Published:Updated:

“இளம் வயதில் வீடு வாங்குவது அதிகரித்து வருகிறது..!”

‘சுந்தரம் ஹோம் ஃபைனான்ஸ்’ லஷ்மி நாராயணன் துரைசாமி சிறப்புப் பேட்டி

பிரீமியம் ஸ்டோரி

நிதிச் சேவையில் 30 ஆண்டுகள் பழுத்த அனுபவம் கொண்டவரும் சுந்தரம் ஹோம் ஃபைனான்ஸ் நிறுவனத்தின் நிர்வாக இயக்குநருமான லஷ்மி நாராயணன் துரைசாமி, நாணயம் விகடன் இதழுக்கு சிறப்புப் பேட்டி அளித்தார்.

மற்ற வீட்டு வசதி நிறுவனத்துக்கும் சுந்தரம் ஹோம் ஃபைனான்ஸ்க்கும் முக்கியமாக என்ன வேறுபாடு?

“வாடிக்கையாளர்களை முழுமையாகப் புரிந்துகொள்வது முக்கியமான சிறப்பு அம்சமாகும். அதாவது, வாடிக்கையாளர் பற்றி ஆவணங்களில் இல்லாத விஷயங்கள், அவர்களின் குடும்ப உறுப்பினர்கள், ஆர்வம் போன்றவற்றைக் கேட்டுத் தெரிந்துகொள்வது மூலம் நீண்ட கால தொடர்பை ஏற்படுத்திக் கொள்வோம். அடுத்து, நம்பிக்கை. வாடிக்கை யாளர்கள் எந்த அளவுக்கு எங்கள் பிராண்டை நம்புகிறார்களோ, அதே அளவுக்கு நாங்களும் வாடிக்கை யாளர்களை நம்பி செயல்படுவதால், அவர்கள் எங்களின் நிரந்தர வாடிக்கையாளர் களாக மாறிவிடுகிறார்கள். அடுத்து, ஒரு முறை கடன் கொடுப்பதுடன், எங்கள் வேலை முடிந்துவிடுவதில்லை. வீட்டுக் கடன் வாங்கியவர்களின் குடும்பம் பெரிதாகும் போது கூடுதல் அறை கட்ட கூடுதல் கடன் வழங்குகிறோம். மேலும், வீட்டுக் கடன் வாங்கியவர்களுக்கு வேறு ஏதாவது செலவுக்குப் பணம் தேவைப்பட்டால் அதற்கு டாப்அப் கடன் கொடுத்து உதவி செய்வதால், வாடிக்கை யாளருடனான உறவு 15, 20 வருடங்களுக்கு மேல் தொடர்கிறது.”

தமிழக வீட்டுக் கடன் துறையின் வளர்ச்சி இன்னும் 5, 10 ஆண்டுகளில் எப்படி இருக்கும்?

“கடந்த ஒன்றரை ஆண்டுகளாக ரியல் எஸ்டேட் துறை மந்தமாக இருந்ததால், வீட்டுக் கடன் துறையும் சுணக்கமாக இருந்தது. இனி முன்பைவிட வேகமாக வீட்டுக் கடன் துறை வளர்ச்சி காணும். அந்த வளர்ச்சி இரட்டை இலக்கத்தில் இருக்கும் என எதிர்பார்க்கப்படுகிறது. மேலும், கோவிட் தொற்று நோய்ப் பரவலுக்குப் பின், வீடு பாதுகாப்பாக இருக்க வேண்டும்; பெரியதாக இருக்க வேண்டும்; கூடுதல் அறைகள் இருக்க வேண்டும் என்கிற சிந்தனை பலருக்கும் வந்திருக்கிறது. வீட்டி லிருந்து வேலை செய்ய வாய்ப்பிருப்பதால், நகரத்தில் வீடு இருக்க வேண்டும் என்கிற அவசியம் இல்லை. எனவே, புறநகர்களில் ரியல் எஸ்டேட் விற்பனை அதிகரித்து வீட்டுக் கடன் வாங்குவது உயர்ந்துள்ளது. இன்னும் அடுத்த 5, 10 வருடங்களுக்கு வீட்டுக் கடன் தேவை மிகவும் அதிகமாக இருக்கும் எனலாம்.

மத்திய அரசு அனைவருக்கும் 2022-ம் ஆண்டுக்குள் வீடு என்கிற திட்டத்தைப் பிரபலப் படுத்தி வருகிறது. முதல் முறை வீட்டுக் கடன் வாங்குபவர் களுக்கு சுமார் ரூ.2.5 லட்சம் வட்டி மானியம் வழங்கப்படு வதால், பலரும் சற்றுப் பெரிய வீட்டை வாங்கி வருகிறார்கள்.”

லஷ்மி நாராயணன் துரைசாமி
லஷ்மி நாராயணன் துரைசாமி

உங்கள் நிறுவனத்தில் எந்த மாதிரியான கடன் திட்டங்களை வைத்திருக்கிறீர்கள்?

“புது வீடு மற்றும் பழைய வீடு வாங்க, கூடுதல் அறை கட்ட, வீட்டைப் புதுப்பிக்க கடன் தருகிறோம். வீட்டுப் பத்திரத்தின்பேரில் அடமானக் கடன் உள்ளிட்ட கடன் களையும் வழங்கி வருகிறோம். வீட்டு மனை வாங்கவும், மனை வாங்கி உடனே வீடு கட்டவும் கடன் தருகிறோம்.”

வீட்டுக் கடன் துறை கொரோனாவுக்கு முந்தையை நிலையை அடைந்துவிட்டதா?

“சகஜ நிலை திரும்பிவிட்டது என உறுதியாகச் சொல்ல முடியவில்லை. ஆனால், கோவிட் அதிக பாதிப்பு இருந்த காலத்தில் வீடு வாங்கும் திட்டத்தைத் தள்ளி வைத்த வர்கள் இப்போது வீடு வாங்க ஆரம்பித்திருக்கிறார்கள். தவிர, புதிதாகவும் பலர் வீடு வாங்கத் தொடங்கியிருக்கிறார்கள்.”

எந்த வயதினர் அதிகம் வீட்டுக் கடன் வாங்குகிறார்கள்?

“கடந்த 2 - 3 ஆண்டுகளுக்கு முன், வீட்டுக் கடன் மூலம் வீடு வாங்கியவர்களில் 45 வயதுக்கு மேற்பட்டவர்களின் பங்களிப்பு சுமார் 52 சதவிகிதமாக இருந்தது. இப்போது 45 வயதுக்கு உட்பட்டவர்கள் 65 சதவிகிதத்துக்கு மேல் இருக்கிறார்கள். அதாவது, இளம் வயதில் வீடு வாங்குபவர் களின் எண்ணிக்கை முன்பைவிட மிகவும் அதிகரித்துள்ளது. கொரோனா பாதிப்பால் உருவாகியிருக்கும், வீட்டிலிருந்து வேலை இதற்கு முக்கியக் காரணமாக இருக்கிறது. நாட்டின் தொழில்துறை மேம்பட்டு பலருக்கும் புதிய வேலைவாய்ப்பு கிடைத்திருப்பது, ஏற்கெனவே வேலை பார்ப்பவர்களுக்கு சம்பளம் அதிகரிப்பு போன்றவற்றாலும் இளைஞர்கள் வீடு வாங்குவது முன்பைவிட அதிகரித்துள்ளது.”

நகரங்கள் மற்றும் கிராமப்புறங்களில் சராசரி வீட்டுக் கடன் அளவு எவ்வளவாக இருக்கிறது?

“நகரங்களைப் பொறுத்தவரை, குறைந்தபட்சம் ரூ.40 லட்சம் முதல் கோடிக்கணக்கான ரூபாய்க்கு வீடு வாங்கப்படு கிறது. கிராமப்புறங்களில் ரூ.15 லட்சம் முதல் ரூ.35 லட்சத்துக்கு வீடு வாங்கி வருகிறார்கள்.”

சராசரியாக எத்தனை ஆண்டுகளில் வீட்டுக் கடனைத் திரும்ப அடைக்கிறார்கள்?

“வீட்டுக் கடனை 15, 20, 25 ஆண்டுகளில் திரும்பக் கட்டுவதாக வாங்கினாலும், சராசரியாக 12 ஆண்டுகளில் அடைத்து முடித்துவிடுகிறார்கள். வருமானம் அதிகரிக்கும் போது மாதத் தவணையை அதிகரித்துக் கட்டுகிறார்கள். ஓராண்டில் சில தவணைகளைச் சேர்த்துக் கட்டுகிறார்கள், போனஸ் போன்ற ஏதாவது மொத்தத் தொகை கிடைத்தாலும் கட்டி வீட்டுக் கடன் அசல் தொகையைக் குறைத்துவிடு கிறார்கள். இதனால், கடன் விரைவிலேயே முடிந்துவிடுகிறது.”

தனி வீடா, அடுக்குமாடிக் குடியிருப்பா, வில்லாவா - ரியல் எஸ்டேட்டில் இப்போதைய டிரெண்டு என்ன?

“நகருக்கு வெளியேதான் தனி வீடு கிடைக்கிறது. இதைப் பணக்காரர்கள் மற்றும் நடுத்தர வருமான பிரிவினர் வாங்கி வருகிறார்கள். வில்லாக்கள் விலை அதிகம் என்பதால், அதை உயர் வருமான பிரிவினர் மட்டுமே வாங்குகிறார்கள். விலை குறைவு, வசதிகள் அதிகம் என்பதால், அனைத்துத்தரப்பினரும் அடுக்குமாடிக் குடியிருப்பு வீடுகளை விரும்புகிறார்கள்.’’

முதல்முறையாக வீடு வாங்குபவர் கள் பிரதமரின் வீட்டுக் கடன் மானியத்தை எந்த அளவுக்குப் பயன் படுத்துகிறார்கள்?

“பெரும்பாலும் பயன்படுத்திக் கொள்கிறார்கள். ஏற்கெனவே குடும்ப உறுப்பினர்கள் பெயரில் வீடு இருந்தால், இந்த மானியம் கிடைக்காது என்பது முக்கிய மான விஷயம்.’’

வருமான வரியைச் சேமிக்க வீடு வாங்குவது அதிகமா, குடியிருக்க வீடு வாங்குவது அதிகமா?

‘‘கோவிட் 19 பரவலுக்குப் பிறகு, குடியிருக்க வீடு வாங்குவது தான் அதிகமாக இருக்கிறது. வருமான வரி சேமிப்பும் முக்கியம்தான். வரிச் சேமிப்பதற் காக மட்டும் மாதம் ரூ.30,000, ரூ.40,000 மாதத் தவணை கட்ட யாரும் முன்வருதில்லை.”

புதிதாக வீட்டுக் கடன் வாங்கு பவர்களுக்கு உங்களின் முக்கிய ஆலோசனை என்ன?

“உங்கள் வீடு வாங்கும் பட்ஜெட் எவ்வளவு என்பதை சரியாக நிர்ணயம் செய்யுங்கள். அடுத்து, சிரமம் இல்லாமல் மாதம் எவ்வளவு இ.எம்.ஐ கட்ட முடியும் எனப் பாருங்கள். வீடு அமைந்திருக்கும் இடமும், தரமான கட்டுமானமும் மிக முக்கியம். ஏற்கெனவே கட்டிய வீடு எனில், அதன் தரத்தை நல்ல பொறியாளரைக் கொண்டு சோதிக்க வேண்டும்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு