Published:Updated:

அமெரிக்கப் பங்குச் சந்தையில் என்ன நடக்கிறது?

பங்குச் சந்தையில் முதலீடு

இரண்டு சதவீதம் லட்சியம், நான்கு சதவீதம் நிச்சயம் என்று நமது அரசியல் தலைவர்கள் கூறுவது போன்ற எதிர்பார்ப்பினை சந்தை கொண்டிருந்தது. அதன் காரணமாகவே அக்டோபர் மாதத்தில் வரலாறு காணாத வளர்ச்சியை பங்கு சந்தைகள் பெற்றன...

அமெரிக்கப் பங்குச் சந்தையில் என்ன நடக்கிறது?

இரண்டு சதவீதம் லட்சியம், நான்கு சதவீதம் நிச்சயம் என்று நமது அரசியல் தலைவர்கள் கூறுவது போன்ற எதிர்பார்ப்பினை சந்தை கொண்டிருந்தது. அதன் காரணமாகவே அக்டோபர் மாதத்தில் வரலாறு காணாத வளர்ச்சியை பங்கு சந்தைகள் பெற்றன...

Published:Updated:
பங்குச் சந்தையில் முதலீடு

அமெரிக்க பங்குச் சந்தை 1976 -ம் ஆண்டுக்குப் பிறகு மிக அதிக அளவு ஏற்றத்தை கடந்த அக்டோபர் மாதத்தில் கண்டிருக்கிறது. அக்டோபர் மாதத்தில் மட்டும் அமெரிக்க பங்குச் சந்தை 14% வளர்ச்சியை அடைந்திருக்கிறது. இது கடந்த 46 வருடங்களில் ஏற்பட்ட மிகப்பெரிய வளர்ச்சி ஆகும். ஆனால் இதே அமெரிக்க பங்குச் சந்தை செப்டம்பர் மாதத்தில் 2600 புள்ளிகள் சரிந்து முதலீட்டாளர்களுக்கு மிகப்பெரிய நஷ்டத்தை தந்தது. பரமபத விளையாட்டில் உள்ள ஏற்ற இறக்கங்களை போல பங்குச் சந்தைகளில் நகர்வு இருக்கிறது. இப்பொழுது நவம்பர் தொடக்கத்தில் இருந்து மீண்டும் அமெரிக்க பங்குச் சந்தை சரிவை நோக்கி சென்று கொண்டிருக்கிறது.

பங்குச் சந்தை
பங்குச் சந்தை

 என்ன நடக்கிறது பங்குச் சந்தையில்?

அமெரிக்க பங்குச் சந்தையின் அதிக ஏற்ற இறக்கங்களுக்கு மூல காரணமாக இருப்பது ரஷ்யா மற்றும் உக்ரைன் நாடுகளுக்கு இடையிலான போர் ஆகும். உலக அளவில் கச்சா எண்ணெய் மற்றும் இயற்கை எரிவாயு உற்பத்தியில் இரண்டாவது பெரிய நாடாக ரஷ்யா திகழ்கிறது. இந்தப் போர் காரணமாக கச்சா எண்ணெய் விலை அதிகமாக உயர்ந்தது இந்தப் பிரச்சனைக்கு காரணமாக அமைந்தது. கச்சா எண்ணெய் விலை உயர்வால்  உலகில் உள்ள பெரும்பாலான நாடுகளில் பண வீக்கம் அதிகரிக்க தொடங்கியது. பண வீக்கத்தை கட்டுப்படுத்த அமெரிக்கா வட்டி உயர்வை அமல்படுத்த தொடங்கியது.

நமது நாட்டில் மத்திய ரிசர்வ் வங்கி இருப்பது போன்று அமெரிக்காவில் ஃபெடரல் ரிசர்வ் என்ற அமைப்பு இருக்கிறது. ரிசர்வ் வங்கியின் தலைவர்  சக்தி கந்த தாஸ் என்றால், ஃபெடரல் ரிசர்வ் அமைப்பின் தலைவர் ஜெரோம் பாவல் ஆவர். பண வீக்கத்தை கட்டுப்படுத்துவதற்கு ஆகஸ்ட் மாதம் வட்டி விகிதத்தில் 75 புள்ளிகளை ஃபெடரல் வங்கி அதிகரித்தது. அமெரிக்க பணவீக்கம் 2% என்ற அளவிற்கு குறையும் வரை வட்டி விகிதங்களை உயர்த்த இருப்பதாக ஜெரோம் தெரிவித்தார். ஆனால் ஜூன் மாத பணவீக்கம் 9.2% ஆக இருந்தது. இதன் காரணமாக ஜூலை மாதத்தில் பங்குச் சந்தை கடுமையான சரிவினை சந்திக்க தொடங்கியது.

 இதனைத் தொடர்ந்து செப்டம்பர் மற்றும் அக்டோபர் மாதங்களில் 75 புள்ளிகள் வட்டி உயர்த்தப்பட்டது. அதனால் பங்குச் சந்தைகளும் உலக அளவில் ஆகஸ்ட் மற்றும் செப்டம்பர் மாதங்களில் கடுமையான சரிவினை சந்தித்தன.

ஜெரோம் பாவெல் ஃபெடரல் வங்கி தலைவர்
ஜெரோம் பாவெல் ஃபெடரல் வங்கி தலைவர்

அக்டோபர் மாதத்தில் பங்குச் சந்தை உயர்ந்தது ஏன்?

பண வீக்கத்தை கட்டுப்படுத்த 2.25% வட்டி விகிதத்தை அதிகரித்த போதிலும் பணவீக்கம் 9.1% என்ற அளவில் இருந்து 8.2% என்ற அளவிற்கு மட்டுமே செப்டம்பர் மாதத்தில் குறைந்து இருந்தது. ஆனால் ஃபெடரல் வங்கியின் இலக்கு பணவீக்க விகிதம் 2%  ஆகும். அதனால் வட்டி விகிதங்களை உயர்த்துவது உடனடி பலன்களை அளிக்கவில்லை. பண வீக்கத்தை கட்டுப்படுத்த தொடர்ந்து வட்டி விகிதங்களை உயர்த்தினால் அது பொருளாதார வீழ்ச்சியை கொண்டு வந்து விடும் என்பதால் ஃபெடரல் வங்கி  டிசம்பர் மாதத்தில் இருந்து வட்டி விகிதங்களை உயர்த்துவதை குறைக்க தொடங்கும் என்று வல்லுனர்கள் கூறத் தொடங்கினர்.

 மேலும் அமெரிக்காவின் முன்னணி நிறுவனங்கள் தமது செப்டம்பர் காலாண்டு முடிவுகளில் பெரும்பாலும் சிறப்பான முடிவுகளாக கொடுக்கத் தொடங்கின. இதுவும் சந்தைக்கு சாதகமான அம்சமாக மாறியது. இந்த நம்பிக்கையின் அடிப்படையில் ஃபெடரல் வங்கி வட்டி விகிதங்களை அதிகரிப்பதை டிசம்பர் மாதத்தில் இருந்து குறைக்க தொடங்கும் என்ற நம்பிக்கையில் அக்டோபர் மாதத்தில் பங்குச் சந்தை கணிசமாக உயரத் தொடங்கியது.

வட்டி விகிதங்கள் உயர்த்தப்பட்டால் பங்குச் சந்தைக்கு என்ன பாதகம்?

அமெரிக்க வங்கிகளில் வட்டி விகிதம் இந்தப் பிரச்னைக்கு முன்பு மிகக் குறைவானதாக இருந்தது. அங்கு பணியில் இருக்கும் பலர் கடன் வாங்கி வீடு, ஆடம்பர கார்கள் என்று வாழ்ந்து பழக்கப்பட்டுள்ளனர். ஒரு வீட்டின் விலை ஒரு மில்லியன் டாலர் என்று வைத்துக் கொண்டால், இந்திய மதிப்பில் அது 8 கோடி ரூபாய் ஆகும்.

அதனை ஒருவர் வங்கியில் கடனாக பெற்று வீடு வாங்கியிருந்தால் கடந்த நான்கு மாதங்களில் உயர்த்தப்பட்ட 3% வட்டி காரணமாக இரண்டு லட்சம் ரூபாய் கூடுதல் பணத்தை வட்டியாக செலுத்த வேண்டி இருக்கும் (8 கோடி * 3 /12*100). இதனை சமாளிக்க கடன் பெற்ற நபர் இதர பொருட்கள் வாங்குவதை குறைக்க தொடங்குவார். இது பொருளாதார சக்கரத்தில் இணைந்துள்ள பல நிறுவனங்களுக்கு பாதகமாக மாறும். இதன் காரணமாகவே பங்கு சந்தைகள் வட்டி வகித உயர்வின் போது அதிக அழுத்தத்திற்கு உள்ளாகின்றது.

பங்குச் சந்தை
பங்குச் சந்தை

பங்குச் சந்தையில் சுற்றும் பறவைகள்

பங்குச் சந்தையில் காளை மற்றும் கரடி ஆகிய இரண்டு விலங்குகள் பங்குச் சந்தை உயர்வு மற்றும் சரிவை குறிக்க பயன்படுத்தப்படுகிறது. பங்குச் சந்தையில் புள்ளிகள் அதிக ஏற்ற இறக்கங்கள் இல்லாமல் ஒரே இடத்தில் வர்த்தகமாகும் போது அதை முயல் சந்தை என்று அழைக்கப்படுகிறது. இந்த விலங்குகள் மட்டுமின்றி பங்குச சந்தையில் புறா மற்றும் கழுகு ஆகிய இரண்டு பறவைகளும் பொதுவாக பயன்படுத்தப்படுகின்றது.

புறா மென்மையான ஒரு பறவை ஆகும். அதற்கு நேர்மாறாக கழுகு மிகவும் ஆக்ரோஷமான பறவை ஆகும். இதனை டவ்விஷ் ( புறா) மற்றும் ஹாக்கிஷ் ( கழுகு) என்ற பதத்தில் பங்குச் சந்தையில் அழைக்கப்படுகிறது.

 ஒவ்வொரு ஃபெடரல் ரிசர்வ் வங்கி மீட்டிங் நடைபெற்ற பிறகு அதன் ஆளுநர் பத்திரிக்கையாளர்களை சந்திப்பார். அப்பொழுது பொருளாதார சீர்திருத்தங்கள் காரணமாக கடுமையான நடவடிக்கைகள் மேற்கொள்வதை அவர் குறிப்பிட்டால் அதை ஹாக்கிஷ் என்று அழைப்பார்கள். அதற்கு மாறான கருத்துகளை வெளியிட்டால் அதனை டவ்விஷ் என்று அழைப்பார்கள்.

 நவம்பர் 3 என்ன நடந்தது?

அமெரிக்க ஃபெடரல் ரிசர்வ் வங்கியின் அக்டோபர் மாத கூட்டம் நவம்பர் 3 அன்று நடைபெற்றது. வட்டி விகிதங்களை தொடர்ந்து அதிகரித்தாலும் பணவீக்கம் கட்டுக்குள் வராத காரணத்தினால் வரும் காலங்களில் வட்டி விகிதம் அதிக அளவு உயர்த்தப்படாது என்ற சந்தைக்கு சாதகமான டவ்விஷ் கமெண்டை ஆளுநர் வெளிப்படுத்துவார் என்று சந்தை கருதியது. இரண்டு சதவீதம் லட்சியம், நான்கு சதவீதம் நிச்சயம் என்று நமது அரசியல் தலைவர்கள் கூறுவது போன்ற எதிர்பார்ப்பினை சந்தை கொண்டிருந்தது. அதன் காரணமாகவே அக்டோபர் மாதத்தில் வரலாறு காணாத வளர்ச்சியை பங்கு சந்தைகள் பெற்றன.

அமெரிக்கப் பங்குச் சந்தையில் என்ன நடக்கிறது?

ஆனால் நவம்பர் 3 அன்று நடைபெற்ற கூட்டத்தில் ஃபெடரல் வங்கியின் ஆளுநர் டவ்விஷ் கருத்துகளை வெளியிடவில்லை. பெடரல் வங்கி 2% என்ற பணவீக்க நிலையை அடையும் வரை வட்டி விகிதங்களை உயர்த்துவதை நிறுத்தப் போவதில்லை. வட்டி விகிதங்களை தளர்த்தும் நிலையை தற்போது நாம் எட்டவில்லை என்று தெரிவித்தார். மேலும் நான்காவது முறையாக 75 புள்ளிகள் வட்டி விகிதத்தை உயர்த்துவதாக அறிவித்தார். இது பங்குச் சந்தைக்கு சாதகமான விஷயமாக பார்க்கப்படவில்லை. இதன் காரணமாக கூட்டம் முடிவற்ற அரை மணி நேரத்தில் அமெரிக்க பங்கு சந்தை 2% சரிவினை சந்தித்தது.

பங்கு முதலீட்டாளர்கள் இனி என்ன செய்ய வேண்டும்...

தற்போதைய நிலையை லீமன் பிரதர்ஸ் காரணமாக தோன்றிய பொருளாதார வீழ்ச்சி, கொரோனா நோய் தொற்று காலகட்டத்தில் ஏற்பட்ட பொருளாதார வீழ்ச்சி ஆகியவற்றை ஒப்பிட்டு பேசுகின்றனர். இது போன்ற இக்கட்டான சூழ்நிலைகளில் இருந்து சந்தை மீட்சி அடையும் பொழுது அபிரதமான வளர்ச்சியை கடந்த காலங்களில் பெற்றிருந்தது. அதைப் போன்ற எழுச்சி பங்குச் சந்தையில் ஏற்படும் என்று பலர் கருதுகின்றனர்.

பங்கு முதலீட்டாளர்கள்
பங்கு முதலீட்டாளர்கள்

ஆனால் கடந்த காலங்களில் ஏற்பட்ட பிரச்சனைகளுக்கும் தற்போதைய வீழ்ச்சிக்கும் மிகப்பெரிய வேற்றுமை உள்ளது. கொரோனா ஊரடங்கு காலகட்டத்தில் வட்டி விகிதங்களை அனைத்து நாடுகளும் கணிசமாக குறைத்தன. கச்சா எண்ணெய் விலை வரலாறு காணாத வீழ்ச்சியை அடைந்தது. இவை சந்தைக்கு மிகவும் சாதகமான விஷயமாக மாறியது. அதனால் நோய் தொற்று நிலை மாறத் தொடங்கிய பொழுது சந்தை அபிரதமான வளர்ச்சியை பெற்றது.

ஆனால் தற்போது அதற்கு நேர்மாறாக வட்டி விகிதங்கள் விண்ணை முட்டும் அளவிற்கு உயர்ந்திருக்கிறது. கச்சா எண்ணெய் விலையும் குறைவது போல தெரியவில்லை. அதனால் குறுகிய காலத்தில் அபிரத வளர்ச்சி ஏற்படுமா என்றால் நிச்சயம் அதற்கான வாய்ப்பு குறைவாகவே உள்ளது. கண்ணுக்கு எட்டிய தொலைவு வரைக்கும் வட்டி விகிதங்கள் கடந்த கால அளவிற்கு செல்வதற்கான சாத்திய கூறுகளும் தெரியவில்லை. ரஷ்ய போரும் முடிவுக்கு வருவது போல தெரியவில்லை.

 பங்குச் சந்தைகள் எப்பொழுதும் நீண்ட காலங்களில் உயர்வடையும் என்று கருதினால் அதுவும் தவறு என்பதை ஜப்பான் பங்குச் சந்தை உணர்த்துகிறது. 1980 களில் 40 ஆயிரம் புள்ளிகள் என்ற நிலையில் இருந்த ஜப்பான் நாட்டின் நைய்கி குறியீடு தற்போது 40 ஆண்டுகள் முடிவற்ற பிறகும் 40,000 புள்ளிகளை கடக்க இயலவில்லை. ஜப்பான் பங்குச் சந்தையில் நீண்ட காலத்திற்கு முதலீடு செய்த முதலீட்டாளர்கள் 40 ஆண்டுகள் கடந்த பிறகும் தமது பணத்தை லாபத்தில் எடுக்க முடியவில்லை.

 பங்குச் சந்தையில் முதலீடு செய்யக்கூடாதா?

நிச்சயமாக பங்குச் சந்தைகள் போல பணம் அளிக்கும் அட்சய பாத்திரங்கள் வேறு எதுவும் இல்லை. சரியான பங்குகளை தேர்ந்தெடுத்து முதலீடு செய்வது நமக்கு லாபத்தை அளிக்கும். ஒவ்வொரு காலகட்டத்திலும் நாம் தேர்ந்தெடுக்கும் பங்கு ஒரே மாதிரி லாபத்தை தந்து விடாது.

பங்குச் சந்தை
பங்குச் சந்தை

உதாரணத்திற்கு பணவீக்கம் காரணமாக மெட்டல் துறை மிகப்பெரிய வீழ்ச்சியை கடந்த ஆண்டில் கண்டுள்ளது. இதன் காரணமாக மெட்டல் துறை சார்ந்த டாடா ஸ்டீல், வேதாந்தா, ஹின்டால்கோ போன்ற நிறுவன பங்குகள் சரிவை சந்தித்து வருகின்றன.

ஆனால் இந்த உலோகங்களை மூலப் பொருட்களாக பயன்படுத்தி கார் தயாரிக்கும் மாருதி சுசுகி நிறுவனம் இந்த மூலப் பொருட்களின் விலை குறைவால் நான்கு மடங்கு லாபத்தை சென்ற காலாண்டில் ஈட்டியுள்ளது. இதன் காரணமாக இந்த நிறுவனத்தின் பங்கு மிகப்பெரிய லாபத்தை பங்கு சந்தை கடுமையான சரிவை சந்தித்து வரும் இந்த காலகட்டத்தில் அதன் முதலீட்டாளர்களுக்கு கொடுத்திருக்கிறது. அதனால் பங்குகளை நடப்பு சூழலுக்கு ஏற்ப தேர்வு செய்வதில் அதிக கவனத்துடன் இருப்பது லாபத்தை நமக்கு பெற்றுத் தரும். மேலும் அதிக ஏற்ற இறக்கம் இருக்கும் இது போன்ற காலகட்டங்களில் பங்குகளை வாங்கி விற்பது போன்று, விற்று வாங்கும் முறையையும் பயன்படுத்த வேண்டும். அப்பொழுதுதான் பாம்பிடம் இருந்து கொத்து வாங்காமல் ஏணியில் ஏறி நமது இலக்கை எட்ட முடியும்.