என் மைனர் பெண் குழந்தைக்கு பான் கார்டு எடுப்பது அவசியமா?

கிஷோர் குமார், கோயமுத்தூர்

கே.ஆர். சத்தியநாராயணன், ஆடிட்டர்

‘‘பொதுவாக, மைனர் குழந்தைகளுக்கு பான் கார்டு  அவசியம் இல்லை.  ஏனெனில், மைனர் குழந்தைக்காக வங்கிக் கணக்கு தொடங்குவது, கல்வி உதவித்தொகை பெறுவது ஆகிய விஷயங்களில், குழந்தையின் பெற்றோர்தான் (அப்பா/அம்மா) கார்டியனாக இருப்பார்கள். யார் கார்டியனாக இருக்கிறாரோ, அவரிடம் பான் கார்டு இருந்தால் போதும். அந்தக் குழந்தையின் தனித் திறமைக்கான பரிசாகப் பணம் கிடைக்கும்பட்சத்தில் அதற்கு பான் கார்டு தேவைப் படலாம்.’’

ஹெல்த் இன்ஷூரன்ஸ் பாலிசி எடுக்கும்போது கவரேஜ் தொகையை எப்படித் தீர்மானிப்பது?

சந்திரமோகன், பொள்ளாச்சி

பி.மனோகரன், இன்ஷூரன்ஸ் ஆலோசகர் 

‘‘உங்களால் எவ்வளவு தொகையை பிரீமியமாகக்  கட்ட முடியும் என்பதை முதலில் கவனத்தில் கொள்ளுங்கள். எந்தெந்த நோய்களுக்கான சிகிச்சைகளுக்கு உங்களுக்குத் தேவைப்படலாம் என்பதன் அடிப்படையிலும் கவரேஜ் தொகையை நீங்கள் நிர்ணயம் செய்துகொள்ளலாம். தவிர, இன்ஷூரன்ஸ் நிறுவனத்தின் தொடர்பில் இருக்கக்கூடிய மருத்துவமனைகளின் தரம், கட்டண விவரங்கள், குடும்ப உறுப்பினர்களின் எண்ணிக்கை, உறுப்பினர்களின் வயது, அவர்களுக்கான எதிர்கால மருத்துவத் தேவை போன்ற எல்லா விஷயங்களையும்  ஆராய்ந்தறிந்து அதற்கேற்றபடி கவரேஜ் தொகையை முடிவு செய்யலாம்.’’ 

குடும்பத் தலைவியான நான் பங்குச் சந்தை புரோக்கராக இருக்கிறேன். வருமானத்துக்கு நான் எப்படி வரி கட்ட வேண்டும், எந்தப் படிவத்தைப் பயன்படுத்த வேண்டும்?

இந்திரா, சென்னை

ஜி.கார்த்திகேயன், ஆடிட்டர் 

‘‘பங்குச் சந்தை முகவராக நீங்கள் சம்பாதிக்கும் வருமானம், வர்த்தக வருமானமாகக் கருதப்படும். உங்கள் வருமானத்தைப் பொறுத்து 5%, 20%, 30% என வரி விதிக்கப்படும். இதற்கான வருமான வரியைத் தாக்கல் செய்ய ஐடிஆர் 3 (ITR 3) படிவம் பயன்படுத்த வேண்டும்.’’

யூலிப் பாலிசி, இ.எல்.எஸ்.எஸ் ஃபண்டுகள் இவையிரண்டில் வருமான வரிச் சேமிப்பிற்கு உகந்தது எது?

முத்துலட்சுமி, அரக்கோணம்

ஸ்ரீதரன், வெல்த் லேடர், இன்ஷூரன்ஸ் ஆலோசகர் 

‘‘டாக்ஸ் சேவிங் மியூச்சுவல் ஃபண்டுகளில் (ELSS) முதலீடு செய்வது எப்போதும் நல்ல வரிச் சேமிப்பு முறையாகும். யூலிப் இன்ஷூரன்ஸ் பாலிசியில், ஃபண்ட் அலோகேஷன், நிர்வாகம், நிதி மேலாண்மை மற்றும் மார்ட்டாலிட்டி என நான்கு வகைக் கட்டணங்கள் வசூலிக்கப்படும்.  இதனால் நமது வருமானம் குறையும். மேலும், யூலிப் பாலிசியில் இன்ஷூரன்ஸ் கவரேஜ் குறைவாக இருக்கும். உங்களுக்கு இன்ஷூரன்ஸ் பாதுகாப்பு தேவையென்றால், டேர்ம் இன்ஷூரன்ஸ் எடுத்துக்கொள்வதுதான் சரி.   அதற்கும் வருமான வரிச் சலுகை இருக்கிறது. யூலிப் பாலிசிக்குப் பதிலாக இ.எல்.எஸ்.எஸ் மற்றும் டேர்ம் இன்ஷூரன்ஸ் பிளான் எடுத்துக் கொள்ளவும்.’’ 

ஆண்டு வருமானமான ரூ.13 லட்சத்துக்கு 30% வருமான வரி கட்ட வேண்டியிருக்கிறது. பங்குகள் வாங்கி விற்ற குறுகிய கால ஆதாயத்திற்கும் அதே 30% வரிதான் கட்ட வேண்டுமா? 

செந்தில் முருகன், தூத்துக்குடி

எஸ்.பாலாஜி, சார்ட்டர்ட் அக்கவுன்டன்ட் 

‘‘நீங்கள் சம்பாதிக்கும் ஆண்டு வருமானமான ரூ.13 லட்சத்துக்கு 30% வரி வசூலிக்கப்படும். அடுத்து, குறுகியகால ஆதாயமாகப் பங்குச் சந்தையிலிருந்து கிடைக்கும் வருமானத்திற்கு மட்டும் தனியாக 15% வரி மற்றும் கல்வித் தீர்வை 3% கட்ட வேண்டும். அப்படித் தனியாக வரி கட்ட நீங்கள் ஏற்கெனவே பங்குப் பரிவர்த்தனை வரி (Security Transaction Tax) கட்டியிருக்க வேண்டும். அப்படிக் கட்டவில்லை என்றால் வருமானங்கள் அனைத்தும் ஒன்றாகக் கணக்கிடப்பட்டு, அதற்கான வரி வசூலிக்கப்படும்.

உங்களுடைய வருமானம், அடிப்படை வருமான வரி வரம்பைவிட அதிகமாக இருக்கும்போது மட்டுமே இந்த வரிக் கணக்கீடு பொருந்தும். வருமானம், அடிப்படை வரி வரம்பான ரூ.2.5 லட்சத்தை எட்டாதபோது, குறுகிய கால ஆதாயமாகக் கிடைத்த வருமானத் தையும் இணைத்துக் கிடைக்கும் கூட்டு வருமானம், வரி வரம்பைவிடக் குறைவாக இருந்தால் வரி கட்டத் தேவையில்லை. ஆனால், பங்குச் சந்தை மூலம் குறுகிய காலத்தில் கிடைத்த லாபம், அடிப்படை வரம்பைத் தாண்டும்பட்சத்தில், 15% வரி கட்டியாக வேண்டும். கூடவே, கல்வித் தீர்வை 3% கட்ட வேண்டும். கல்வித் தீர்வை    2018-19-ம் நிதியாண்டுக்கு 4 சதவிகிதமாக அதிகரிக்கப்பட்டுள்ளது.’’ 
 
வயது 24. முதன்முறையாக மியூச்சுவல் ஃபண்டில் முதலீடு செய்யவுள்ளேன். என்னிடமுள்ள 25,000 ரூபாயைக் குறைந்த அளவிலான ரிஸ்க்கில், நீண்ட காலத்துக்கு முதலீடு செய்ய விரும்புகிறேன். இதற்கேற்ற ஃபண்ட் திட்டங்களைச் சொல்லுங்கள்.

ஹரிஹரசுதன், சென்னை

எஸ்.ராமலிங்கம், நிதி ஆலோசகர்  

‘‘உங்களைப் போன்ற இளம் வயதினர் பண வீக்கத்தைத் தாண்டி, நீண்ட கால அடிப்படையில் லாபம் பெற வேறெந்த முதலீட்டுத் திட்டத்தையும் விட பங்குச் சந்தை சார்ந்த மியூச்சுவல் ஃபண்ட்  திட்டங்களே சிறந்தது. எல்&டி ஹைபிரீட் ஈக்விட்டி ஃபண்டில் ரூ.10,000, ரிலையன்ஸ் ஈக்விட்டி ஹைபிரீட் ஃபண்டில் ரூ.10,000, இன்வெஸ்கோ இந்தியா குரோத் ஆப்பர்ச்சூனிட்டீஸ் ஃபண்டில் ரூ.5,000 என்று  பிரித்து, ஐந்து முதல் எட்டு ஆண்டுகள் வரை முதலீடு செய்யுங்கள். இந்த முதலீட்டின் மூலம் ஆண்டுக்குச் சராசரியாக 12% வருமானம் எதிர்பார்க்கலாம்.’’

இ.டி.எஃப் என்றால் என்ன, இதன்மூலம் எவ்வளவு வருமானம் பெற முடியும்? எந்த வயதில் இதில் முதலீடு செய்யலாம்?

ஆர்.கே.ராம்குமார், திருச்சி. 
                                         
வ.நாகப்பன், பங்குச் சந்தை நிபுணர் 

‘‘இ.டி.எஃப் என்பது, பங்குச் சந்தையில் வர்த்தக மாகக்கூடிய மியூச்சுவல் ஃபண்ட் திட்டமாகும். பொதுவாக, மியூச்சுவல் ஃபண்ட் திட்டங்களில் முதலீடு செய்ய அந்தந்த அஸெட் மேனேஜ்மென்ட் கம்பெனிகளையோ அல்லது அவர்களின் முகவர்களையோதான் அணுக வேண்டும். விற்கும்போதும் அப்படித்தான். ஃபண்டுகளின் என்.ஏ.வி அடிப்படையில் நமக்கு ஃபண்ட் யூனிட்டுகள் கிடைக்கும்.

ஆனால், இ.டி.எஃப்-ஐ பொறுத்தவரையில், என்.எஃப்.ஓ (NFO) முறையில் புதிதாக வெளியிடும் போது முதலீடு செய்ய மட்டுமே அந்தந்த  கம்பெனிகளையோ அல்லது அவர்களின் முகவர் களையோ அணுக வேண்டும். அதன்பின்னர் அதை விற்று வெளியில் எடுக்கவோ அல்லது மேலும் வாங்கவோ, பங்குச் சந்தைக்குத்தான் செல்ல வேண்டும். ஏனெனில், அதன் யூனிட்டுகள் பங்குச் சந்தைகளில் பட்டியலிடப்பட்டு, பங்கு களைப் போலவே வர்த்தகமாகிக் கொண்டிருக்கும்.

நாம் வாங்கும் ஒவ்வொரு யூனிட்டுக்கும் இணையாக நிறுவனங்களின் பங்குகளோ, தங்கமோ வாங்கி வைத்திருப்பார்கள். வெளிநாடுகளில் வெள்ளி மற்றும் கச்சா எண்ணெய் உள்ளிட்ட இதரப் பொருள்களின் அடிப்படையிலும்         இ.டி.எஃப்-கள் உண்டு. அந்த முதலீடுகளின் மதிப்பு உயர உயர, நம் யூனிட்டுக்களின் மதிப்பும் உயரும். அல்லது அன்றைய சந்தை நிலவரத்தைப் பொறுத்து இறங்கவும் செய்யலாம்.

இளம் வயதினர், தேசியப் பங்குச் சந்தைக் குறியீடான நிஃப்டியில் வணிகமாகும் 50 முன்னணிப் பங்குகளை அடிப்படையாகக் கொண்ட நிஃப்டி இ.டி.எஃப்-ல் நீண்டகால அடிப்படையில், மாதாமாதம் எஸ்.ஐ.பி முறையில் சிறுகச் சிறுக முதலீடு செய்வது நல்லது.  இ.டி.எஃப்-ல் முதலீடு செய்ய அருகில் இருக்கும் பங்குச் சந்தை புரோக்கரை அணுகுங்கள்.’’

தொகுப்பு: தெ.சு.கவுதமன்

கேள்விகளை அனுப்புகிறவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. nav@vikatan.com.