Published:Updated:

மருத்துவக் காப்பீடு: தவறான நம்பிக்கைகளும் சரியான விளக்கங்களும்..!

மருத்துவக் காப்பீடு
பிரீமியம் ஸ்டோரி
மருத்துவக் காப்பீடு

மருத்துவக் காப்பீடு

மருத்துவக் காப்பீடு: தவறான நம்பிக்கைகளும் சரியான விளக்கங்களும்..!

மருத்துவக் காப்பீடு

Published:Updated:
மருத்துவக் காப்பீடு
பிரீமியம் ஸ்டோரி
மருத்துவக் காப்பீடு

எதிர்பாராத விபத்து, நோய் பாதிப்பு போன்றவற்றால் ஏற்படும் பெரிய செலவுகளி லிருந்து குடும்பத்தைப் பாதுகாக்கும் கவசமாக மருத்துவக் காப்பீடு (Health Insurance) உள்ளது. இன்றைய விரைவான உலகம் மற்றும் வாழ்க்கை முறை (LifeStyle) மாற்றத்தால் ஏற்படும் நோய்களுக்கு சிகிச்சை எடுக்க குடும்ப உறுப்பினர்கள் அனைவருக்கும் மருத்துவக் காப்பீடு எடுப்பது அவசியமாகும். அந்தக் காப்பீடு குறித்து பல்வேறு தவறான நம்பிக்கைகள் நம்மிடையே நிலவு கின்றன. அந்தத் தவறான நம்பிக்கைகளையும் சரியான விளக்கத்தையும் பார்ப்போம்.

சிவகாசி மணிகண்டன் 
நிதி ஆலோசகர், 
Aismoney.com
சிவகாசி மணிகண்டன் நிதி ஆலோசகர், Aismoney.com

தவறான நம்பிக்கை 1: நான் இளைஞன். ஆரோக்கியமாகத்தானே இருக்கேன். எனக்கு மருத்துவக் காப்பீடு தேவையில்லையே...

சரியான விளக்கம்: பலரும் இப்படித்தான் நினைக் கிறார்கள். மன அழுத்தம் நிறைந்த இன்றைய வாழ்க்கை முறை, சுற்றுச்சூழல் மாசு, கலப்பட உணவு போன்றவற்றால் நல்ல உடல்நலத்துக்கும் வயதுக்கும் எந்தத் தொடர்பும் இல்லாமல் போய்விட்டது. இன்றைய பெரும்பான்மையான இளைஞர்கள் பணிச்சுமை, மன அழுத்தம், உடல் பருமன் பிரச்னை உள்ளிட்டவற்றால் நோய்வாய்ப்பட்டு உள்ளனர். மேலும், விபத்து என்பது எந்த வயதினருக்கும் எப்போது வேண்டுமானாலும் ஏற்படக்கூடும். நாம் சாலையில் மிகச் சரியாக வாகனம் ஓட்டிச் சென்றாலும் எதிரில் வருபவர்கள் அல்லது நம் பின்னால் வருபவர்கள் சரியாக வாகனம் ஓட்டவில்லை எனில், பாதிப்பு நமக்குத்தான். எனவே, இளம்வயதாக இருந்தாலும் மருத்துவக் காப்பீடு எடுப்பது அவசியமாகும். இளம் வயதில் இன்ஷூரன்ஸ் பாலிசி எடுக்கும்போது பிரீமியம் குறைவாக இருக்கும் என்பது முக்கியமான விஷயம்.

தவறான நம்பிக்கை 2: அலுவலக மருத்துவக் காப்பீடு இருக்கே, அது போதாதா..?

சரியான விளக்கம்: கார்ப்பரேட் ஹெல்த் இன்ஷூரன்ஸ் திட்டங்களின்கீழ் பெரும்பாலான நிறுவனங்கள் தங்கள் ஊழியர்கள் மற்றும் அவர்களின் குடும்ப உறுப்பினர்களுக்கு மருத்துவக் காப்பீடு பாலிசிகளை அளிக்கின்றன. சில நிறுவனங்கள் அவையே அதற்கான பிரீமியத்தையும் கட்டுகின்றன. பல நிறுவனங் கள் பணியாளர்களின் சம்பளத்திலிருந்து பணத்தைப் பிடித்துக் கட்டுகின்றன. இந்தக் குரூப் பாலிசியை யாரும் வேண்டாம் என சொல்லக் கூடாது. காரணம், இதில் காத்திருப்புக் காலம் கிடையாது. மேலும், ஏற்கெனவே இருக்கும் நோய்களுக்கான சிகிச்சை செலவுகளுக்கு இழப்பீடு அனுமதி எனப் பல சலுகைகள் இருக்கின்றன. இந்த அலுவலக பாலிசியில் போதிய அளவுக்கு கவரேஜ் இருந் தாலும், இல்லை என்றாலும், தனியே ஒரு பாலிசி எடுத்துக் கொள்வது நல்லது. அலுவலக பாலிசியில் அதிக கவரேஜ் இருந்தால், தனிப்பட்ட பாலிசியைக் குறைவான கவரேஜுக்கு எடுத்துக்கொள்ளவும். அலுவலக பாலிசியில் கவரேஜ் தொகை குறைவாக இருந்தால், தனிப்பட்ட பாலிசியை அதிக கவரேஜ் அல்லது டாப் அப் பாலிசியாக எடுத்துக்கொள்ளவும். ஒருவர் ஒரு நிறுவனத்தில் பணிபுரியும் வரை மட்டுமே அவரின் கார்ப்பரேட் காப்பீட்டு பாலிசி செல்லுபடியாகும். வேலையை விட்டுவிட்டால், அந்த பாலிசி பயன்தராது. அப்போது புதிய பாலிசி எடுக்க வேண்டிவரும். ஏற்கெனவே ஒரு தனிப்பட்ட பாலிசி உங்களிடம் இருக்கும்பட்சத்தில், திடீரென ஏதாவது ஆகிவிடுமோ எனக் கவலைப்படத் தேவையில்லை.

மருத்துவக் காப்பீடு: தவறான நம்பிக்கைகளும் சரியான விளக்கங்களும்..!

தவறான நம்பிக்கை 3: குறைந்தபட்சம் ஒரு நாளாவது மருத்துவ மனையில் இருந்தால்தான் இழப்பீடு கிடைக்குமாம்...

சரியான விளக்கம்: ஆரம்பக் காலத்தில் இப்படியொரு நிபந்தனை இருந்தது. இப்போது பல நோய்களுக்கு மேற்கொள்ளப்படும் சிகிச்சை களுக்கு இந்த நிபந்தனை இல்லை. கீமோதெரபி, ரேடியோ தெரபி, கண் அறுவைசிகிச்சை, டயாலிசிஸ், பல் பராமரிப்பு போன்றவற்றுக்கு 24 மணி நேரம் மருத்துவமனையில் அனுமதிக்கப் பட்டிருக்க வேண்டும் என்கிற நிபந்தனை இல்லாமல் பல இன்ஷூரன்ஸ் நிறுவனங்கள் இழப்பீடு வழங்குகின்றன.

தவறான நம்பிக்கை 4: கர்ப்பம், பிரசவச் செலவுகளுக்கு மருத்துவக் காப்பீட்டில் இழப்பீடு இல்லையாம்...

சரியான விளக்கம்: சில ஆண்டுகளுக்கு முன்பு வரை இது உண்மைதான்; இப்போது சில நிபந்தனைகளுக்கு உட்பட்டு கர்ப்பம் மற்றும் மகப்பேறு கவரேஜ் செலவுகள் வழங்கப்படு கின்றன. சில பாலிசிகளில் மூன்று ஆண்டுகள் காத்திருக்கும் காலம் உள்ளது. பெரும்பாலும் கார்ப்பரேட் பாலிசிகளில் இந்த கவரேஜ் இருக்கிறது.

மருத்துவக் காப்பீடு: தவறான நம்பிக்கைகளும் சரியான விளக்கங்களும்..!

தவறான நம்பிக்கை 5: மருத்துவக் காப்பீட்டில் சிகிச்சைச் செலவு முழுமை யாகத் திரும்பக் கிடைக்கும்...

சரியான விளக்கம்: பாலிசியின் தன்மையைப் பொறுத்து செலவுத் தொகையில் குறிப்பிட்ட சதவிகிதம்தான் கிடைக்கும். மருத்துவம் சாராத செலவுகளுக்கு இழப்பீடு கிடைக் காது. மேலும், அறை வாடகை என்பது பாலிசி தொகையில் குறிப்பிட்டத் தொகையாக இருக் கும். பாலிசியில் மருந்துக்கென குறிப்பிட்டத் தொகைதான் அனுமதிக்கப்படும். மீதித் தொகையை பாலிசிதாரர் கையிலிருந்து செலுத்த வேண்டிவரும்.

தவறான நம்பிக்கை 6: புகைப்பழக்கம் உள்ளவர்களுக்கு மருத்துவக் காப்பீடு கிடைக்காது...

சரியான விளக்கம்: இது உண்மை அல்ல. முன்பே இருக்கும் நோய்களின் நிலைமை குறித்து மட்டுமே மருத்துவக் காப்பீட்டு நிறுவனங்கள் அக்கறை கொண்டுள்ளன. காப்பீடு வாங்குவதற்குமுன், புகைபிடிக்கும் பழக்கம் காரணமாக நுரையீரல் புற்றுநோய் அல்லது பிற சுவாச நோய் பாதிப்பு இருந்தால், அதை முன்பே இருக்கும் மருத்துவ நிலை என்று பாலிசியின் முன்மொழிவு படிவத்தில் குறிப்பிட வேண்டும். இந்த நிலையில் அதிக பிரீமியம் நிர்ணயம் செய்யப்படலாம்.

தவறான நம்பிக்கை 7: ஏற்கெனவே இருக்கும் நோய் களுக்கான சிகிச்சை செலவுக்கு இழப்பீடு கிடையாது...

சரியான விளக்கம்: ஏற்கெனவே இருக்கும் நோய் பாதிப்புக்கு பாலிசியின் தன்மையைப் பொறுத்து 24 அல்லது 48 மாதங்களுக்கு அந்த நோய் பாதிப்புக்கான செலவுக்கு க்ளெய்ம் கிடைக்காது. இதன் அர்த்தம், ஏற்கெனவே இருக்கும் நோய்களுக்கு பாலிசியில் குறிப்பிட்டிருக்கும் நிபந்தனைகளின் அடிப்படையில் 24 மாதங்கள் அல்லது 48 மாதங்களுக்குப் பிறகு, சிகிச்சை எடுத்துக்கொண்டால் இழப்பீடு கிடைக்கும்.

தவறான நம்பிக்கை 8: அறுவைசிகிச்சைக்கு சிறிது காலத்துக்கு முன்பு மருத்துவக் காப்பீடு பாலிசி எடுத்துக் கொண்டால் போதும்...

சரியான விளக்கம்: மருத்துவக் காப்பீட்டு பாலிசி களில் ஏற்கெனவே இருக்கும் நோய்களுக்கு பாலிசி எடுக்கப்பட்டவுடன் சிகிச்சை பெற்று இழப்பீடு பெற முடியாது. ஏற்கெனவே இருக்கும் நோய்களுக்கு இரண்டு, மூன்று, நான்கு ஆண்டுகள் எனக் காத்திருப்பு காலம் இருக்கிறது. எனவே, பாலிசியை எடுக்கும் போது விதிமுறைகள் மற்றும் நிபந்தனைகளைத் தெளிவாகப் படித்து அறிந்துகொள்வது அவசியமாகும்.

தவறான நம்பிக்கை 9: மருத்துவக் காப்பீடு பாலிசி எடுத்த தேதியிலிருந்தே அமலுக்கு வந்துவிடும்...

சரியான விளக்கம்: பொதுவாக, மருத்துவக் காப்பீடுகளில் பாலிசி எடுத்த முதல் 30 நாள்கள் காத்திருப்புக் காலம் (Waiting Period) ஆகும். இந்தக் காலகட்டத்தில் நோய்களுக்கான சிகிச்சை மற்றும் நோய் கண்டறிதல் செலவுகளுக்கு இழப்பீடு கிடையாது. அதே நேரத்தில், விபத்தில் சிக்கி மருத்துவமனையில் அனுமதிக்கப்பட்டு சிகிச்சை பெற்றால், அதற்கான இழப்பீடு அனுமதிக்கப்படும்.

தவறான நம்பிக்கை 10: பிரீமியம் குறை வாக உள்ள பாலிசியே சிறந்த பாலிசியாகும்.

சரியான விளக்கம்: நிறைய பேர் பிரீமியத்தின் அடிப்படையில் மருத்து வக் காப்பீடு பாலிசி எடுக்கும் முடிவை எடுக்கிறார்கள். குறைவான பிரீமியம் என்கிறபோது சலுகைகள் மிகவும் வரம்புக்கு உட்பட்டதாக இருக்கக்கூடும். மேலும், அதிக விதிமுறைகள் மற்றும் நிபந்தனைகளைக் கொண்டதாக இருக்கக்கூடும். விரிவான கவரேஜ், கூடுதல் சலுகைகளைக் கொண்ட பாலிசிகளில் பிரீமியம் அதிகம் என்றாலும் அவற்றைத் தேர்வு செய்வதே பின்னர் இழப்பீடு கோரும்போது லாபகரமாக இருக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism