ரூ.10 லட்சம் வரை ஏ.டி.எம் கார்டு இன்ஷூரன்ஸ்..! - கட்டாயம் அறிய வேண்டிய 7 விஷயங்கள்!

“ஒ ருவருக்கு தற்செயலான மரணம் அல்லது விபத்தின் மூலம் மரணம் ஏற்படும்போது, அவர் பயன்படுத்திக்கொண்டிருந்த டெபிட் அல்லது கிரெடிட் கார்டு மூலம் 10 லட்சம் ரூபாய் வரை காப்பீட்டுத் தொகை கிடைக்கும்” எனச் சொன்னால் உங்களால் நம்ப முடிகிறதா? ஆம். இதற்கான வசதிவாய்ப்புகளை வங்கிகள், தங்களின் வாடிக்கையாளருக்கு ஏற்படுத்தி வைத்திருக்கின்றன. காப்பீட்டு விதிகளின்படி, டெபிட் அல்லது கிரெடிட் கார்டு பயனாளர்களுக்கு ஒவ்வொரு வங்கியும் இந்தக் காப்பீட்டை வழங்குகிறது. இது நிறைய பேருக்குத் தெரிவதில்லை. இது சார்ந்த விவரங்களைத் தெரிந்துகொள்ள நிதி ஆலோசகர் சுரேஷ் பார்த்தசாரதியிடம் கேட்டோம். நம் கேள்விகளுக்கு விளக்கமான பதில்களைத் தந்தார் அவர். . வங்கிக்கணக்கு/ஏ.டி.எம் காப்பீட்டுத் திட்டம் பற்றி..!

“2015-ம் ஆண்டு முதல் வங்கியின் வடிக்கையாளங்களுக்கு ‘பிரதம மந்திரி ஜீவன் ஜோதி பீமா யோஜனா (PMJJBY)’ மற்றும் ‘பிரதம மந்திரி சுரக்ஷா பீமா யோஜனா (PMSBY)’ என்ற இரண்டு இன்ஷூரன்ஸ் திட்டங்கள் நடைமுறையில் உள்ளன. இவ்விரு திட்டங்களின் மூலமும் வங்கிக்கணக்கு வைத்திருக்கும் ஒவ்வொருவருக்கும் 2 லட்சம் ரூபாய் வரை காப்பீட்டுத் தொகை கிடைக்கும்.

. ‘பிரதம மந்திரி ஜீவன் ஜோதி பீமா யோஜனா பாலிசியை 18 முதல் 50 வயது வரை உள்ளவர்கள் எடுத்துக்கொள்ளலாம். இதற்கான பிரீமியம் வருடத்துக்கு 330 ரூபாய். அதேபோல, ‘பிரதம மந்திரி சுரக்ஷா பீமா யோஜனா’ திட்டத்தை 18 முதல் 70 வயது வரை உள்ளவர்கள் எடுத்துக் கொள்ளலாம். இதற்கான பிரீமியம் வருடத்துக்கு 12 ரூபாய் மட்டுமே. விபத்தால் கண்பார்வை இழப்பது அல்லது இரண்டு கைகளையும் நிரந்தரமாக இழப்பது அல்லது இரண்டு கால்களையும் இழப்பது அல்லது ஒரு கண்ணில் பார்வைத் திறனை நிரந்தரமாக இழப்பது போன்ற இழப்புகளுக்கு, இழப்பீடாக ரூ.2 லட்சம் க்ளெய்ம் பெறலாம். ஒரு கண் அல்லது ஒரு கை அல்லது ஒரு கால் இழப்புக்கு ஒரு லட்சம் ரூபாய் வரை க்ளெய்ம் பெற முடியும். இந்த பிரீமியம் வாடிக்கை யாளரின் கணக்கிலிருந்து ‘Auto-Debit’ மூலம் எடுக்கப்பட்டு, உரிய காப்பீட்டு நிறுவனத்தில் செலுத்தப்படும்.”

. வங்கியில் கணக்கு ஆரம்பிக்கும்போது, ஏ.டி.எம் இன்ஷூரன்ஸ் திட்டம் குறித்த விவரங்களை வங்கிகள் தெரியப்படுத்து வதில்லையே ஏன்?

. “வாடிக்கையாளர் சேவையை மேம்படுத்தும் நோக்கத்தில் ரிசர்வ் வங்கி, ‘பேங்கிங் கோட்ஸ் & ஸ்டாண்டர்ட்ஸ் போர்டு ஆஃப் இந்தியா’ என்ற அமைப்பை ஏற்படுத்தியுள்ளது. இந்த அமைப்பு வங்கிகளுக்கான நெறிமுறைகளை வகுத்துள்ளது. வாடிக்கையாளரின் சேவை குறித்தும் அறிவுறுத்தியுள்ளது. இதன்படி, வங்கிக் கணக்கு மற்றும் ஏ.டி.எம் தொடர்பான அனைத்து வசதிகள் மற்றும் விதிமுறைகளைக் கட்டாயம் வாடிக்கையாளர்களுக்குத் தெரியப்படுத்த வேண்டும். அந்த வகையில், அனைத்து வங்கிகளும், அது சார்ந்த விஷயங் களைத் தங்களின் வாடிக்கையாளர்களுக்குத் தெரியப்படுத்திக் கொண்டுதான் இருக்கின்றன. ஆனால், கால ஓட்டத்தில், பெரும்பாலானவர்கள் இந்த வகை இன்ஷூரன்ஸ் திட்டங்கள் இருப்பதை மறந்துவிடுகிறார்கள். வங்கிகள் இந்தத் தகவல்களைத் தெரியப்படுத்தாமல் போனால், வங்கிக் கணக்குத் தொடர்பான அனைத்து விவரங்களையும், வங்கி அலுவலர் களிடம் கேட்டுத் தெரிந்துகொள்வது அந்தந்த வாடிக்கையாளர்களின் பொறுப்பாகும்.”

. அனைத்து டெபிட் மற்றும் கிரெடிட் கார்டுகளுக்கும் ஒரே மாதிரியான காப்பீட்டுத் தொகைதானா?

. “வாடிக்கையாளர்களின் வங்கிச் சேமிப்புத் தொகை, பணப்பரிமாற்றம் ஆகியவற்றைப் பொறுத்து காப்பீட்டுத் தொகை மாறுபடும். உதாரணத்துக்கு, ரூபே கார்டு உள்ளவர்களுக்கு ரூ.2 லட்சம் வரை காப்பீடு வசதி உள்ளது. அதேபோல விசா, மாஸ்டர் கார்டு என வெவ்வேறு கார்டு கொண்டவர்களுக்கு அதற்குத் தகுந்தாற்போல காப்பீட்டுத் தொகையின் அளவு மாறுபடும். ஒரு நபரிடம் ஒன்றுக்கு மேற்பட்ட டெபிட் கார்டு இருந்தால், அட்டை வைத்திருப்பவர் ஒவ்வோர் அட்டையிலும் காப்பீட்டுத் தொகையை உரிமை கோர முடியாது. காப்பீட்டுத் தொகையை ஒரே ஒரு டெபிட் கார்டில் மட்டுமே உரிமை கோர முடியும்.”

. இயற்கை மரணம், விபத்தால் மரணம், தற்கொலை ஆகிய மூன்றுக்குமே இந்தக் காப்பீடு பொருந்துமா?

. “இயற்கை மற்றும் தற்கொலை காரணங்களால் மரணம் எனில், பிரதம மந்திரி ஜீவன் ஜோதி பீமா யோஜனா திட்டத்திலும், விபத்தால் ஏற்படும் மரணம் எனில், பிரதான் மந்திரி சுரக்ஷா பீமா யோஜனா திட்டத்திலும் க்ளெய்ம் செய்யலாம்.”

. கிரெடிட் அல்லது டெபிட் கார்டு வைத்திருப்பவருக்கு தற்செயலாக மரணம் ஏற்படும்போது, செயல்பாட்டில் இருக்கும் அட்டைகளுக்கு மட்டுமே உரிமைகோரல் வழங்கப்படுகிறது என்பதை நினைவில் கொள்ளுங்கள். . காப்பீட்டு பலனைப் பெறுவதற்காக, ஒருவரின் மரணத்தை ஆயுள் காப்பீட்டு நிறுவனங்களுக்குத் தெரியப் படுத்துவதுபோல, வங்கிக்கு எவ்வளவு நாள்களுக்குள் தெரியப்படுத்த வேண்டும்?

. “இந்தக் காப்பீடுகள் வங்கிகள் வழியே எடுக்கப்படுவன. எனவே, வங்கிகள் மாஸ்டர் பாலிசி ஹோல்டராக இருக்கும். அதனால் க்ளெய்ம் விண்ணப்பங்கள் வங்கிகள் மூலம் இன்ஷூரன்ஸ் கம்பெனிகளுக்கு அனுப்பப்பட வேண்டும். வங்கிகள் க்ளெய்ம் விண்ணப்பங்களைச் சரிபார்த்து தங்கள் பரிந்துரையுடன் இன்ஷூரன்ஸ் நிறுவனங் களுக்கு அனுப்புகின்றன. எனவே, வங்கிகளுக்கு முதலில் தெரியப்படுத்த வேண்டும். மரணம் அல்லது விபத்து குறித்த விவரத்தை வங்கிக்கு ஒரு வாரத்துக்குள்ளாக எழுத்து வடிவில் தெரிவித்து அதற்கான அத்தாட்சியைப் பெற்றிட வேண்டும். க்ளெய்ைம செய்வதற்கான விண்ணப்பம் மற்றும் தேவையான ஆவணங்களைத் தயார் செய்து மரணம் அல்லது விபத்து நடந்த 90 நாள்களுக்குள் வங்கியில் க்ளெய்ம் விண்ணப்பத்தைச் சமர்ப்பிக்க வேண்டும்.”

. க்ளெய்ம் செய்யும்போது சமர்ப்பிக்க வேண்டிய ஆவணங்கள் என்னென்ன?

. “சேமிப்புக் கணக்கின் நாமினி, அந்தக் கணக்கின் வாடிக்கையாளரின் இறப்புச் சான்றிதழுடன் க்ளெய்ம் படிவத்தை 90 நாள்களுக்குள் பூர்த்தி செய்து, தொடர்புடைய வங்கியிடம் சமர்ப்பிக்க வேண்டும். மேலும், நாமினியின் வங்கிக் கணக்கின் ரத்து செய்யப்பட்ட காசோலையையும் உடன் சமர்ப்பிக்க வேண்டும். சமர்ப்பித்த 60 நாள் களுக்குள் இன்ஷூரன்ஸ் க்ளெய்ம் நாமினியின் கணக்கில் வரவு வைக்கப்படும். விபத்தால் இறப்பு அல்லது உறுப்பு இழப்பு ஏற்பட்டு இருப்பின் அதற்கான எஃப்.ஐ.ஆர் சான்றிதழ், கை, கால் இழப்பு ஏற்பட்டிருந்தால் மருத்துவச் சான்றுகள் எனக் கூடுதல் ஆவணங்களைச் சமர்ப்பிக்க வேண்டும். கிரெடிட் அல்லது டெபிட் கார்டு வைத்திருப்பவருக்கு தற்செயலாக மரணம் ஏற்படும்போது, செயல்பாட்டில் இருக்கும் அட்டைகளுக்கு மட்டுமே உரிமை கோரல் வழங்கப்படுகிறது என்பதை நினைவில் கொள்ளுங்கள். அட்டை வைத்திருப்பவரின் மரணத்துக்கு முந்தைய கடைசி 60 நாள்களில் ஒருமுறையாவது கட்டாயம் பரிவர்த்தனை செய்திருக்க வேண்டும்.”

. விமான விபத்தால் இறப்பவர்களுக்கும் இந்தக் காப்பீட்டு முறை பொருந்துமா?

. “பிரதமரின் இருவேறு இன்ஷூரன்ஸ் (PMJJBY/PMSBY) திட்டங்களில் காப்பீடு க்ளெய்ம் பெறலாம். ரூபே கார்டுகளில் விமான விபத்து காப்பீடு வசதி உள்ளது. மற்ற கார்டுகளின் விவரங்களை அந்தந்த வங்கியிடம் கேட்டுத் தெரிந்துகொள்வது நல்லது.”

ரூ.10 லட்சம் வரை ஏ.டி.எம் கார்டு இன்ஷூரன்ஸ்..! - கட்டாயம் அறிய வேண்டிய 7 விஷயங்கள்!

செ.கார்த்திகேயன்Follow