Published:Updated:

மீண்டும் ஊரடங்கு... கடன் தவணைகளுக்கு சலுகை அளிக்கப்படுமா? அடிக்கடி கேட்கப்படும் கேள்விகள்

F A Q H O M E L O A N

பிரீமியம் ஸ்டோரி

கொரோனா பாதிப்பு காரணமாகச் சிலருக்கு வேலை இழப்பு, சம்பளக் குறைப்பு ஏற்பட்டது. இதனால், கடன் வாங்கிய பலரால் திரும்பச் செலுத்த முடியாத சூழல் உருவானது. இதை அடுத்து ரிசர்வ் வங்கி, குறித்த கால கடன்களைத் (Term Loans) திரும்பக் கட்டுவதில் சலுகை அறிவித்தது. இது குறித்து அடிக்கடி கேட்கப்படும் கேள்விகள் வருமாறு...

கொரோனா காரணமாக, பொதுமக்கள் வங்கி / நிதி நிறுவனங்களிடமிருந்து வாங்கியிருந்த கடன்களுக்கான இ.எம்.ஐ-யை (மாதத் தவணை) திருப்பிச் செலுத்த ரிசர்வ் வங்கி கால அவகாசம் கொடுத்தது. இது எந்தெந்த வகை கடன்களுக்குப் பொருந்தும்?

“கிரெடிட் கார்டு கடன், வீட்டுக் கடன், பர்சனல் லோன், கார் கடன் என அனைத்துவிதமான குறித்த காலக் கடன்களுக்குப் பொருந்தும்.”

மீண்டும் ஊரடங்கு... கடன் தவணைகளுக்கு சலுகை அளிக்கப்படுமா? அடிக்கடி கேட்கப்படும் கேள்விகள்

மாதத் தவணையைத் திருப்பிச் செலுத்த ரிசர்வ் வங்கி கொடுத்திருந்த கால அவகாசம் எவ்வளவு, எந்த மாதத்திலிருந்து எந்த மாதம் வரை..?

“முதலில் 2020 மார்ச், ஏப்ரல், மே என மூன்று மாதங்களுக்கு மாதத் தவணை கட்டுவதிலிருந்து விலக்கு அளிக்கப்பட்டது. இந்தக் காலகட்டத்தில் நாட்டின் பொருளாதார நிலை மற்றும் தனிநபர்களின் நிதிநிலை சீராகவில்லை என்பதால், ஜூன், ஜூலை. ஆகஸ்ட் என மேலும் மூன்று மாதங்களுக்கு என மொத்தம் ஆறு மாதங்களுக்கு கடன் தவணை கட்டுவதிலிருந்து விலக்கு அளித்தது ரிசர்வ் வங்கி.”

கடன் தவணையைக் கட்டாமல் விட்டதால் கிரெடிட் ஸ்கோர் பாதிக்கப்படுமா?

“பாதிக்கப்படாது என ரிசர்வ வங்கி உறுதி அளித்திருக்கிறது.’’

அந்த ஆறு மாதங்களுக்கான வட்டி தள்ளுபடி செய்யப்பட்டுள்ளதா?

“இந்த ஆறு மாத தவணைக் காலத்தில் கடனுக்கான வட்டி போடப்பட்டது. கூடவே வட்டிக்கு வட்டியும் போடப் பட்டது. இந்த நிலையில், உச்ச நீதி மன்றத்தில் கடனுக்கான வட்டி மற்றும் வட்டிக்கு வட்டி போடப்பட்டதை தள்ளுபடி செய்யக் கோரி வழக்கு தொடரப்பட்டது. ‘வட்டியை முழுமை யாகத் தள்ளுபடி செய்தால், டெபாசிட் தாரர்களுக்கு வட்டி கொடுக்க முடியாது. வங்கிகளின் நிதிநிலைமை மிகவும் மோசமாகப் பாதிக்கப்படும் என்று சொன்ன ரிசர்வ் வங்கி, ‘வட்டிக்கு வட்டி’ கட்ட வேண்டியதில்லை என்று அதை மட்டும் தள்ளுபடி செய்தது. கடன் தவணையைக் கட்டுவதில் அளிக்கப்பட்ட விலக்கை ஆறு மாதங்களுக்கும் மேலே நீடிக்க மத்திய அரசும் ரிசர்வ் வங்கியும் மறுத்துவிட்டன.”

வட்டிக்கு வட்டியாகப் போடப்பட்ட தொகை திரும்பவும் கடன்தாரர்களுக்கு அளிக்கப்பட்டதா?

“இந்தத் தொகையைக் கடன் வாங்கிய வர்களுக்கு திரும்ப அளிக்க ரிசர்வ் வங்கி உத்தரவிட்டது. அதன்படி, வட்டிக்கு வட்டியாகப் போடப்பட்ட தொகை ஈடுசெய் யப்பட்டது.”

ஆறு மாத நிலுவைத் தொகைக்கு (அசல்/வட்டி) கூட்டுவட்டி/அபராத வட்டியெல்லாம் உண்டா அல்லது வழக்கமான வட்டியை மட்டும் செலுத்தினால் போதுமா?

“வழக்கமான வட்டி மட்டும் போடப்பட்டது. இந்த வட்டி யானது கடன் தொகையுடன் சேர்ந்ததால், கடனைக் கட்டி முடிக்கும் காலம் சில மாதங்கள் முதல் பல மாதங்கள் வரை கடன் காலத்தைப் பொறுத்து அதிகரிக்கும்.”

2020 மார்ச் மாதம் கொரோனா வந்ததிலிருந்து இதுநாள் வரை மாதத் தவணையை (அசல் மற்றும் வட்டி) செலுத்தவே இல்லை. இப்போது செலுத்த வேண்டும் எனில், மொத்தமாக அனைத்துத் தவணைகளையும் சேர்த்து செலுத்த வேண்டுமா, இதற்கு வட்டிக்கு வட்டி போடுவார்களா?

“2020 மார்ச் முதல் 2020 ஆகஸ்ட் வரைக்கும் வட்டி மட்டும் போட்டிருப்பார்கள். செப்டம்பர் மாதமும் கட்ட வில்லை எனில், அதன் பிறகு வட்டிக்கு வட்டி போட்டிருப் பார்கள். இப்படி மூன்று மாதம் கட்டவில்லை எனில், அது வாராக்கடனாக (NPA) மாறிவிடும். அதன் பிறகு, வட்டி போடுவதை நிறுத்திவிட்டு, அதை வாராக் கடனாக அறிவித்துவிடுவார்கள். இந்த நிலையில், வங்கி அல்லது நிதி நிறுவனத்திடம் பேசி பாக்கித் தவணைகளை மொத்தமாகக் கட்டி கடனை செயல்பாட்டுக்கு கொண்டு வர வாய்ப்புள்ளது. அதன் பிறகு பாக்கி கடன் தவணை மூன்று மாதங்களுக்கு மேல் அதிகரிக்காமல் பார்த்துக் கொள்வது அவசியம். அப்படி இல்லை எனில், மீண்டும் அது வாராக்கடனாக மாற வாய்ப்புள்ளது.”

தற்போது மீண்டும் கொரோனா ஊரடங்கு ஆரம்பமாகியிருப்பதால், பலதரப்பட்ட நிறுவனங்களில் பணியாற்றுபவர்களும் திண்டாட்டத்தில் உள்ளனர். மீண்டும் மாதத் தவணைக்கான கால அவகாசம் கிடைக்க வாய்ப்பிருக்கிறதா?

“ஏற்கெனவே மாதத் தவணை சிக்கலில் மாட்டியவர்களில் ஒரு பகுதியினர் அதிலிருந்து மீளமுடியாமல் தவித்து வருகிறார்கள். காரணம், கடனைத் திரும்பச் செலுத்துவதில் உள்ள விதிமுறை களைச் சரியாகத் தெரிந்து வைத்திருக்காதது மற்றும் வங்கி, நிதி நிறுவனம், வீட்டுவசதி நிறுவனம் ஆகியவை கடனைத் திரும்பச் செலுத்துவதில் உள்ள விதிமுறைகளைக் கடன் வாங்கியவர்களுக்கு சரியாக விளக்கிச் சொல்லாததாக இருக்கிறது.

பலருக்கு சொந்த வீடு என்பது வாழ்நாள் கனவு, அந்தஸ்தாக இருக்கிறது. எனவே, பி.எஃப், பி.பி.எஃப், எண்டோவ்மென்ட் பாலிசி, மியூச்சுவல் ஃபண்ட் போன்ற முதலீடுகள் இருந்தால் அதிலிருந்து பணம் எடுத்தோ, அடமானம் வைத்தோ, நகையை அடமானம் வைத்தோ நிலைமையைச் சமாளிப்பது தான் பெஸ்ட். வீட்டுக் கடன் தவணையை மீண்டும் தள்ளிக் கட்டும் சலுகையை ரிசர்வ் வங்கி அறிவிக்குமா என்பது சந்தேகமே!”

ஆர்.கணேசன்
ஆர்.கணேசன்

வீடு எப்போது ஏலத்துக்கு வரும்?

வீட்டுக் கடன் துறையில் நீண்ட அனுபவம் கொண்டவரும் நவரத்னா ஹவுஸிங் ஃபைனான்ஸ் நிறுவனத்தின் முதன்மைச் செயல் அதிகாரியுமான ஆர்.கணேசன், “பொதுவாக, எந்த ஒரு கடனாக இருந்தாலும் தொடந்து மூன்று தவணைகள் (3 மாதங்கள் – 90 நாள்கள்) கட்டவில்லை எனில், அது வாராக்கடனாக (Non-Performing Asset - NPA) மாறிவிடும். இப்படிக் கடனானது வாராக்கடனாக மாறிவிட்டால், பாக்கி உள்ள தவணைகளை வங்கியானது மொத்தமாக கட்டச் சொல்லும். அப்படிக் கட்டவில்லை எனில், முழுக் கடனையும் கட்டச் சொல்லும். அப்படியும் கட்டவில்லை எனில், வீட்டை ஏலத்துக்கு விட்டு பாக்கித் தொகையை எடுத்துக்கொள்ளும் நடவடிக்கையை வங்கி எடுக்கும். இது தொடர்பாகக் கடன் வாங்கியவருக்கு நோட்டீஸ் அனுப்பும். அப்படியும் அவர் கடனைக் கட்டவில்லை எனில், நீதிமன்ற நடவடிக்கை மூலம் வீட்டை அதன் பொறுப்பில் எடுத்துக்கொள்ளும்.

கொரோனா பாதிப்பு காரணமாக ஆறு மாதங்கள் தவணையில் விலக்கு அளிக்கப்பட்டது. அதாவது, 2020 மார்ச் முதல் ஆகஸ்ட் வரை விலக்கு அளிக்கப்பட்டது. ஒருவர் 2020 செப்டம்பர், அக்டோபர், நவம்பர் வரை கடனைக் கட்டாமல் டிசம்பரிலிருந்து தவணையைக் கட்டத் தொடங்கியிருந்தால் சிக்கல் இல்லை. பொதுவான விதிமுறைப்படி, 90 நாள்களுக்கு மேல் தொடர்ந்து கடன் தவணை கட்டவில்லை எனில், அது வாராக்கடன் ஆகிவிடும். தற்போதைய நிலையில், 9 தவணைகளுக்கு மேல் பாக்கி இருக்கும் நிலை காணப்பட்டால், வங்கி, நிதி நிறுவனம் அல்லது வீட்டு வசதி நிறுவனம் பாக்கி உள்ள தவணைகளை மொத்தமாகக் கட்டி சீர்செய்தால் மட்டுமே மேற்கொண்டு மாதத் தவணைகளைக் கட்ட அனுமதிக்கும். இல்லையெனில், வாராக் கடனாக எடுத்துக்கொண்டு, சட்டபடியான நடவடிக்கையில் இறங்கி, வீட்டை ஏலம் விட ஏற்பாடு செய்யும். எனவே, பணத்துக்கு ஏதாவது ஏற்பாடு செய்து பாக்கித் தவணை களை மொத்தமாகக் கட்டி, கடனை செயல்பாட்டுக்குக் கொண்டு வருவதுதான் புத்திசாலித்தனம்” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு