Published:Updated:

கவர்ச்சிகரமான விளம்பரங்களை நம்பி வீடு வாங்கலாமா?

கவர்ச்சிகரமான விளம்பரங்களை நம்பி வீடு வாங்கலாமா?

டனுக்கான வட்டியை ரிசர்வ் வங்கி இருமுறை தலா 0.25% குறைத்துள்ள நிலையில் முன்னணி தனியார் வங்கிகள் 0.10% முதல் 0.25% வரை வீட்டுக் கடனுக்கான வட்டியை குறைத்துள்ளன. ஆனாலும், நாடு முழுக்க வீடு விற்பனை வேகம் எடுத்ததுபோல் இல்லை.

வீடு வாங்கினால் அதிர்ஷ்டம்!

அண்மையில் அக்‌ஷய திரிதியையின்போது தங்கம் வாங்கினால் அதிர்ஷ்டம் என ஜூவல்லரி நிறுவனங்கள் விளம்பரம் செய்தன. சில ரியல் எஸ்டேட் நிறுவனங்கள், அக்‌ஷய திருதியை அன்று தங்கம் மட்டுமல்ல, வீடு வாங்கினாலும் அதிர்ஷ்டம்தான் என விளம்பரம் செய்தன.

கவர்ச்சிகரமான விளம்பரங்களை நம்பி வீடு வாங்கலாமா?

தங்கம் வாங்க சில ஆயிரங்கள் இருந்தால் போதும்;  ஆனால், வீடு வாங்க பெரும் தொகை தேவைப்படுமே என்று மக்கள் நினைத்துவிடக் கூடாது என்பதற்காக அதற்கும் சில ரியல் எஸ்டேட் நிறுவனங்கள் திட்டம் வைத்திருக்கின்றன. சுமார் 5 சதவிகித முன்பணம் அல்லது ரூ. 10,000 கொடுத்தால் போதும், மீதியை வீட்டு சாவியை வாங்கும்போது கொடுத்தால் போதும் எனச் சலுகைகளை சில ரியல் எஸ்டேட் நிறுவனங்கள் அறிவித்தன. இந்த சலுகைகளைப் பார்த்து இதுவரை வீடு வாங்காதவர்கள்கூட, நாமும் வீடு வாங்கலாமே என்று யோசிக்கத் தொடங்கி இருக்கிறார்கள்.

கவர்ச்சிகரமான விளம்பரங்களை நம்பி வீடு வாங்கலாமா?

ரியல் எஸ்டேட் நிறுவனங்கள் இப்போது முன்வைத்திருக்கும் இந்த சிறப்புத் திட்டம் வீடு வாங்குபவர்களுக்கு சாதகமாக இருக்கிறதா என்பதை அறிய களமிறங்கி விசாரித்தோம்.

வீட்டுக் கடன் வாங்கும்போது, வீடு வாங்குபவர் சுமார் 20 சதவிகித தொகையைக் கையிலிருந்து முன்பணமாக தரவேண்டி இருக்கும். மீதியை , அதாவது 80 சதவிகித தொகையை வங்கிகள் / வீட்டு வசதி நிறுவனங்கள் கடனாகக் கொடுக்கும்.  வங்கிகள் தரும் இந்த 80 சதவிகித கடனுக்கான வட்டியை, வீட்டைக்  கட்டி முடித்து நம்மிடம் ஒப்படைக்கும் வரைக்கும் வீடு கட்டித் தரும் நிறுவனங்கள் கட்டும்.

இந்த 20:80 என்கிற திட்டமானது, இப்போது 25:75, 2:92:6, 6:88:6, 10:10:70:10 என்கிற மாதிரியெல்லாம் புதுப்புது அவதாரமெடுத்திருக்கிறது. இதில் அதிகச் சதவிகிதத்தில் இருப்பதை வங்கி கடனாக அளிக்கும். மீதியை வீடு வாங்குபவர், பல்வேறு நிலைகளில் தன் கையிலிருந்து போடவேண்டி இருக்கும்.

ரியல் எஸ்டேட் நிறுவனத்துக்கு குறைந்த வட்டியில் கடன்!

பொதுவாக, வீட்டைக் கட்டி முடிக்கும் வரைக்கும் அல்லது    2 / 3 ஆண்டுகளுக்கு வட்டியை ரியல் எஸ்டேட் நிறுவனம் கட்டுவதுபோல் ஒப்பந்தம் போடப்படும். வீட்டை முன்பதிவு செய்யும்போது டவுண் பேமென்ட், பத்திரப் பதிவு கட்டணம், வாட், சேவை வரி உள்ளிட்டவைகளை வீடு வாங்குபவர் செலுத்த வேண்டும்.

