Published:Updated:

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

ஒட்டுமொத்த விகடனுக்கும் ஒரே ஷார்ட்கட்

Use App
சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!
சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

செளரப் முகர்ஜி, சி.இ.ஓ. ஆம்பிட் கேப்பிட்டல்

பிரீமியம் ஸ்டோரி
சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

திக வருமானம்... பங்குச் சந்தையில் முதலீடு செய்யும் எல்லோருடைய விருப்பமும் இதுவாகத்தான் இருக்கும். பங்குச் சந்தை மட்டுமல்ல, எந்தவொரு முதலீடாக இருந்தாலும் சரி, நாம் எதிர்பார்ப்பது அதிக வருமானம்தான்.

பங்குச் சந்தையில் முதலீடுசெய்து அதிக வருமானம் ஈட்டுவதற்கு எத்தனையோ உத்திகள் பங்குச் சந்தை ஜாம்பவான்கள் பலராலும், அனலிஸ்ட்டுகளாலும் கண்டுபிடிக்கப்பட்டு உள்ளன. அவற்றில் ஒன்றுதான், போர்ட் ஃபோலியோக்களை உருவாக்குதல்.

பொதுவாக, போர்ட்ஃபோலியோக்களை உருவாக்குவதன் மூலம் பங்குச் சந்தையில் கணிசமான லாபத்தை நம்மால் பார்க்க முடியும். அப்படிப்பட்ட போர்ட்ஃபோலியோக்களில் ஒன்று, காபி கேன் போர்ட்ஃபோலியோ. அது என்ன காபி கேன் போர்ட்ஃபோலியோ என்று கேட்கிறீர்களா?

வங்கிகள் தமது சேவைகளைப் பெரிய அளவில் கொண்டு வருவதற்குமுன், அமெரிக்கர்கள் தங்களின் மதிப்புமிக்க சேமிப்புகளை, காபி கேன்களில் அடைத்துக் கட்டிலுக்குக் கீழே வைத்துவிட்டு மறந்துவிடுவார்களாம். பின்னர் தேவைப்படும்போது மட்டுமே அந்த சேமிப்புகளை எடுப்பார்களாம்.

இந்தப் பழக்கத்தை வைத்து உருவாக்கப்படும் போர்ட்ஃபோலியோ, காபி கேன் போர்ட் ஃபோலியோ என்று சொல்லப்படுகிறது. அதாவது, இந்த போர்ட்ஃபோலியோவில் முதலீடு செய்துவிட்டு, அதை மறந்துவிடுவது.

காபி கேன் போர்ட்ஃபோலியோ என்கிற  பெயரைப் பயன்படுத்தியவர் கேபிட்டல் குரூப் ஃபண்ட் மேனேஜர் ராபர்ட் ஜி. கிர்பி (Robert G.Kirby) என்பவர்.

  காபி கேன் போர்ட்ஃபோலியோ முதலீட்டு உத்தி

காபி கேன் போர்ட்ஃபோலியோ பற்றி தெரிந்து கொள்வதற்குமுன் அதன் முதலீட்டு உத்தியைப் பற்றித் தெரிந்துகொள்ளலாம். அதற்கு சில உதாரணங்களைச் சொன்னால் எளிதில் புரியும்.

ரோமானியர்கள், தாங்கள் களம் இறங்கும் எல்லாப் போர்க்களங்களிலும் வெற்றியடைய மாட்டார்களாம். ஆனாலும், இறுதியில் போரில் வென்றுவிடுவார்களாம். தோல்விகளைச் சந்திக்காத சாம்ராஜ்யங்கள் நீண்ட காலத்துக்கு நிலைத்து நிற்கும் தகுதியைப் பெற்றிருக்காது என்பது அறிஞர்களின் கருத்து.

