Published:Updated:

#GDP: வரலாறு காணாத ஜி.டி.பி வீழ்ச்சி... என்ன செய்யப்போகிறது மத்திய அரசு?

நரேந்திர மோடி
நரேந்திர மோடி

நம்பிக்கை தரும் வகையில் விவசாயத்துறை மட்டும் 3.4 சதவிகித வளர்ச்சியைக் கண்டுள்ளது. கடந்த நிதியாண்டில் இதன் வளர்ச்சி விகிதம் 3 சதவிகிதமாக இருந்தது.

ஏற்கெனவே மோசமான பொருளாதார மந்தநிலையை நாடு எதிர்கொண்டு வரும் வேளையில், கொரோனா பாதிப்பு காரணமாக மொத்த உள்நாட்டு உற்பத்தியில் (ஜி.டி.பி) மிகப்பெரிய தாக்கம் ஏற்பட்டுள்ளது

அதாவது, நடப்பு நிதி ஆண்டின் முதல் காலாண்டில் (ஏப்ரல்-ஜூன்) இந்தியாவின் மொத்த உள்நாட்டு உற்பத்தி -23.9 சதவிகிதம் சரிவைச் சந்தித்துள்ளது. இது கடந்த மிகப்பெரிய சரிவாகும்.

ஜி.டி.பி என்பது...

ஜிடிபி என்பது குறிப்பிட்ட நிலப்பரப்பில் அல்லது நாட்டில் குறிப்பிட்ட கால இடைவெளியில் கணக்கிடப்படும் மொத்த உள்நாட்டு உற்பத்தி (Gross Domestic Product) ஆகும். இதன் மூலம் ஒரு நாட்டின் பொருளாதாரம் கணக்கிடப்படுகிறது. அந்த நாட்டின் பொருளாதாரம் குறிப்பிட்ட காலகட்டத்தில் அதிகரித்துள்ளதா அல்லது குறைந்துள்ளதா என்பதைக் கண்டறியவும் அந்நாட்டின் மொத்த உள்நாட்டு உற்பத்தி கணக்கிடப்படும். இதன்மூலம் பணவீக்கம் மற்றும் பண மதிப்பு அதிகரித்துள்ளதா என்பதைத் தெரிந்துகொள்ள முடியும்.

-23.9% சரிவு!

நாட்டின் ஜி.டி.பி மதிப்பு கடந்த 2019-20-ம் ஆண்டின் முதல் காலாண்டில் 35,35,000 கோடி ரூபாயாக இருந்தது. அந்த நிதி ஆண்டின் முதல் காலாண்டில் பதிவான 5.2 சதவிகித வளர்ச்சியுடன் ஒப்பிடும்போது, இந்த ஆண்டு -23.9 சதவிகிதமாகச் சரிந்ததாக தேசிய புள்ளியியல்துறை அலுவலக அறிக்கை கூறுகிறது.

Economy
Economy

குறிப்பாக, உற்பத்தி துறை 39.3 சதவிகித சரிவைச் சந்தித்துள்ளது. சுரங்கத்துறை -23.3 சதவிகித சரிவையும், மின்சாரத்துறை -7 சதவிகித சரிவையும், பொதுத்துறை -10 சதவிகித சரிவையும் ஹோட்டல்/டிரான்ஸ்போர்ட் -47 சதவிகித சரிவையும், கட்டுமானம் -50 சதவிகித சரிவையும், தனியார் துறை -27 சதவிகித சரிவையும் சந்தித்துள்ளன. நம்பிக்கை தரும் வகையில் விவசாயத்துறை மட்டும் 3.4 சதவிகித வளர்ச்சியைக் கண்டுள்ளது. கடந்த நிதியாண்டில் இதன் வளர்ச்சி விகிதம் 3 சதவிகிதமாக இருந்தது.

ராகுல் ட்வீட்!

``ஜி.டி.பி கிட்டத்தட்ட -24 சதவிகிதம் வீழ்ச்சியை சந்தித்திருப்பது, இந்திய சுதந்திர வரலாற்றிலேயே இல்லாத ஒன்று. துரதிர்ஷ்டவசமாக இந்த விவகாரத்தில் ஆரம்பம் முதலே தங்களுடைய எச்சரிக்கையை இந்திய அரசு உதாசீனப்படுத்தி வந்தது" எனத் தமது ட்விட்டர் பக்கத்தில் குறிப்பிட்டுள்ளார் ராகுல் காந்தி.

ப.சிதம்பரம் திட்டு!

ஜி.டி.பி வீழ்ச்சி குறித்து பேசியிருக்கும் ப.சிதம்பரம், ``விவசாயத்துறை நீங்கலாக பொருளாதாரத்தின் ஒவ்வொரு துறையும் கடுமையாக வீழ்ச்சியடைந்துள்ளது. இந்த மதிப்பீடுகள் எங்களுக்கு ஆச்சர்யமாக இல்லை. ரிசர்வ் வங்கி ஏற்கெனவே 2020-ம் ஆண்டின் முதல் பாதியில் வீழ்ச்சி என்பது பரவலாகவும் ஆழமாகவும் மேலும் மேலும் இருக்கும் என்று சுட்டிக்காட்டியிருக்கிறது. மேலும், பெரும் மந்தநிலை மற்றும் 2008-ல் ஏற்பட்ட உலகளாவிய நிதி நெருக்கடியைவிட அழிவுகரமானதாக அது இருக்கும் என்றும் கூறியுள்ளது.

ப.சிதம்பரம்
ப.சிதம்பரம்

இந்திய பொருளாதாரம் மீண்டும் சீரான நிலைக்கு வந்து, சாதகமான வளர்ச்சிக்குத் திரும்ப பல மாதங்களாகலாம். ஆனால், அரசின் தற்போதைய செயலற்ற நிலை விரைவில் இந்த பிரச்னைக்கு விடிவு காலத்தை தரும் என்ற நம்பிக்கையை அளிக்கவில்லை" என்றார்.

மேலும், ``பொருளாதார வீழ்ச்சியை `கடவுளின் செயல்' என்று குற்றம் சாட்டிய நிதியமைச்சர், விவசாயிகளுக்கும் விவசாயிகளை ஆசீர்வதித்த கடவுள்களுக்கும் நன்றியுடன் இருக்க வேண்டும்" என்று ப.சிதம்பரம் தெரிவித்துள்ளார்.

நிலைமை சரியாகும்!

வரலாறு காணாத வகையில் ஜிடிபி வீழ்ச்சியடைந்திருந்தாலும் இரண்டாவது காலாண்டில் நிலைமை சரியாகிவிடும் என்று தலைமைப் பொருளாதார ஆலோசகர் கே.வி.சுப்பிரமணியன் கூறியுள்ளார்.

கே.வி.சுப்பிரமணியன்
கே.வி.சுப்பிரமணியன்

இது குறித்து அவர் பேசியபோது, ``கொரோனாவின் தாக்கம் உலகம் முழுவதுமே இருந்து வருகிறது. தற்போதைய முதலாம் காலாண்டு ஜிடிபி சரிவு என்பது எதிர்பார்த்த பாதையில்தான் வந்துள்ளது. 1870 ஆண்டுக்குப் பின் உலக நாடுகளில் ஜிடிபி இவ்வளவு மிக மோசமான பாதிப்பை இப்போதுதான் சந்தித்துள்ளது. பிற நாடுகளைப் போல முதலாம் காலாண்டில் இந்தியாவும் லாக்டௌனை அமல்படுத்தியது. இதன் காரணமாக இந்தியாவில் நுகர்வு விகிதமானது 27 சதவிகிதமாகக் குறைந்திருக்கிறது. இது நிச்சயமாக ஜி.டி.பி-யில் பாதிப்பை ஏற்படுத்தவே செய்யும்" எனக் குறிப்பிட்டிருக்கிட்டிருக்கிறார்.

அடுத்த கட்டுரைக்கு