பங்குச் சந்தை
நடப்பு
Published:Updated:

முடிவுக்கு வரும் லிபார் வட்டி விகிதம்..! பின்னணி என்ன..?

லிபார் வட்டி விகிதம்
பிரீமியம் ஸ்டோரி
News
லிபார் வட்டி விகிதம்

L I B O R

பன்னாட்டு நிதிச் சந்தையில் டெபாசிட்டுகளைப் பெறவும் கடன்களை வழங்கவும் உலகின் பெரும்பாலான வங்கிகளால் பயன்படுத்தப்படும் வட்டி விகிதம் லிபார் (LIBOR) ஆகும். சர்வதேச நிதிச் சந்தையில் சுமார் 400 ட்ரில்லியன் டாலர் மதிப்பிலான (இந்திய ஜி.டி.பி-யைப் போல நூறு மடங்குக்கும் மேல்) டெபாசிட்டுகள்/ கடன்கள் லிபார் விகிதத்துடன் இணைக்கப்பட்டுள்ளதாக சந்தை நிபுணர்களால் மதிப்பிடப் பட்டுள்ளது. இந்தியாவிலும்கூட பெரும்பாலான அந்நிய செலாவணிக் கடன்களின் வட்டித் தொகையும் லிபார் அடிப்படையிலேயே கணக்கிடப்படுகிறது. ஆனால், இந்த லிபார் வட்டி விகிதத்தை 1.1.2022 முதல் இந்திய வங்கிகள் பயன்படுத்தக் கூடாது என ரிசர்வ் வங்கி தற்போது அறிவுறுத்தியுள்ளது.

லிபார் என்றால் என்ன..?

லண்டன் நிதிச் சந்தையில் நடைபெறும் தினசரி வர்த்தகத்தை அடிப்படையாகக் கொண்டு நிர்ணயிக்கப்படும் வங்கிகளுக்கு இடையேயான கடன்களுக்கான வங்கி-வட்டி விகிதமே லிபார் (London Based Interbank Rate) என்று அழைக்கப்படுகிறது.

இந்த லிபார் விகிதத்தை லண்டன் நிதிச் சந்தையில் பங்கு பெறும் 16 பெரும் பன்னாட்டு வங்கிகள் கூட்டாக நிர்ணயிக் கின்றன. நிதிச் சந்தைகளின் தினசரி செயல்பாட்டின் அடிப்படையில் ஒவ்வொரு நாளும் கணக்கிடப்படும் இந்த லிபார் வட்டிவிகிதம், ஒரு மாதம், இரண்டு மாதம் என மாதங்கள் கணக்கிலும் ஒன்று இரண்டு என ஆண்டுகள் கணக்கிலும் நிர்ணயிக்கப் படுகின்றன. லிபார் வட்டி விகிதத்தின் அடிப்படையில் நிர்ணயிக்கப்படும் (டெபாசிட் தொகை மற்றும் கடன்களின் மீதான) வட்டி விகிதங்கள் குறிப்பிட்ட கால இடைவெளியில் திருத்தியமைக்கப் படுகின்றன.

முடிவுக்கு வரும் லிபார் வட்டி விகிதம்..! பின்னணி என்ன..?

உலகை உலுக்கிய லிபார் ஊழல்...

டாயிஸ்ச் பேங்க், சிட்டி பேங்க், ராயல் பேங்க் ஆஃப் ஸ்காட்லாண்ட், பர்க்லேஸ் பேங்க் போன்ற பன்னாட்டு வங்கிகள், லிபார் வட்டி விகிதத்தை கூட்டாக நிர்ணயம் செய்யும் விவகாரத்தில் பெரும் முறைகேட்டில் ஈடுபட்டு வந்தன என்ற தகவல் 2012-13-ல் பொது வெளியில் கசிந்தபோது நிதிச் சந்தைகள் அதிர்ச்சியில் உறைந்து போயின. நிதிச் சந்தையில் தமது தனிப்பட்ட லாப நோக்கத்துக்காக, குறிப்பிட்ட சில வங்கிகள் லிபார் விகிதங்களைக் கூடுதலாகவோ, குறைவாகவோ மாற்றியமைத்த தகவல், லிபார் வட்டி விகித பயன் பாட்டின் மீதான பல்லாண்டு நம்பகத்தன்மையைக் கேள்விக் குள்ளாகிவிட்டது.

ஏற்கெனவே கூறியதுபோல, பல ட்ரில்லியன் மதிப்புள்ள கடன்களும் டெபாசிட்டுகளும் லிபார் வட்டி விகிதத்தைச் சார்ந்திருந்த நிலையில், மிகப் பெரும் பண இழப்பு நேரிட்டிருந்தாலும் அந்த இழப்பு மிகப் பரவலாகப் பகிரப்பட்டிருந்ததால் தனிப்பட்ட முறையிலான இழப்பு குறித்த விவரங்கள் முழுமையாக வெளியாகவில்லை. மேலும், பொது ஊடகங்களிலும் இந்த விவகாரம் அதிகம் கவனம் பெறவில்லை.

களை இழந்த லிபார் மார்க்கெட்...

லிபார் விவகாரம் வெளிவந்த பின்னர், லிபார் நிர்ணயம் மீதான பொறுப்பு பிரிட்டிஷ் வங்கிகள் சங்கத்திடமிருந்து பிரிட்டிஷ் அரசாங்கத்துக்கு மாற்றப்பட்டது. பின்னர் லிபார் வட்டி விகித நிர்ணயப் பொறுப்பு அமெரிக்காவைச் சார்ந்த இண்டர் கன்டிநென்டல் எக்ஸ்சேஞ்ச்க்கு மாற்றப் பட்டத்துடன் ‘ஐஸ் லிபார்’ என்ற புதிய பெயரும் வழங்கப்பட்டது. மேலும், லிபார் வட்டி விகிதத்தை 2021-ம் ஆண்டு வரை மட்டுமே தொடர அனுமதிக்க முடியும் என்று பிரிட்டிஷ் அரசின் நிதி கட்டுப்பாட்டு அமைப்பு தெரிவித்துவிட்டது. அமெரிக்க மத்திய வங்கியும் லிபாருக்கு மாற்றாக ‘சோஃபர்’ (Secured Overnight Financing Rate) என்ற புதிய வட்டி விகிதத்தை அறிவித்துள்ளது. அரசுக் கடன் பத்திரங்களின் வர்த்தகத்தின் அடிப்படையில் அமைவதால் இந்தப் புதிய வட்டி விகிதம் அதிக துல்லியமானதாக இருக்கும் என்று எதிர்பார்க்கப்படுகிறது.

லிபார் மாற்றம் ஏற்படுத்தக்கூடிய பாதிப்புக்கள்...

இந்தியாவின் மிகப்பெரிய வங்கிகளான ஸ்டேட் பாங்க் ஆஃப் இந்தியா மற்றும் ஐ.சி.ஐ.சி.ஐ பேங்க் ஆகியவை ஏற்கெனவே ‘சோஃபர்’ வட்டி விகிதத்தின் அடிப்படையில் அந்நியச் செலாவணி பரிவர்த்தனைகளை பரிட்சார்த்த முறையில் மேற்கொள்ள தொடங்கிவிட்டன. மற்ற இந்திய வங்கிகளும் கூடியவிரைவில் புதிய வட்டி விகித முறைக்கு மாறிவிடும் என்பதால் லிபார் வட்டி விகிதம் முடிவுக்கு வருவது இந்திய நிதிச் சந்தைகளில் பெரும் தாக்கத்தை ஏற்படுத்தாது என்றும் எதிர்பார்க்கப்படுகிறது. அதே சமயம், பல்லாண்டுக் காலம் சர்வதேச நிதிச் சந்தையில் முழு ஆதிக்கம் செலுத்திய லிபார் வட்டி விகிதம் தனிப்பட்ட சிலரின் பேராசையால் சட்டென முடிவுக்கு வந்திருப்பது வருத்தத் துக்குரிய விஷயம்தான்.