Published:Updated:

சமரசம் செய்யக் கூடாத நிதி இலக்குகள்..! சரியான முதலீட்டுத் திட்டங்கள்...

F I N A N C I A L P L A N

பிரீமியம் ஸ்டோரி

த.ராஜன், இணை நிறுவனர், Holisticinvestment.in

நிதி இலக்குகளை அடைவதற்காகவே அவற்றை நாம் நிர்ணயிக்கிறோம். ஆனாலும், சில சமயங்களில் இலக்குகளில் சமரசம் செய்ய வேண்டிய தேவை உருவாகலாம். எந்த மாதிரியான நிதி இலக்குகளில் சமரசம் செய்யலாம், எந்த மாதிரியான நிதி இலக்குகளில் சமரசம் செய்யக் கூடாது என்று பார்ப்போம்.

த.ராஜன்
 இணை நிறுவனர்,
Holisticinvest
ment.in
த.ராஜன் இணை நிறுவனர், Holisticinvest ment.in

சமரசம் செய்யக்கூடிய நிதி இலக்குகள்...

வீட்டுக் கடனில் சொந்தமாக வீடு வாங்குவதற்குப் பதில் வாடகை வீட்டில் குடியிருக்கலாம். இது செலவைக் கைக்கு அடக்கமாக வைத்திருக்க உதவும். காரணம், வீட்டுக் கடன் மூலம் வீடு வாங்கும்போது கட்டும் மாதத் தவணையுடன் (இ.எம்.ஐ) ஒப்பிடும்போது வீட்டு வாடகை குறைவாக இருக்கும். தவிர, நினைத்த நேரத்தில் எந்த ஊருக்கு வேண்டு மானாலும் ஏன், எந்த நாட்டுக்கு வேண்டுமானாலும் சென்றுவிடலாம்.

சொந்தமாக கார் வாங்கி பயன்படுத்துவதற்குப் பதில் ஊபர், ஓலா போன்ற வாடகை கார்களைப் பயன்படுத்துவது வசதியாகவும் லாபகரமாகவும் இருக்கும். பார்க்கிங் பிரச்னை இல்லை. வீட்டு வாசலுக்கே வந்து அழைத்துச் சென்று, வீட்டு வாசலிலேயே கொண்டுவந்து சேர்த்து விடுகிறார்கள். வாடகையும் குறைவுதான்.

சமரசம் செய்யக் கூடாத நிதி இலக்குகள்..! சரியான முதலீட்டுத் திட்டங்கள்...

சமரசம் செய்யக் கூடாத நிதி இலக்குகள்...

ஓய்வுக்கால நிதித் திட்டமிடல், அடுத்தது பிள்ளைகளின் எதிர்காலத் தேவைக்கான நிதித் திட்டமிடலில் யாரும் சமரசம் செய்துகொள்ளக் கூடாது. இவற்றுக்குத் தேவையான நிதித் தொகுப்புக்கு மாற்று எதுவும் இல்லை என்பதுடன், இந்த இரு இலக்கு களுக்கான தேவையைத் தள்ளிப் போட முடியாது. உதாரணமாக, பிள்ளைகளின் கல்வியைத் தள்ளிப் போட முடியாது. உங்களின் பணி ஓய்வுக் காலம் என்பது 58 வயது அல்லது 60 வயது என்பது முன்கூட்டியே நிர்ணயிக்கப்பட்டதாகும். அதை நீங்கள் விரும்பினாலும் தள்ளிப் போட முடியாது.

முன்கூட்டியே திட்டமிடல்

சமரசம் செய்துகொள்ளக் கூடாத இந்த நிதி இலக்குகளை நிறைவேற்ற முன்கூட்டியே திட்டமிடுவது மிக அவசியம். சிலர் பிள்ளைகளின் உயர்கல்விச் செலவுக்கு கல்விக் கடன் வாங்கிக்கொள்ளலாம் எனத் திட்ட மிட்டிருக்கலாம். கல்விக் கடன் கட்டாயம் கிடைக்கும் என்பதற்கு எந்தவித உத்தரவாதமும் இல்லை. கல்விக் கடன் வாங்குவதில் எவ்வளவு நடைமுறை சிக்கல்கள் இருக் கின்றன என்பதை அதை வாங்கியவர்களைக் கேட்டால் தான் தெரியும். எனவே, பிள்ளை களின் எதிர்காலத் தேவைகளான உயர்கல்வி மற்றும் அவர்களின் கல்யாணத்துக்கு நிச்சயம் முன்கூட்டியே முதலீடு செய்வது அவசியமாகும். அதுவும் சரியான முதலீட்டுத் திட்டங்களைத் தேர்வு செய்வது மூலம்தான் இந்த இலக்குகளுக்கான தொகுப்பு நிதி சுலபமாகவும் போதிய அளவுக்கும் சேர்க்க முடியும்.

முதலீட்டை விழுங்கும் பூதம்...

பணவீக்க விகிதம் என்பது முதலீட்டை விழுங்கும் பெரிய பூதமாக உள்ளது. இந்தியாவில் கல்விச் செலவுக்கான பணவீக்க விகிதம் சுமார் 10 சதவிகிதமாக உள்ளது. அதேபோல், மருத்துவச் செலவுக்கான பணவீக்க விகிதமும் 10 சதவிகிதத்துக்கு அதிகமாக இருக்கிறது. அந்த வகையில் வயதான காலத்தில் (ஓய்வுக் காலம்) மருத்துவச் செலவுகளைச் சமாளிக்க சரியாக முதலீடு செய்து வருவது மிக அவசியம்.

மருத்துவக் காப்பீடு இருக்க கவலை ஏன் என்கிறார்கள் பலர். அதில் பாதிதான் உண்மை. காரணம், வயதான காலத்தில் சீனியர் சிட்டிசன் பாலிசிகளுக்கு பிரீமியம் அதிகம் கட்ட வேண்டும். அடுத்து, மருத்துவமனையில் சேர்க்கப்பட்டு, ஏதாவது மருத்துவச் சிகிச்சை பெற்றால், சிகிச்சை செலவு 100 சதவிகிதமும் பாலிசி மூலம் ஈடுகட்டப்படாது. அண்மைக் காலத்தில் கோவிட் சிகிச்சைக்காக மருத்துவமனயில் சேர்ந்து சிகிச்சை எடுத்துக்கொண் டவர்களில் சுமார் 50 சதவிகிதத் தொகைதான் க்ளெய்ம் ஆக கிடைத்திருக்கிறது என்பதை நினைவில்கொள்வது நல்லது.

பிள்ளைகளின் கல்விச் செலவுக்கு ஆயுள் காப்பீட்டு நிறுவனங்கள் அளிக்கும் சில்ட்ரன் பிளான்கள் மற்றும் மியூச்சுவல் ஃபண்ட் நிறுவனங் களின் சில்ட்ரன் ஃபண்டுகளும் அவ்வளவாகக் கைக்கொடுப்ப தில்லை. சில்ட்ரன் லைஃப் இன்ஷூரன்ஸ் பிளான்கள் வருமானம் ஈட்டாத பிள்ளை களுக்கு தேவை இல்லாமல் காப்பீடு கவரேஜ் அளிக்கப் படுகிறது. அடுத்து இந்த பாலிசி கள் எண்டோவ்மென்ட் பாலிசி பிரிவைச் சேர்ந்தது என்பதால், நீண்டகாலத்தில் ஆண்டுக்குச் சராசரியாக சுமார் 5% வருமானத் தைத் தருபவையாகவே உள்ளன.

ரெடிமேட் திட்டங்கள்...

இந்த பாலிசிகளை எடுப்ப வர்கள் அதை ஒரு முதலீட்டுத் திட்டமாக இல்லாமல் சேமிப்புத் திட்டமாகக் கருதி செயல்படுகிறார்கள். அது தவிர்க்கப்பட வேண்டும். மேலும், இந்த பாலிசிகள் பணவீக்க விகிதத்தைத் தாண்டி கல்விச் செலவுகளை ஈடுசெய்யும் அளவுக்குப் பெருகுவதில்லை.

மியூச்சுவல் ஃபண்ட் திட்டங்களில் உள்ள சில்ட்ரன் பிளான்களில் பணம் பெரும் பகுதி கடன் சார்ந்த திட்டங்களில் முதலீடு செய்வதால், பணவீக்க விகிதத்தைத் தாண்டிய வருமானத்தை எதிர்பார்க்க முடியாது. இந்த ரெடிமேட் சில்ட்ரன் பிளான்களால் இலக்குகளை நிறைவேற்ற முடியவில்லை என்பதுதான் நிதர்சனமான உண்மையாகும்.

அதனால், நீங்கள் முதலீட்டாளராக செயல்பட்டு, உங்கள் பிள்ளைகளின் எதிர்காலத் தேவைகள் மற்றும் உங்களின் ஓய்வுக்காலத் தேவை என்கிற நிதி இலக்குகளை அடைய புத்திசாலிதனமாகச் செயல்பட்டு முதலீடு செய்வது அவசியம் ஆகும். சரியான முன்திட்டமிடலுடன், சரியான முதலீட்டுத் திட்டங்களையும் தேர்ந்தெடுத்தால் நாம் நிதி இலக்குகளில் சமரசம் செய்யாமல் சரியான நேரத்தில் அடைய முடியும்!

கைகொடுக்கும் ஈக்விட்டி மியூச்சுவல் ஃபண்டுகள்..!

இந்தச் சமரசம் செய்ய முடியாத நிதி இலக்குகளுக்கு சரியான முதலீட்டுத் திட்டங்களைத் தேர்வு செய்வது எப்படி? பொதுவாக, பிள்ளைகள் பிறந்தவுடன் அவர்களின் எதிர்காலத் தேவையான உயர்க் கல்வி மற்றும் கல்யாணத்துக்கு முதலீட்டை ஆரம்பித்தால், முதலீட்டுக் காலம் சுமார் 17 ஆண்டுகள் மற்றும் 25 ஆண்டுகளாக இருக்கும். சில ஆண்டுகள் கழித்து ஆரம்பித்தாலும் முதலீட்டுக் காலம் 15 ஆண்டுகள் முதல் 20 ஆண்டுகளாக மிக நீண்டகாலமாக இருக்கும்.

அந்த வகையில் முதலீட்டில் ரிஸ்க் எடுக்கும்பட்சத்தில், பணவீக்க விகிதத்தைத் தாண்டிய நல்ல வருமானத்தைப் பெற முடியும். அதற்கு ஏற்றவையாக ஈக்விட்டி மியூச்சுவல் ஃபண்டுகள் இருக்கின்றன. இவற்றின் நீண்டகாலத்தில் 12% முதல் 15% வருமானத்தைப் பெறமுடியும். மேலும், வருமானத்துக்கு வரி என்பது குறைவாகத்தான் இருக்கிறது.

ஒருவரின் ரிஸ்க் எடுக்கும் திறனுக்கேற்ப ஃபிளெக்ஸி கேப் ஃபண்ட், மல்ட்டிகேப், லார்ஜ்கேப் ஃபண்ட், லார்ஜ் அண்ட் மிட்கேப் ஃபண்ட், மிட்கேப் ஃபண்ட், ஸ்மால்கேப் ஃபண்ட் பிரிவுகளில் சிலவற்றில் அல்லது இவற்றில் கலவையாக முதலீடு செய்துவரலாம். ஹைபிரிட் ஃபண்டு களையும் இந்தக் குறிக்கோளுக்காகப் பரிசீலிக்கலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு