Published:Updated:

சைல்டு இன்ஷூரன்ஸ் பாலிசி: நம் குழந்தைகளை காக்குமா?

சைல்டு இன்ஷூரன்ஸ் பாலிசி: நம் குழந்தைகளை காக்குமா?

பிரீமியம் ஸ்டோரி
சைல்டு இன்ஷூரன்ஸ் பாலிசி: நம் குழந்தைகளை காக்குமா?
சைல்டு இன்ஷூரன்ஸ் பாலிசி: நம் குழந்தைகளை காக்குமா?

வ்வொரு பெற்றோரும் தங்களின் எதிர்காலம் என்பது பிள்ளைகளின் வளர்ச்சிதான் என நினைக்கிறார்கள். அதனால்தான் குழந்தைகளின் எதிர்காலத் தேவையான கல்வி மற்றும் திருமணத்திற்கு என அதிகமாக முதலீடு செய்கிறார்கள். குழந்தை பிறந்த சில ஆண்டுகளிலே இந்த முதலீடுகளை ஆரம்பித்துவிடுகின்றார்கள். இவர்களின் முதலீடு என்பது பெரும்பாலும் குழந்தைகளுக்கான இன்ஷூரன்ஸ் பாலிசிகளாகத்தான் இருக்கின்றன. இதில் எண்டோவ்மென்ட், யூலிப் என வகைகள் இருக்கின்றன.

குழந்தைகளின் கல்வி மற்றும் கல்யாணச் செலவுக்காக சைல்டு இன்ஷூரன்ஸ் பாலிசிகளை எடுப்பது சரியா என்பது குறித்து விளக்கிச் சொன்னார், பஜாஜ் கேப்பிட்டல் நிறுவனத்தின் நிதி ஆலோசகர் ஆர்.செந்தில்.

சைல்டு இன்ஷூரன்ஸ்!

''குடும்பத்தில் வருமானம் ஈட்டும் நபரின் பெயரில் பாலிசி எடுப்பதுதான் சரி. குழந்தைகளுக்கு ஆயுள் கவரேஜ் இருப்பது போல பாலிசி எடுப்பது தவறு. குடும்பத் தலைவருக்கு ஏதாவது அசம்பாவிதம் நடந்தால் பிள்ளைகளின் படிப்பு, கல்யாணம் போன்ற முக்கிய காரியங்கள் தடைபடக் கூடாது என்பதால் வருமானம் ஈட்டும் பெற்றோரின் பெயரில் பாலிசி எடுக்கிறோம். இதில் குழந்தையை நாமினியாக சேர்க்க வேண்டும். அப்போதுதான் திட்டத்தின் முழுப் பலனும் குழந்தைக்கு கிடைக்கும். நீங்கள் குழந்தையின் பெயரில் இன்ஷூரன்ஸ் எடுக்க நேர்ந்தால், அப்போது நீங்கள் செய்ய வேண்டியது ஒன்றுதான். உங்களுக்கு ஏதாவது நேர்ந்தால் குழந்தைக்கு முதிர்வுத் தொகை கிடைக்குமாறு உள்ள திட்டத்தைத் தேர்ந்தெடுப்பதுதான் தீர்வாக அமையும்.

பாரம்பரிய பாலிசிகள்..!

சைல்டு இன்ஷூரன்ஸ் பாலிசிகளில் அதிகம் பேர் எடுப்பது (பாரம்பரிய பாலிசிகள்) எண்டோவ்மென்ட் பாலிசியைத்தான். இதில் சுமாராக சுமார் 6 சதவிகிதம்தான் வருமானம் இருக்கும். பெற்றோருக்கு ஏதாவது நிகழ்ந்துவிட்டால் உடனடியாக இழப்புத் தொகை கிடைக்கும். அதோடு பாலிசியின் ஆண்டு காலம் முடியும்போது முதிர்வுத் தொகை கிடைக்கும். இதில் 18, 20, 22 ஆகிய வயதில் படிப்பு என்று குறிப்பிட்ட அளவு முதிர்வுத் தொகையும் கிடைக்கும்.

யூலிப் பாலிசிகள்..!

சைல்டு இன்ஷூரன்ஸ் பாலிசி: நம் குழந்தைகளை காக்குமா?

யூலிப் பாலிசியில் ரிஸ்க் அதிகம். ஏனெனில் இதில் கட்டப்படும் பிரீமியத்திலிருந்து காப்பீட்டுக்கு எடுத்தது போக, மீதியைத்தான் பங்கு சந்தையில் முதலீடு செய்வார்கள். ஒதுக்கீடுக் கட்டணங்கள் அதிகமாக இருக்கும். இதில் முதிர்வுத் தொகை என்பது பங்குச் சந்தை செயல்பாட்டுக்கு ஏற்பவே கிடைக்கும். எனவே, உங்களது குறிக்கோள், குழந்தையின் எதிர்கால செலவுக்குதான் என்பதால் இந்த திட்டங்களை தேர்ந்தெடுக்கும்போது கூடுதல் கவனமாக இருப்பது நல்லது.

பாலிசி எடுத்து ஐந்து ஆண்டுக்குப் பிறகு எப்போது வேண்டுமானாலும் சரண்டர் செய்துவிடலாம். ஆனால், அது உங்களின் குறிக்கோளை நிறைவேற்றுமா என்பதை மனதில் வைத்து செயல்படவேண்டும். இந்த பாலிசியில் ஒரு சிறப்பு அம்சம், பெற்றோருக்கு ஏதாவது அசம்பாவிதம் நிகழ்ந்தால் உடனே இழப்பீடுத் தொகை கிடைப்பதோடு, பாலிசி முடிவில் முதிர்வுத் தொகையும் கிடைக்கும்.  

ரைடர் வசதி பாலிசிகள்..!

##~##
இந்த பாலிசிகளைத் தேர்ந்தெடுக்கும்போது, உங்களுக்கு ஏதாவது அசம்பாவிதம் ஏற்பட்டு மேற்கொண்டு பிரீமியம் கட்ட முடியவில்லை என்றாலும், பாலிசி தொடரும் வசதிகொண்ட துணை (ரைடர்) பாலிசியை எடுத்துக்கொள்வது நல்லது. இதை 'வெய்வர் ஆஃப் பிரீமியம் ரைடர்’ என்பார்கள். மேலும், உங்களுக்கு ஏதாவது நடந்தால் பிள்ளைகளுக்கு ஆண்டுதோறும் குறிப்பிட்ட தொகை (கவரேஜ் தொகையில் சுமார் 10%) கிடைப்பது போன்ற இன்கம் பெனிஃபிட் ரைடர் பாலிசிகளும் இருக்கின்றன. இவை இல்லாமல் இருக்கும் பாலிசிகளை தவிர்ப்பது நல்லது. இந்த ரைடர் பாலிசியில் ஒரு லட்ச ரூபாய்க்கு 250 லிருந்து 300 ரூபாய் கூடுதலாக பிரீமியம் கட்ட வேண்டியிருக்கும்.

இன்றைய தேதியில் கூட்டிக் கழித்து பார்த்தால் சைல்டு இன்ஷூரன்ஸ் பாலிசிகளைவிட டேர்ம் பிளான் மற்றும் விபத்துக் காப்பீடு பாலிசி எடுத்துவிட்டு மீதித் தொகையை மியூச்சுவல் ஃபண்டில் முதலீடு செய்தாலே கூடுதல் வருமானம் கிடைக்கும்.

விபத்துக் காப்பீடு..!

சைல்டு இன்ஷூரன்ஸ் பாலிசி: நம் குழந்தைகளை காக்குமா?

ஒவ்வொருவரும் டேர்ம் இன்ஷூரன்ஸ் பாலிசி எடுப்பது கட்டாயம். இதனோடு ஒரு விபத்துக் காப்பீடு பாலிசியும் எடுப்பது அவசியம். விபத்துக் காப்பீட்டில் 10 லட்ச ரூபாய் கவரேஜுக்கு 1,500 ரூபாய் ஆண்டு பிரீமியம் கட்டினால் போதும். கூடவே, ஒரு லட்சம் ரூபாய் வரை மருத்துவச் செலவுக்கும் கிளைம் கிடைக்கும். விபத்து ஏற்பட்டு, திரும்ப வேலைக்குப் போகும் வரை வாரத்திற்கு 3,000 ரூபாய் கிடைக்கும். இது அதிகபட்சம் 48 வாரங்கள் வரை கிடைக்கும். இதனுடன் குழந்தைகளின் படிப்பு செலவுக்கு என மாதத்திற்கு 5,000 ரூபாய் வீதம் அதிகபட்சம் 48 மாதங்களுக்கும், வீட்டுக் கடன் உள்ளிட்ட கடன்களுக்கான தவணைக்கு மாதம் 10,000 ரூபாயும் கிடைக்கும். ஒருவேளை விபத்தில் இறக்க நேரிட்டால் விபத்து காப்பீடு 10 லட்ச ரூபாயும், டேர்ம் இன்ஷூரன்ஸ் காப்பீட்டுத் தொகையும் கிடைக்கும். இதுபோன்ற அம்சங்கள் இருக்கும் பாலிசிகளை தேர்ந்தெடுத்தால் கூடுதல் பலன் இருக்கும்'' என்றார் செந்தில்.

ஆக, குழந்தைகளின் வளமான எதிர்காலத்திற்கு சைல்டு பிளான்களே போதும் என்று நினைக்காமல், டேர்ம் இன்ஷூரன்ஸ், விபத்துக் காப்பீடு, மியூச்சுவல் ஃபண்ட் முதலீடு என்கிற ரீதியில் நம் யுக்தியை அமைத்துக்கொண்டால், குழந்தைகளின் எதிர்காலம் உண்மையிலேயே பிரகாசமாக இருக்கும்

- இரா.ரூபாவதி,
படம்: ஜெ.வேங்கடராஜ்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு