அதிகப் பணத்தைச் செலவிடுகிறோம். நம் மீது திணிக்கப்படும் விளம்பரங்களும் அந்தப் பொருள்களை வாங்க நம்மைத் தூண்டு கின்றன. இதில் அதிகம் பாதிக்கப்படுவது வருமானம் குறைவாக இருக்கும் நபர்களே. இது போன்ற விரயச் செலவு களைத் தவிர்த்துக் கட்டுக் கோப்பாக இருக்க விரும்பும் அனைவரும் பட்ஜெட் போட்டு செலவு செய்ய வேண்டியது அவசியம்.’’

அளவுக்கு அதிகமான வருமானம் உள்ளவர்களுக்கும் பட்ஜெட் தேவையா..?

‘‘தன் தேவைக்கும் மேல் உபரி வருமானம் உள்ளவர்கள் கடைப்பிடிக்க வேண்டிய முக்கிய விதிமுறைகளில் ஒன்று குடும்ப பட்ஜெட்! ஏனெனில் அதிகப்படியான வருமானம் உள்ளபோது பணத்தின் மீது ஓர் அலட்சியப்போக்கு ஏற்படுவது இயல்பு. இதனால் அளவுக்கு அதிகமான அநாவசியச் செலவுகள் செய்வோம். இது ஆரோக்கியமான போக்கு அல்ல. எனவே, நம்மிடமிருக்கும் உபரி வருமானத்தைச் சேமிக்கவும், முதலீடு செய்யவும் பட்ஜெட் வழிவகுக்கும்.’’

திடீரென ஏற்படும் எதிர்பாராத செலவுகளை பட்ஜெட்டுக்குள் கொண்டு வருவது எப்படி?

‘‘உங்கள் பட்ஜெட்டுக்கென குறிப்பிட்ட தொகையை ஒதுக்கி யிருப்பீர்கள். இந்த நேரத்தில் திடீரென வரும் எதிர்பாராத செலவுகளைச் சமாளிப்பது கொஞ்சம் கடினமாகவே இருக்கும். மருத்துவக் கட்டணம், கல்விக் கட்டணம், வீட்டைச் சீரமைக்கும் செலவு என்று ஏதோ ஒரு வகையில் எதிர்பாராத செலவு ஏற்படலாம்.

உங்களுக்கு எந்த விஷயங்களுக்கு எல்லாம் திடீர் பணத் தேவை ஏற்படலாம் என்ப தைச் சிந்தியுங்கள். மேலும், கடந்த காலங்களில் ஏற்பட்ட எதிர்பாராத செலவு களையும் கணக்கில் கொண்டு, ஒரு குறிப்பிட்ட தொகை யை மாதம்தோறும் எடுத்து தனியே வைத்துவிடுங்கள். இது சிறுசேமிப்பு போல இருக்கட்டும். உங்கள் பட்ஜெட் டுக்குள் வராத ஏதேனும் திடீர் செலவு ஏற்படும்பட்சத்தில் இந்தச் சேமிப்பிலிருந்து எடுத்து செலவு செய்துகொள்ளலாம்.’’

வயதான காலத்திலும் பட்ஜெட் அவசியமா..?

‘‘கண்டிப்பாக அவசியம். ஏனெனில், வேலையிலிருந்து ஓய்வு பெற்ற வயதான காலத்திலும் சிலருக்கு பென்ஷன், வீட்டு வாடகை போன்றவற்றிலிருந்து வருமானம் வருவதற்கு வாய்ப்பு உள்ளது. அதைச் சரியான முறையில் செலவு செய்யவும், ஏதேனும் தேவைகளுக்குச் சேமிக்கவும் வயதான காலத்திலும் பட்ஜெட் அவசியமாகிறது.’’

பட்ஜெட் போடுவதற்கு உதவும் கருவிகள் எதுவும் இருக்கின்றனவா..?

‘‘பட்ஜெட் போடுவதற்கென பிரத்யேக கருவிகள் எதுவும் இல்லை. ஒரு டைரி, பேனா மட்டும் போதும். மாதத்தின் ஆரம்பத்தில் உங்கள் பட்ஜெட்டை டைரியில் எழுதி வைத்துக்கொள்ளுங்கள். கூடவே நீங்கள் தினமும் செய்யும் செலவு களையும் எழுதி வைத்துக் கொள்ளவும்.

இதுபோல் குடும்பத்தில் உள்ள ஒவ்வொருவர் செய்யும் செலவை யும் குறித்து வைத்துக்கொண்டு, மாத இறுதியில் அனைவரும் உட்கார்ந்து அதைக் கலந்தாலோ சிக்கும்போது தேவையற்ற செலவுகளைத் தவிர்க்கலாம். டைரிக்கு பதில் கணினியில் எக்ஸ்எல் ஷீட்டில் கூட செலவு களைக் குறித்து வைத்துக் கொள்ளலாம்.’’

பட்ஜெட் போட்டு செலவு செய்யும்போது கடைப்பிடிக்க வேண்டிய முக்கியமான விஷயம் என்ன..?

‘‘பட்ஜெட் போட்ட பின்பு, உங்களின் ஒரு மாதத்துக்கான குடும்பச் செலவுக்கு 30,000 ரூபாய் தேவைப்படுகிறது என்று வைத்துக்கொள்வோம். வங்கியில் ஒரு ஜாயின்ட் அக்கவுன்ட்டைத் தொடங்கி, அந்தக் குறிப்பிட்ட தொகையை மட்டும் அதில் போட்டு வைத்துக்கொள்ள வேண்டும்.

நீங்கள் செய்யும் செலவு களுக்குத் தேவைப்படும் தொகையை அந்த அக்கவுன்ட்டில் இருந்து மட்டுமே எடுக்க வேண்டும். ஒருவேளை, பட்ஜெட்டை மீறி நீங்கள் செலவு செய்தால், அக்கவுன்ட்டில் இருக்கும் தொகை மாத இறுதிக்கு குறைவாக இருக்கும். இது உங்களை அலர்ட் செய்து வீண்செலவுகள் செய்யாமல் தடுக்கும். ஆக, மாத செலவுக்கான தொகையைப் போட்டுவைக்க ஒரு தனி பேங்க் அக்கவுன்ட்டை ஓப்பன் செய்ய வேண்டியது அவசியம்.’’

குடும்ப பட்ஜெட்டால் யாருக்குப் பயன் அதிகம்..?

‘‘குடும்ப பட்ஜெட் போட்டுச் செலவு செய்வதில் குறுகிய கால பயன் என்னவோ அந்தக் குடும்பத்தின் தலைவன் - தலைவிக்கே. ஆனால், இதன் நீண்ட பயன் அக்குடும்பத்தின் குழந்தைகளுக்கே. தங்களின் சிறு வயதிலிருந்தே பட்ஜெட் போட்டு செலவு செய்வதைப் பார்த்து வளரும் குழந்தைகள் பணத்தின் அருமையை உணர்ந்தவர்களாக வளர்வார்கள். எதிர்காலத்தில் தாங்கள் எவ்வளவு சம்பளம் வாங்கினாலும் வீண் செலவு செய்ய மாட்டார்கள். தவறான முதலீடுகளில் இறங்கி பண நஷ்டம் அடையமாட்டார்கள். ஆக குடும்ப பட்ஜெட்டால் அதிகம் பயனடையப் போவது அந்த குடும்பத்தின் வாரிசுகளே! இவர்கள் என்றைக்கும் சிக்கனமாக செலவழித்து, சேமித்து, சிறப்பாக வாழக்கூடியவர்களாக இருப்பார்கள்!’’

பட்ஜெட் பழக்கத்தைக் குழந்தைகளுக்குக் கற்றுத்தருவது எப்படி?

‘‘பட்ஜெட் போடும் பழக்கத்தைக் குழந்தைகளுக்கு படிப்படியாகக் கற்றுத் தர வேண்டியது அவசியம். பள்ளிக் கூடத்தில் குழந்தைகளுக்குத் தினமும் ஒரு குறிப்பிட்ட தொகையை பாக்கெட் மணியாகக் கொடுக்கலாம். மாத இறுதியில் நீங்கள் கொடுத்த பாக்கெட் மணியை அவர்கள் எதையெல்லாம் வாங்கச் செலவிட்டார்கள் என்று கணக்கு கேட்கலாம். அவர்கள் ஏதாவது வீண் செலவு செய்திருந்தால் அதை எடுத்துச் சொல்லிப் புரிய வைக்கலாம். கூடவே பாக்கெட் மணியைச் சேமிக்கவும் கற்றுத் தாருங்கள். குழந்தைகள் ஆசைப்பட்ட பொருளை வாங்கித் தர அவர்களின் சேமிப்பிலிருந்து சிறு தொகையைக் கேளுங்கள். இது அவர்களுக்குப் பணத்தின் மீதான மதிப்பை உணர வைக்கும். சேமிப்பின் அருமையையும் புரிய வைக்கும்."