உதாரணத்துக்கு, 5:80:15 திட்டத்தில், வீடு வாங்குபவர் சொத்தின் மதிப்பில் 5 சதவிகிதத் தொகையை ஆரம்பத்தில் பில்டருக்கு கொடுக்க வேண்டும். 80% தொகை வங்கிக் கடனாகப் பெற்றுத் தரப்படும். வீட்டில் குடியேறும்போது மீதி 15 சதவிகித தொகையைக் கொடுக்க வேண்டும்.

கவர்ச்சிகரமான விளம்பரங்களை நம்பி வீடு வாங்கலாமா?

ரியல் எஸ்டேட் நிறுவனங்கள் சமீபத்தில் அறிவித்துள்ள இந்த சலுகைத் திட்டங்களில் வீடு வாங்குபவர்களுக்கு லாபம் இருக்கிறதோ இல்லையோ, ரியல் எஸ்டேட் நிறுவனங்களுக்கு லாபம் இருக்கிறது. வழக்கமாக ரியல் எஸ்டேட் நிறுவனங்கள் கட்டுமானத்துக்கு சுமார் 18-20% வட்டிக்கு கடன் வாங்கும். மேலும், ஜாமீனாகச் சொத்து காட்ட வேண்டும். ஆனால், இப்போது அறிவித்துள்ள திட்டங்கள் மூலம் வீட்டுக் கடன் வாங்குபவர்கள் மூலமாக அவர்களுக்கு சுமார் 10-11% சதவிகித வட்டியில் நிதி சுலபமாகக் கிடைத்துவிடுகிறது. இதனால் இப்படிப்பட்ட கவர்ச்சிகரமான திட்டங்களை ரியல் எஸ்டேட் நிறுவனங்கள் தந்து வருகின்றன என்கிறார்கள் விஷயம் தெரிந்தவர்கள்.

வட்டியை கவனியுங்கள்!

சர்வதேச சொத்து ஆலோசனை நிறுவனமான ஜேஎல்எல்இந்தியாவின் முதன்மை செயல்பாட்டு அதிகாரி ரமேஷ் நாயர் கூறும்போது, ‘‘இந்தச் சிறப்புத் திட்டத்தில் சொத்து வாடிக்கையாளர் பெயரில் பதிவு செய்யப்படுவது கட்டாயம். இது வீடு வாங்குபவருக்கு ஒரு சாதகமான அம்சம். இந்தச் சிறப்புத் திட்டங்கள் பெரும்பாலும், புராஜெக்ட்கள் ஆரம்பிக்கப்பட்ட நிலையில் அல்லது பூஜை போடப்பட்ட நிலையில்தான் இருக்கும். தங்களின் புராஜெக்ட்டுக்கு தேவையான நிதியில் ஒருபகுதியை திரட்டிக்கொள்ள இந்த முறையைப் பல புரமோட்டர்கள் பயன்படுத்திக் கொள்கிறார்கள்.

முக்கியமாக, வீட்டுக் கடனுக்கான வட்டி எவ்வளவு என்பதைக் கவனியுங்கள். இந்த திட்டத்தில் கட்டுமானக் காலத்தில் கம்மியாகவும் அதன்பிறகு அதிகமாகவும் இருக்க வாய்ப்பு இருக்கிறது.

உதாரணமாக, கட்டுமானக் காலத்தில் வட்டி 7.99% என்பதுபோல் கொடுத்துவிட்டு, 2 அல்லது 3 ஆண்டுகள் கழித்து இதனை 10.5 என்பதுபோல் மாற்றினால் மாதத் தவணை அதிகரித்துவிடும். அப்போது கடன் வாங்கியவர் சிக்கலில் மாட்ட வாய்ப்பு இருக்கிறது. அதனால் வட்டி விகிதம் குறித்து வங்கி அல்லது வீட்டு வசதி நிறுவனத்திடம் தெளிவுப்படுத்திக் கொள்வது நல்லது” என்றார்.

கவர்ச்சிகரமான விளம்பரங்களை நம்பி வீடு வாங்கலாமா?

அடுக்குமாடி வீடு கட்டி முடிக்க, 2-3 ஆண்டுகள் ஆகும் என்பதால், அனைத்து அனுமதிகளையும் முறையாகப் பெற்றுதான் வேலையை ஆரம்பித்திருக்கிறார்களா என்பதை வீடு வாங்குபவர்கள் உறுதிப்படுத்திக் கொள்வது நல்லது. முக்கியமாக, பிளான் அப்ரூவல் உள்ளிட்டவை வாங்காமல் வேலையைத் தொடங்கி இருக்கும்பட்சத்தில், அதனைப் பெற்று கட்டுமானப் பணிகளை முடிக்க எப்படியும் அதிக ஆண்டுகள் எடுக்கும்.

விலையைக் கவனியுங்கள்!

அடுத்து முக்கியமாகக் கவனிக்க வேண்டியது, விலை. இந்தச் சிறப்புத் திட்டத்தின் கீழ் வீடு வாங்கும்போது சதுர அடி விலை எவ்வளவு என்பதைக் கட்டாயமாக கவனிக்க வேண்டும்.  வழக்கமான திட்டத்தைவிட இந்தத் திட்டத்தின் மூலம் வாங்கும் வீடுகளின் சதுர அடி விலை அதிகமாக இருக்க வாய்ப்பு இருக்கிறது.

உதாரணத்துக்கு, வழக்கமான திட்டத்தில் சதுர அடி ரூ.4,700 என்று இருந்தால், இந்தச் சிறப்புத் திட்டத்தில் சதுர அடி ரூ.4,900 என்று இருப்பதற்குக்கூட வாய்ப்பு இருக்கிறது. இந்த விலை வித்தியாசத்தின் மூலம், ரியல் எஸ்டேட் நிறுவனம் கட்டும் வட்டியை திரும்பப் பெற்றுவிட வாய்ப்பு இருக்கிறது.

இந்தச் சிறப்புத் திட்டத்தின் மூலம் குறைவான முன்பணம், கட்டுமானக் காலம் அல்லது 2-3 ஆண்டுகளுக்கு வீட்டுக் கடனுக்கு வட்டி கிடையாது என்பது சலுகையாக இருக்கிறது. அதே நேரத்தில், கட்டுமானப் பணி தாமதமாகும்போது பாதிக்கப்படுவது வீடு வாங்கியவ ராக இருப்பார். காரணம், கடன் அவர் பெயரில்தான் வாங்கப் பட்டிருக்கிறது. அந்த வகையில் ஒப்பந்தம் போடும்போதே, வீட்டை முடித்துக் கொடுக்கும் வரை ரியல் எஸ்டேட் நிறுவனம் தான் கடனுக்கான வட்டியை செலுத்த வேண்டும் என்று எழுதிக்கொள்வது நல்லது.

கவர்ச்சிகரமான விளம்பரங்களை நம்பி வீடு வாங்கலாமா?

வரிச் சலுகையை முழுமையாகப் பெற!

வீட்டுக் கடன் வாங்கி மூன்றாண்டுக்குள் வீட்டைக் கட்டி முடித்துக் குடியேறினால் தான், கட்டுமானக் காலத்தில் கட்டிய வட்டிக்கான வரிச் சலுகையை முழுமையாகப் பெற முடியும். கட்டுமானக் காலத்தில் கட்டிய வட்டியில் ரூ.2 லட்சம் வரையில், கட்டுமானம் முடிந்த நிதி ஆண்டிலிருந்து 5 ஆண்டுகளுக்குச் சமமாகப் பிரித்து வருமான வரிச் சலுகையைப் பெற முடியும்.

மூன்றாண்டுக்குள் கட்டுமான வேலை முடியவில்லை என்றால் அதுவரைக்கும் கட்டிய வட்டி யில் வெறும் ரூ.30,000 மட்டுமே வரிச் சலுகையாகப் பெறமுடியும். மேலும், கட்டுமானக் காலத்தில் ப்ரீ-இஎம்ஐ சரியான தேதியில் கட்டப்படவில்லை என்றால், அது வீட்டுக் கடன் வாங்கியவரை தான் பாதிக்கும். அவரது பெயர் சிபில் ரிப்போர்டில் இடம்பெற வாய்ப்பு இருக்கிறது.

எனவே, சொத்தின் மதிப்பில் 20% தொகை கையில் இருக்கிறது என்கிறபட்சத்தில் கட்டி முடிக்கப்பட்ட வீட்டை வீட்டுக் கடன் மூலம் வாங்கிக் குடியேறுவது பல வகையில் லாபகரமாக அமையும்’’ என்று முடித்தார் ரமேஷ் நாயர்.

கவர்ச்சிகரமாக சலுகை கிடைக்கிறதே என்பதற்காக வீட்டை வாங்காமல், வேறு விஷயங்களையும் பார்த்து வாங்குவது உத்தமம்!

வட்டியைக் குறைக்காத 70 வங்கிகள்!

ரிசர்வ் வங்கி கடனுக்கான வட்டியை 2 முறை தலா 0.25% குறைந்துள்ளது. ஆனால், நாட்டிலுள்ள 91 வங்கிகளில் இதுவரைக்கும் 21 வங்கிகள் மட்டுமே அவற்றின் அடிப்படை வட்டி விகிதத்தைக் (பேஸ் ரேட்) குறைத்துள்ளன. அதாவது, 21 வங்கிகள் மட்டுமே வீட்டுக் கடனுக்கான வட்டியை 0.1% முதல், 0.25% வரை குறைத்திருக்கின்றன. இப்படி குறைந்ததுள்ள வங்கிகளில் 4 பொதுத் துறை வங்கிகள், 6 தனியார் வங்கிகள், 11 வெளிநாட்டு வங்கிகளாக உள்ளன. இந்தத் தகவலை ராஜ்ய சபையில் மத்திய இணை நிதி அமைச்சர் ஜெயந்த் சின்ஹா தெரிவித்துள்ளார்.

சி.சரவணன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு