Published:Updated:

டிராவல் இன்ஷூரன்ஸ் ஏன் அவசியம்?

ஒட்டுமொத்த விகடனுக்கும் ஒரே ஷார்ட்கட்

Use App
டிராவல் இன்ஷூரன்ஸ் ஏன் அவசியம்?
டிராவல் இன்ஷூரன்ஸ் ஏன் அவசியம்?

சோ.கார்த்திகேயன்

பிரீமியம் ஸ்டோரி

ம்மில் பலர், உள்ளூர் முதல் உலக நாடுகள் வரை சுற்றுலா செல்கிறோம். அப்படிச் செல்லும்போது எல்லாம் சரியாக நடந்துவிட்டால், எந்தப் பிரச்னையும் இல்லை. ஆனால், சுற்றுலா செல்லும் இடங்களில் ஏதேனும் அசம்பாவிதம் நிகழ்ந்தால், நாம் நிம்மதி இழப்போம். இதனால் சுற்றுலாவுக்குச் சென்ற நோக்கமே பாழாகிவிடும். இது மாதிரியான அசம்பாவிதங்களிலிருந்து நம்மைக் காக்க உதவுபவைதான் ‘டிராவல் இன்ஷூரன்ஸ்’. சுற்றுலா செல்லும் முன்பு, இந்த ‘டிராவல் இன்ஷூரன்ஸ்’ இல்லாமல் போவது மகா தவறு. 

‘டிராவல் இன்ஷூரன்ஸ்’ பாலிசியானது குறைந்தபட்சம் ஏழு நாள்கள் முதல் தரப்படுகிறது. ஆறு மாதக் குழந்தை முதல் 70 வயது முதியவர் வரை இந்த இன்ஷூரன்ஸை எடுத்துக்கொள்ளலாம். இந்த பாலிசியை, நீங்கள் சுற்றுலாவுக்குக் கிளம்பும் தினத்தன்றுகூட எடுக்கலாம். நீங்கள் விமானத்தில் ஏறி வெளிநாட்டுக்குச் சென்று, மீண்டும் இந்திய விமான நிலையத்துக்குள் வந்து இறங்கும் வரை இந்த பாலிசி மூலம் கவரேஜ் கிடைக்கும். இந்த இன்ஷூரன்ஸில் கவனிக்க வேண்டிய விஷயங்கள் குறித்து இன்ஷூரன்ஸ் நிபுணரும், வெல்த் லேடர் நிறுவனத்தின் நிறுவனருமான ஸ்ரீதரனிடம் கேட்டோம்.  

டிராவல் இன்ஷூரன்ஸ் ஏன் அவசியம்?

   அமெரிக்கா, இங்கிலாந்தில் அவசியம்

“நம் நாட்டுக்குள் சுற்றுலா செல்லும்போது  அவசியம் ‘டிராவல் இன்ஷூரன்ஸ்’ எடுக்க வேண்டும் என்று நான் சொல்ல மாட்டேன். காரணம், நம்மில் பலருக்கும் ஹெல்த் மற்றும் லைஃப் இன்ஷூரன்ஸ்  பாலிசி ஏற்கெனவே இருக்கும். இந்த பாலிசி மூலம் நமக்கேற்படும் உடல்நலக் குறைபாடுகளால் ஏற்படும் செலவுகளைச் சமாளித்து விடலாம். இந்த இன்ஷூரன்ஸ் இல்லாதவர்கள் ‘டிராவல் இன்ஷூரன்ஸ்’ பாலிசி எடுப்பது அவசியம். 

ஆனால், வெளிநாட்டுச் சுற்றுலா செல்லும்போது, ‘டிராவல் இன்ஷூரன்ஸ்’ மிக அவசியம். அமெரிக்கா, இங்கிலாந்து, ஆஸ்திரேலியா போன்ற நாடுகளுக்குச் செல்லும்போது ‘டிராவல் இன்ஷூரன்ஸ்’ இருந்தால் மட்டுமே அந்த நாட்டுக்குள் செல்ல அனுமதிப்பார்கள். விசா எடுக்கும்போதே, இந்த இன்ஷூரன்ஸ் பாலிசியையும் சேர்த்து எடுப்பது அவசியம்.

வெளிநாடுகளுக்குச் செல்லும்போது ‘டிராவல் இன்ஷூரன்ஸ்’ எடுக்க அதிகம் செலவாகாது.  நான்கு பேர்கொண்ட ஒரு குடும்பம், ஆசிய நாடுகளுக்கு ஒரு வாரக் காலம் சுற்றுலா செல்கிறது எனில், நபருக்கு தலா ரூ.1,000 மட்டுமே செலவாகும். ‘டிராவல் இன்ஷூரன்ஸ்’ பாலிசிக்கான பிரிமீயம் ஒவ்வொரு நாட்டுக்கும் மாறும். அமெரிக்கா, இங்கிலாந்து போன்ற நாடுகளுக்கு ஒரு வாரம் சுற்றுலா எனில், ஒரு நபருக்கு ரூ.2,500 செலவாகும்.  

டிராவல் இன்ஷூரன்ஸ் ஏன் அவசியம்?

பாஸ்போர்ட் தொலைந்து போனால்...

டிராவல் இன்ஷூரன்ஸில் இரண்டு வகை உண்டு. ஒன்று, உடல்நலம் சம்பந்தமான பிரச்னை. மற்றொன்று, உயிர்ச்சேதம் மற்றும் உடைமைகள் காணாமல் போவது. 

பொதுவாக, உயிர்ச்சேதம் ஏற்பட்டால், 100% க்ளெய்ம் செய்து கொள்ளலாம். பாஸ்போர்ட் தொலைந்து போனால், ரூ.10,000 முதல் ரூ.20,000 வரை க்ளெய்ம் கிடைக்கும். இதுவே உடைமைகள் வைத்திருக்கும் பை (Bag) தொலைந்தால், வெளிநாடு செல்லும்முன், பைகளில் வைத்திருக்கும் உடைமைகளின் மதிப்பு எவ்வளவு என்று தாக்கல் செய்கிறோமோ, அந்த அளவுக்கு க்ளெய்ம் செய்து கொள்ளலாம். பைகளில் வைத்துள்ள பொருள்களுக்கான க்ளெய்ம் என்று வரும்போது அதிகபட்சம் ரூ.50,000 வரை இழப்பீடு கிடைக்கும்.

டிராவல் இன்ஷூரன்ஸ் ஏன் அவசியம்?

மருத்துவச் செலவினங்கள், இந்தியாவைவிட வெளிநாட்டில் மிக அதிகம். உதாரணத்துக்கு, ஐரோப்பிய நாடுகளுக்குச் சுற்றுலா சென்ற இடத்தில் உடல்நிலை பாதிப்படைந்தால், அங்கு மருந்துச்சீட்டு பரிந்துரை இல்லாமல் எந்தவொரு மருந்தையும் வாங்க முடியாது.  மருத்துவரை அணுகினால், குறைந்தது 100 முதல் 150 யூரோ வரை கட்டணம் தர வேண்டும். 100 யூரோ என்பது, இந்திய மதிப்பில் ரூ.7,000. இந்தக் கட்டணமும் இன்ஷூரன்ஸ் கவரேஜில் கிடைக்கும்.  மருத்துவருக்கான கட்டணம் மட்டுமின்றி, மருந்துப் பொருள்களுக்கான செலவு, மருத்துவமனையில் அனுமதி மற்றும் சிகிச்சைக்கான செலவு என அனைத்துச் செலவுகளுக்கும் உரிய ரசீதுகளைச் சமர்ப்பித்து க்ளெய்ம் செய்து கொள்ளலாம். அதிகபட்சமாக 5,000 யூ.எஸ் டாலர் வரை கிடைக்கும்.

வெளிநாடு செல்லும்போது இறக்கும்பட்சத்தில் அவர் உடலை விமானத்தில் கொண்டு வருவதற்கான செலவுத் தொகையும் இழப்பீடாகக் கிடைக்கும். இன்ஷூரன்ஸ் எடுத்தவர் உயிரிழந்தால், அவர் இறந்ததற்கான சான்றிதழைச் சமர்ப்பித்த பிறகுதான் க்ளெய்ம் கோர முடியும்.

   கவனிக்க வேண்டிய விஷயங்கள்

டிராவல் இன்ஷூரன்ஸைப் பொறுத்தவரை, அப்போலோ முனிச், நேஷனல் இன்ஷூரன்ஸ், ஸ்டார் ஹெல்த், ஹெச்.டி.எஃப்.சி எர்கோ என எல்லா ஹெல்த் மற்றும் பொதுக் காப்பீட்டு நிறுவனங்களும் வழங்குகின்றன. முதலில், டிராவல் இன்ஷூரன்ஸில் என்னென்ன கவரேஜ்கள் இருக்கின்றன என்பதைக் கவனிக்க வேண்டும். எந்தெந்த நாடுகள் கவரேஜ் ஆகின்றன, பேக் மிஸ்ஸிங், ஹெல்த் இன்ஷூரன்ஸ் என எந்தவிதமான கவரேஜுக்கு எவ்வளவு  க்ளெய்ம் கிடைக்கும் என்பதைப் பார்க்க வேண்டும். மேலும், எவ்வளவு பிரீமியம் செலுத்த வேண்டும், நிறுவனத்தின் க்ளெய்ம் செட்டில்மென்ட் விகிதம் எவ்வளவு என்பதைப்  பார்த்து,  இன்ஷூரன்ஸ் எடுப்பது நல்லது.

சுற்றுலா செல்லும்போது உங்கள் இன்ஷூரன்ஸ் பாலிசி எண், பாலிசி எடுத்த நிறுவனத்தின் பெயர், பாலிசியின் பெயர், நிறுவனத்தின் இலவசத் தொலைப்பேசி எண் போன்றவற்றைக் குறித்து வைத்துக்கொள்ளவும். ஒருவேளை பாலிசியின் நகல் தொலைந்தால்கூட, பாலிசி எண்ணை வைத்து க்ளெய்ம் செய்யலாம்.

இன்ஷூரன்ஸ் நிறுவனத்தில் ஆன்லைனில் உடைமைகள் தொலைந்ததற்கான தகவலைத் தெரிவித்தும் க்ளெய்ம் செய்துகொள்ளலாம்’’ என்றார் இன்ஷூரன்ஸ் நிபுணர் ஸ்ரீதரன். இனி, சுற்றுலா செல்லும்போது, ‘டிராவல் இன்ஷூரன்ஸ்’ எடுக்க மறக்காதீர்கள்!

முன்னெச்சரிக்கை அவசியம்!

டிராவல் இன்ஷூரன்ஸ் ஏன் அவசியம்?



கிருஷ்ணராஜ், டிராவல் இன்ஷூரன்ஸ் பயனாளர் 

 “குடும்பத்துடன் சிங்கப்பூர் மற்றும் மலேசியாவுக்கு இரண்டு வாரங்கள் சுற்றுலா செல்வதற்காக டிராவல் இன்ஷூரன்ஸ் எடுத் தேன். நிறைய செலவு செய்து சுற்றுலா செல்கிறோம். போகும் இடத்தில் பாஸ்போர்ட், பேக் என எது வேண்டுமானாலும் காணாமல் போகலாம். திடீரென நமக்கு உடல்நிலை சரியில்லாமல் போகலாம். இதிலிருந்து வரும் பாதிப்புகளிலிருந்து  பாதுகாத்துக்கொள்ளத்தான் இந்த டிராவல் இன்ஷூரன்ஸ் எடுத்திருந்தேன். சுற்றுலா சென்ற இடத்தில் ஏதாவது நேர்ந்து அங்கு செலவழிப்பதைவிட, அதற்கான முன்னெச் சரிக்கை நடவடிக்கையை இங்கேயே எடுத்துவிடுவது நல்லது என்பது என் அனுபவம்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு