Published:Updated:

என்.எஸ்.இ-யில் பட்டியல் இடப்பட்ட 100-வது இ.டி.எஃப் திட்டம்... முதலீட்டாளர்களுக்குக் கைகொடுக்குமா?

இ.டி.எஃப் திட்டம்...
பிரீமியம் ஸ்டோரி
இ.டி.எஃப் திட்டம்...

ETF

என்.எஸ்.இ-யில் பட்டியல் இடப்பட்ட 100-வது இ.டி.எஃப் திட்டம்... முதலீட்டாளர்களுக்குக் கைகொடுக்குமா?

ETF

Published:Updated:
இ.டி.எஃப் திட்டம்...
பிரீமியம் ஸ்டோரி
இ.டி.எஃப் திட்டம்...

இந்திய பங்குச் சந்தையில் ஒரு முக்கிய மைல் கல்லாக நூறாவது இ.டி.எஃப் திட்டம் (ETF - Exchange Traded Fund) சில நாள்களுக்குமுன் அறிமுகம் செய்யப்பட்டுள்ளது. 2002-ம் ஆண்டு இந்தியாவின் முதல் இ.டி.எஃப் நிப்பான் மியூச்சுவல் ஃபண்ட் நிறுவனத்தால் அறிமுகம் செய்யப்பட்டது. கடந்த 19 ஆண்டுகளில் பல புதிய இ.டி.எஃப் திட்டங்கள் தொடங்கப்பட்டு தற்போது நூறாவது இ.டி.எஃப் அறிமுகமாகியுள்ளது.

ஷியாம் ராம்பாபு
ஷியாம் ராம்பாபு

இ.டி.எஃப் என்பது...

இ.டி.எஃப் என்பது நிறுவனப் பங்குகள் அல்லது கடன் பத்திரங்கள் அல்லது தங்கம் இவற்றை அடிப்படையாகக் கொண்டு, பங்குச் சந்தையில் வர்த்தகமாகும் திட்டமாகும். உதாரணமாக, இந்தியாவில் உள்ள முன்னணி வங்கிப் பங்குகளைத் தொகுத்து, பேங்க் நிஃப்டி அறிமுகம் செய்யப் பட்டது. இந்த பேங்க் நிஃப்டி இ.டி.எஃபை ஒருவர் வாங்கும் போது அந்தத் திட்டத்தில் இடம்பெற்றுள்ள அனைத்துப் பங்குகளிலும் பணமானது பிரித்து முதலீடு செய்யப்படும். இதுபோன்ற திட்டங்களில் ஒவ்வொரு நிறுவனத்துக்கும் அதற்கிருக்கும் வெயிட்டேஜுக்கு ஏற்ப ஒருவர் முதலீடு செய்யும் பணம் பிரித்து முதலீடு செய்யப்படும்.

மியூச்சுவல் ஃபண்டிலிருந்து எப்படி மாறுபடுகிறது?

மியூச்சுவல் ஃபண்ட் திட்டங்கள் ஃபண்ட் மேனேஜரின் முடிவுகளுக்கேற்ப பல்வேறு திட்டங்களில் முதலீடு செய்யப்படும். அந்தத் திட்டத்தில் இடம்பெற்ற பங்குகளை விற்பதற்கோ, அதில் புதிய நிறுவன பங்குகளைச் சேர்ப்ப தற்கோ முடியும். ஆனால், இ.டி.எஃப் திட்டங்களில் முதலீடு செய்யப்பட்ட இண்டெக்ஸில் இடம் பெற்றுள்ள நிறுவனங்களின் விகிதாசாரப்படி மட்டுமே முதலீடு மேற்கொள்ளப்படும். உதாரணமாக, நிஃப்டி 50 இண்டெக்ஸ் திட்டத்தில் ஒருவர் முதலீடு செய்திருந்தால், நிஃப்டி இண்டெக்ஸில் இடம்பெற்றுள்ள 50 பங்குகளிலும் ஒவ்வொரு நிறுவனத்தின் வெயிட்டேஜுக்கு ஏற்ப முதலீடு மேற்கொள்ளப்படும்.

என்.எஸ்.இ-யில் பட்டியல் இடப்பட்ட 100-வது இ.டி.எஃப் திட்டம்... முதலீட்டாளர்களுக்குக் கைகொடுக்குமா?

இ.டி.எஃப் திட்டங்களால் என்ன நன்மை?

மியூச்சுவல் ஃபண்ட் திட்டத்தை நிர்வாகம் செய்வதற்காக சிறிய தொகை முதலீட்டாளரிடமிருந்து பிடித்தம் செய்யப்படும். அதையே முதலீட்டாளர் நேரடியாக பங்குச் சந்தையில் இ.டி.எஃப் திட்டங்களில் முதலீடு செய்யும்போது இதுபோன்ற கட்டணங்கள் வசூலிக்கப் படுவதில்லை. ஆனால், வாங்க விற்க சிறிய தரகுக் கட்டணம் கொடுக்க வேண்டும். இதன் காரணமாக, இ.டி.எஃப் திட்டங்கள் மக்களிடம் அதிக வரவேற்பைப் பெறுகின்றன. பேசிவ் ஃபண்டுகள் என்று அழைக்கப்படும் இந்த வகை ஃபண்டுகளுக்கான கட்டணங்கள் மற்ற மியூச்சுவல் ஃபண்ட் திட்டங்களைவிட சற்று குறைவாகவே இருக்கும்.

எவ்வாறு முதலீடு செய்வது?

பங்குச் சந்தையில் டீமேட் அக்கவுன்ட் வைத்திருப்பவர்கள் பங்குகளை வாங்குவதுபோல, இந்த இ.டி.எஃப்-களை யும் வாங்க முடியும். இண்டெக்ஸின் ஏற்ற இறக்கத்துக்கு ஏற்ப முதலீடு செய்யப்பட்ட தொகைக்கு வருவாய் கிடைக்கும்.

21 திட்டங்களில் ரூ.3.16 லட்சம் கோடி..

பல்வேறு இ.டி.எஃப் திட்டங்களில் தற்போது ரூ.3.16 லட்சம் கோடி நிர்வாகம் செய்யப்பட்டு வருகிறது. மக்களின் விருப்பத்துக்கு ஏற்ப அதிக அளவிலான திட்டங்கள் அறிமுகம் செய்யப்படு கின்றன. கடந்த ஆண்டில் மட்டும் 21 இ.டி.எஃப் திட்டங்கள் அறிமுகம் செய்யப்பட்டுள்ளன. கடன் பத்திரங்கள், பங்குச் சந்தை, தங்கம் போன்ற பல வகைகளில் முதலீடு செய்யப் படும் இ.டி.எஃப் திட்டங்கள் அறிமுகம் செய்யப்படுகின்றன. ஐந்து ஆண்டுகளுக்குமுன்பு இ.டி.எஃப் திட்டங்களில் ரூ.23,000 கோடி மட்டுமே முதலீடு செய்யப்பட்டிருந்தது. அது ஐந்து ஆண்டுகளில் ஏறக்குறைய 14 மடங்கு உயர்ந்து, ரூ.3.16 லட்சம் கோடி ஆகி இருப்பதன் மூலம் நாம் இ.டி.எஃப் திட்டங்களை அதிகமான மக்கள் விரும்பி வாங்குகிறார்கள் என்பதை எளிதாகப் புரிந்துகொள்ள முடியும். இ.டி.எஃப் திட்டங்களில் முதலீடு செய்பவர்களின் எண்ணிக்கை கடந்த நிதி ஆண்டில் இரு மடங்காக உயர்ந்து 40 லட்சம் என்ற அளவில் உள்ளது. கடந்த நிதியாண்டில் நாளொன்றுக்கு சராசரியாக தேசியப் பங்குச் சந்தையில் ரூபாய் 265 கோடி வர்த்தகம் இ.டி.எஃப் திட்டங்களில் நடைபெற்றது.

பிரபலமான இ.டி.எஃப் திட்டங்கள்...

தற்போது வரை இ.டி.எஃப் திட்டங்களில் மிகவும் பிரபலமாக உள்ளது நிஃப்டி இண்டெக்ஸ் ஆகும். பங்குச் சந்தை தவிர்த்து, தங்கத்தில் தற்போது வரை 11 இ.டி.எஃப் திட்டங்கள் செயல் பட்டு வருகின்றன. தங்கத்தில் 12 லட்சம் பேர் முதலீடு செய்திருக் கிறார்கள். கோல்டு இ.டி.எஃப் முதலீடு கடந்த ஐந்து ஆண்டுகளில் இரண்டரை மடங்கு உயர்ந்து ரூ.16,624 கோடியாக உள்ளது.

ரிஸ்க் குறைவான கடன் பத்திரங்களிலும் 13 இ.டி.எஃப் திட்டங்கள் அறிமுகம் செய்யப் பட்டுள்ளன. இந்தத் திட்டங்களில் ரூ.40,230 கோடி நிர்வாகம் செய்யப் படுகிறது. மேலும் இ.டி.எஃப் திட்டங்களில் முதலீடு செய்யப்படும் தொகைக்கு மிகக் குறைந்த அளவான 0.001% மட்டுமே பங்கு பரிமாற்ற வரியாக விதிக்கப் படுகிறது (Security Transaction Tax – STT). இது நேரடிப் பங்குகளை வாங்குவதற்கு விதிக்கப்படும் வரி அளவைவிட மிகக் குறைவாகும்.

எவ்வளவு வருமானம் கிடைக்கும்?

இ.டி.எஃப் திட்டங்களில் எவ்வளவு வருமானம் கிடைக்கும் என்பதை அறுதியிட்டுக் கூற முடியாது. இந்தத் திட்டத்தின் வகைக்கேற்ப செய்யப்படும் முதலீட்டுக்கு வருமானம் கிடைக்கும்.

நிஃப்டி இண்டெக்ஸ் தொடங்கப்பட்டதிலிருந்து சராசரியாக 17.2% வருமானம் கொடுத்துள்ளது. நீண்டகால நோக்கில் பங்குச் சந்தை சார்ந்த திட்டங்கள் நல்ல வருமானம் தரலாம். குறுகியகாலத்துக்குக் கடன் பத்திரங்களில் முதலீடு செய்யப்படும் இ.டி.எஃப் திட்டங்கள் சிறந்தவை.

எவ்வளவு வருமான வரி?

திட்ட வகைக்கேற்ப இ.டி.எஃப் திட்டங்கள் மூலம் கிடைக்கும் வருமானத்துக்கு வரி செலுத்த வேண்டும்.நேரடிப் பங்குச் சந்தையில் முதலீடு செய்வதற்கு சந்தையைப் பற்றிய தெளிவும், அனுபவமும் மிக முக்கியமானது ஆகும். அதனால்தான் பெரும்பாலானவர்கள் இ.டி.எஃப் மற்றும் மியூச்சுவல் ஃபண்ட் திட்டங்களில் முதலீடு செய்கிறார்கள்.

மியூச்சுவல் ஃபண்ட் திட்டங்களை விட நேரடி இ.டி.எஃப் திட்டங்களில் முதலீடு செய்யும் தொகைக்கு கட்டணம் குறைவாகச் செலுத்தினால் போதும். ஆனால், பங்குச் சந்தை முதலீடு என்பது சந்தை அபாயத்துக்கு என்றுமே உட்பட்டது ஆகும். அதை உணர்ந்து சரியான முறையில் அவரவர் ரிஸ்க் எடுக்கும் திறனுக்கேற்ப உள்ள இ.டி.எஃப் திட்டங்களில் முதலீடு செய்வது நீண்ட கால நோக்கில் நல்ல லாபத்தை அளிக்கக் கூடும். ஒருவர் தனது போர்ஃபோலியோவில் குறிப்பிட்ட அளவு முதலீட்டை இ.டி.எஃப் திட்டங்களில் வைத்திருப்பது நல்லது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism