Published:Updated:

குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?

ஒட்டுமொத்த விகடனுக்கும் ஒரே ஷார்ட்கட்

Use App
குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?
குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?

ஷியாம் சுந்தர், கமாடிட்டி நிபுணர்

பிரீமியம் ஸ்டோரி

மது மனம் கவர்ந்த தங்கமாக இருந்தாலும் சரி, அன்றாடம் நாம் பயன்படுத்தும் பெட்ரோல், டீசலாக இருந்தாலும் சரி, ரூபாயின் மதிப்பு சரிவதால் இவற்றின் விலை உயர்ந்துகொண்டே போகிறது. தற்போது ஒரு டாலருக்கு நிகரான ரூபாய் மதிப்பு ரூ.67-க்குமேல் இருக்கிறது. இது 68 ரூபாயைத் தாண்டி, 70 ரூபாயைத் தொடுகிற நிலை உருவானால், தங்கம் மற்றும் கச்சா எண்ணெய் விலை இன்னும் கணிசமாக உயரும் என்பது நம் எல்லோரையும் பயமுறுத்தும் விஷயம். இதனால் சாதாரண மக்கள் அனைவருமே பாதிக்கப்படும் நிலை உருவாகும்.   

குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?

பொதுவாக, ஒரு பொருளின் விலை உயர்கிறது என்றால், இரண்டு விஷயங்கள் நடக்க வேண்டும். ஒன்று, அதன் தேவை அதிகரித்திருக்க வேண்டும் அல்லது உற்பத்தி குறைந்திருக்க வேண்டும். அதேபோல, ஒரு பொருளின் விலை குறைகிறது என்றால், உற்பத்தி அதிகரித்திருக்க வேண்டும் அல்லது தேவை குறைந்திருக்க வேண்டும். 

குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?



ஆனால், தேவை, உற்பத்தி என்கிற இரண்டு விஷயங்களையும் பின்னுக்குத் தள்ளிவிட்டு, அமெரிக்க டாலருக்கும், இந்திய ரூபாய்க்குமான மதிப்பில் உள்ள ஏற்ற இறக்கம் காரணமாகத் தங்கம் மற்றும் கச்சா எண்ணெய் ஆகிய இரண்டின் விலை உயர்ந்து வருகிறது. இதற்கு முக்கியக் காரணம், இந்த இரண்டையுமே  வெளி நாடுகளிருந்து நாம் இறக்குமதி செய்து வருவதுதான். 

அமெரிக்க டாலரும், தங்கமும்

தங்க வணிகம் என்பது உலக அளவில் டாலரில் நடந்து வருகிறது. தங்கத்தை வெளிநாடுகளிலிருந்து இறக்குமதி செய்யவேண்டுமெனில், சர்வதேசச் சந்தையில் நாம் அமெரிக்க டாலரைக் கொடுத்துத் தான் வாங்க வேண்டும். அமெரிக்க டாலரின் மதிப்பு உயரும்பட்சத்தில், டாலருக்கு நிகராக அதிக ரூபாய் மதிப்பு குறையும். அப்போது அதிக அளவில் ரூபாயைத் தந்து, நாம் தங்கம் வாங்க வேண்டியிருக்கும். இதனால் நம் நாட்டில் தங்கத்தின் விலை அதிகரிக்கிறது.

சர்வதேசச் சந்தையில் ஒரு அவுன்ஸ் (சுமார் 31.10 கிராம்) தங்கத்தின் விலை கடந்த மே, 2011-ல் 1900 டாலர்களாக இருந்தது. அப்போது டாலருக்கு நிகரான ரூபாய் மதிப்பு ரூ.47-ஆக இருந்தது. ஒரு கிராம் தங்கத்தின் விலை சுமார் ரூ.2,500-2,600-க்குள் இருந்தது.  

குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?

ஏறக்குறைய ஐந்து ஆண்டுகளுக்குப்பிறகு ஒரு அவுன்ஸ் தங்கத்தின் விலை தற்போது 1,315 டாலர்களாக உள்ளது. தங்கத்தின் விலை கிட்டத்தட்ட 585 டாலர் விலை குறைந்தாலும், ரூபாய் மதிப்பு குறைந்ததன் காரணமாக, தங்கத்தின் விலை குறைவதற்குப் பதிலாக விலை ஏறவே செய்திருக்கிறது. தற்போது ஒரு கிராம் தங்கத்தின் விலை ரூ.2,978-ஆக இருக்கிறது.

ஆக, நம் நாட்டில் தங்கம் விலை உயரக்  காரணம், தங்கத்தின் விலை உயர்ந்ததால் அல்ல; டாலருக்கு நிகரான ரூபாய் மதிப்பு குறைந்ததுதான் காரணம்.  இதைச் சரியாகப் புரிந்துகொண்டால், தங்கம் விலை ரூபாய் மதிப்பு ஏற்ற இறக்கத்துக்கேற்ப எவ்வளவு ஏறும் அல்லது இறங்கும் என்பதைச் சரியாகப் புரிந்துகொள்ளலாம். 

தங்க இறக்குமதி குறைவு


2018-ன் முதல் காலாண்டில் (மூன்று மாதங் களில்) சென்ற ஆண்டின் முதல் காலாண்டோடு ஒப்பிடும்போது, இந்தியாவின் தங்கத்துக்கான தேவை 12% குறைந்துள்ளது. சென்ற வருடம் 2017-ல் இதேகாலத்தில் 260 டன்களாக இருந்தது. தற்போது 2018-ன் முதல் மூன்று மாதங்களின் இறக்குமதி 50% குறைந்து அதாவது, 153 டன்களாகக் குறைந்துள்ளது.   

குறையும் ரூபாய் மதிப்பு... தங்கம், பெட்ரோல் விலை இன்னும் உயருமா?

சர்வதேச தங்கக் குழுமத்தின் (வேர்ல்டு கோல்டு கவுன்சில்) அறிக்கையின்படி, உள்நாட்டு விலை அதிகமாக இருப்பது, சென்ற ஆண்டைக் காட்டிலும் இந்த ஆண்டு முகூர்த்த நாள்கள் குறைவாக இருப்பது போன்றவற்றின் காரணமாகத் தேவை குறைந்துள்ளதாகச் சொல்கிறது. 

இதேபோலத்தான், கச்சா எண்ணெயும். ஆனால், ஒரே ஒரு வித்தியாசமுண்டு. தற்போது சர்வதேசச் சந்தையில் கச்சா எண்ணெய்யின் விலையும் உயர்கிறது. டாலருக்கு நிகரான ரூபாய் மதிப்பும் குறைகிறது. இந்த ஆண்டின் தொடக்கத்தில் ஒரு பீப்பாய் பிரன்ட் க்ரூட் 65 டாலர்களாக இருந்தது, தற்போது 75 டாலர்களாக உயர்ந்துள்ளது. டாலருக்கு நிகரான ரூபாய் மதிப்பு கடந்த ஜனவரியில் ரூ.63-50 இருந்தது, தற்போது ரூ.67-க்கு மேல் சென்றுள்ளது. இதனால் நமது பெட்ரோல் ஒரு லிட்டர் விலை இந்த ஆண்டு ஜனவரி 1-ம் தேதியன்று ரூ.72.53-ஆக இருந்தது, தற்போது ரூ.77.43-ஆக உயர்ந்திருக்கிறது. ஒரு லிட்டர் டீசலின் விலையும் ரூ.62.90-லிருந்து ரூ.69.56-ஆக உயர்ந்துள்ளது. (கச்சா எண்ணெய் விலை அதிகரிப்புக்கும், ரூபாயின் விலைச் சரிவிற்கும் நேரிடையான தொடர்பு இருப்பதை விளக்கும் வரைபடத்தைப் பார்க்கவும். இந்த வரைபடத்தில் இடதுபுறம் டாலருக்கு நிகரான ரூபாயின் மதிப்பும், வலதுபுறம் பிரன்ட் க்ரூட் விலையும் தரப்பட்டுள்ளன.)

விலை குறைய வாய்ப்பு உண்டா?

இப்போது அமெரிக்க டாலர் மதிப்பு வலுவாக  இருப்பதால், இந்திய ரூபாய் மதிப்பு  வலுவிழந்து, தங்கத்தின் விலையேற்றத்திற்குக் காரணமாக இருக்கின்றன. இனிவரும் நாள்களில் தங்கம் விலை இப்போதிருக்கும் நிலையிலிருந்து உயராமல், டாலருக்கு நிகரான ரூபாய் மதிப்பு அதிகரித்தால், தங்கத்தின் விலை குறையும். ஆனால், ரூபாயின் மதிப்பு 68-யைத் தாண்டி, 69 அல்லது 70-யைத் தொட்டால், தங்கம் கிராம் ஒன்றுக்கு இன்னும் சில நூறு ரூபாய்களைக்  கூடுதலாகச் செலவழிக்க வேண்டியிருக்கும். ஒரு லிட்டர் பெட்ரோல் மற்றும் டீசலுக்கும் இன்னும் சில ரூபாய்களைக் கூடுதலாகத் தரவேண்டியிருக்கும்.

தங்கம் மற்றும் பெட்ரோல், டீசலுக்கு அதிகம் செலவழிக்க விரும்பாதவர்கள், சர்வதேசச் சந்தையில் இந்த இரு பொருள்களின் விலை உயரக்கூடாது என்று பிரார்த்திப்பதுடன், டாலருக்கு நிகரான ரூபாயின் மதிப்பு உயர வேண்டும் என்றும் பிரார்த்திக்க வேண்டும்! 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு