Published:Updated:

`50 தொழிலதிபர்களின் ரூ.68,607 கோடி வாராக்கடன்... தள்ளுபடி.. தள்ளிவைப்பு..' - என்ன வித்தியாசம்?

ஆர்.பி.ஐ
ஆர்.பி.ஐ ( pixabay )

2014 ஏப்ரல் முதல் 2017 டிசம்பர் வரை அரசு வங்கிகளால் தள்ளுபடி செய்யப்பட்ட மொத்தத்தொகை 2,72,558 கோடி ரூபாய். தள்ளுபடி செய்யப்பட்ட தொகையில் வசூலிக்கப்பட்ட மொத்தத்தொகை 29,343 கோடி ரூபாய்.

வங்கிக்கடன் தள்ளுபடி செய்யப்பட்டவர்களின் பட்டியலை தகவல் அறியும் உரிமைச் சட்டத்தின்கீழ், சாகேத் கோகலே என்ற சமூக ஆர்வலர் கேட்டிருந்தார். இதற்குப் பதிலளித்த ரிசர்வ் வங்கி, 2019, செப்டம்பர் 30-ம் தேதிவரை, டெக்னிகலாகக் கடன் தள்ளுபடி செய்யப்பட்ட 50 தொழிலதிபர்களின் பட்டியலை அளித்தது.

`மல்லையா உள்ளிட்ட 50 தொழிலதிபர்களின் ரூ.68,607 கோடி வாராக்கடன் தள்ளுபடி’ -ஆர்டிஐ மூலம் வெளியான தகவல்

அந்தப் பட்டியலில் மெகுல் சோக்‌ஷி, ஜுன்ஜுன்வாலா, விஜய் மல்லையா மற்றும் பாபா ராம்தேவின் ருச்சி சோயா உள்ளிட்ட 50 வாராக்கடன்தாரர்களின், ரூ.68,607 கோடி மதிப்பிலான சொத்துகள் கணக்கியல் ரீதியாகத் தள்ளுபடி செய்யப்பட்டுள்ளதாகத் தெரிவிக்கப்பட்டுள்ளது.

இந்த விவகாரத்தில் மத்திய அரசுக்கு எதிராக கடுமையான விமர்சனங்கள் எழுந்தன. காங்கிரஸ் எம்.பி-யும் காங்கிரஸ் கட்சியின் முன்னாள் தலைவருமான ராகுல் காந்தி மத்திய அரசை கடுமையாக விமர்சித்திருந்தார். பல தரப்பினரும் இது தொடர்பாக விமர்சனங்களை முன்வைத்த நிலையில், இது `Waive off’ (தள்ளுபடி) கிடையாது. `Write off’ (தள்ளிவைப்பு) தான்.. கடன் தொகையைத் திரும்பப் பெருவதற்கான நடவடிக்கைகள் தொடரும் என்றும் கட்டப்படாமல் இருக்கும் தொகைக்கு கடன்காரர்களே பொறுப்பு என்றெல்லாம் பதில் விமர்சனங்கள் வைக்கப்பட்டன.

ஆர்.பி.ஐ
ஆர்.பி.ஐ

இவை இரண்டுக்கும் என்ன தான் வித்தியாசம்? இந்திய வங்கி ஊழியர் சம்மேளனத்தின் அகில இந்திய இணைச் செயலாளர் சி.பி.கிருஷ்ணனிடம் பேசினோம். ``68,607 கோடி ரூபாய் தள்ளுபடி செய்யப்பட்ட செய்தி பற்றி பல விவாதங்கள் கிளம்பியுள்ளன. Write off என்றால் தள்ளிவைப்பு; Waive off என்றால்தான் தள்ளுபடி என்று ஒரு புது விளக்கம் கொடுக்கப்படுகிறது. இது உண்மை அல்ல. Write off என்றாலே தள்ளுபடிதான்.

ஒரு கடன் வாராக்கடன் ஆக மாறிய பின் sub-standard, doubtful, loss asset என்ற நிலைகளைக் கடந்து, அந்தக் கடனுக்கான முழுத் தொகையும் லாபத்தில் இருந்து ஒதுக்கீடு செய்த பிறகு, ``இனி அந்தக் கடன் வரவே வராது” என்று வங்கியாளர்கள் முடிவு செய்த பின் அதைத் தள்ளுபடி செய்வார்கள். Loss Asset-ஐ Balance Sheet-ல் வைத்துக்கொண்டிருப்பதால் `பேசல்’ விதிகளின்படி கூடுதலாக மூலதனம் தேவைப்படுகிறது என்று காரணம் காட்டி அது தள்ளுபடி செய்யப்படுகிறது. சிறு வாராக்கடன் முதல் பெரும் வாராக்கடன்கள் வரை இவ்வாறு தள்ளுபடி செய்யப்படுவதுண்டு. 5 கோடி ரூபாய்க்கு மேல் கடன் வைத்துள்ள பெரும் கடனாளிகளின் (large borrowers) வாராக்கடனை தள்ளுபடி செய்ய வங்கியின் உயர் மட்ட இயக்குநர் குழுவுக்குதான் அதிகாரம் உள்ளது.

வாராக்கடன்
வாராக்கடன்

அவ்வாறு தள்ளுபடி செய்யப்பட்ட பின் தொடர்ந்து அந்த கடனாளிகளின் கடனை வசூலிக்க வங்கிகள் முயற்சி செய்யும். ஆனால், அவ்வாறு செய்யப்படும் முயற்சி எதுவும் பலன் அளிப்பதில்லை. உதாரணமாக அரசு வங்கிகளால் தள்ளுபடி செய்யப்பட்ட தொகை வருடம் 2014-15 - ரூ. 49,018 கோடி, 2015-16 – ரூ. 57,585 கோடி, 2016-17 – ரூ. 81,683 கோடி, 2017 ஏப்ரல் முதல் டிசம்பர் வரை ரூ. 84,272 கோடி. தள்ளுபடி செய்யப்பட்ட பின் வசூலிக்கப்பட்ட தொகை 2014-15 - ரூ.5,462 கோடி, 2015-16 –ரூ. 8,096 கோடி, 2016-17 – ரூ. 8,680 கோடி, 2017 ஏப்ரல் முதல் டிசம்பர் வரை - ரூ.7,106 கோடி.

ஆக 2014 ஏப்ரல் முதல் 2017 டிசம்பர் வரை அரசு வங்கிகளால் தள்ளுபடி செய்யப்பட்ட மொத்தத்தொகை 2,72,558 கோடி ரூபாய். தள்ளுபடி செய்யப்பட்ட தொகையில் வசூலிக்கப்பட்ட மொத்தத்தொகை 29,343 கோடி ரூபாய். அதாவது தள்ளுபடி செய்யப்பட்ட வாராக்கடனில் 10.8 சதவிகிதம்தான் வசூலிக்கப்பட்டது. இதுவும் நடைமுறை அனுபவத்தில் சிறு கடனாளிகளிடமிருந்து வசூலிக்கப்பட்ட தொகையாகத்தான் உள்ளது.

சி.பி.கிருஷ்ணன்
சி.பி.கிருஷ்ணன்

ஏற்கெனவே இத்தகைய கடன்களுக்கு வங்கிகளின் லாபத்திலிருந்து முழு (100%) ஒதுக்கீடு செய்யப்பட்டுவிட்டதால் இந்த வசூலிக்கப்பட்ட தொகை நேரடியாக லாபத்தில் வரவு வைக்கப்படும். ஆக 89 சதவிகிதம் முழுவதுமாக ரத்து செய்யப்பட்டு விட்ட தொகை. இதை வேண்டுமானால் waive off amount என்று அழைக்கலாம். இது நாடாளுமன்ற மேலவையில் 2018-ம் ஆண்டு மார்ச் மாதம் கேட்கப்பட்ட கேள்விக்குக் கிடைத்த பதில் என்று வங்கிகளின் வராக்கடன் ஆய்வாளர் விவேக் கவுல் பதிவு செய்கிறார்.

ஏதோ `write off' செய்யப்பட்ட கடன் முழுவதும் பின்னால் வசூல் ஆகிவிடும்போல் மாயையை உருவாக்கப் பார்க்கிறார்கள் ஆட்சியாளர்கள். அது உண்மையல்ல” என்கிறார்.

அடுத்த கட்டுரைக்கு