Published:Updated:

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி

இன்ஷூரன்ஸ் பாலிசிகள்
பிரீமியம் ஸ்டோரி
இன்ஷூரன்ஸ் பாலிசிகள்

தேவையற்ற பொருள்களை வாங்கிக் குவிப்போம். ஆனால், தேவையானதை வாங்க யோசிப்போம். இது இயல்பாக பலருக்கும் இருக்கும் குணம்தான்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி

தேவையற்ற பொருள்களை வாங்கிக் குவிப்போம். ஆனால், தேவையானதை வாங்க யோசிப்போம். இது இயல்பாக பலருக்கும் இருக்கும் குணம்தான்.

Published:Updated:
இன்ஷூரன்ஸ் பாலிசிகள்
பிரீமியம் ஸ்டோரி
இன்ஷூரன்ஸ் பாலிசிகள்

கொரோனா நோய்த்தொற்றுப் பரவலுக்குப் பிறகு ஹெல்த் மற்றும் டேர்ம் இன்ஷூரன்ஸ் பாலிசிகள் மீதான விழிப்புணர்வு மக்களுக்கு அதிகரித்திருக்கிறது. கொரோனா அலைகளில் மருத்துவமனைச் செலவுகள் அதிகரித்தபோது, இன்ஷூரன்ஸ் எடுக்காமல் இருந்தவர்களின் சேமிப்புகள் அப்போது கரைந்து போயின. எதிர்கால இலக்குகளுக்காகச் செய்திருந்த முதலீடுகளும் இடைநிறுத்தம் ஆகியிருக்கின்றன. இந்தச் சூழ்நிலையில்தான் இன்ஷூரன்ஸ் மீதான மக்களின் கவனம் அதிகரித்திருப்பதாகவும், நிதி திட்டமிடும்போது இன்ஷூரன்ஸ் குறித்தும் அவர்கள் திட்டமிட ஆர்வம்காட்டுவதாகவும் இத்துறை சார்ந்த நிபுணர்கள் கருத்து தெரிவிக் கிறார்கள்.

இந்தக் கையேடு, இன்ஷூரன்ஸ் குறித்த வழிகாட்டும், புரிந்துணர்வை அதிகப்படுத்தும். ஹெல்த் மற்றும் டேர்ம் இன்ஷூரன்ஸ் பாலிசி களைத் தாண்டி, ஹவுஸ்ஹோல்டு இன்ஷூ ரன்ஸ், கிரிட்டிகல் இல்னஸ் பாலிசிகள், அரசு வழங்கும் இன்ஷூரன்ஸ் திட்டங்கள் போன்ற இன்ஷூரன்ஸ் சார்ந்த பல்வேறு விஷயங்கள் பற்றிய தகவல்களையும் உங்களிடம் சேர்க்கும்.

‘ஸ்டார் ஹெல்த் இன்ஷூரன்ஸ்’ நிறுவனத் தின் துணைத் தலைவர் சி.பாலாஜி பாபு, `மணிவேதம்.காம்' நிறுவனர் லலிதா ஜெயபாலன், நிதி ஆலோசகர் பி.பத்மநாபன் மற்றும் இன்ஷூரன்ஸ் நிபுணர் தரன் ஆகியோர் இன்ஷூரன்ஸ் சார்ந்த விஷயங்களை இந்தத் தொகுப்பில் அளித்திருக்கிறார்கள்.

ஒருவருக்கு இன்ஷூரன்ஸ் ஏன் அவசியம்?

தேவையற்ற பொருள்களை வாங்கிக் குவிப்போம். ஆனால், தேவையானதை வாங்க யோசிப்போம். இது இயல்பாக பலருக்கும் இருக்கும் குணம்தான். ஆனால், ஆயுள் காப்பீடு விஷயத்தில் இப்படியான அணுகுமுறை இருக்கக் கூடாது. ஏனெனில், ஆயுள் காப்பீடுதான் ஒரு குடும்பத்தில் வருமானம் ஈட்டும் நபருக்கு அசம்பாவிதம் நேர்ந்தால் குடும்பம், நிதி ரீதியாகக் கஷ்டப்படாமல் தாங்கிப் பிடிக்கும். அதனால், ‘எனக்குப் பிறகான நாள்களில், என் குடும்பம் பண ரீதியாக நலமுடன் இருக்க வேண்டும்’ என நினைப்பவர்கள் அனைவரும் கட்டாயம் இன்ஷூரன்ஸ் எடுத்திருக்க வேண்டும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி

இன்ஷூரன்ஸ் என்பது முதலீடு கிடையாது!

பலர், இன்ஷூரன்ஸை பாதுகாப்பாகக் கருதாமல் முதலீடாகப் பார்க்கிறார்கள். ‘வருமான வரி கட்ட வேண்டியிருக்கும். அதனால் ஒரு பாலிசி போட்டேன்’, ‘இப்போ ஒரு பாலிசி எடுத்தா 15 வருஷம் கழிச்சு மூணு லட்சம் ரூபாய் கிடைக்கும்னு சொன்னாங்க’ போன்ற காரணங்களால் பாலிசி எடுப்பவர்கள்தான் அதிகம். ஆனால், பாலிசியை முதலீட்டுக் கண்ணோட்டத்தில் அணுகக்கூடாது. பைக் அல்லது காருக்கு எப்படி இன்ஷூரன்ஸ் எடுக்கிறோமோ, அதுபோலத்தான் நமக்கு எடுக்கும் இன்ஷூரன்ஸ் பாலிசியும். அதிலிருந்து லாபத்தை எதிர் பார்க்கக் கூடாது.

எப்போதுமே இன்ஷூரன்ஸையும் முதலீட்டையும் ஒன்றாக இணைக்காமல், இன்ஷூரன்ஸைத் தனியாகவும், முதலீட்டைத் தனியாகவும் செய்ய வேண்டும்.

`லைஃப் இன்ஷூரன்ஸ்' என்று சொல்லப்படுகிற ஆயுள் காப்பீட்டில் `எண்டவ்மென்ட்' (Endowment), `யூலிப்' (ULIP - Unit Linked Insurance Plan) என இப்படி நிறைய பாலிசிகள் இருக்கின்றன. இந்த வகை பாலிசிகள், பங்குச் சந்தை மற்றும் இதர முதலீட்டுத் திட்டங்களுடன் லிங்க் ஆகியிருக்கும். பாலிசிதாரர்களிடமிருந்து பெறப்படும் பிரீமியம் தொகையை, பாலிசி நிறுவனம் வருமானம் தரக்கூடிய முதலீடுகளில் முதலீடு செய்து, அதிலிருந்து ஒரு குறிப்பிட்ட தொகையைத்தான் எடுத்து பாலிசிதாரர்களுக்கு முதிர்வு காலத்தில் வழங்கும். ஆனால், இந்தத் திட்டங்களின் மூலம் பாலிசிதாரர்களை விடவும் அதிகம் சம்பாதிப்பது காப்பீடு நிறுவனங்களே என்பதை மக்கள் புரிந்துகொள்ள வேண்டும். பாலிசி எடுப்பதில் கவனம் செலுத்தும் மக்கள், அதன் பின்புலத்தை பற்றியும் தெரிந்துகொள்வது அவசியமாகும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
takasuu

டேர்ம் ப்ளானைப் பொறுத்தவரை, பாலிசிதாரர் செலுத்தும் பிரீமியம் இன்ஷூ ரன்ஸுக்கு மட்டுமே செல்வதால், இந்த ப்ளானில் எந்தவிதமான முதிர்வுத் தொகையும் இருக்காது. ஆனால், அதுதான் பரிந்துரைக்கத்தக்கது. இதுவே எண்டவ்மென்ட் பாலிசி, யூலிப் பாலிசி போன்றவற்றில் பாலிசிதாரர் செலுத்தும் பிரீமியத்தில் ஒரு தொகை காப்பீட்டுக்காகவும், ஒரு தொகை முதலீட்டுக்காகவும் பிரிக்கப்பட்டு பாலிசி முடியும்போது குறிப்பிட்ட தொகையைத் திருப்பித் தருகின்றனர். இந்த வகை பாலிசிகள் மூலம் பாலிசிதாரர்களை விட, பாலிசி நிறுவனங்களே அதிக அளவில் வருமானத்தைப் பார்க்கின்றன. அதுமட்டு மல்லாமல், இவ்வகையான பாலிசிகளின் பிரீமியம் சாதாரணமான டேர்ம் பாலிசிகளைவிட சற்று அதிகமாக இருக்கும். ஆகவே, இதுபோன்ற பாலிசி களைத் தவிர்த்து விடுவதே நல்லது.

மிக முக்கியமான இரண்டு பாலிசிகள்!

எந்த பாலிசி இருக்கிறதோ இல்லையோ, ஒருவரிடம் மிக முக்கியமாக இருக்க வேண்டிய இரண்டு பாலிசிகள்... டேர்ம் பாலிசி மற்றும் ஹெல்த் பாலிசி.

டேர்ம் இன்ஷூரன்ஸ் பாலிசி!

குடும்பத்தில் வருமானம் ஈட்டும் நபர் குடும்பத் தேவைகளுக்காக வீட்டுக் கடன், கார் கடன், தனிநபர் கடன் எனப் பல்வேறு கடன்களை வாங்கியிருப்பார். அவரின் எதிர்பாராத மறைவுக்குப் பின்னர், குடும்பத் தினரைக் கடன் சுமை பாதிக்காமலிருக்க காப்பீடு அவசியம். பிள்ளைகளை மேற்படிப்பு படிக்க வைக்கவும், அவர்களின் கல்யாணத்தை சிறப்பாக நடத்தவும் நினைத்திருப்பார்கள். இடையில் ஏதாவது அசம்பாவிதம் ஏற்பட்டு, பாலிசிதாரர் காலமாகிவிட்டால், எதிர்கால இலக்குகளுக்கு பாதிப்புகள் வராதபடி டேர்ம் இன்ஷூரன்ஸ் பாலிசி காப்பாற்றும்.

டேர்ம் பாலிசியின் முக்கியத்துவம்!

கோவிட் - 19 தொற்றுநோய், சம்பாதிக்கும் ஒவ்வொரு நபருக்கும், அவரை சார்ந்திருப்பவர்களின் நிதிப் பாதுகாப்பை உறுதி செய்வதற்கான தேவையை நிறையவே உணர்த்தியிருக்கிறது. அதற்கு, டேர்ம் பிளான் கைகொடுக்கிறது.

டேர்ம் பாலிசி மூலம் கிடைக்கும் இழப்பீட்டுத் தொகை, பாலிசிதாரரைச் சார்ந்திருப்பவர்கள் தங்கள் வாழ்க்கையைத் தொடர தேவையான நிதி ஆதாரங்களை உறுதிப்படுத்தும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
CatLane

டேர்ம் பாலிசி... தொகை எவ்வளவு இருக்க வேண்டும்?

டேர்ம் பாலிசியைக் கணக்கிடுவதில் இருவேறு முறைகள் கடைப்பிடிக்கப்படுகின்றன. ஒன்று, ஒருவரின் ஆண்டு வருமானத்தில் 10 மடங்கு தொகைக்கு டேர்ம் இன்ஷூரன்ஸ் பாலிசியை எடுத்துக்கொள்வது. உதாரணத்துக்கு, ஒருவருக்கு ரூ.6 லட்சம் ஆண்டு சம்பளம் என்றால், அவருக்கு ரூ.60 லட்சம் அளவுக்கு டேர்ம் பாலிசி கவரேஜ் இருக்க வேண்டும். ஆனால் இன்றைய பணவீக்க விகிதத் துடன் ஒப்பிடும்போது இந்தத் தொகை குறைவாகத் தெரிவதாக நிதி ஆலோசகர்கள் சொல்கிறார்கள். இதற்கு மாற்றாக அவர்கள் சொல்லும் மற்றொரு முறை, எதிர்கால இலக்குக்குத் தேவையாக தொகை மற்றும் கடன்கள் இருந்தால் அதையும் சேர்த்து மொத்த மதிப்புக்கு டேர்ம் பாலிசி எடுத்துக் கொள்ளலாம். இந்த வகையில் டேர்ம் பாலிசி எடுப்பது கூடுதல் நன்மைகளைத் தரும் என்கின்றனர்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
triloks

ஹெல்த் இன்ஷூரன்ஸின் முக்கியத்துவம்!

உடல்நலக் குறைபாடு என்று மருத்துவமனைக்குச் சென்றால், என்ன நோய், என்ன சிகிச்சை என்று டாக்டர்கள் விளக்கம் அளித்தாலும் நோயாளிகள் முதலில் கேட்பது, இதற்கு மருத்துவச் செலவு எவ்வளவு என்பதுதான். மேலும், குறைந்த செலவில் எவ்வாறு மருத்துவ சிகிச்சை பெறலாம் என்பது அவர்களின் அடுத்த எண்ணமாக உள்ளது. விஞ்ஞானம் பல வகையில் வளர்ந்திருந்தாலும், கட்டணம் அதிகமான சிகிச்சை முறைகளை எல்லோரும் மேற்கொள்ள முடியாது என்பதுதான் நிதர்சனம். இப்படியான சூழலில், எதிர்பாராத விபத்தோ, உடல்நிலை சரியில்லாமல் போகும் நேரத்திலோ மருத்துவச் செலவுகளுக்காக நாம் கடனாளி ஆகாமல் இருக்கக் கைகொடுப்பதே, ஹெல்த் இன்ஷூ ரன்ஸ் திட்டம்.

தொகை எவ்வளவு இருக்க வேண்டும்?

கொரோனாவுக்கு முன்பு வரை, ஒருவருக்கு ஒரு லட்சம் முதல் அதிக பட்சம் மூன்று லட்சம் வரை ஹெல்த் இன்ஷூரன்ஸ் பாலிசி இருந்தால் போதுமானதாகவும், நான்கு பேர் இருக்கும் வீட்டில் குடும்ப உறுப்பினர் களுக்கு எல்லாம் சேர்த்து `ஃபேமிலி ஃப்ளோட்டர்' (Family Floater) பாலிசி அதிகபட்சம் ஐந்து லட்சம் ரூபாயாக இருந்தால் போதுமானதாகவும் இருந்தது.

ஆனால், கொரோனா நோய்த் தொற்றுக்குப் பிறகு மருத்துவமனைச் செலவுகள் உயர்ந்திருக்கின்றன. அதனால் மெட்ரோ நகரங்களில் வசிப்பவர்களுக்கு, நான்கு பேர் கொண்ட குடும்பத்துக்கு ஃபேமிலி ஃப்ளோட்டர் பாலிசி குறைந்தபட்சம்

10 லட்சம் ரூபாய்க்கு இருப்பது அவசியம். இதற்கு ஆண்டு பிரீமியம், 35 வயதுடைய பாலிசிதாரர் என்றால் சுமார் 19,500 ரூபாயும், 45 வயதுடையவர் என்றால் சுமார் 22,500 ரூபாயும் கட்ட வேண்டி வரும். மெட்ரோ நகரமாக இல்லாமல், டையர்-2, டையர்-3 எனச் சொல்லப்படும் இரண்டாம் நிலை, மூன்றாம் நிலை நகரங்களில் வசிக்கும் குடும்பமாக இருந்தால், நான்கு பேர் கொண்ட குடும்பத்துக்கு ஃபேமிலி ஃப்ளோட்டர் பாலிசி குறைந்தபட்சம் 5 லட்சம் ரூபாய்க்கு எடுத்துக் கொள்ளலாம். இதற்கு ஆண்டு பிரீமியம், 35 வயதுடைய பாலிசி தாரர் என்றால் சுமார் 17,000 ரூபாயும், 45 வயதுடைய பாலிசிதாரர் என்றால் சுமார் 19,700 ரூபாயும் கட்ட வேண்டி வரும். மெட்ரோ நகரங்களைவிட சிறு நகரங்களில் மருத்துவமனைச் செலவுகள் ஓரளவுக்குக் குறைவாகவே இருக்கும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
eternalcreative

`ஃபேமிலி ஃப்ளோட்டர்'(Family Floater) பாலிசி என்றால் என்ன?

ஹெல்த் இன்ஷுரன்ஸ் பாலிசியை பொறுத்தவரை, எப்போதுமே தனிநபர் பாலிசியாக எடுக்காமல், தன்னுடைய குடும்ப உறுப்பினர்கள் அனைவருக்கும் சேர்த்து பாலிசி எடுக்கத்தான் பெரும் பாலானவர்கள் விரும்புகிறார்கள். அவர் களுக்கானதுதான் இந்த ஃபேமிலி ஃப்ளோட்டர் பாலிசி.

குடும்பத்தில் இருக்கும் யார் ஒருவர், முதலில் மருத்துவமனைச் செலவுகளை சந்திக்கிறாரோ, அவருக்கான செலவுகளை முதலில் க்ளெய்ம் செய்து கொள்ளலாம். மீதமிருக்கும் தொகையில், அடுத்தடுத்து இருப்பவர்கள் க்ளெய்ம் பெறும் வகையில் இந்த பாலிசி வடிவமைக்கப்பட்டிருக்கும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி

பிரீமியம் விஷயத்தில் கவனிக்க...

நாம் ஆரோக்கியமாக இருக்கும் இள வயதிலேயே மருத்துவக் காப்பீடு எடுப்பது மிக மிக அவசியம். மருத்துவக் காப்பீட்டில், உங்களின் வயது மற்றும் உங்களின் உடல் ஆரோக்கியத்தைப் பொறுத்து, பிரீமியத் தொகை நிர்ணயம் செய்யப்படும். 25 வயது நபர் நீரிழிவு மற்றும் ரத்தக்கொதிப்பு போன்ற பாதிப்புகள் எதுவும் இல்லாமல் இருப்பார். அதனால் அவருக்கான பிரீமியம் குறைவாக இருக்கும் அல்லது மேலே குறிப்பிட்ட சில பிரச்னைகள் சிறு வயதிலேயே அவருக்கு இருந்து, அப்போது அவர் ஹெல்த் இன்ஷூரன்ஸ் எடுத்துக் கொள்வதற்காக பாலிசி நிறுவனத்தை அணுகினால், அப்போது பிரீமியம் தொகையோடு சேர்த்து ’லோடிங்’ என்ற பெயரில் கிட்டத்தட்ட

10 சதவிகிதம் கூடுதலாக பிரீமியம் வசூலிக்கப்படும். இந்தத் தொகை நிறுவனத்துக்கு நிறுவனம் வித்தியாசப்படும். மேலும், புகைப்பழக்கம், குடிப்பழக்கம் மற்றும் இதர போதைப் பழக்கங்கள் இருந்து, ஹெல்த் இன்ஷூரன்ஸ் பாலிசி எடுத்தால் பிரீமியம் தொகை அதிகமாகும்.

பிரீமியத்தைக் குறைப்பதற்காக போதைப் பழக்கம் இருப்பதை மறைத்து இன்ஷூரன்ஸ் எடுத்தால், க்ளெய்ம் செய்யும்போது சமர்ப்பிக்கும் மருத்துவமனை ரிப்போர்ட் காட்டிக்கொடுத்துவிடும். அந்த நேரத்தில் க்ளெய்ம் கிடைக்காமல் போகவும் வாய்ப்பு இருக்கிறது. அதனால் சிறிய தொகைக்கு ஆசைப்பட்டு, மொத்த க்ளெய்ம் தொகையையும் ரிஸ்குக்கு ஆளாக்காமல் இருப்பது நல்லது.

மேலும், ஒருவரின் வேலையின் தன்மை, அதில் உள்ள ரிஸ்க்குக்கு ஏற்பவும் பிரீமியம் அதிகரிக்கும். விமானி, மரம் அறுப்பவர்கள், மீனவர்கள், சுரங்கத் தொழிலாளர்கள், சமையல் எரிவாயு சிலிண்டர் சப்ளை செய்பவர்கள் உள்ளிட்ட பல பணியாளர்களுக்கு மற்றவர்களைவிட அதிக ரிஸ்க் இருக்கிறது. அதனால், இவர்களுக்கு அதிக பிரீமியம் இருக்கும்.

பாலிசி எடுப்பவருக்கு வெளிநாட்டுக்குப் பயணம் மேற்கொள்வதில் அதிக ஆர்வம் இருக்கும்பட்சத்தில் அல்லது அவர் பணி நிமித்தமாக அடிக்கடி வெளி நாடுகளுக்குச் செல்ல வேண்டியிருக்கும்பட்சத்தில் அவருக்கு அதிக அளவு பயண ரிஸ்க் இருக்கிறது. அந்த வகையில் அவருடைய டேர்ம் பாலிசிக்கான பிரீமியம் அதிகரிக்க வாய்ப்பிருக்கிறது.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
ipopba

பாலிசி எடுக்கும் முன் கவனிக்க வேண்டியவை!

1. பாலிசிக்கான பிரீமியத்தை மட்டுமே கவனிக்கக் கூடாது. சம்பந்தப்பட்ட இன்ஷூரன்ஸ் நிறுவனம், தன்னுடைய கஸ்டமர்களுக்கு க்ளெய்ம் செட்டில்மென்ட் செய்யும் விகிதம் (இழப்பீட்டுத் தொகை வழங்குவது) தொடர்ந்து அதிகமாக இருக்கிறதா என்பதைக் கவனிக்க வேண்டும். குறைந்தது ஐந்தாண்டுகளுக்கு கவனிக்க வேண்டும்.

2. சம்பந்தப்பட்ட இன்ஷூரன்ஸ் நிறுவனமானது தங்கள் கஸ்டமர்களுக்கு எவ்வளவு காலத்தில் இழப்பீடு வழங்கியிருக்கிறார்கள் என்பதைப் பார்க்க வேண்டும். அப்போதுதான் குடும்பத்தினருக்கு விரைந்து இழப்பீட்டுத் தொகை கிடைக்கும்.

3. சம்பந்தப்பட்ட இன்ஷூரன்ஸ் நிறுவனத்தினர், பாலிசிதாரர்களின் புகார்களுக்கு எவ்வளவு விரைவாகத் தீர்வு அளித்திருக்கிறார்கள் எனக் கவனிப்பது மிக முக்கியம். இல்லையென்றால் புகார்களைச் சரிசெய்ய பாலிசிதாரர் பெரும்பாடு பட வேண்டியிருக்கும்.

4. சம்பந்தப்பட்ட இன்ஷூரன்ஸ் நிறுவனத்துக்கு வலுவான இணையதளம் இருக்க வேண்டும். அப்போதுதான் கொரோனா பரவல் போன்ற காலத்தில் கூட ஆன்லைன் மூலமாகவே அவர்களால் பாலிசிதாரர்களுக்குச் சிறப்பான சேவை அளிக்க முடியும்.

5. சம்பந்தப்பட்ட இன்ஷூரன்ஸ் நிறுவனம் வாடிக்கையாளர்களின் நம்பிக்கையைப் பெற்றதாக இருக்க வேண்டும். பொதுமக்களிடம் பிராண்டு பற்றி நல்ல பெயர் இருக்கும்பட்சத்தில் அதன் சேவையும் சிறப்பாக இருக்கும்.

மூத்த குடிமக்களுக்கான ஹெல்த் பாலிசி!

மூத்த குடிமக்கள் மருத்துவக் காப்பீட்டுத் திட்டத்தில் 60 வயதுக்கு மேற்பட்டவர்கள் சேர முடியும். இது, முதியோர்களின் மருத்துவப் பராமரிப்புடன் தொடர்புடைய செலவுகளை ஈடுசெய்ய உதவுவதற்காக பிரத்யேகமாக வடிவமைக்கப்பட்டுள்ளது. இந்த சீனியர் சிட்டிசன் பாலிசியைப் பெறுவதற்கு முன்பு மருத்துவப் பரிசோதனையை மேற்கொள்ள வேண்டும். உடல்நலத்தின் தகுதிக்கேற்ப பிரீமியம் மாறுபடும்.

தீவிர நோய் பாதிப்பு (Critical illness) பாலிசி!

சிறுநீரகச் செயலிழப்பு, புற்றுநோய், மாரடைப்பு போன்ற தீவிர நோய்களுக்கு சிகிச்சை அளிக்க ஒரு முழுமையான பாலிசி, விரும்பினால் கூடவே ஒரு ரைடரை (Rider) எடுத்துக்கொள்ளலாம். ரைடர் என்பது, ஆயுள் காப்பீட்டில் இணைக்கப்பட்டிருக்கும் விருப்ப நன்மைகள். இந்தத் துணை பாலிசியை விரும்பினால் பெறலாம், வேண்டாம் என்றால் விட்டுவிடலாம். மேலும், ரைடரை தனியாக வாங்க முடியாது. ஏற்கெனவே இருக்கும் ஹெல்த் பாலிசிக்கு துணை பாலிசியாக ரைடராக வாங்கலாம்.

கிரிட்டிக்கல் இல்னெஸ் பாசிலியைப் பொறுத்தவரை, பாலிசிதாரர் ஒரு குறிப்பிட்ட கொடிய நோயால் பாதிக்கப் பட்டிருப்பது கண்டறியப்பட்டால், அவருக்குத் தீவிர நோய்க் காப்பீட்டு பாலிசிகள் ஒரு குறிப்பிட்ட தொகையை வழங்கும். ரைடரையும் எடுப்பதால் பாலிசி பிரீமியம் குறைவாக இருக்கும்.

குழு மருத்துவக் காப்பீடு!

குழு/ஊழியர் மருத்துவக் காப்பீடு பாலிசிகள் பொதுவாக நிறுவனங்களால் தங்கள் பணியாளர்களுக்கு எடுக்கப்படும். குழு மருத்துவக் காப்பீட்டில் பிரீமியம் பொதுவாக சராசரியை விட குறைவாக இருக்கும். பெரும்பாலானவர்களுக்கு அலுவலகத்தில் இந்த வகை பாலிசிகள் இருக்கும் என்பதால், அவர்கள் தனியாக ஹெல்த் பாலிசி அல்லது குடும்ப உறுப்பினர்கள் அனைவரையும் சேர்த்து ஃபேமிலி ஃப்ளோட்டர் பாலிசி எடுத்துக்கொள்ள ஆர்வம் காட்டுவதில்லை. ஆனால், இன்றைய காலகட்டத்தில் எந்தவோர் அலுவலக வேலைகளும் நிரந்தரம் இல்லை என்பதால், தனியாக ஹெல்த் இன்ஷூரன்ஸ் பாலிசிகளை எடுத்துக்கொள்வது நல்லது.

தனிநபர் விபத்துக் காப்பீடு!

இந்த பாலிசி... விபத்து, இறப்பு, உடல் ஊனம், காயம் மற்றும் பிற எதிர்பாராத சூழல்களின் விளைவாக ஏற்படும் செலவுகளில் இருந்து பாலிசி தாரரையும் அவரது குடும்பத்தையும் பாதுகாக்கிறது. தனிநபர் விபத்துக் காப்பீடு தனியாக எடுக்கலாம்; துணை பாலிசியையும் (ரைடர்) எடுத்துக் கொள்ளலாம்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி

மகப்பேறு மருத்துவக் காப்பீடு!

‘மகப்பேறு மருத்துவக் காப்பீடு’... கர்ப்பிணிகளுக்காக உருவாக்கப்பட்ட பிரத்யேக ரைடர் (துணை பாலிசி) பாலிசி. ஏற்கெனவே கூறியது போல, இதைத் தனியாக வாங்க முடியாது. ஏற்கெனவே இருக்கும் ஹெல்த் பாலிசிக்கு ரைடராக வாங்கலாம். மகப்பேறு மருத்துவக் காப்பீடு பிரசவத்துக்கு முன், பிரசவத்துக்குப் பின் மற்றும் மருத்துவமனைச் செலவுகள் எனத் தாய், குழந்தை இருவரையும் உள்ளடக்கியது. கூடுதலாக பிரசவம் காரணமாக ஏற்படும் சிக்கல்களும் உள்ளடங்கும். ஆனால், இதில் சில விதிமுறைகள் இருக்கின்றன. இது நிறுவனத்துக்கு நிறுவனம் வேறுபடும். ரைடர் பாலிசி எடுத்துக்கொள்ளும்போது, இதற்கான பிரீமியம் 1,000 - 2,000 ரூபாய் வரை மட்டுமே இருக்கும். அதேபோல `கிரிட்டிக்கல் இல்னஸ்’ பாலிசிகளும், பெண் களுக்குக் கிடைக்கின்றன. இவற்றின் மூலம், அதி நவீன மருத்துவ சிகிச்சை களுக்கு க்ளைம் பெற முடியும்.

டாப்-அப் ஹெல்த் பாலிசி!

`டாப்-அப் மருத்துவக் காப்பீடு' என்பது வழக்கமான மருத்துவக் காப்பீட்டின் கூடுதல் காப்பீடு அம்சம். அதாவது, அடிப்படை பாலிசியுடன் இந்தப் பாலிசியை எடுத்துக் கொள்ளலாம். அதில் இருக்கும் கவரேஜ் தொகையைவிட க்ளெய்ம் அதிகமாகப் போகும்போது மட்டுமே இந்த டாப்-அப் பாலிசியைப் பயன்படுத்த முடியும். டாப்-அப் பாலிசியின் பிரீமியம் மிகக் குறைவு. தனி நபர் மற்றும் குடும்பம் என இதை யார் வேண்டுமானாலும் எடுத்துக்கொள்ளலாம்.

உதாரணமாக, ஒருவர் ரூ.5 லட்சத்துக்கு ஒரு ஹெல்த் இன்ஷூரன்ஸ் பாலிசியை எடுத்தால், தோராயமாக ரூ.27,000 பிரீமியம் செலுத்த வேண்டியிருக்கும். ஆனால், அடிப்படை பாலிசி ரூ.3 லட்சம், டாப்-அப் பாலிசி ரூ.2 லட்சம் என எடுத்துக்கொண்டால் பீரீமியம் குறையும். அதாவது, அடிப்படை பாலிசியில் ரூ.3 லட்சம் ரூபாய் கவரேஜுக்கு பிரீமியம் ரூ.12,000 என்று வைத்துக்கொள்வோம். கூடுதலாக ரூ.2 லட்சத்துக்கு இன்னொரு பாலிசியை எடுத்தால், அதற்கு தனியாக ரூ.8,000 பிரீமியம் செலுத்த வேண்டியிருக்கும். இதுவே, அடிப்படை பாலிசியுடன் சேர்த்துக் கூடுதலாக ரூ.2 லட்சத்துக்கு டாப்-அப் பாலிசி எடுத்துக்கொண்டால் எக்ஸ்ட்ரா பிரீமியம் வெறும் ரூ.3,000 மட்டும்தான் (இந்த பிரீமியம் ஒவ்வோர் இன்ஷூரன்ஸ் நிறுவனத்துக்கும் வித்தியாசப்படும்).

ரூ.3 லட்சம் கவரேஜுக்கு அடிப்படை பாலிசியையும், ரூ.2 லட்சத்துக்கு டாப்-அப் பாலிசியும் வைத்திருக்கிறீர்கள் எனில், உங்களின் க்ளெய்ம் ரூ.5 லட்சம் வரும்போது அடிப்படை பாலிசியில் ரூ.3 லட்சமும், டாப்-அப் பாலிசியிலிருந்து ரூ.2 லட்சமும் க்ளெய்ம் செய்யலாம். ஆனால், அடிப்படை பாலிசியின் கவரேஜ் முழுவதும் தீர்ந்த பிறகு மட்டுமே டாப்-அப் பாலிசியைப் பயன்படுத்த முடியும் என்பதை கவனத்தில் கொள்ளுங்கள். ஐ.ஆர்.டி.ஏ.ஐ (IRDIA - Insurance Regulatory and Development Authority of India) விதிமுறையின்படி, இன்றைய நிலையில் ரூ.1 கோடி வரை டாப்-அப் ஹெல்த் இன்ஷூரன்ஸ் பாலிசிகளை எடுத்துக்கொள்ள முடியும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
eakrin rasadonyindee

ஆன்லைனில் பாலிசி எடுக்கலாமா?

பொதுவாக டேர்ம் மற்றும் ஹெல்த் இன்ஷூரன்ஸ் பாலிசிகளை நிறுவனத்தின் ஏஜென்ட் மூலம் எடுத்தால், ஆன்லைனில் எடுப்பதைவிட பிரீமியம் சற்று அதிகமாக இருக்கும். காரணம், ஏஜென்ட் கமிஷன் உள்ளது. அதேநேரத்தில், ஏஜென்ட் மூலம் எடுக்கும்போது பாலிசி பற்றிய விவரங்களை உங்களுக்கு விளக்கமாக எடுத்துச் சொல்வார். விண்ணப்பப் படிவம் பூர்த்தி செய்வதில் உதவி செய்வார். பிரீமியம் கட்ட தொடர்ந்து நினைவுபடுத்துவார். பிற்காலத்தில் பாலிசிதாரர் இல்லாமல் போனால் இழப்பீடு விரைந்து கிடைக்க உதவுவார். பாலிசி பற்றிய விவரங்கள் முழுவதுமாக தெரிந்தால் மட்டுமே ஆன்லைன் மூலம் எடுக்கலாம்.

டிராவல் இன்ஷூரன்ஸ்!

நம்மில் பலர், உள்ளூர் முதல் உலக நாடுகள் வரை சுற்றுலா செல்கிறோம். அப்படிச் செல்லும்போது எல்லாம் சரியாக நடந்துவிட்டால், எந்தப் பிரச்னையும் இல்லை. ஆனால், சுற்றுலா செல்லும் இடங்களில் ஏதேனும் அசம்பாவிதம் நிகழ்ந்தால், அதிலிருந்து நம்மை பொருளாதார ரீதியாகக் காக்க உதவுவது... ‘டிராவல் இன்ஷூரன்ஸ்’. சுற்றுலா செல்லும் முன்பு இந்த ‘டிராவல் இன்ஷூரன்ஸ்’ இல்லாமல் போவது மகா தவறு.

‘டிராவல் இன்ஷூரன்ஸ்’ பாலிசியானது குறைந்தபட்சம் ஏழு நாள்கள் முதல் தரப்படுகிறது. ஆறு மாதக் குழந்தை முதல் 70 வயது முதியவர் வரை இந்த இன்ஷூரன்ஸை எடுத்துக்கொள்ளலாம். இந்த பாலிசியை, நீங்கள் சுற்றுலாவுக்குக் கிளம்பும் தினத்தன்றுகூட எடுக்கலாம். நீங்கள் விமானத்தில் ஏறி வெளிநாட்டுக்குச் சென்று, மீண்டும் இந்திய விமான நிலையத்துக்குள் வந்து இறங்கும் வரை இந்த பாலிசி மூலம் கவரேஜ் கிடைக்கும்.

பிரீமியம் எவ்வளவு?

வெளிநாடுகளுக்குச் செல்லும்போது ‘டிராவல் இன்ஷூரன்ஸ்’ எடுக்க அதிகம் செலவாகாது. நான்கு பேர்கொண்ட ஒரு குடும்பம், ஆசிய நாடுகளுக்கு ஒரு வார காலம் சுற்றுலா செல்கிறார்கள் எனில், நபருக்கு தலா ரூ.1,000 மட்டுமே செலவாகும். ‘டிராவல் இன்ஷூரன்ஸ்’ பாலிசிக்கான பிரிமீயம் ஒவ்வொரு நாட்டுக்கும் மாறும். அமெரிக்கா, இங்கிலாந்து போன்ற நாடுகளுக்கு ஒரு வாரம் சுற்றுலா எனில், ஒரு நபருக்கு ரூ. 2,500 ஆகும். பிரீமியம் தொகை நிறுவனத்துக்கு நிறுவனம் வித்தியாசப்படும்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி

கேன்சர் இன்ஷூரன்ஸ் பாலிசி!

நம் நாட்டைப் பொறுத்தவரை, புற்றுநோய் நோயாளிகளின் எண்ணிக்கை நாளுக்கு நாள் அதிகரித்து வருகிறது. ஒருவரின் கேன்சர் நிலை மற்றும் சிகிச்சை முறைகளைப் பொறுத்து, ஒரு சிகிச்சைக்கு குறைந்தபட்சம் ஆறு மாதங்களுக்கு ரூ.2.5 லட்சம் முதல் ரூ.50 லட்சம் வரை செலவு செய்ய வேண்டியிருக்கும். இவ்வளவு பணத்தை செலவழித்து, பணம் படைத்தவர்கள் எளிதில் சிகிச்சை மேற்கொள்ள முடியும். ஆனால், பணம் இல்லாதவர்களுக்கு ஒரே தீர்வு இன்ஷூரன்ஸ் மட்டுமே. எனவே, ஒருவேளை இந்த நோயால் பாதிக்கப்பட நேர்ந்தால் அதன் பின்னர் பாலிசி எடுக்கவில்லையே என கவலைப்படுவதைவிட, முன்பே இன்ஷூரன்ஸ் பாலிசி எடுத்து, மருத்துவ சிகிச்சையை எதிர்கொள்ளலாம். குறிப்பாக, குடும்பத்தில் அப்பா, அம்மா என ஏற்கெனவே யாரேனும் புற்றுநோயால் பாதிக்கப்பட்டு என, மரபு காரணங்களால் புற்றுநோய் ஏற்பட வாய்ப்புள்ளவர்கள் இதைப் பரிசீலிக்கலாம்.

வீடு, வாழ்க்கை, பயணம்... கைகொடுக்கும் இன்ஷூரன்ஸ் பாலிசிகள்! - ஓர் எளிமையான வழிகாட்டி
rvimages

ஹவுஸ் ஹோல்டு இன்ஷூரன்ஸ்!

சமீப காலமாகவே மழை, வெள்ளம், பூகம்பம், சுனாமி போன்றவற்றினால் அதிக நாசம் ஏற்படுகிறது. இவற்றின் பாதிப்பால் வீடு இடிந்து விழுந்தாலோ, வெள்ளத்தால் பாதிக்கப்பட்டாலோ ஹோம் இன்ஷூரன்ஸ் பாலிசி இருந்தால் இழப்பீடு கிடைக்கும். இந்த ஹோம் இன்ஷூரன்ஸ் பாலிசியை ஹவுஸ் ஹோல்டர் பாலிசி (House Holder Policy) என அழைக்கிறார்கள். இது ஓர் ஒருங்கிணைந்த பாலிசியாக அதாவது, பலவற்றுக்கும் ஒருசேர காப்பீடு மற்றும் கவரேஜ் அளிக்கும் பாலிசியாக இருக்கிறது. ஹோம் இன்ஷூரன்ஸ் பாலிசியில் வீட்டில் தீ விபத்து, இயற்கை சீற்றங்களால் பாதிப்படைவது, வீட்டிலுள்ள டிவி, தங்கநகை போன்ற விலையுயர்ந்த பொருள்கள் திருடுபோவது போன்றவற்றுக்கு இழப்பீடு தருவதாக இது இருக்கிறது.

இந்த வகை பாலிசியை அனைத்து பொதுத்துறை மற்றும் தனியார் ஜெனரல் இன்ஷூரன்ஸ் நிறுவனங்களும் வழங்குகின்றன. பழையது, புதியது என எல்லா வீட்டுக்கும் இந்தப் பாலிசியை எடுத்துக்கொள்ளலாம். மிகப் பழைய, சேதம் அடைந்த நிலையில் இருக்கும் வீட்டுக்குக் கிடைக்காது. கட்டடத்தைப் பொறுத்தவரை, வீட்டை மறுசீரமைப்பு செய்வதற்கான மதிப்பீடு (Reinstatement value) மற்றும் சந்தை மதிப்பு (Market value) என இரண்டு வகையில் இன்ஷூரன்ஸை எடுத்துக்கொள்ள முடியும். சந்தை மதிப்பு என்றால் வீட்டின் தற்போதைய சந்தை மதிப்பை மட்டும் (இடம் தவிர்த்து) கணக்கில் எடுத்துக் கொண்டு பாலிசி தருவார்கள். வீட்டை மறு சீரமைப்பு செய்வதற்கான செலவினைப் பெறும் பாலிசி என்றால் அன்றைய நிலையில் வீட்டை மறுசீரமைப்பு செய்ய என்ன தொகை செலவாகுமோ, அந்தப் பணத்தை இழப்பீடாக வழங்குவார்கள்.

அதேபோல வீட்டில் உள்ள உடைமைகளான பீரோ, கட்டில், எலெக்ட்ரானிக் பொருள்கள், தங்க நகைகள் (ரசீது அவசியம்) என அனைத்துக்கும் இன்ஷூரன்ஸ் எடுத்துக் கொள்ளலாம். அலுவலகக் கட்டடத்துக்கு இன்ஷூரன்ஸ் எடுத்துக் கொள்ளும்போது எவ்வளவு பணம் என்பது வரவு, செலவு கணக்கில் இருக்கும் என்பதால் பணத்துக்கும் சேர்த்து இன்ஷூரன்ஸ் எடுத்துக்கொள்ள முடியும். இதில் இன்னொரு முக்கியமான விஷயம்... வாடகை வீட்டில் இருப்பவர்களும், தங்களின் உடைமைகளுக்கு இன்ஷூரன்ஸ் எடுத்துக் கொள்ளலாம்.

பிரீமியம் எவ்வளவு?

இந்த பாலிசியைப் பொறுத்தவரையில் பிரீமியம் என்பது மிகக் குறைவு. ஒரு லட்சம் ரூபாய்க்கு ஆண்டு பிரீமியமாக ரூ.20-35 மட்டுமே. இயற்கை சீற்றங்களால் பாதிப்பு உண்டாகியிருப்பின், எஃப்.ஐ.ஆர் தேவைப்படாது. ஆனால், இயற்கை சீற்றத்துக்கான செய்தித்தாள் பிரசுரத்துடன், சர்வேயர் அறிக்கை, வானிலை ஆய்வறிக்கை, இழப்பு பற்றிய மதிப்பீடு, அரசு தரப்பில் வழங்கப்படும் ஆவணங்கள் மற்றும் பாலிசி சான்றிதழ்களை இன்ஷூரன்ஸ் நிறுவனத்தில் சமர்பிப்பது அவசியம். ஆவணங்கள் சரியாக இருப்பின் சமர்ப்பித்த 30 நாள் களுக்குள் இழப்பீட்டுத் தொகை வழங்கப்படும்

பொருள்கள் திருடு போயிருந்தால் கண்டிப்பாக எஃப்.ஐ.ஆர் தேவை. இதனுடன் எழுத்துபூர்வமாக ‘க்ளெய்ம் தேவை’ என்பதை சம்பந்தப்பட்ட நிறுவனத்துக்கு அனுப்பி வைக்க வேண்டும். இன்ஷூரன்ஸ் நிறுவனம், நீங்கள் கொடுத்த தகவல் உண்மைதானா என்பதை அறிய அதிகாரிகள் கொண்ட குழுவை அனுப்பி வைப்பார்கள். அவர்கள் வந்து சோதனை செய்து உறுதியளித்த பின்புதான் க்ளெய்ம் கிடைக்கும்.

அப்பார்ட்மெண்ட்டில் வசிப்பவர்கள் என்றால்...

பூகம்பம் மாதிரியான இயற்கை சீற்றங்களில் அதிகம் பாதிக்கப்படுவது வானுயர கட்டப்பட்டிருக்கும் அப்பார்ட்மென்ட்கள்தான். அதனால் அப்பார்ட்மென்ட்டில் வசிப்பவர்கள் கட்டாயம் ஹவுஸ்ஹோல்டு இன்ஷூரன்ஸ் எடுத்துக் கொள்வது நல்லது. அப்பார்ட்மென்ட்டில் இருக்கும் அனைவரும் சேர்ந்துதான் இந்த இன்ஷூரன்ஸை எடுக்க வேண்டும் என்பது கிடையாது. அப்பார்ட்மென்ட்டில் வசிக்கும் ஒருவர், தங்களுடைய வீட்டுக்குத் தனியாக ஹவுஸ்ஹோல்டு இன்ஷூரன்ஸ் எடுத்திருந்தாலும் க்ளைம் பெறலாம். இதில் இன்னொரு முக்கியமான விஷயம், வாடகை வீட்டில் இருப்பவர்களும், வீட்டைத் தவிர்த்து தங்களின் உடைமைகளுக்கு ஹவுஸ்ஹோல்டு இன்ஷூரன்ஸ் எடுத்துக் கொள்ள முடியும்.

மத்திய அரசின் காப்பீட்டுத் திட்டங்கள்!

மத்திய அரசு, நாட்டு மக்களுக்காகக் குறைந்த பிரீமியத்தில் விபத்து மற்றும் டேர்ம் பாலிசிகளை வழங்கி வருகிறது. அதில் ஒன்று, `பிரதான் மந்திரி சுரக்ஷா பீமா யோஜனா' (PMSBY - Pradhan Mantri Suraksha Bima Yojana). இது ஒரு விபத்துக் காப்பீடாகும். ஏழை மற்றும் குறைந்த வருமானம் உடைய மக்கள் நன்மை பெற இந்தத் திட்டம் செயல்படுத்தப்பட்டு வருகிறது. இந்தத் திட்டத்தை எடுக்கும் பாலிசிதாரர், ஒரு வருடத்துக்குள் விபத்தில் சிக்கி இறக்க நேரிட்டால் இத்திட்டத்தின் கீழ் அவர் குடும்பத்துக்கு இரண்டு லட்சம் ரூபாய் நிதியுதவி வழங்கப்படும். வங்கியில் சேமிப்பு கணக்கு கொண்ட, 18-70 வயதுடையவர்கள் இந்த பிரதமர் பாதுகாப்பு காப்பீட்டுத் திட்டத்தை எடுத்துக் கொள்ளலாம். விபத்து காரணமாக ஏற்படும் இறப்புகள் மற்றும் குறைபாடுகள் இத்திட்டத்தில் கவர் ஆகும். அதே நேரத்தில் ஒருவேளை பாலிசிதாரர் தற்கொலை செய்து கொண்டால், இந்தத் திட்டத்தால் அவரது குடும்பத்துக்கு எந்தப் பலனும் கிடைக்காது. பாலிசிதாரர் கொலை செய்யப்பட்டால் அந்த மரணம் இந்த திட்டத்தின் கீழ் கவர் ஆகும். விபத்துகள், வெள்ளம் மற்றும் நிலநடுக்கம் போன்ற இயற்கை பேரழிவுகள் மூலம் ஏற்படும் மரணங்கள் அல்லது உடல் குறைபாடுகள் இந்தத் திட்டத்தில் கவர் ஆகும். இந்தத் திட்டத்தின் கீழ் இன்ஷூரன்ஸ் பாலிசியைப் பெறுபவர்கள் ஆண்டுக்கு வெறும் 12 ரூபாய் செலுத்தினால் போதுமானது.

மற்றொரு திட்டம் `பிரதான் மந்திரி ஜீவன் ஜோதி பீமா யோஜனா' (PMJJBY - Pradhan Mantri Jeevan Jyoti Bima Yojana). இது ஒரு டேர்ம் பாலிசி. இந்தத் திட்டம் 18 முதல் 50 வயது வரை உள்ளவர்களுக்கானது. பிரீமியம் வருடத்துக்கு ரூ.330. இந்த பாலிசியை எடுக்கும் பாலிசிதாரர்கள் தங்களின் 55 வயது வரை பிரீமியம் செலுத்த வேண்டும். இந்தத் திட்டத்தின் மூலம் 75 வயது வரை பலன் பெறலாம்.

இயற்கை சீற்றங்கள், விபத்து, உடல்நிலைக் கோளாறு என எந்தக் காரணத்தால் உயிரிழப்பு ஏற்பட்டாலும் இந்த பாலிசியின் மூலம் 2 லட்சம் ரூபாய் வரை இழப்பீடு பெறலாம். மேலும் இந்தத் திட்டத்தை ஆண்டுதோறும் புதுப்பிக்க வேண்டும் என்பதை கவனத்தில் கொள்ள வேண்டும். பல வங்கிகளில் சேமிப்புக் கணக்கு வைத்திருந்தாலும், ஒரு வங்கி சேமிப்புக் கணக்கு மூலம் மட்டுமே இந்த திட்டத்தில் சேர முடியும்.

அட்டைப்படம்: மதன்சுந்தர்

ஏஜென்ட்கள் கூறுவதை அப்படியே ஏற்றுக்கொள்ளக் கூடாது!

இங்கிருக்கும் பெரும்பாலான இன்ஷூரன்ஸ் நிறுவனங்களும், இன்ஷூரன்ஸ் ஏஜென்ட்களும் வருமானம் பார்ப்பதற்காக தேவையில்லாத பாலிசிகளைத் மக்கள் தலையில் கட்டி வருகிறார்கள்.

கொரோனா பேரிடர் மாதிரியான நேரங்களைப் பயன்படுத்தி, மக்களை இன்ஷூரன்ஸ் எடுக்க வைப்பதில் அவர்கள் குறியாக இருக்கிறார்கள். பாலிசியின் பெயர்களில் சில்ட்ரன்ஸ் பிளான், ரிட்டையர்மென்ட் பிளான் எனத் திட்டங்களின் பெயர்களை வைத்திருப்பதால், அந்தந்த தேவைக்கு எனக் கருதி மக்கள் அதை ஒரு முதலீடாகப் பார்க்கிறார்கள். இப்படி குறைந்த லாபத்துக்கு, இன்ஷூரன்ஸை முதலீடாக நினைத்து முதலீடு செய்வதற்குப் பதிலாக, நீண்டகால அடிப்படையில் நல்ல லாபம் தரும் மியூச்சுவல் ஃபண்டுகளில் நேரடியாக முதலீடு செய்யலாம்.

ஹெல்த் பாலிசிகளில் க்ளெய்ம் செய்யும் முறை!

மருத்துவக் காப்பீடு பாலிசிகளில் இரு முறைகளில் க்ளெய்ம் செய்ய முடியும். முதல் முறையில், உங்கள் சிகிச்சைக்கு நீங்கள் முதலில் மருத்துவ மனையில் பணம் செலுத்திவிட்டு, பாலிசிக்கான கோருதலைப் பின்னர் செய்யலாம். இந்த முறையைத் தவிர்ப்பது நல்லது. காரணம், நீங்கள் கையிலிருந்து பணம் போட வேண்டியிருக்கும். அந்தத் தொகை உங்களிடம் இல்லை என்றால், நீங்கள் கடன் வாங்கும் நிலைக்குத் தள்ளப்படுவீர்கள்.

இரண்டாவது முறையில், காப்பீட்டு நிறுவனத்துடன் இணைந்திருக்கிற நெட்வொர்க் மருத்துவமனையில் சேரும்பட்சத்தில் சிகிச்சையின் ஆரம்பத்திலிருந்தே நீங்கள் கையிலிருந்து செலவுகளைச் செய்ய வேண்டியிருக்காது. இதை கேஷ்லெஸ் (Cashless) வசதி என்பார்கள். அதாவது, ரொக்கமில்லா செட்டில்மென்ட்.

`நோ க்ளெய்ம்' போனஸ்!

ஹெல்த் பாலிசி எடுத்திருக்கும் நபர் எந்தவொரு சிகிச்சைக்காகவும் க்ளெய்ம் செய்யவில்லை என்றால், `நோ க்ளெய்ம்' போனஸ் நன்மையாக அளிக்கப்படுகிறது. நோ க்ளெய்ம் போனஸாக இலவச உடல்நலப் பரிசோதனைகள் மற்றும் தள்ளுபடி வவுச்சர்கள் வழங்கப்படுகின்றன அல்லது அடுத்தடுத்த ஆண்டுகளுக்கான பிரீமியம் குறைக்கப்படலாம் அல்லது கவரேஜ் அதிகரித்து வழங்கப்படும்.

எதற்கெல்லாம் கவரேஜ் கிடைக்கும்?

டிராவல் இன்ஷூரன்ஸில் இரண்டு வகை உண்டு. ஒன்று, உடல்நலம் சம்பந்தமான பிரச்னை. மற்றொன்று, உயிர்ச்சேதம் மற்றும் உடைமைகள் காணாமல் போவது. பொதுவாக, உயிர்ச்சேதம் ஏற்பட்டால், 100% க்ளெய்ம் செய்து கொள்ளலாம். பாஸ்போர்ட் தொலைந்து போனால், ரூ.10,000 முதல் ரூ.20,000 வரை க்ளெய்ம் கிடைக்கும். இதுவே உடைமைகள் வைத்திருக்கும் பை (Bag) தொலைந்தால், வெளிநாடு செல்லும் முன், பைகளில் வைத்திருக்கும் உடைமைகளின் மதிப்பு எவ்வளவு என்று தாக்கல் செய்கிறோமோ, அந்த அளவுக்கு க்ளெய்ம் செய்து கொள்ளலாம். பைகளில் வைத்துள்ள பொருள்களுக்கான க்ளெய்ம் என்று வரும்போது அதிகபட்சம் ரூ.50,000 வரை இழப்பீடு கிடைக்கும்.

மருத்துவச் செலவினங்கள், இந்தியாவைவிட வெளிநாட்டில் மிக அதிகம். உதாரணத்துக்கு, ஐரோப்பிய நாடுகளுக்குச் சுற்றுலா சென்ற இடத்தில் உடல்நிலை பாதிப்படைந்தால், அங்கு மருந்துச்சீட்டு பரிந்துரை இல்லாமல் எந்தவொரு மருந்தையும் வாங்க முடியாது. மருத்துவரை அணுகினால், குறைந்தது 100 முதல் 150 யூரோ வரை கட்டணம் தர வேண்டும். 100 யூரோ என்பது, இன்றைய இந்திய ரூபாய் மதிப்பில் 8,000 ரூபாய். இந்தக் கட்டணமும் இன்ஷூரன்ஸ் கவரேஜில் கிடைக்கும். மருத்துவருக்கான கட்டணம் மட்டுமன்றி, மருந்துப் பொருள்களுக்கான செலவு, மருத்துவமனையில் அனுமதி மற்றும் சிகிச்சைக்கான செலவு என அனைத்துச் செலவுகளுக்கும் உரிய ரசீதுகளைச் சமர்ப்பித்து க்ளெய்ம் செய்து கொள்ளலாம். அதிகபட்சமாக 5,000 யூ.எஸ் டாலர் வரை கிடைக்கும்.

நாமினி விஷயத்தில் கவனிக்க..!

நாமினி என்றால் நம்பிக்கைக்குரியவர் என்று பொருள். ‘என்னுடைய மறைவுக்குப் பிறகு என் இன்ஷூரன்ஸ் முதிர்வுப் பணத்தை பெற்றுக் கொள்வதற்காக நான் இவரை நியமிக்கிறேன்’ என்பதுதான் அதன் முழுமையான அர்த்தம். ஒருவருடைய மறைவுக்குப் பிறகு அவர் கடைசியாக யாரை நாமினியாக நியமித்திருக்கிறாரோ, அவரே பலன்களை அனுபவிக்கத் தகுதியானவராகிறார். மேலும், நாமினியாக ஒருவரை நியமிக்கும்போது, அவருடைய புகைப்படம், கையெழுத்தைப் பெற்று இன்ஷூரன்ஸ் விண்ணப்பத்துடன் கொடுத்து வைத்தால், நாமினியின் தேவை ஏற்படும்போது குழப்பம் இல்லாமல் இருக்கும். அதேபோல, யாரை நாமினியாக நியமிக்கிறோமோ, அவருக்கு அது பற்றி தகவல் சொல்லிவிட வேண்டும். அப்போதுதான் உரிமை கோரமுடியும். டேர்ம் மற்றும் ஹெல்த் இன்ஷூரன்ஸ் விஷயத்தில் இப்படி தகவல் சொல்லிவைப்பது மிகவும் பயனுள்ளதாக இருக்கும்.

பாலிசிதாரர், டேர்ம் இன்ஷூரன்ஸை வீட்டுக் கடனுக்காகவோ, இதர கடன்களுக்காகவோ அத்தாட்சியாக காட்டியிருந்தால், அவருடைய மறைவுக்குப் பிறகு இன்ஷூரன்ஸ் முதிர்வுத் தொகையைக் கொண்டு அந்தக் கடன்களை திருப்பிச் செலுத்துவதற்குத்தான் முன்னுரிமை அளிக்கப்படும். கடன்கள் கட்டியது போக மீதம் தொகை இருந்தால், நாமினிக்கு கொடுக்கப்படும். அதனால்தான், கடன், குடும்பத்தில் எதிர்கால தேவைக்கான நிதி என அனைத்தும் சேர்த்து நிதி ஆலோசகர்கள் டேர்ம் இன்ஷூரன்ஸ் எடுக்கச் சொல்கிறார்கள்.

உங்கள் குடும்பத்துக்கு எடுக்க வேண்டிய காப்பீடுகளை இனியும் காலம் தாழ்த்தாமல் எடுத்துவிடுங்கள்!