Published:Updated:

ஆயுள் காப்பீடு அவசியம் எடுக்க 5 காரணங்கள்! என்னென்ன தெரியுமா..?

I N S U’ R A N C E

பிரீமியம் ஸ்டோரி

சிவகாசி மணிகண்டன், நிதி ஆலோசகர், Aismoney.com

நம்மில் பலருக்கு ஆயுள் காப்பீட்டின் முக்கியத்துவம் தெரியாமல் இருக்கிறது. குடும்பத்தில் வருமானம் ஈட்டும் நபர் மறையும்போதுதான் குடும்ப உறுப்பினர் பலருக்கு அதன் முக்கியத்துவம் தெரிய வருகிறது. இதேபோல், குடும்ப உறுப்பினராக இருப்பவர்களில் பலரும் ஆயுள் காப்பீட்டு பிரீமியத்தை செலவாகத் தான் நினைக்கிறார்களே தவிர, குடும்பத்தைக் காக்கும் கவசமாக நினைப்பதில்லை. எந்தெந்தக் காரணத்துக்காக ஒருவர் ஆயுள் காப்பீடு பாலிசி எடுக்க வேண்டும் என்பதைப் பார்ப்போம்.

சிவகாசி 
மணிகண்டன் 
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

1. குடும்பத்தினர் நிதிச் சுமை இல்லாமல் இருக்க...

ஆயுள் காப்பீடு எடுப்பதன் மிக முக்கிய நோக்கம், குடும்பத்தில் வருமானம் ஈட்டும் நபர் இல்லாத போது குடும்பத்தினர் நிதிச் சுமையில் சிக்கிக்கொள்ளக் கூடாது என்பதற் காகத்தான். இதனால்தான், குடும்பத்தில் வருமானம் ஈட்டும் நபரின் பெயரில் ஆண்டு வருமானத் தைப்போல் சுமார் 15 மடங்கு தொகைக்கு ஆயுள் காப்பீடு கவரேஜ் எடுத்துக்கொள்ள வேண்டும் என்கிறார்கள். ஒருவரின் மாத வருமானம் ரூ.30,000 என வைத்துக் கொண்டால், ஆண்டு வருமானம் ரூ.3.6 லட்சம். இதன் 15 மடங்கு என்பது ரூ.54 லட்சம். இந்தத் தொகைக்கு, பிரீமியம் குறைவான முதிர்வின்போது எதுவும் கிடைக்காத டேர்ம் பிளான் எடுத்துக்கொள்ள வேண்டும். 30 வயதான ஆண் ஒருவர் அவரின் 60 வயது வரைக்கும் அதாவது, 30 ஆண்டுகளுக்கு ரூ.60 லட்சத்துக்கு டேர்ம் பிளான் எடுத்தால் (புகைபிடிக்காதவர்) ஆண்டு பிரீமியம் சுமார் ரூ.14,400 ஆகும். அதாவது, மாதம் ரூ.1,200. குடும்பத் தலைவர் திடீரென இறந்து போனால், இந்த ரூ.60 லட்சம் இழப்பீட்டுத் தொகையை முதலீடு செய்வது மூலம் குடும்பத்தினர் தங்கள் மாதச் செலவுகளை சுலபமாக சமாளிக்க முடியும்.

2. குடும்பத்துக்குக் கடன் சுமை இல்லா வாழ்க்கை...

பலர் வீட்டுக் கடன், கார் கடன், தனிநபர் கடன், கிரெடிட் கார்டு எனப் பல கடன்களைக் குடும்பத் தேவைக்காக வாங்கியிருப்பார்கள். குடும்பத்தில் வருமானம் ஈட்டும் நபர் எதிர்பாராத விதமாக இறந்துவிட்டால், இந்தக் கடன்கள் குடும்பத்தினருக்குப் பெரும் சுமையாகிவிடும். அதிலிருந்து மீண்டுவருவது இயலாத காரியமாக இருக்கும். இந்த நிலையில், இந்தக் கடன்களையும் கவர் செய்வதுபோல் டேர்ம் பிளான் கூடுதலாக எடுத்திருப்பது அவசியம்.

ஆயுள் காப்பீடு அவசியம் எடுக்க 
5 காரணங்கள்! என்னென்ன தெரியுமா..?

3. பிள்ளைகளின் கல்வி மற்றும் கல்யாணச் செலவுக்கு கவசம்!

பிள்ளைகளின் உயர்கல்வி மற்றும் திருமணத்துக்கு என முதலீடு செய்துவரும் பெற்றோர் ஏராளம். குடும்பத்தில் வருமானம் ஈட்டும் நபருக்கு ஏதாவது ஆகிவிட்டால் பிள்ளைகளின் உயர்கல்வி மற்றும் கல்யாணம் நினைத்ததுபோல் சிறப்பாக நடக்காது. இந்த இலக்கு களுக்கு எந்தப் பாதிப்பும் வராமலிருக்க, வருமானம் ஈட்டும் நபர்களின் பெயரில் கூடுதலாக ஆயுள் காப்பீடு எடுத்திருக்க வேண்டும்.

4. நிலையற்ற, நிச்சயமற்ற காலத்தில் நிம்மதி...

மேலே விவரிக்கப்பட்ட மூன்று காரணங்களை நிறைவேற்றும் விதமாக நீங்கள் ஆயுள் காப்பீடு பாலிசி எடுத்திருக்கும்பட்சத்தில், கொரோனா பரவல் போன்ற நிலையற்ற, நிச்சயமற்ற காலத்தில் உடல்நலக் குறைவு போன்ற சிக்கலான நிலைமையிலும் மன நிம்மதியுடன் இருக்கலாம். மேலும், நீங்கள் நிதிச் சுதந்திரம் மற்றும் நிதித் தன்மையுடன் உங்களின் அன்றாடப் பணிகளைத் தொய்வில்லாமல் செய்துவரலாம்.

5. வருமான வரிச் சலுகை

ஆயுள் காப்பீடு பாலிசிக்கு கட்டும் பிரீமியத்தில் 80சி பிரிவின்கீழ் வரிச் சலுகை உண்டு. இது நிதியாண்டில் ரூ.1.5 லட்சம் வரை செலுத்தும் பிரீமியத்துக்கு வரிச் சலுகை கிடைக்கும்.

தவிர, இந்த பாலிசி மூலம் கிடைக்கும் முதிர்வுத் தொகை மற்றும் இழப்பீட்டுத் தொகைக்கும் வரிச் சலுகை உண்டு.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு