மினி தொடர் - 11 - முதலீட்டில் டைமிங் முக்கியமா..? - ஓர் உதாரணம்... ஓர் ஒப்பீடு!

பொ துவாக, சந்தை வேகமானதொரு சரிவைச் சந்திக்கும் சூழ்நிலையில், கன்சிஸ்டன்ட் காம்பவுண்டிங் பங்குகள் (CCP) மற்றும் ஏனைய பலவீனமான பங்குகளுக்கு இடையே உள்ள வித்தியாசத்தை உணர்வதற்குள் சி.சி.பி பங்குகள் உள்ளிட்ட அனைத்துப் பங்குகளுமே வேகமான விலை இறக்கத்தைச் சந்திக்கவே செய்யும். . இந்தவித சூழ்நிலையில், முதலீட்டாளர்கள் என்ன செய்ய வேண்டும் என்பது குறித்து இப்போது பார்ப்போம். இதை ஓர் உதாரணத்துடன் பார்த்தால், நம்மால் இன்னும் நன்றாகப் புரிந்துகொள்ள முடியும்.

. இரண்டு முதலீட்டாளர்களை நாம் எடுத்துக்கொள்வோம். இவர்கள் இருவருமே ஏசியன் பெயின்ட்ஸ் நிறுவனத்தில் ரூ.1 கோடியை ஒவ்வோர் ஆண்டிலும் முதலீடு செய்ய திட்டமிட்டிருக்கிறார்கள் என்று வைத்துக்கொள்வோம். இதில் முதலாவது முதலீட்டாளரின் பெயர் திருவாளர் அதிர்ஷ்டசாலி. இவர், ஒவ்வொரு முறையும் காத்திருந்து சரியான நேரத்தில் ஏசியன் பெயின்ட்ஸ் நிறுவனத்தின் பங்குகள் சந்தையில் விலை நல்ல இறக்கத்தைச் சந்திக்கும்போது மட்டுமே வாங்கி முதலீடு செய்பவர்.

இரண்டாவது முதலீட்டாளரின் பெயர், திருவாளர் துரதிர்ஷ்டம். ‘‘விலை இறக்கத்தில் சரியாக முதலீடு செய்ய வேண்டும் என்ற டைமிங் எல்லாம் எனக்குத் தெரியாது’’ என்று சொல்பவர். ஆண்டுதோறும் ஏப்ரல் 1-ம் தேதி ஏசியன் பெயின்ட்ஸ் பங்குகளை, அது எந்த விலையில் இருக்கிறது என்பதைப் பற்றியெல்லாம் கவலைப்படாமல் வாங்குபவர்.

. இவர்கள் இருவருமே ஒவ்வோர் ஆண்டும் 1 கோடி ரூபாயை ஏசியன் பெயின்ட்ஸ் நிறுவனப் பங்குகளில் ஏப்ரல் 2010-ல் முதலீடு செய்ய ஆரம்பித்தனர். திருவாளர் துரதிர்ஷ்டம் ஏப்ரல் 1, 2010 அன்று ஏசியன் பெயின்ட்ஸ் பங்கின் விலை ரூ.203-ஆக இருக்கும்போது முதலீடு செய்தார். மாறாக, திருவாளர் அதிர்ஷ்டசாலியோ அவருடைய டைமிங் திறனைப் பக்காவாக உபயோகித்து, 2010-11-ம் நிதியாண்டில் ஆகக்குறைந்த விலையை ஏசியன் பெயின்ட்ஸ் கண்ட தினமான மே 21-ம் தேதியன்று (2010-ம் ஆண்டு) முதலீடு செய்தார்.

. இவர்கள் இருவருமே ஆண்டுதோறும் இந்த முதலீட்டை (அதே உத்தியில்) தொடர்ந்து 10 வருடங்களுக்கு செய்துவருகிறார்கள் என்பதால், இவர்கள் இருவரின் கொள்முதல் விலையும் நிறையவே மாறுபடும்.

உதாரணத்துக்கு, 2014-ம் ஆண்டில் திருவாளர் துரதிர்ஷ்டம் ஏப்ரல் 1, 2013 அன்று 495 ரூபாயிலும், திருவாளர் அதிர்ஷ்டம் ஆகஸ்ட் 28, 2013 அன்று 392 ரூபாயிலும் முதலீடு செய்திருப்பார்கள். அதாவது, திருவாளர் அதிர்ஷ்டம் அந்த வருடம் தன்னுடைய கொள்முதலை துரதிர்ஷ்டத்தைவிட 21% விலைக்குக் குறைவாக வாங்கியிருப்பார்.

இவர்கள் இருவருடைய முதலீட்டுக் காலமாகிய 10 வருடம் முடிந்தபிறகு இருவருடைய போர்ட்ஃபோலியோவின் (ஏசியன் பெயின்ட்ஸ் என்ற ஒரேயொரு பங்கை மட்டும் கொண்டிருப்பது) வருமானத்தை ஒப்பிட்டுப் பார்ப்போம்.

இந்த ஒப்பீட்டில் இந்த இருவரின் போர்ட்ஃபோலியோவின் மதிப்பு மற்றும் அவை வழங்கிய கூட்டு வருமானம் [Compounded Return (XIRR)] என்ற இரண்டையும் கணக்கிட்டுப் பார்ப்போம்.

திருவாளர் அதிர்ஷ்டத்தின் போர்ட்ஃபோலியோவின் மதிப்பு ரூ.36.3 கோடியாக 22.6% XIRR வருமானத்துடனும், திருவாளர் துரதிர்ஷ்டத்தின் போர்ட்ஃபோலியோவின் மதிப்பு ரூ.34.5 கோடியாக 21.7% அளவிலான XIRR வருமானத்துடனும் (0.9% அளவு குறைவானதாக) இருக்கும்.

. திருவாளர் துரதிர்ஷ்டத்தின் போர்ட்ஃபோலியோவின் மதிப்பு, திருவாளர் அதிர்ஷ்டத்தின் போர்ட்ஃபோலியோவின் மதிப்பைவிட 5% அளவே மதிப்பு குறைவாக இருக்கும். ‘டைமிங் செய்கிறேன்’ என்று திருவாளர் அதிர்ஷ்டம் எடுத்த ரிஸ்க்குக்கு ஈடான அதிக அளவிலான வருமானத்தை அவர் பெறவில்லை என்பதுதான் இங்கு கவனிக்கப்பட வேண்டிய விஷயம்.

. நேரம் பார்த்து முதலீடு செய்வது (Timing) மிக மிக நுணுக்கமான அதே சமயம், ஹைரிஸ்க் கொண்ட ஒரு விஷயமாகும். ஏனென்றால், நம் கணிப்பு தவறினால் குறைந்த விலையில் அந்த ஆண்டில் அந்தப் பங்கை வாங்க முடியாமலேயே போகலாம் (நிஜத்தில் அதற்கான வாய்ப்புகளே மிக அதிகம்). ஏனென்றால், முதலீட்டுக்கான சரியான நேரத்தைக் கண்டுபிடிப்பது மிகவும் கடினமான காரியம். இந்த போர்ட்ஃபோலியோ வருமானத்தைக் கணக்கிடும்போது டிவிடெண்டுகள் கணக்கில் எடுத்துக்கொள்ளப்படவில்லை. அதையும் சேர்த்தால் XIRR என்பது 1-2% இருவருக்குமே அதிகமாகும். (பார்க்க, பின்பக்கமுள்ள சார்ட்)

இனி, எதிர்பக்கத்தில் தரப்பட்டுள்ள அட்டவணையைப் பாருங்கள். 2001 முதல் 2020 வரையிலான காலகட்டத்தில் ஒவ்வொரு 10 ஆண்டுகளுக்கும் இவர்கள் இருவரின் இடையேயான முதலீட்டுச் சித்தாந்தங்களால் உருவான மதிப்பு மற்றும் XIRR வித்தியாசத்தை இந்த அட்டவணை காட்டுகிறது.

இந்த அட்டவணையைக் கொஞ்சம் கூர்ந்து கவனித்தால், எந்த 10 ஆண்டுக்காலத்துக்கான தங்களுடைய முதலீடுகளை எப்போது தொடங்கியபோதிலுமே அதிகபட்சமாக போர்ட்ஃபோலியோ மதிப்பில் 15% அளவே திருவாளர் அதிர்ஷ்டத்துக்கும் மற்றும் திருவாளர் துரதிர்ஷ்டத்துக்கும் (வருடத்தின் குறிப்பிட்ட ஒரே நாளில் முதலீடு செய்கிற ரகம்) இடையே இருந்துள்ளது.

. இதே மாதிரியான வேறு பல முதலீட்டுத் திட்டங்களையும் ஆராய்ச்சி செய்தால், இந்த அளவுக்கான விளைவுகளையே அது தந்துள்ளது என்பது நமக்குப் புரியும்.

. ஏசியன் பெயின்ட்ஸுக்குப் பதிலாக, மும்பை பங்குச் சந்தையின் குறியீட்டு எண்ணான சென்செக்ஸில் இதேபோன்ற 10 ஆண்டுக் காலத்துக்கான முதலீடுகளை 1991-ம் ஆண்டிலிருந்து செய்துவந்தால் (திருவாளர் அதிர்ஷ்டம் மற்றும் திருவாளர் துரதிர்ஷ்டம் செய்யும் முதலீட்டுத் திட்ட முறைகளில்) அதன் வருமானத்தில் பெரிய அளவில் மாறுதல் ஏதும் இருக்காது.

இதில் திருவாளர் துரதிர்ஷ்டத்தின் போர்ட்ஃபோலியோவின் மதிப்பு, அதிர்ஷ்டத்தின் போர்ட்ஃபோலியோவில் 80-95% (சராசரியாக 83% அளவில்) அளவிலேயே இருக்கும்.

. 1991-க்குப் பிறகு எந்த ஆண்டிலிருந்தும் ஆரம்பித்து, முதலீட்டின் காலகட்டத்தை 10-லிருந்து 20 வருடங்களாக உயர்த்தினாலும்கூட மேலே சொன்ன மாதிரியிலான விளைவுகளே இரண்டு போர்ட்ஃபோலியோவிலும் இருக்கும். அதாவது, திருவாளர் துரதிர்ஷ்டத்தின் போர்ட்ஃபோலியோ, திருவாளர் அதிர்ஷ்டத்தின் போர்ட்ஃபோலியோவில் சராசரியாக 82% அளவிலேயே இருந்திருக்கும். ஏசியன் பெயின்ட்ஸ் பங்குகளில் இதே வகையில் செய்யப்பட்ட முதலீடுகள் சராசரியாக 85% அளவில் இருந்தது என்பதை இங்கே நாம் நினைவு கூரவேண்டும்.

இந்த முதலீட்டின் விளைவுகள் ஏன் இப்படி இருக்கிறது என்பது குறித்து அடுத்த வாரம் பார்ப்போம்.

(அடுத்த இதழில் நிறைவுபெறும்)

மினி தொடர் - 11 - முதலீட்டில் டைமிங் முக்கியமா..? - ஓர் உதாரணம்... ஓர் ஒப்பீடு!

நாணயம் விகடன் டீம்