Published:Updated:

புதிய நிதியாண்டு 2021-22... நிதி சார்ந்த புதிய மாற்றங்கள் என்னென்ன? - இனி இதுதான் நடைமுறை...

நிதியாண்டு
பிரீமியம் ஸ்டோரி
நிதியாண்டு

F I N A N C I A L C H A N G E S

புதிய நிதியாண்டு 2021-22... நிதி சார்ந்த புதிய மாற்றங்கள் என்னென்ன? - இனி இதுதான் நடைமுறை...

F I N A N C I A L C H A N G E S

Published:Updated:
நிதியாண்டு
பிரீமியம் ஸ்டோரி
நிதியாண்டு

ஏப்ரல் 1, 2021 முதல் புதிய நிதியாண்டு (2021-22) தொடங்கிவிட்டது. நிதியமைச்சர் நிர்மலா சீதாராமன் பல புதிய மாறுதல்களை ஏற்கெனவே செய்து அறிவித்திருக்கிறார். இந்த நிதிச் சேவை களில் என்ன மாற்றங்கள் வந்திருக்கின்றன என்பதை விரிவாகப் பார்க்கலாம்.

ஷியாம் ராம்பாபு
ஷியாம் ராம்பாபு

பிராவிடன்ட் ஃபண்ட்...

பிராவிடன்ட் ஃபண்டில் முதலீடு செய்யப்படும் பணம் நிதி ஆண்டில் ரூ.2.5 லட்சத்துக்குமேல் தாண்டினால் வட்டிக்கு வரி விதிக்கப்படுகிறது. இந்த உச்ச வரம்பு அரசு ஊழியர்களுக்கு மட்டும் ரூ.5 லட்சமாக உயர்த்தப்பட்டுள்ளது. பொதுவாக, தொழிலாளர் வைப்பு நிதியில் வழங்கப்படுகிற வட்டியானது வங்கி ஃபிக்ஸட் டெபாசிட்களுக்கு கிடைக்கும் வட்டியைவிட அதிகமாக இருக்கிறது. அதனால் வரி செலுத்தினாலும் பி.எஃப் முதலீடு ஆதாயமாக இருக்கும்.

வருமான வரி தானாக கணக்கீடு...

சம்பளம் தவிர்த்த பிற வருமானங்கள் தானாக கணக்கீடு செய்யப்பட்டு கணக்காளரின் வருமான வரிப் படிவத்தில் காட்டப்படும். வரிக் கணக்கு தாக்கல் செய்பவர்களுக்கு டிவிடெண்ட், வட்டி வருமானம் போன்ற பல வழிகளில் வருமானம் வந்திருந்தால், அந்த வருமானங்கள் மற்றும் அதற்காகப் பிடித்தம் செய்யப்பட்ட டி.டி.எஸ் போன்ற விவரங்கள் இனி வருமான வரிப் படிவத்தில் தானாகக் காட்டப்படும்.

இது வருமான வரிக் கணக்கு தாக்கல் செய்வதை எளிமையாக்க அரசு எடுக்கும் முயற்சி மற்றும் வரிக் கட்டாமல் ஏய்ப்பதைத் தடுப்பதாகும். மேலும், வரி செலுத்துபவர் மறதி காரணமாக சில விவரங்களைப் பதிவு செய்யாமல் இருக்கலாம். இந்த வசதி மூலம் அனைத்து வருமானங்களுக்கும் அரசுக்கு வரி கிடைப்பதற்கு வாய்ப்பு ஏற்படுகிறது. அரசுக்கு அதிக வரி வருமானம் கிடைக்கவும் வாய்ப்புள்ளது

நிதியாண்டு
நிதியாண்டு

பான் எண் கொடுக்காவிட்டால்..?

ஒருவரிடமிருந்து டி.டி.எஸ் அல்லது டி.சி.எஸ் வசூலிக்கப்படும்பட்சத்தில் அவர் பான் எண் கொடுக்க வேண்டும். அப்படிக் கொடுக்கவில்லை எனில், அதிக வரி பிடிக்கப்படும். மேலும், கடந்த இரு ஆண்டுகளில் 50,000 ரூபாய்க்கு மேல் டி.டி.எஸ் பிடிக்கப்பட்டிருக்கும் பட்சத்தில், அவர் கண்டிப்பாக வருமான வரிக் கணக்கு தாக்கல் செய்ய வேண்டும்.அவ்வாறு வரிக் கணக்கு தாக்கல் செய்யாமல் இருந்தால், இனி இரு மடங்கு அபராதம் செலுத்த வேண்டியிருக்கும். இதற்காக பட்ஜெட்டில் செஷ்சன் 206AB மற்றும் செஷ்சன் 206CCA என்கிற இரண்டு புதிய பிரிவுகள் ஏற்படுத்தப் பட்டுள்ளன.

புதிய காசோலைகள் மட்டுமே செல்லும்...

கடந்தாண்டுகளில் பல சிறிய வங்கிகள் பெரிய வங்கிகளுடன் முழுமையாக இணைக்கப்பட்டுவிட்டன. இதனால் 2021 ஏப்ரல் 1 முதல் பழைய வங்கிக் காசோலைகள் காலாவதியாகிவிடும் என்ற அறிவிப்பு வெளிவந்துள்ளது. அதன்படி, பெரிய வங்கி சார்பாக வழங்கப்பட்ட காசோலைகள் மற்றும் பாஸ்புக் புத்தகத்தை மட்டுமே இனி பயன்படுத்த முடியும். அதனால் வாடிக்கை யாளர்கள் புதிய காசோலைகள் மற்றும் வங்கிப் புத்தகத்தை இதுவரை பெறவில்லை எனில், வங்கிக் கிளைகளை அணுகி உடனடி யாகப் புதிய காசோலை புத்தகத்தைப் பெற விண்ணப் பிக்கலாம். அவ்வாறு செய்யா விட்டால் உங்கள் கணக்கில் பணம் இருந்தாலும் இனி சிறிய வங்கிகள் வழங்கிய காசோலை களைக் கொடுத்தால் அது செல்லாததாகக் கருதப்படும்.

இந்த மாறுதல் காரணமாக வாடிக்கையாளர்கள் பின்தேதி யிட்ட காசோலைகளை வழங்கி இருக்கும் அனைத்துப் பரிவர்த் தனைகளிலும் இந்த மாறுதலைத் தவறாமல் செய்ய வேண்டும். உதாரணமாக, காசோலை மூலம் கடனுக்குத் தவணை செலுத்தும் பட்சத்தில் பழைய காசோலை யைத் திரும்பப் பெற்று புதிய காசோலையைத் தருவதை உறுதிப்படுத்த வேண்டும். இதுபோன்று மியூச்சுவல் ஃபண்ட், இன்ஷூரன்ஸ் போன்ற பல விதமான திட்டங்களில் பின்தேதி யிட்ட காசோலைகளைக் கொடுத்திருந்தால் அங்கெல்லாம் மாற்றம் செய்ய வேண்டிவரும். அதனால் வங்கி வாடிக்கை யாளர்கள் உடனடியாக இந்த மாற்றங்களைச் செய்வது வங்கிச் சேவையில் எந்தக் குளறுபடியும் வராமல் இருப்பதற்கு உதவும்.

யூலிப் பாலிசி வருமானத்துக்கு வரி...

பங்குச் சந்தை சார்ந்த ஆயுள் காப்பீட்டுத் திட்டத்தில் (ULIP Scheme) நிதி ஆண்டில் 2.5 லட்சம் ரூபாய்க்கு மேல் ஆண்டு பிரீமியம் செலுத்தும்பட்சத்தில், அந்தத் திட்டத்தில் கிடைக்கும் வருமானத்துக்கு அவரவர் வருமான வரி வரம்புக்கு ஏற்ப வரி செலுத்த வேண்டும். யூலிப் பாலிசியில் ஆண்டு பிரீமியம் 2.5 லட்சம் ரூபாய்க்குக் குறைவாக இருந்தால், அதன் மூலம் கிடைக்கும் வருமானத்துக்கு வரி செலுத்த வேண்டாம்.

ரியல் எஸ்டேட் முதலீடு: டி.டி.எஸ் இல்லை...

நாட்டின் உள்கட்டமைப்பை வலுப்படுத்த திரட்டப்படும் ரியல் எஸ்டேட் மற்றும் இன்ஃப் ராஸ்ட்ரக்சர் சார்ந்த முதலீடு களில் (REIT – Real Estate Infrastructure Trust மற்றும் Invit Infrastructure Investment Trust) கிடைக்கும் டிவிடெண்ட் தொகைக்கு டி.டி.எஸ் பிடித்தம் செய்யப்படாது என்ற அறிவிப்பு பட்ஜெட்டில் வெளிவந்துள்ளது.

என்றாலும், இந்த டிவிடெண்ட் தொகைக்கு வருமான வரிக் கணக்கு தாக்கல் செய்யும்போது அவரவர் வருமான வரி வரம்புக்கு ஏற்ப வரி கணக்கீடு செய்யப்பட்டு வரி செலுத்த வேண்டும். எனவே, இதை ஒரு சலுகை என்று சொல்ல முடியாது.

மிகவும் மூத்த குடிமக்கள் வரிக் கணக்கு தாக்கல் சலுகை...

75 வயதுக்கு மேற்பட்ட சீனியர் சிட்டிசன்கள் வாங்கும் பென்ஷன் மற்றும் வங்கி டெபாசிட்டுகள் மூலம் வருமானம் கிடைக்கப் பெற்றால் அவர்கள் இந்த நிதியாண்டு முதல் வரிக் கணக்கு தாக்கல் செய்ய வேண்டாம். அவர்களுக்குக் கிடைக்கும் வட்டி மற்றும் பென்ஷன் தொகையைக் கணக்கிட்டு தானாகவே வரி பிடித்தம் செய்யப்பட்டுவிடும்.

இந்தத் திட்டத்தின் மூலம் வருமான வரிச் சலுகைகள் வழங்கப்படவில்லை. வரிக் கணக்கு தாக்கல் செய்யும் நடைமுறைகளில் இருந்து மட்டும் விலக்கு அளிக்கப்பட்டுள்ளது. வட்டி மற்றும் பென்ஷன் தவிர்த்து பிற வருமானங்கள் கிடைக்கப்பெற்றால், வருமான வரித் தாக்கல் செய்ய வேண்டும். மேலும், ஓய்வூதியம் மற்றும் வட்டி வருமானம் ஒரே வங்கிக் கிளையில் பெற்றால் மட்டுமே இந்தச் சலுகை. இந்த மாறுதல் களை நிதித் திட்டமிடலில் தேவையான மாற்றங்களைச் செய்துகொள்ளவும்.