அதேபோல, ஆட்டோ பந்தயம்,  ஓட்டப் பந்தயம் போன்ற பந்தயங்களில் ஒவ்வொரு சுற்றிலும் நாம் ஜெயிக்க வேண்டுமென்பதில்லை, இறுதிப் புள்ளியை அடைந்தால் போதும். அதேசமயம், பந்தயத்தில் நாம் எடுக்கக்கூடிய ரிஸ்க்குகள் நமக்குச் சாதகமாக அமைய வேண்டும். மாறாக, நம்மைக் கவிழ்த்துவிடக்கூடிய அளவுக்கான ரிஸ்க்குகளை எடுக்க வேண்டியதில்லை.  

இந்த காபி கேன் போர்ட்ஃபோலியோவின் முதலீட்டு உத்தியும் அப்படித்தான். எப்போதுமே பங்குகள் உச்சத்திலேயே இருக்க வேண்டியதில்லை, இருக்கவும் கூடாது. ஏற்ற இறக்கங்களால் மட்டுமே பங்குச் சந்தையில் வருமானம் என்பது சாத்தியமாக இருக்கிறது. பங்குச் சந்தையில் எடுக்கும் ரிஸ்க்கு களும்கூட நமக்குச் சாதகமானதாக இருந்தால் மட்டுமே எடுக்க வேண்டும்.

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

  குழப்பியடிக்கும் ஹாலோ எஃபெக்ட்

ஒரு நபர், ஒரு நிறுவனம், ஒரு பொருள் என எதுவாக வேண்டுமானாலும் இருக்கட்டும், அதுபற்றி நமக்கு ஏற்கெனவே உள்ள அறிவு மற்றும் அனுபவத்தின் அடிப்படையில்தான் அவற்றின் மீதான நம் பார்வை இருக்கும். அந்தப் பார்வையின் அடிப்படையில்தான் நாம் அவை குறித்த முடிவுகளை எடுக்கிறோம். இதைத்தான் ‘ஹாலோ எஃபெக்ட்’ என்கிறோம். இந்த ஹாலோ எஃபெக்ட், பங்குச் சந்தையிலும் தாக்கத்தை ஏற்படுத்துகிறது. எப்படி?

ஒரு நிறுவனத்தின் செயல்பாட்டை, நாம் அதன் கலாசாரம், தலைமை போன்றவற்றின் அடிப்படையில் முடிவு செய்கிறோம். பிசினஸாக இருக்கட்டும் அல்லது பங்குச் சந்தையாக இருக்கட்டும், அவற்றில் நாம் செய்யும் முதலீடுகளைப் பற்றி அதிகம் யோசிக்கும்போதுதான் நாம் பிரச்னைகளைச் சந்திக்க வேண்டியிருக்கிறது. சரியான நிறுவனங்களில் முதலீடு செய்துவிட்டு, அதை மறந்துவிடுவது அதிக வருமானம் தரும் உத்தியாக பங்குச் சந்தை முதலீட்டு ஜாம்பவான்கள் அனைவராலும் குறிப்பிடப்படுகிறது.

கிர்பி, தனது கேபிட்டல் குரூப் நிறுவனத்தின் சார்பாக வாடிக்கையாளர் ஒருவருக்கு 5,000 டாலர் மதிப்புள்ள பங்குகளை பரிந்துரை செய்தார். அந்தப் பங்குகளில் கிர்பியும் முதலீடு செய்தார். ஒருகட்டத்தில் கிர்பி, தன் வசம் வைத்திருந்த அந்தப் பங்குகளை விற்று விட்டார். ஆனால், இவருடைய பரிந்துரையில் வாங்கிய அந்த வாடிக்கை யாளர், பங்குகளை விற்கவில்லை. வாங்கியதோடு மறந்துவிட்டார். பத்து ஆண்டுகள் கழித்து அந்தப் பங்குகளின் மதிப்பு பல மடங்கு உயர்ந்து, மிகப் பெரிய வருமானத்தை அவருக்குக் கொடுத்தது.

இந்த நிகழ்வுக்குப் பிறகே வாங்கிவிட்டு, மறந்துவிடும் முதலீட்டு உத்திக்கு, காபி கேன் போர்ட்ஃபோலியோ என்ற பெயரைப் பயன்படுத்தினார் கிர்பி. 

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

காபி கேன் போர்ட்ஃபோலியோ நிறுவனங்களைத் தேர்வு செய்வது எப்படி?

சரியான நிறுவனங்களைத் தேர்ந்தெடுப்பதில் மூன்று படிகள் உள்ளன. முதலில், பங்குச் சந்தையில் பட்டியலிடப் பட்டுள்ள ஆயிரக்கணக்கான நிறுவனங்களில் முதலீட்டுக்கு ஏற்ற நிறுவனங்கள் எவை என்பதை முடிவுசெய்ய வேண்டும். உதாரணத்துக்கு, குறைந்த பட்சமாக ரூ.100 கோடி மார்க்கெட் கேபிட்டலைசேஷன் கொண்ட நிறுவனங்கள் என்று வைத்துக்கொள்ளலாம்.

இரண்டாவதாக, முதலீட்டின் காலகட்டத்தை முடிவு செய்ய வேண்டும். அந்தக் காலகட்டம் அந்த நிறுவனங்களின் பொருளாதாரத்தில் ஏற்படும் ஏற்றம் மற்றும் இறக்கம் ஆகிய இரண்டுமே அடங்கிய சுழற்சிகளைக் கொண்டிருக்க வேண்டும். மேலும்,  இந்தக் காலகட்டமானது நீண்ட காலமாக இருக்கவேண்டும்.

மூன்றாவதாக, சிறப்பான நிதிநிலை செயல்பாடு இருக்க வேண்டும். அடிப்படையில் அந்த நிறுவனம் லாபம் ஈட்டுவதாகவும், அந்த லாபத்தை மீண்டும் முதலீடு செய்வதன் மூலம் தொடர்ந்து வளரக்கூடியதாகவும் இருக்கவேண்டும். உதாரணமாக, கடந்த பத்து வருடங்களில், ஒவ்வொரு வருடமும் ஒரு நிறுவனத்தின் வருவாய் வளர்ச்சி 10 சதவிகிதம் மற்றும் மூலதனத்தின் மீது கிடைக்கும் வருமான வளர்ச்சி 10 சதவிகிதம் என்கிற அளவில் இருக்க வேண்டும்.   

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

  காபி கேன் போர்ட்ஃபோலியோ Vs சென்செக்ஸ்

இந்தியாவில் 1991-லிருந்து 2000 வரையிலான காலகட்டத்தில், மேற்சொன்ன மூன்று படிகளிலும் தேர்வான ஐந்து பங்குகள் என்ஐஐடி, சிப்லா, ஹீரோ மோட்டோகார்ப், ஸ்வராஜ் இன்ஜின்ஸ் மற்றும் ஹெச்டிஎஃப்சி. இவைதான் 2000-ம் ஆண்டின் காபி கேன் போர்ட்ஃபோலியோ பங்குகளாக எடுத்துக்கொள்ளப்படுகின்றன.

இனி 30 ஜூன் 2000 முதல் 30 ஜூன் 2010 வரையிலான காலகட்டத்தில் இந்த போர்ட் ஃபோலியோவில் உள்ள ஐந்து பங்குகளின் செயல்பாடு எப்படி இருக்கிறது என்பதைப் பார்க்கலாம். ஒவ்வொரு பங்கிலும் ரூ.100 வீதம் முதலீடுசெய்தால், போர்ட்ஃபோலியோவின் மொத்த முதலீடு ரூ.500.

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!



பத்து வருடங்கள் கழித்து இதன் மதிப்பு ரூ.3,831-ஆக இருக்கிறது. அதாவது, இவற்றின் வருமான வளர்ச்சி 22.6 சதவிகிதமாக இருக்கிறது. ஆனால், இந்தக் காலகட்டத்தில் சென்செக்ஸ் கொடுத்த வருமானம் 16% மட்டுமே. 

இதே செயல்முறையில் 2000 முதல் 2016 வரையிலான 16 ஆண்டுகளில், ஒவ்வொரு ஆண்டும் ஒரு காபி கேன் போர்ட்ஃபோலியோ உருவாக்கப் படுகிறது என்று வைத்துக்கொள்வோம். அவற்றில் ஏழு போர்ட்ஃபோலியோக்கள் மட்டும் 10 ஆண்டுகளை நிறைவு செய்திருக்கும். மீதமுள்ள ஒன்பது போர்ட்ஃபோலியோக்கள் நிறைவு செய்திருக்காது. இந்தப் போர்ட்ஃபோலியோக்களில் சராசரியாக 12 நிறுவனப் பங்குகள் உள்ளன.

இந்த  நிறைவு செய்த போர்ட்ஃபோலியோக்களின் வருமானத்தை எடுத்துப்பார்த்தால், சென்செக்ஸை விட ஆண்டுக்கு குறைந்தபட்சம் 4% கூடுதலாக வருமானம் கொடுத்திருப்பதைப் பார்க்க முடியும். மேலும், இந்த போர்ட்ஃபோலியோக்களில் எடுத்துக்கொள்ளப்பட்ட லார்ஜ் கேப் பங்குகள் கூட சென்செக்ஸைவிடக் கூடுதலாக வருமானம் தந்திருப்பதைப் பார்க்க முடியும்.

தவிர, இந்த காபி கேன் போர்ட்ஃபோலியோ பங்குகளில், அதிக உச்சத்துக்குப் பிறகு நடக்கும் அதிகபட்ச இறக்கம்கூட குறைவாக இருப்பதையும் பார்க்க முடியும். காரணம், இவற்றில் உள்ள ரிஸ்க் அட்ஜஸ்ட்மென்ட் காரணிகள்தான்.

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

  கேள்விகளும் பதில்களும்

காபி கேன் போர்ட்ஃபோலியோவில் சில கேள்விகள் எழுகின்றன. நாம்  ஏன் குறைவான நிறுவனங்களை போர்ட் ஃபோலியோவில் தேர்வு செய்கிறோம்,  போர்ட்ஃபோலியோக்களில் நிறுவனங்கள் மீண்டும் மீண்டும் தேர்ந்தெடுக்கப்படுவதில் உள்ள பொதுவான அம்சங்கள் என்ன, காபி கேன் போர்ட்ஃபோலியோ குறைவான ஏற்ற இறக்கங்களிலும் தொடர்ச்சியான வருமானங்களைத் தருவது எப்படி?

இந்தக் கேள்விகளுக்கான பதிலை ‘தி அன்யூஷ்வல் பில்லியனர்ஸ்’ (இந்தப் புத்தகம் பற்றிய கட்டுரை அடுத்த வாரம் வெளியாகும் நாணயம் விகடனில்) என்ற புத்தகத்தில் ஏசியன் பெயின்ட்ஸ், பெர்ஜர் பெயின்ட்ஸ், பேஜ் இண்டஸ்ட்ரீஸ், மாரிக்கோ, அஸ்ட்ரால் பாலி, ஹெச்டிஎஃப்சி பேங்க் மற்றும் ஆக்ஸிஸ் பேங்க் ஆகிய நிறுவனங்களின் கடந்த 40 வருட செயல்பாட்டின் ஆய்வு செய்து தரப்பட்டிருக்கிறது.

மூன்று முக்கியமான விஷயங்களைக் கவனிக்க வேண்டும். ஒன்று, நிறுவனங்களின் மேலாண்மை குழு தனது தொழிலின் அடிப்படையான வளர்ச்சியில் தெளிவான இலக்கைக் கொண்டிருக்க வேண்டும். ஏனெனில், குறுகிய கால வளர்ச்சியில் நிறுவனங்கள் ஆர்வம் காட்டினால், விரைவில் அவற்றின் திட்டமிட்ட உத்திகளில் இருந்து விலகிச் செல்வதோடு, அவை அடைய நினைத்த அல்லது அடைய முடிந்த இலக்குகளை அடைய முடியாமல் தோல்வி அடைந்துவிடுகின்றன.

எந்தெந்த நிறுவனங்கள் குறுகிய கால வளர்ச்சிகளின் கவர்ச்சியில் சிக்காமல் நீண்டகால வளர்ச்சியில் கவனம் செலுத்து கின்றனவோ, அவையே காலத்தைத் தாண்டியும் வெற்றியடைகின்றன. அப்படிப்பட்ட நிறுவனங்கள் இந்தியாவில் மிகக் குறைவாகவே இருக்கின்றன.

உதாரணம்: மாரிக்கோ, பேஜ் இண்டஸ்ட்ரீஸ், ஹெச்டிஎஃப்சி பேங்க்.

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

இரண்டாவதாக, ஒரு நிறுவனம் போட்டிகளைத் தாண்டி ஜெயிக்க எந்த ஆழத்துக்கும் சென்று அயராது உழைக்க வேண்டும். “நாம் ஏன் மற்றவர்களைக் காட்டிலும் சிறப்பாகச் செயல்பட வேண்டும்’’ என்ற கேள்வியைத் தனக்குள் கேட்டுக் கொண்டு, அதற்கான தெளிவான பதிலையும் வைத்திருக்கும் நிறுவனங்கள், அந்தப் பதிலை நோக்கி பயணிக்கும்; வெற்றியும் அடையும்.

உதாரணம்: ஏசியன் பெயின்ட்ஸ், அஸ்ட்ரால் பாலி.

மூன்றாவதாக, நிறுவனத்தில் முதலீடுகளை ஒதுக்கீடு செய்வதில் மிகவும் கவனமாக இருப்பார்கள். அதிக லாபம் கிடைக்கும் என்று கற்பனையாகக் கருதும் விஷயங்களில் முதலீடு செய்வதைப் பெரும்பாலும் தவிர்த்துவிடுவார்கள்.

மேலும், எதிலும் முதலீடு செய்வதற்கான சூழல் இல்லை என்றால், பங்குதாரர்களுக்கு உபரிப் பணத்தைப் பிரித்துக் கொடுப்பார்கள். ஒரு நல்ல நிறுவனத்தின் நிர்வாகக் குழு ஒன்றில், முதலீடு செய்வதற்கு முன்பே அதன் முடிவு என்னவாக இருக்கும் என்பதைத் தெளிவுபடுத்திக் கொள்வதில் மெனக்கெடுவார்கள். அதற்குப் பின்னரே முதலீடு செய்வார்கள்.

உதாரணம்: ஐடிசி, ஏசியன் பெயின்ட்ஸ்

சென்செக்ஸைவிட அதிக வருமானம் தரும் காபி கேன் போர்ட்ஃ போலியோ!

இவற்றின் அடிப்படையில்தான் காபி கேன் போர்ட்ஃபோலியோவுக்கான பங்குகள் தேர்ந்தெடுக்கப்படுகின்றன. இப்படி உருவாக்கப்படும் காபி கேன் போர்ட் ஃபோலியோக்கள், முதலீட்டுக்கு மிகச் சிறந்த உத்தி என்பதைச் சொல்லும் முக்கியமான ஐந்து காரணங்கள்:

1. நீண்ட கால அடிப்படையில் லாபத்துக்கான வாய்ப்புகள் இதில் அதிகமாக இருக்கின்றன. எனவே, இதன் லாப வளர்ச்சி, காலத்தின் அடிப்படையில் மேல்நோக்கியே நகர்வதாக இருக்கிறது.

உதாரணத்துக்கு, சென்செக்ஸ் 16% வருமானம் தருகிறது என்றால், காபி கேன் போர்ட்ஃபோலியோ தரும் வருமானத்துக்கான வாய்ப்புகள் ஒரு ஆண்டில் 70 சதவிகிதமாகவும், 10 ஆண்டுகளில் 100 சதவிகிதமாகவும் இருக்கிறது. 

2. காபி கேன் போர்ட்ஃபோலியோ பங்குகளைப் பத்து ஆண்டுகளுக்கு வைத்திருக்கும்போது வருமான வளர்ச்சியில் நடக்கும் கூட்டு வளர்ச்சி மிகவும் அதிசயமாக இருக்கிறது. ஏனெனில், இந்தப் போர்ட்ஃபோலியோவில் நீண்டகால அடிப்படையில் வளரக்கூடிய பங்குகளின் தாக்கம் தான் அதிகமாக உள்ளன. நஷ்டமடையும் பங்குகளின் தாக்கம் மிக மிகக் குறைவுதான்.

3. இந்த போர்ட்ஃபோலியோவில் நெகட்டிவ் தாக்கம் ஏற்பட்டாலும், நீண்ட காலத்துக்கு அந்தப் பங்குகளை வைத்திருக்கும்போது நெகட்டிவ் போக்கின் தாக்கம் குறைக்கப்பட்டுவிடுகின்றன. சரியான பங்கைத் தேர்ந்தெடுத்து, அவற்றை நீண்ட காலத்துக்கு வைத்திருக்கத் தயாராக இருந்தால், அந்தப் பங்கை எப்போது வாங்குவது, விற்பது என்று தெரிந்துகொள்ள வேண்டிய அவசியமே இல்லை. அப்படி தெரிந்துகொள்ள நினைத்தால், இறுதியில் தேவையற்ற முடிவுகளையே எடுக்க வேண்டிவரும்.

4. தேவையில்லாத பதற்றம்  இருக்காது.  இந்த போர்ட்ஃபோலியோ பங்குகளைப் பத்து ஆண்டுகளுக்கு வைத்திருக்க நீங்கள் முடிவு எடுத்துவிட்டால், குறுகிய கால நகர்வுகளில் விற்கலாமா, வேண்டாமா என்ற பதற்றத்துக்கு ஆளாக வேண்டியதில்லை. மேலும், குறுகிய கால நகர்வுகளில் விற்பதும் பின்னர் வாங்குவதுமாக இருந்தால், பரிவர்த்தனைக் கட்டணங்கள் உங்களுடைய லாபத்தைக் கணிசமாகக் குறைத்துவிடும்.

5. மறுசீரமைப்பு என்பது ஒருபோதும் வருமானத்தை வளர்க்காது என்பது தெளிவாக இருக்கிறது. இந்த காபி கேன் போர்ட் ஃபோலியோவில், ஒவ்வொரு ஆண்டும் தேர்ந்தெடுக்கப்படும் நிறுவனங்கள் மாறிக் கொண்டேதான் இருக்கும். ஆனால், ஒருமுறை கட்டமைக்கப்பட்ட போர்ட்ஃபோலியோவை மீண்டும் மறுசீரமைப்பு செய்வதால், வருமான வளர்ச்சியில் எந்த முன்னேற்றமும் ஏற்படுவதில்லை. மாறாக, நீண்ட கால அடிப்படையில் அந்த போர்ட்ஃபோலியோ தன்னுடைய பிரச்னைகளை தானாகவே சரிசெய்து கொள்கிறது. எனவே, காபி கேன் போர்ட் ஃபோலியோவை மறுசீரமைக்க வேண்டிய அவசியம் இல்லை.

சுருக்கமாகச் சொன்னால், காபி கேன் போர்ட்ஃபோலியோ உத்தி, சரியான பங்குகளை வாங்கு, மறந்துவிடு என்பதுதான். ஏனெனில் எவ்வளவு அதிகமாக, கடினமான விஷயங்களை நாம் அறிந்து வைத்திருக்கிறோமோ, அந்த அளவுக்கு அவை நமக்கான பலன்களை சரியாக, தெளிவாக, பாதுகாப்பாக அடைவதற்கான நம்முடைய திறன்களைக் குறைத்துவிடும்.

எனவே, காபிகேன் போர்ட்ஃபோலியோ உத்தியைப் பயன்படுத்தி பங்குச் சந்தையில், சென்செக்ஸைக் காட்டிலும் அதிக வருமானத்தை அடைய முதலீட்டாளர்கள் முயற்சிக்கலாமே!

தொகுப்பு: ஜெ.சரவணன்

டிஸ்க்ளெய்மர்: இந்தக் கட்டுரையில் குறிப்பிடப்பட்டுள்ள பங்குகள் பரிந்துரை அல்ல.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு