மூன்று மாதங்களில் ரூ.1 லட்சம் கோடி... எளிதில் பணம் அனுப்ப கைகொடுக்கும் யு.பி.ஐ!

ஆ ச்சர்யம்தான், ரொக்கமாகவே பணத்தைத் தந்து, வாங்கிப் பழக்கப்பட்ட நம் மக்கள் ஆன்லைனில் பணப் பரிவர்த்தனை செய்யத் தயாராகிவிட்டார்கள் என்று பார்க்கும் போது ஆச்சர்யமாகத்தான் இருக்கிறது.

. மத்திய அரசின் செல்போன் பணப் பரிமாற்றச் செயலியான யு.பி.ஐ ஆப்ஸ்மூலம் கடந்த ஏப்ரல், மே, ஜூன் ஆகிய மூன்று மாதங் களில் ரூ.1 லட்சம் கோடி பரிவர்த்தனை நடந்து புதிய சாதனை படைக்கப்பட்டு உள்ளது.

யு.பி.ஐ செயலி கடந்த 2016, ஆகஸ்ட்டில் அறிமுகப்படுத்தப்பட்டது. முதல் மாதத்தில் ரூ.3.10 கோடி அளவுக்கு மட்டுமே பணப் பரிவர்த்தனை நடந்தது. அடுத்த 20 மாதங்களில் (2016 ஆகஸ்ட் முதல் 2018 மார்ச் வரை) ரூ.1.16 லட்சம் கோடி பரிவர்த்தனை நடந்துள்ளது. ஆனால், நடப்பு நிதியாண்டின் முதல் காலாண்டில் (ஏப்ரல்-ஜூன்) ரூ.1.01 லட்சம் கோடிக்கு பரிவர்த்தனை நடந்து எல்லோரது புருவத்தையும் உயர்த்தியிருக்கிறது.

.

யு.பி.ஐ செயலி அறிமுகமானதிலிருந்து 2018 ஜூன் வரையிலான காலத்தில் இதன் மூலமாக 155 கோடி (எண்ணிக்கை) பரிவர்த்தனைகள் நடந்துள்ளன. அண்மைக் காலத்தில் இந்தச் செயலியைப் பயன்படுத்துபவர்களின் எண்ணிக்கை வேகமாக அதிகரித்து வருகிறது.

யு.பி.ஐ செயலியை எப்படிப் பயன் படுத்துவது என்பது குறித்து, வங்கி மற்றும் கார்ப்பரேட் நிறுவனங்களுக்கு சைபர் கிரைம் குறித்துப் பயிற்சி அளிக்கும் இன்ஃபைசெக் நிறுவனத்தின் பயிற்சியாளர் கார்த்திக்கிடம் கேட்டோம்.

‘‘இந்த ஆப்ஸை முதலில் டவுன்லோட் செய்துகொள்ளுங்கள். இதில் குறிப்பிட்டதொரு வங்கியை நாம் தேர்ந்தெடுத்தால், அது யு.பி.ஐ செயலிக்கு நம்மைக்கொண்டு செல்லும்.

வழக்கமாக, நாம் ஒரு வங்கியிலிருந்து இன்னொரு வங்கிக் கணக்குக்குப் பணப் பரிமாற்றம் செய்ய வேண்டும் என்றால், ஆர்.டி.ஜி.எஸ் (RTGS) செய்யலாம். இதற்கும் குறைவான தொகையாக இருந்தால், என்.ஐ.எஃப்.டி (NIFT) மூலம் அனுப்புவோம். இந்தத் தொகை வங்கிக்கு வங்கி மாறுபடும்.

. நிஃப்ட் அதாவது, என்.ஐ.எஃப்.டி வழியாகப் பணம் அனுப்ப அதற்கென்று குறிப்பிட்ட கட் ஆஃப் நேரம் உள்ளது. எனவே, நம் தேவைக்கு 24 மணி நேரமும் பணம் அனுப்ப இயலாது. மேலும், தற்போது, இரண்டாம் சனி மற்றும் நான்காவது சனிக்கிழமை வங்கிகளுக்கு விடுமுறை நாளாக இருக்கிறது. எனவே, வெள்ளிக்கிழமை நிஃப்ட் மூலம் பணப் பரிமாற்றம் செய்தால் திங்கள்கிழமைதான் பணம் கிடைக்கும். இதற்காகத்தான் ஐ.எம்.பி.எஸ் (Immediate Payment System) உருவாக்கப்பட்டது. இதில் அடுத்த விநாடியே பணப் பரிமாற்றாமாகிவிடும். இதில் அனுப்பப் படும் பணத்தின் வரம்பு வங்கிக்கு வங்கி மாறுபடும். சில வங்கிகள் மூலம் ரூ.10 ஆயிரம் மட்டுமே அனுப்ப முடியும் என்று நிர்ணயத்துள்ளன.

ஆனால், யு.பி.ஐ செயலி மூலம் ஒருநாளில் அதிகபட்சம் ரூ.1 லட்சம் பணப் பரிமாற்றம் மேற்கொள்ளலாம். யு.பி.ஐ செயலியில் பணப் பரிமாற்றம் உங்களுக்கு ஏற்கெனவே இருக்கும் வங்கிக் கணக்கைப் பயன்படுத்திக்கொள்ளலாம். யு.பி.ஐ செயலியைப் பயன்படுத்தும்போது 0.50 காசு மட்டுமே வங்கிகள் கட்டணமாக வசூலிக்கின்றன. எனவே, கட்டணத்தைப் பற்றிக் கவலைப்படாமல் உடனே பணம் அனுப்பவும், பெறவும் முடியும்’’ என்றார்.

நீங்கள் யு.பி.ஐ ஆப்பை டவுண்லோடு செய்து எளிதில் பணப் பரிவர்த்தனை செய்யலாமே! - கே.எஸ்.தியாகராஜன்