Published:Updated:

ஹெல்த் பாலிசி மருத்துவப் பரிசோதனை... கொரோனாகால புதிய மாற்றம்!

தொலைபேசி அழைப்பு மருத்துவப் பரிசோதனை வேகமாகவும் சிக்கனமாகவும் செய்து முடிக்கப்படுவது சாதகமான விஷயம்!

பிரீமியம் ஸ்டோரி
ருத்துவக் காப்பீடு எடுக்க விரும்பும் வாடிக்கையாளர்கள் முதலில் மருத்துவப் பரிசோதனை செய்து, லேட்டஸ்ட் ரிப்போர்ட் அளிக்க வேண்டும் என இன்ஷூரன்ஸ் நிறுவனங்கள் வலியுறுத்துகின்றன. ஏன் இந்த மருத்துவப் பரிசோதனை..?

மருத்துவப் பரிசோதனை ஏன்?

ஹெல்த் பாலிசி வாங்க விரும்பும் வாடிக்கையாளருக்கு மருத்துவப் பரிசோதனை செய்வதன் மூலம் அவரின் உடல்நலம் குறித்த முழுத் தகவலையும் பெற முடியும். பரிசோதனை அறிக்கையின் தகவல்படி, அவருக்கு பிரீமியம் தொகையை நிர்ணயம் செய்யலாம். மருத்துவப் பரிசோதனை முடிவில் அவருக்கு ஏதாவது நோய் பாதிப்பு இருப்பது தெரியவந்தால், நோயின் வீரியத்துக்கேற்ப கூடுதலாக பிரீமியம் செலுத்த வேண்டியிருக்கும். நோய் அபாய எல்லைக்கு மேலே இருந்தால், அந்தக் குறிப்பிட்ட நோய்க்கு மட்டும் விலக்கு அளித்துவிட்டு, பாலிசி வழங்குவதற்கு இன்ஷூரன்ஸ் கம்பெனிச் சம்மதிக்கலாம் அல்லது பாலிசிதாரரின் விண்ணப்பத்தை நிராகரிக்கலாம்.

ஹெல்த் பாலிசி மருத்துவப் பரிசோதனை... கொரோனாகால புதிய மாற்றம்!

மருத்துவக் காப்பீட்டுக்கு விண்ணப்பிக்கும் நேரத்தில் ஒருவருக்கு நோய் இருப்பது தெரியவந்தால், முதல் 2/3/4 வருடங்களுக்கு அந்த நோயின் காரணமாக பாலிசிதாரர் மருத்துவமனையில் அனுமதிக்கப்படும்போது ஏற்படும் செலவுகளுக்கு கவரேஜ் கிடைக்காது. இதை, `காத்திருப்புக் காலம்’ (Waiting Period) என்பார்கள்.

பிரீமியத்தில் வித்தியாசம்

உதாரணமாக ராம், சோமு இருவரும் சம வயதுடையவர்கள். இருவரும் ஹெல்த் பாலிசி வாங்க முற்படுகிறார்கள். ராமின் ரத்த அழுத்தம் இயல்பாக இருந்தது; அதே நேரத்தில் சோமுவுக்கு ரத்த அழுத்தம் மிக அதிகம் என்று மருத்துவப் பரிசோதனையின் முடிவில் தெரிய வருகிறது. இந்த அடிப்படையில் ராமுக்கு பிரீமியம் குறைவாகவும், சோமுவுக்கு பிரீமியம் அதிகமாகவும் இன்ஷூரன்ஸ் கம்பெனியால் நிர்ணயம் செய்யப்படும். உடல்நலம் என்பது நபருக்கு நபர் வித்தியாசப்படும்போது பிரீமியமும் வித்தியாசப்படும்.

ஹெல்த் பாலிசி
ஹெல்த் பாலிசி

பாலிசிதாரருக்கு நல்லது!

மருத்துவப் பரிசோதனை முடிவில் வாடிக்கையாளருக்கு நோய் இருப்பது தெரியவருகிறது; அதேநேரத்தில் நோயின் தாக்கம் அதிகம் இல்லை; ஆனால் பாதிப்பு அடைந்தது உண்மை; ஏற்றுக்கொள்ளக்கூடிய நிலையிலேயே நோய் இருக்கிறது. இத்தகைய வாடிக்கையாளரை ஏற்றுக்கொள்வதில் இன்ஷூரன்ஸ் கம்பெனிக்கு ரிஸ்க் அதிகம். இருந்தாலும் அவரின் கோரிக்கையை ஏற்று இன்ஷூரன்ஸ் கம்பெனி தகுந்த கூடுதல் பிரீமியத்தை நிர்ணயம் செய்து பாலிசி வழங்குகிறது. இதன் மூலம் நோயால் பாதிப்படைந்த நபர் பாலிசியால் பாதுகாக்கப் படுகிறார்.

உண்மையைச் சொன்னால் இழப்பீடு!

பாலிசிதாரர் ஒருவர் தனது 50 வயதுக்கு முன் பாலிசி வாங்க விண்ணப்பிக்கிறார், அப்படிப்பட்ட வாடிக்கையாளரை மருத்துவப் பரிசோதனை செய்ய இன்ஷூரன்ஸ் கம்பெனி வலியுறுத்தவில்லை என்று உதாரணத்துக்கு எடுத்துக்கொள்வோம். விண்ணப்பப் படிவத்தில் தனக்கு ஏற்பட்ட நோய் குறித்து தவறாக அல்லது முற்றிலும் மாறுபட்ட தகவலைக் கொடுத்துவிடுகிறார். அவரின் விண்ணப்பம் ஏற்கப்பட்டு பாலிசிச் சான்றிதழும் வழங்கப்படுகிறது. பிரீமியத்தை ஒழுங்காக செலுத்திவருகிறார். இந்த வேளையில் அந்த நோய் முற்றிப்போய் அவர் மருத்துவமனையில் அனுமதிக்கப்பட்டு, இன்ஷூரன்ஸ் கம்பெனியிடம் க்ளெய்ம் கோருகிறார். இன்ஷூரன்ஸ் கம்பெனியின் க்ளெய்ம் துறை சார்ந்த அதிகாரிகள் க்ளெய்ம் கொடுப்பதற்கு முன்னர் விசாரணை மேற்கொள்வார்கள். விசாரணை முடிவில் பாலிசி வாங்குவதற்கு முன்னரே அவர் அந்தக் குறிப்பிட்ட நோயால் பாதிக்கப்பட்டிருந்திருக்கிறார் எனக் கண்டுபிடிக்கிறார்கள். வாடிக்கையாளர் தனக்கு ஏற்பட்ட நோய் குறித்த உண்மைத் தகவலை விண்ணப்பப் படிவத்தில் கொடுக்கத் தவறிவிட்டார் என்ற காரணத்தை கூறி இழப்பீடு கொடுக்க மறுக்கலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

இத்தகைய சிக்கல்களிருந்து அறவே விடுபட விரும்பும் நபர், மருத்துவப் பரிசோதனைக்கு தன்னை உட்படுத்திக்கொள்வது நல்லது. மருத்துவப் பரிசோதனை அறிக்கைக்கு உட்பட்டு பாலிசி வழங்கப்படுகிறது. ஏதாவது அசம்பாவிதம் ஏற்பட்டு பாலிசிதாரர் மருத்துவ மனையில் அனுமதிக்கப்படும்பட்சத்தில், மருத்துவப் பரிசோதனை அறிக்கை முடிவுகள் ஏற்கெனவே இன்ஷூரன்ஸ் கம்பெனியில் இருப்பதால், பாலிசிதாரருக்கு க்ளெய்ம் கிடைப்பதில் எவ்விதத் தடங்கலும் இருக்காது.

மருத்துவப் பரிசோதனைக்கு உட்படாதவர்கள், விண்ணப்பப் படிவத்தில் உடல்நலம் (நோய்) பற்றி உண்மைக்குப் புறம்பான தகவலைத் தராதபட்சத்தில் க்ளெய்ம் விரைவாக கிடைக்கும்; எவ்வித நிதி இழப்பும் ஏற்படாது.
ஹெல்த் பாலிசி
ஹெல்த் பாலிசி

தொலைபேசி மூலம்..!

மருத்துவக் காப்பீட்டு பாலிசியை வாங்குவதற்கு முன்னர் வாடிக்கையாளருக்குச் செய்யப்படும் மருத்துவப் பரிசோதனை முறைகளில் சில புதிய மாற்றங்கள் நடைமுறைக்கு வந்துள்ளன. இதன்படி, மருத்துவப் பரிசோதனை செய்ய வேண்டியவர் மருத்துவமனைக்குச் செல்ல வேண்டாம். தொலைபேசி அழைப்பின் மூலம் வாடிக்கையாளரிடம், அவரின் உடல்நலம் குறித்துத் தகவல் பெறப்படும்.

கொரோனா, ஸ்வைன் ஃபுளு, சிக்குன்குனியா, சார்ஸ் போன்ற பயங்கர நோய்கள் அவ்வப்போது உலகின் பல்வேறு நாடுகளைச் சேர்ந்த லட்சக்கணக்கான மக்களைத் தாக்கி உயிரிழக்கச் செய்கின்றன. இதன் தொடர்ச்சியாக நாட்டில் வேலை இழப்பு, சம்பளக் குறைப்பு, சம்பள உயர்வு நிறுத்தி வைப்பு, உற்பத்தி மற்றும் விற்பனை பாதிப்பு போன்றவை ஏற்படுகின்றன. தற்போது கொரோனாவின் தாண்டவம் எல்லா இடத்துக்கும் பரவி உலகை நிலைகுலையச் செய்துவருகிறது. இந்தக் கொடியநோயிலிருந்து தாக்கப்படாமலிருக்க, எல்லோரும் வீட்டில் இருக்கும்படி அறிவுறுத்தப்படுகிறார்கள்.

இந்தச் சூழ்நிலையில், பாலிசிதாரருக்குச் செய்ய வேண்டிய மருத்துவப் பரிசோதனையைத் தொலைபேசி அழைப்பு வாயிலாகச் செய்கிறார்கள். துறைசார்ந்த ஆழ்ந்த அனுபவம் பெற்ற மருத்துவர்கள் மற்றும் வல்லுநர்கள் தொலைபேசி மூலம் பாலிசி எடுக்க இருப்பவரைத் தொடர்புகொள்கிறார்கள். அவருக்கு இருக்கும் நோய்கள், அதற்கு அவர் எடுத்துவரும் சிகிச்சை போன்ற தகவல்கள் சேகரிக்கப்படுகின்றன. இந்தத் தகவல்களை ஆய்வுக்குழு (Underwriting Team) ஆய்வு செய்யும். மருத்துவ அறிக்கை முடிவுகள் சரியாக இருக்கும்பட்சத்தில் இன்ஷூரன்ஸ் கம்பெனி பாலிசி வழங்கும். சில இன்ஷூரன்ஸ் கம்பெனிகள் ஹெல்த் இன்ஷூரன்ஸ் மற்றும் டேர்ம் இன்ஷூரன்ஸ் பாலிசிகளுக்கு இந்த முறையைப் பின்பற்றுகின்றன.

இப்படிச் செய்வதன் மூலம் பாலிசிதாரர் மருத்துவமனைக்குச் செல்ல வேண்டிய அவசியம் இல்லை. இதனால் தொற்றுநோய் பிறருக்குப் பரவுவது தவிர்க்கப்படுகிறது.

தொலைபேசி அழைப்பு மருத்துவப் பரிசோதனை வேகமாகவும் சிக்கனமாகவும் செய்து முடிக்கப்படுகிறது என்பது கம்பெனிக்குச் சாதகமான விஷயம்.

எதிர்காலத்தில் இந்தத் தொலைபேசி அழைப்பு மருத்துவப் பரிசோதனை முறை முழு செயல்வடிவம் பெறும்போது அதிக எண்ணிக்கையில் பாலிசிதாரர்கள் பயன்பெறுவார்கள்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு