Published:Updated:

மோட்டார் இன்ஷூரன்ஸ் ஐந்து ஆண்டு பாலிசி... சாதகமா, பாதகமா..?

மோட்டார் இன்ஷூரன்ஸ்
பிரீமியம் ஸ்டோரி
மோட்டார் இன்ஷூரன்ஸ்

இன்ஷூரன்ஸ்

மோட்டார் இன்ஷூரன்ஸ் ஐந்து ஆண்டு பாலிசி... சாதகமா, பாதகமா..?

இன்ஷூரன்ஸ்

Published:Updated:
மோட்டார் இன்ஷூரன்ஸ்
பிரீமியம் ஸ்டோரி
மோட்டார் இன்ஷூரன்ஸ்
‘பம்பர் டூ பம்பர்’ என்கிற இன்ஷூரன்ஸை ஐந்து ஆண்டுகளுக்குக் கட்டாயம் எடுக்க வேண்டும் என்ற உத்தரவை தமிழகப் போக்குவரத்துத் துறை 1.9.2021-லிருந்து நடைமுறைக்குக் கொண்டுவந்துள்ளது. அதனால், இனி புதிதாக வாங்கப்படும் வாகனங்களுக்கு பம்பர் டூ பம்பர் இன்ஷூரன்ஸ் கட்டாயம்..!

செப்டம்பர் 1-ம் தேதி முதல் விற்கப்படும் அனைத்து வாகனங்களுக்கும் ‘பம்பர் டூ பம்பர்’ என்ற அடிப்படையில் ஐந்து ஆண்டுகளுக்கு வாகனக் காப்பீடு கட்டாயமாக்க வேண்டும் எனச் சென்னை உயர் நீதிமன்றம் உத்தரவிட்டுள்ளது. இந்த உத்தரவு சாதாரண மக்கள் முதல் டிராவல்ஸ் நிறுவனங்கள் வரை அனைவருக்குள்ளும் கலக்கத்தை ஏற்படுத்தி இருக்கிறது. இந்த உத்தரவுக்கு ஒரு சிலர் ஆதரவு தெரிவித்தாலும், பெரும்பாலானவர்கள் எதிர்ப்பு தெரிவித்து வருகிறார்கள்.

வாகனங்களுக்கு ஐந்து ஆண்டுகள் காப்பீடு கட்டாயம் என்கிற விதிமுறை அமலுக்கு வந்தால், வாகன ஓட்டிகள் சந்திக்கும் பிரச்னைகள், இதிலிருக்கும் சாதக, பாதகங்கள் என்னென்ன என்பது குறித்து இன்ஷூரன்ஸ் துறை சார்ந்த பலரிடம் பேசினோம்.

வழக்கின் பின்னணி...

முதலில், தற்போது நீதிமன்றம் பிறப்பித் திருக்கும் உத்தரவில் உள்ள விஷயங்கள் குறித்து விளக்கமாக எடுத்துச் சொன்னார் வழக்கறிஞர் வி.எஸ்.சுரேஷ்.

“ஒகேனக்கல்லில் 2016-ம் ஆண்டு ஆகஸ்ட் மாதம் நடந்த சாலை விபத்தில் மரணமடைந்த சடையப்பன் என்பவரின் குடும்பத்தினர், இழப்பீடு கேட்டு ‘ஈரோடு மோட்டார் வாகன விபத்து இழப்பீட்டுத் தீர்ப்பாயத்தில்’ வழக்கு தொடர்ந்தனர். இந்த வழக்கை விசாரித்த தீர்ப்பாயம், சடையப்பன் குடும்பத்துக்கு இன்ஷூரன்ஸ் நிறுவனம் ரூ.14.65 லட்சம் இழப்பீடு வழங்க உத்தரவிட்டது.

இதை எதிர்த்து ‘நியூ இந்தியா அஸ்யூரன்ஸ்’ நிறுவனம் சென்னை உயர் நீதிமன்றத்தில் வழக்கு தொடர, அந்த வழக்கை உயர் நீதிமன்றம் விசாரித்தது. இந்த விசாரணையின் போது, வாகனத்துக்கான ஓட்டுநர் மற்றும் உரிமையாளர் என்ற அடிப்படையில் மட்டுமே வாகனக் காப்பீடு எடுக்கப்பட்டிருப்பதும், வாகனத்தில் பயணம் செய்த சடையப்பன் என்பவர் வாகன ஓட்டுநராக அடையாளப் படுத்தப்பட்டு இருப்பதும் தெரியவந்தது. அதனால் நீதிபதி வைத்தியநாதன், ஈரோடு தீர்ப்பாய உத்தரவை ரத்து செய்து, மறு உத்தரவைப் பிறப்பித்தார்.

மோட்டார் இன்ஷூரன்ஸ் ஐந்து ஆண்டு பாலிசி... சாதகமா, பாதகமா..?

பம்பர் டூ பம்பர்...

அந்தச் சமயத்தில், ‘புதிய வாகனத்தை வாங்கும்போது அது எவ்வாறு செயல்படும் என்று தெரிந்துகொள்வதில் ஆர்வம் காட்டு பவர்கள், காப்பீட்டு நடைமுறைகளை முழுமையாகத் தெரிந்துகொள்வதில்லை என்றும், வரும் செப்டம்பர் 1-ம் தேதி முதல் விற்கப்படும் அனைத்து புதிய வாகனங்களுக்கும் ‘பம்பர் டூ பம்பர்’ என்ற அடிப்படையில் வாகன உரிமையாளர்கள், ஓட்டுநர்கள், பயணி என அனைவரையும் உள்ளடக்கும் வகையில், ஐந்து ஆண்டுகளுக்குக் காப்பீடு செய்வதைக் கட்டாயமாக்க வேண்டும்’ என்றும் உத்தர விட்டுள்ளார்.

இந்த உத்தரவை தமிழகப் போக்குவரத்து துறை 1.9.2021-லிருந்து நடைமுறைக்குக் கொண்டுவந்துள்ளது. அதனால், இனி புதிதாக வாங்கப்படும் வாகனங்களுக்கு பம்பர் டூ பம்பர் இன்ஷூரன்ஸ் கட்டாயமாகிறது.

பிரீமியம் செலவு அதிகரிக்கும்...

மேலும், நீதிமன்றம் உத்தரவிட்டிருப்பது போல, ‘பம்பர் டூ பம்பர்’ என்கிற அடிப்படை யில் வாகனக் காப்பீடு எடுக்கும்போது, வருடாந்தர பிரீமியம் செலவு அதிகரிக்கும். ஐந்து ஆண்டுகளுக்கு என்று கணக்கிடும்போது லட்சக் கணக்கில் பிரீமியம் கட்ட வேண்டி யிருக்கும். இது பாமரனுக்குக் கூடுதல் நிதிச் சுமையை ஏற்படுத்தும். கால் டாக்ஸி நிறுவனங்கள், டிராவல்ஸ் நிறுவனங்கள், சரக்குப் போக்குவரத்துத் தொழில் நிறுவனங்கள் என அனைத்தும் இதனால் பாதிக்கப்படையும்.

இன்றைய நிலையில், உரிமம் பெற்றிருக்கும் இரு சக்கர மற்றும் நான்கு சக்கர வாகனங்களில் பாதிக்கு மேற்பட்ட வாகனங்கள் இன்ஷூரன்ஸ் இல்லாமல் ஓடிக்கொண்டிருக்கின்றன. அதை முறையாக ஆராய்ந்து, அனைவரையும் இன்ஷூரன்ஸ் எடுக்கச் செய்ய வேண்டும்.

டிஜிட்டல் டெக்னாலஜி உலகில் நாம் வாழ்ந்துகொண்டிருக்கிறோம். இந்தத் தொழில் நுட்பத்தால் அனைத்து வேலைகளையும் நாம் சிறப்பாகச் செய்ய முடியும் என்கிற நிலை உருவான பிறகு, வாகன இன்ஷூரன்ஸ் விஷயங்களில் மட்டும் மக்களைக் குறை சொல்வது எந்த விதத்தில் நியாயம்? அவர்கள் ஆர்வம் காட்டுவதில்லை எனில், அவர்களுக்கு இன்ஷூரன்ஸ் குறித்த அவசியத்தை உணர்த்த வேண்டியது அரசின் கடமை.

புதிய முறைகளைக் கண்டுபிடிக்கலாம்...

மேலும், இன்ஷூரன்ஸ் எடுக்காமல் தொடர்ந்து வாகனங்களை ஓட்டுபவர்களை எளிதில் பிடிக்க, அரசு சில வழிமுறைகளைக் கண்டுபிடித்தாக வேண்டும். உதாரணமாக, சுங்கச் சாவடிகளில் இதற்கான சாஃப்ட்வேர்களை கணினிகளில் பொருத்தி, அந்த வழியாக வரும் வாகனங் களுக்கு இன்ஷூரன்ஸ்கள் ஆக்டிவ்வாக இருக்கிறதா இல்லையா என்பதைத் தொடர்ந்து பரிசோதனை செய்யலாம்.

தனியார் இன்ஷூரன்ஸ் நிறுவனங்கள் இயங்குவதிலும் சில குறைபாடுகள் இருக்கின்றன. மக்களை வாகன இன்ஷூரன்ஸ் எடுக்க வைக்க, பிரீமியத்தைக் குறைத்துக் கொடுக்க, தனியார் இன்ஷூரன்ஸ் ஏஜென்டுகளின் பங்கு அதிக அளவில் இருந்துகொண்டிருக்கிறது. இவற்றையெல்லாம் சரி செய்யாமல், ஐந்து ஆண்டுகளுக்கு காப்பீட்டைக் காட்டாயம் ஆக்கியிருப்பது அனைத்துத் தரப்பினருக்கும் கூடுதல் நிதிச் சுமையைத்தான் உருவாக்கும்” என்றார்.

நிதிச் சுமையை ஏற்படுத்தும்...

தமிழக கால் டாக்ஸி மற்றும் அனைத்து வாகன ஓட்டுநர்கள் சங்கத்தின் மாநிலப் பொதுச் செயலாளர், பி.ஆர்.சாமி, “தனிநபர் வாகன உரிமையாளர்கள் மற்றும் கால் டாக்ஸி ஓட்டுநர்கள் ஐந்து ஆண்டு காப்பீட்டு முறையால் பெரிதும் பாதிக்கப்படுவார்கள். இன்றைய நிலையில் கார் மற்றும் இதர வாகனங்களை வாகனக் கடன் மூலம் வாங்கி, சுயமாக வேலைவாய்ப்பை உருவாக்கிக் கொண்டு பலர் டிரைவர் வேலை பார்த்துக்கொண்டிருக் கிறார்கள். இந்த விதிமுறை அவர்களுக்கு கூடுதல் நிதிச் சுமையை ஏற்படுத்தும்.

தற்போது ஒரு காருக்கு மூன்றாம் நபர் பாலிசி எடுக்க வேண்டுமெனில், வருடாந்தர பிரீமியமாக 18,000 ரூபாயை செலுத்தி வருகிறோம். இப்போது கூடுதலாக ‘பம்பர் டூ பம்பர் பாலிசி’யை ஐந்து ஆண்டு களுக்கும் சேர்த்து கட்டாயம் எடுக்க வேண்டும் என்று சொல்லும்போது, மூன்றாம் நபர் பாலிசி ரூ.18,000, பம்பர் டூ பம்பர் பாலிசி ரூ.12,000 சேர்த்து வருடத்துக்குக் குறைந்தபட்சம் 30,000 ரூபாயை பிரீமியமாகச் செலுத்த வேண்டியிருக்கும். ஐந்து ஆண்டுகள் என்கிறபோது சுமார் ரூ.1.5 லட்சத்தை வாகனம் எடுக்கும் முதல் ஆண்டிலேயே செலுத்த வேண்டியிருக்கும். வண்டி வாங்கும் செலவுடன், இன்ஷூரன்ஸ் செலவும் சேர்வது நிதி நெருக்கடியை உருவாக்கும். இந்த விதிமுறையால் வாகன விற்பனை குறைவதற்கும் வாய்ப்பிருக்கிறது. இதனால் வாகன விற்பனையாளர்களும் பாதிக்கப்படுவார்கள்.

முழுமையான வழிகாட்டுதல்கள் வெளியாகவில்லை...

மேலும், ஏற்கெனவே இன்ஷூரன்ஸ் எடுத்திருந்து அதைப் புதுப்பிப்பதற்கான பிரீமியம் புதுப்பிக்கும்போது, அதற்கான நடைமுறைகள் ஏற்கெனவே இருந்த விதிமுறை களின்படி தொடருமா அல்லது இந்தப் புதிய விதிமுறைகளை அதற்கும் அமல்படுத்துவார்களா என்பதெல்லாம் இன்னும் சரியாகச் சொல்லப்படவில்லை.

இன்ஷூரன்ஸ் பிரீமியம் தொகை தற்போது மிகவும் அதிகமாக இருக்கிறது. நாங்கள் கேட்பதெல்லாம், அதைப் பாதியாக குறைக்க வேண்டும் என்பதுதான் அதேபோல, சாலை வரி, எங்களுக்கு மிகப்பெரிய சுமையாக இருக்கிறது. ஏனெனில், கொரோனா ஊரடங்கு காலங்களில் எந்தவிதமான வாகனங்களும் சாலைகளில் ஓடவில்லை. அந்தக் காலகட்டத்துக்காவது சாலை வரிகளைத் தள்ளுபடி செய்யச் சொல்லி கேட்டிருந்தோம். ஆனால், ஆறு மாதக் காலம் தள்ளி வைத்து கட்டச் சொல்லியிருக்கிறார்களே தவிர, தள்ளுபடி செய்யவில்லை. இன்றும் எங்களால் பழைய பொருளாதார நிலைக்குத் திரும்ப முடியவில்லை. வேலை கிடைப்பது சிரமமாக இருக்கிறது. இப்படியான சூழலில் இந்த இன்ஷூரன்ஸ் கட்டாயம் ஆக்கப் பட்டிருப்பது வருத்தமளிக்கிறது” என்றார்.

வி.எஸ்.சுரேஷ், பி.ஆர்.சாமி
வி.எஸ்.சுரேஷ், பி.ஆர்.சாமி

60% இன்ஷூரன்ஸ் இல்லாத வாகனங்கள்...

ஓய்வுபெற்ற அரசு இன்ஷூரன்ஸ் நிறுவன அதிகாரி ஒருவரிடம் பேசினோம். “வாகனத்தின் உரிமையாளர்கள் ‘பம்பர் டூ பம்பர் இன்ஷூரன்ஸ் எடுத்துக்கொள்வது, அவர்களின் பாதுகாப்பை உறுதி செய்கிறது. ஆனால், அதைச் செய்யாமல், பிரீமியம் குறைவாகக் கட்ட வேண்டும் என்பதற்காகத் தேவைக்குத் தக்கபடி பாலிசியை எடுத்துக் கொள்கிறார்கள். இப்படியிருக்கும் போது, எந்தத் தேவைக்காக இன்ஷூரன்ஸ் எடுத்திருக் கிறமோ அதற்காக மட்டுமே க்ளெய்ம் பெற முடியும். இன்ஷூரன்ஸ் இல்லாத வாகனம் அல்லது பாலிசி புதுப்பிக்கப்படாத காலங்களில் வாகனங்கள் விபத்துக்கு உள்ளாகும்போது, அதனால் மரணம் அல்லது வாகனச் சேதம் அல்லது உடல் உறுப்புகள் சேதம் என எது நிகழ்ந்தாலும், இன்ஷூரன்ஸ் தொகையை க்ளெய்ம் செய்ய முடியாது என்பது தெரிந்தும், இன்றைய நிலையில் 60% இன்ஷூரன்ஸ் எடுக்காத வாகனங்கள்தான் சாலைகளில் ஓடிக் கொண்டிருக்கின்றன.

ஆனால், செப்டம்பர் 1-ம் தேதி முதல் இந்தக் காப்பீடு நடைமுறைக்கு வந்திருப்பது வரவேற்கத்தக்க விஷயம்தான். இந்த விதிமுறை இன்னும் மேம்படுத்தப் பட்டு, பழைய வாகனங்களுக்காக இன்ஷூரன்ஸ் புதுப்பிப்பவர்களுக்கு என்ன நடைமுறை என்பதை எல்லாம் ஐ.ஆர்.டி.ஏ.ஐ மற்றும் அரசு தரப்பும் ஆலோசித்து முடிவு செய்யும்.

பிரீமியம் தொகையில் சலுகைகள்...

ஐந்து ஆண்டுகளுக்கான இன்ஷூரன்ஸ் பாலிசி பிரீமியத்தை மொத்தமாகக் கட்டும்போது கூடுதல் சுமையாகத்தான் தெரியும். ஆனால், பாதுகாப்பு உறுதிப்படுத்தப்படுகிறது என்பதை மக்கள் மறக்க வேண்டாம். மேலும், ஐந்து ஆண்டு காப்பீட்டு முறை நடைமுறைக்கு வரும்பட்சத்தில், ஐந்து ஆண்டு களுக்கான பிரீமியம் தொகையை மொத்தமாக வாகன உரிமையாளர்கள் கட்ட வேண்டியிருப்பதால், இன்ஷூ ரன்ஸ் நிறுவனங்களுக்கான பிரீமியம் தொகையை நிர்ணயிப்பதில் சில சலுகைகள் கிடைக்க வாய்ப்புள்ளது” என்றார்.

நீதிமன்றத்தின் இந்த உத்தரவு இப்போது நடைமுறைக்கு வந்துவிட்டது. இந்த உத்தரவை இனி எல்லோரும் பின்பற்றித்தான் ஆக வேண்டும். இனியும் மாற்றம் வரும் என எதிர் பார்க்காமல், இந்த நடைமுறையைப் பின்பற்றும் வேலைகளைச் செய்வது எல்லோருக்கும் நல்லது!

*****

17.86 பில்லியன் டாலர்... ஐ.எம்.எஃப் அனுமதி!

இந்திய அரசாங்கம் இந்த ஆண்டில் 17.86 பில்லியன் டாலர் அளவுக்கு நிதியைப் பெறலாம் என சர்வதேச நிதி மையம் (IMF) ஒப்புதல் தெரிவித்திருக்கிறது. சர்வதேச நிதி மையத்தின் இயக்குநர் குழு உலக நாடுகள் 450 பில்லியன் டாலர் அளவுக்கு நிதியை எடுத்துக் கொள்ளலாம் என அனுமதி அளித்திருக்கிறது. அதில் இந்தியாவுக்கு 17.86 நிதியை எஸ்.டி.ஆர் (Special Drawing Right) முறையின்மூலம் எடுத்துக் கொள்ள அனுமதித்து இருக்கிறது!