Published:Updated:

பெரும் பணக்காரராக உங்களுக்கு உதவும் 8 விஷயங்கள்..! இவற்றில் குறை வைக்காதீர்கள்...

பண நிர்வாகம்
பிரீமியம் ஸ்டோரி
பண நிர்வாகம்

M O N E Y M A N A G E M E N T

பெரும் பணக்காரராக உங்களுக்கு உதவும் 8 விஷயங்கள்..! இவற்றில் குறை வைக்காதீர்கள்...

M O N E Y M A N A G E M E N T

Published:Updated:
பண நிர்வாகம்
பிரீமியம் ஸ்டோரி
பண நிர்வாகம்

ஓருவர் பெரும் பணக்காரராக இருப்பதற்கும், பணப் பற்றாக்குறையுடன் இருப்பதற்கும் மிக முக்கியமான வித்தியாசம், அவர் பண நிர்வாகத்தை எந்தளவுக்கு சரியாகச் செய்து கொண்டிருக்கிறார் என்பதைப் பொறுத்ததுதான். பண நிர்வாகத்தில் பாதிப்பை ஏற்படுத்தும் எட்டு விஷயங்களைப் பற்றி நாம் தெரிந்துகொண்டாலே போதும், நாமும் பெரும் பணக்காரராக மாறிவிட வாய்ப்புண்டு. அந்த எட்டு விஷயங்கள் என்னென்ன?

சிவகாசி 
மணிகண்டன் 
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

1. ரொக்கப் பணம்...

கையில் இருக்கும் அல்லது உடனடியாகப் பணமாக்கக்கூடிய முதலீடுகளுக்கு இருக்கும் வலிமை வேறு எதற்கும் இல்லை. ‘கேஷ் இஸ் கிங்’ என்பார்கள். ஒருவர் எவ்வளவு பணத்தை ரொக்கமாக வைத்திருக்க வேண்டும்? மிக அவசர செலவுக்கு குறைந்தது ஒரு மாத சம்பளத்தையாவது ரொக்க மாக வைத்திருக்க வேண்டும். ரொக்கப் பணம் என்பது கையில் இருக்கும் பணத்துடன் ஏ.டி.எம் வசதி உள்ள சேமிப்புக் கணக்கிலிருக்கும் பணத்தையும் குறிக்கும். இதற்காக நிறைய பணத்தை எடுத்து பீரோவில் வைத்திருக்க வேண்டும் என்கிற அவசியம் இல்லை. அவசர நிலையைச் சமாளிக்க முடிகிற அளவுக்கு இருந்தாலே போதும்.

2. அவசரகால நிதி...

மொத்த மாதச் சம்பளத்தை / செலவைப் போல் 3 முதல் 6 மடங்கு தொகையை அவசரகால நிதியாகச் சேமித்து வைத்திருக்க வேண்டும் என்பது பொதுவான விதிமுறை. கொரோனா பாதிப்பு வந்தபின் இதை 12 மடங்கு வரை சேமித்து வைப்பது பாதுகாப்பானது எனலாம். இங்கே மொத்தச் சம்பளம் என்பது ஒருவருக்கு சம்பளத்தில் பிடித்தம் செய்வதற்கு முந்தைய தொகையாகும். அப்போது தான் ஏதாவது சிக்கல் எனில், குடும்பச் செலவுகள், கடன் இ.எம்.ஐ, ஆர்.டி, எஸ்.ஐ.பி, தங்கநகை சேமிப்புத் திட்டம் போன்ற முதலீடுகளைத் தொடர்ந்து செய்ய முடியும்.

இந்த அவசரகால தொகையை ஒரே நாளில் சேர்க்க முடியாது. ஆனால், மாதம் சில ஆயிரங்களைச் சேர்ப்பதன் மூலம் குறிப்பிட்ட காலத்துக்குள் இந்தத் தொகையைத் தாராளமாகச் சேர்த்துவிட முடியும். இந்தத் தொகையை ஓரிரு நாள்களில் பணமாக்கக்கூடிய திட்டங்களில் முதலீடு செய்து வைத்திருப்பது நல்லது.

பெரும் பணக்காரராக உங்களுக்கு உதவும் 8 விஷயங்கள்..! இவற்றில் குறை வைக்காதீர்கள்...

3. ஈக்விட்டி மியூச்சுவல் ஃபண்டுகள்...

சொந்த வீடு, பிள்ளைகளின் கல்வி, கல்யாணம், உங்களின் ஓய்வுக்காலம் மற்றும் செல்வம் சேர்க்க நீண்டகாலத்தில் உதவி செய்வதாக ஈக்விட்டி மியூச்சுவல் ஃபண்டுகள் உள்ளன. இந்த ஃபண்டுகள் குறுகிய காலத்தில் அதிக ரிஸ்க்காக இருந்தாலும், நீண்டகாலத்தில், ரிஸ்க்கைப் பரவலாக்கி அதிக வருமானத்தைத் தருவதாக இருக்கிறது. மேலும், இந்த ஃபண்ட் மூலம் கிடைக்கும் லாபத்துக்கு சிறிய அளவில் வரி கட்டினால் போதும். அதாவது, ஃபண்ட் மூலம் கிடைக்கும் லாபத்தில் ரூ.1 லட்சம் வரை வரி கட்டத் தேவையில்லை. மீதியுள்ள தொகைக்கு 10% வரி கட்டினால் போதும். உதாரண மாக, ஒருவர் ஈக்விட்டி ஃபண்டில் ரூ.3 லட்சம் முதலீடு செய்கிறார். ஐந்து ஆண்டுகளில் இந்தத் தொகை ரூ.6 லட்சமாக அதிகரிக்கிறது எனில், ரூ.3 லட்சம் லாபத்தில் ரூ.1 லட்சத்துக்கு வரி கிடையாது. மீதியுள்ள ரூ.2 லட்சத்துக்கு 10% வரி எனில், ரூ.20,000 வரி கட்டினால் போதும்.

4. பேலன்ஸ்டு அட்வான்டேஜ் ஃபண்ட்...

பேலன்ஸ்டு அட்வான்டேஜ் ஃபண்ட், உங்களின் முதலீட்டுக் கலவையில் இருக்கும்பட்சத்தில், ஒட்டுமொத்த வருமானத்தில் பெரிய ஏற்ற இறக்கத்தைத் தவிர்க்க முடியும். இந்த ஃபண்டில் பங்குச் சந்தையின் ஏற்ற இறக்கத்துக்கேற்ப நிறுவனப் பங்குகள் மற்றும் கடன் பத்திரங்களில் முதலீடு மாற்றி அமைக்கப்படுகிறது. பங்கு சார்ந்த முதலீடு என்பது 30% - 80% என்கிற அளவுக்கு சந்தையின் ஏற்ற இறக்கத்துக்கேற்ப மாற்றி அமைக்கப்படுகிறது. பி/இ விகிதம் அடிப்படையில் பங்கு சார்ந்த முதலீட்டின் சதவிகிதம் தீர்மானிக் கப்படுகிறது

அதாவது, பங்குகளின் மதிப்பீடு வாங்குவதற்கு ஏற்றதாக மலிவாக இருக்கும்போது பங்கு முதலீட்டுக்கான ஒதுக்கீடு அதிகரிக்கப்படும். அதேபோல், பங்குகளின் மதிப்பீடு அதிகரிக்கும் போது, பங்கு முதலீடு குறைத்துக் கொள்ளப்படுகிறது. இதனால் குறைந்த விலையில் வாங்கி அதிக விலையில் விற்பதன் மூலம் லாபம் பெற முடியும்.

5. கடன் ஃபண்டுகள்...

பங்குச் சந்தையின் இறக்கத்தில் ஒருவரின் நமது ஒட்டுமொத்தக் முதலீட்டுக் கலவை பெரிய இறக்கத்தைச் சந்திப்பதைக் கடன் ஃபண்டுகள் தடுக்கும். பங்குச் சந்தை ஃபண்டுகளின் என்.ஏ.வி மதிப்பு அதிக ஏற்ற இறக்கத்துக்கு உட்பட்டதாக இருக்கும்.

கடன் ஃபண்டுகளின் என்.ஏ.வி மதிப்பு பெரும்பாலும் படிப்படி யாக அதிகரிப்பதாகத்தான் இருக்கும். அந்த வகையில், இவற்றின் மூலமான வருமானம் ஓரளவுக்கு நிலையானதாக இருக்கும்.

6. கோல்டு ஃபண்டுகள்...

கோல்டு சேவிங்ஸ் ஃபண்டுகள் மற்றும் கோல்டு இ.டி.எஃப் உங்களின் முதலீட்டுக் கலவையில் இருந்தால் முதலீட்டுக் கலவை பங்குச் சந்தை இறக்கத்திலும் பெரிதாக இழப்பைச் சந்திக்காது.

பொதுவாக, தங்கத்தின் விலை ஏற்றம் காணும்போது பங்குச் சந்தையில் செயல்பாடு சிறப்பாக இருக்காது. மேலும், உலகில் கெட்ட விஷயங்கள் அல்லது நிச்சயமற்ற நிலை ஏற்படும்போது தங்கத்தின் விலை ஏற்றம் காண ஆரம்பிக்கும். உதாரணமாக, அமெரிக்கா - சீனா வர்த்தகப் போரின்போது தங்கம் விலை ஏறியது. இதேபோல், கொரோனா பாதிப்பு ஆரம்பித்த காலத்தில் தங்கத்தின் விலை கிடுகிடுவென உயர்ந்தது. இப்போது பாதிப்பு குறைந்ததை அடுத்து தங்கத்தின் விலை ரூ.4,400 என்கிற அளவுக்குக் குறைந்திருக்கிறது.

7. ஆயுள் காப்பீடு...

குடும்பத்தில் வருமானம் ஈட்டும் நபர்களின் பெயரில் ஆயுள் காப்பீடு பாலிசி கட்டாயம் எடுக்க வேண்டும். அதுவும் அவர்களின் ஆண்டு சம்பளத்தை போல் சுமார் 15 மடங்கு தொகைக்கு எடுக்க வேண்டும். இந்த அளவுக்கு அதிக தொகைக்கு பாலிசி எடுக்கும் பட்சத்தில்தான், பாலிசிதாரருக்கு ஏதாவது அசம்பாவிதம் ஏற்பட்டு, அவர் இல்லை என்றாலும் குடும்ப உறுப்பினர்கள் பணத்துக்குத் திண்டாட மாட்டார்கள்.

டேர்ம் பிளான் எடுக்கும்பட்சத்தில் பிரீமியம் குறைவாகத்தான் இருக்கும். இந்த பாலிசியில் கவரேஜ் மிக அதிகமாக இருக்கும். பாலிசி காலத்தில் பாலிசிதாரர் இறந்தால் மட்டுமே இழப்பீடு கிடைக்கும். பாலிசி முதிர்வில் எதுவும் கிடைக்காது.

8. மருத்துவக் காப்பீடு...

குடும்ப உறுப்பினர்கள் அனைவருக்கும் ரூ.3 - ரூ.5 லட்சத்துக்கு மருத்துவக் காப்பீடு எடுத்திருப்பது கட்டாயம். அப்போதுதான் கொரோனா பாதிப்பு ஏற்பட்டால்கூட ஒருவரின் சேமிப்பு மற்றும் முதலீடு கரைந்து போகாமல் இருக்கும்.

இந்த எட்டு விஷயங்களில் சரியாக இருக்கிறீர்களா என்பதை உறுதி செய்து கொண்டால், இனி நீங்கள் பெரும் பணக்காரராக நிச்சயம் ஆகமுடியும்!