Published:Updated:

நிதி நிர்வாகத்தில் அலட்சியம் வேண்டாமே!

தலையங்கம்
பிரீமியம் ஸ்டோரி
தலையங்கம்

தலையங்கம்

நிதி நிர்வாகத்தில் அலட்சியம் வேண்டாமே!

தலையங்கம்

Published:Updated:
தலையங்கம்
பிரீமியம் ஸ்டோரி
தலையங்கம்

நம் மக்களில் கணிசமானவர்கள் ஃபேஸ்புக் வலைதளத்தைத் தொடர்ந்து பயன்படுத்துகிறார்கள். பல்வேறு விஷயங்களைப் படிப்பதற்கும், படித்ததை உடனே பகிரவும் எளிதாக இருப்பதே இதற்குக் காரணம். ஆனால், இதன்மூலம் நமக்கு வரும் தகவல்கள் அனைத்தும் சரியானவையா என்று நம்மால் பார்க்க முடிவதில்லை. அதிலும் குறிப்பாக, முதலீடு, எதிர்காலச் சேமிப்பு தொடர்பான சில தகவல்கள் வந்துவிட, அதை உண்மை என்று நம்பி பலரும் பலருக்கும் பகிர, அந்தத் தவறான தகவல் அனைவருக்கும் பரவி, அதுவே சரி என்று நினைக்கும் அபாயமான சூழல் உருவாகிவிடுகிறது.

சில தினங்களுக்கு முன், ‘‘சுகன்யா சம்ருதி திட்டத்தில் வருடம்தோறும் ரூ.1000 வீதம் 14 ஆண்டுகள் கட்டினால், உங்கள் மகள் 21 வயதாகும்போது ரூ.6 லட்சம் கிடைக்கும். இந்த லாபத்தைப் பெற தவறாதீர்கள்’’ என்கிற தகவல் ஃபேஸ்புக்கில் வர, இதைப் படித்த பலரும் உண்மை என்று நம்பி பகிர்ந்திருக்கிறார்கள். இந்தத் திட்டத்தை சரிவரப் புரிந்துகொள்ளாமல் பலரும் பலவாறாகப் பரப்பி வருகின்றனர்.

இந்தத் தகவல் பிழையானது என்பதை மேலோட்டமாகப் பார்த்தாலே புரியும். ஆண்டுக்கு ரூ.1,000 வீதம் 14 ஆண்டுகள் கட்டினால், 21 ஆண்டுகள் கழித்து வட்டியுடன் ரூ.39,297 மட்டுமே கிடைக்கும். நிச்சயமாக, ரூ.6 லட்சம் கிடைக்காது. அப்படிக் கிடைக்க வேண்டுமானால், 100 சதவிகிதத்துக்குமேல் வட்டி கிடைக்க வேண்டும். ஆனால், இந்தத் திட்டத்தின் தற்போதைய வட்டி விகிதம் 7.6% மட்டுமே. சரி, மாதம்தோறும் ரூ.1,000 கட்டினால்கூட, ரூ.6 லட்சம் கிடைக்காது. அதாவது, ரூ.1,000 வீதம் 14 ஆண்டுகளுக்கு (168 மாதங்கள்) கட்டினால் மொத்தம் ரூ.1,68,000 கட்டுவார். 21 ஆண்டு கழித்து அதை எடுத்தால், ரூ.4,71,568 மட்டுமே கிடைக்கும்.

உண்மை இப்படி இருக்க, இந்தக் கணக்கு தெரியாமல் ஏதோ ஓர் ஆசையில் இந்தத் திட்டத்தில் பணத்தைப் போட்டு வைத்து என்ன பிரயோஜனம்? ‘நிறைய கிடைக்கும் என்று நினைத்து பணம் போட்டோம்; ஆனால், குறைவாகத்தானே கிடைக்கிறது’ என்று பிற்பாடு வருந்துவதைவிட, எந்தத் திட்டமாக இருந்தாலும் அதில் பணம் சேர்க்கத் தொடங்கும் முன்பே எவ்வளவு வருமானம் வரும் என்பதைத் தெளிவாகத் தெரிந்துகொண்டு செயல்படுவதுதானே சரி.

காப்பீட்டுக்கும் சேமிப்புக்கும், முதலீட்டுக்கும் உள்ள வித்தியாசத்தைத் தெரிந்துகொள்ளாமல்தான் இன்றைக்கும் பலரும் இருக்கிறார்கள். இவற்றுக்குள்ள வித்தியாசங்களை சரியாகப் புரிந்துகொள்ளவில்லை எனில், நாம் எவ்வளவுதான் சம்பாதித்தாலும், அதன்மூலம் லாபம் ஈட்ட முடியாத நிலையிலேயே இருப்போம்.

நமக்குத் தேவையில்லாத பல விஷயங்களைக் கஷ்டப்பட்டுப் புரிந்து கொள்ளும் நம் மக்கள், கஷ்டப்பட்டு சம்பாதித்த பணத்தை சரியான முறையில் முதலீடு செய்து, அதைப் பலமடங்காக உயர்த்தத் தேவையான அறிவை பெறாமலே இருக்கிறார்கள். இந்தத் தவற்றைத் திருத்திக்கொண்டால் மட்டுமே எதிர்காலத்தில் அவர்கள் குறைவற்ற செல்வத்துடன் இருப்பார்கள்!

- ஆசிரியர்