Published:Updated:

குளோபல் ஃபண்டுகள்... என்ன சாதகம், என்ன பாதகம்?

ஒட்டுமொத்த விகடனுக்கும் ஒரே ஷார்ட்கட்

Use App
குளோபல் ஃபண்டுகள்... என்ன சாதகம், என்ன பாதகம்?
குளோபல் ஃபண்டுகள்... என்ன சாதகம், என்ன பாதகம்?

வி.கோபாலகிருஷ்ணன், Askgopal.com

பிரீமியம் ஸ்டோரி

நாம் அன்றாடம் உபயோகப்படுத்தும் பொருள்கள் அல்லது சேவைகள் பெரும்பாலும் வெளிநாட்டு நிறுவனங்களைச் சார்ந்தவையாகவே இருந்துவருகிறது. உதாரணமாக, நாம் கணினி உபயோகிக்கும்போது மைக்ரோசாஃப்ட் நிறுவனத்தின் விண்டோஸ், பல விஷயங்களைத் தேடித் தெரிந்துகொள்ள கூகுள், நமது மின்னஞ்சல் போக்குவரத்திற்காக ஜிமெயில்,  செல்போனுக்கு ஆப்பிள் ஐபோன், நமது ஆன்லைன் ஷாப்பிங்கிற்காக அமேசான், சமூகத் தொடர்புகளுக்காக ஃபேஸ்புக் மற்றும் ட்விட்டர் போன்ற பல விஷயங்கள் நமது அன்றாட வாழ்க்கையில் ஒன்றாகிவிட்டன. 

குளோபல் ஃபண்டுகள்... என்ன சாதகம், என்ன பாதகம்?

இப்படிப் பல வெளிநாட்டு நிறுவனங்களின் குறிப்பாக, அமெரிக்காவில் தயாராகும் பொருள்கள் மற்றும் சேவைகளைப் பயன்படுத்தும் நாம் அந்த நிறுவனங்களில், பங்குகள் மூலமாகவோ அல்லது மியூச்சுவல் ஃபண்டுகளின் மூலமாகவோ ஏன் முதலீடு செய்யக்கூடாது என்கிற சிந்தனை நம் மக்களிடம் இன்னும் பிரபலமாகவில்லை. 

ஏன் முதலீடு செய்ய வேண்டும்?

நம் நாட்டில் பொருளாதார வளர்ச்சி நன்கு இருக்கும் நிலையில்,  உலகத்திலுள்ள பல பெரும் முதலீட்டாளர்கள் எஃப்.ஐ.ஐ என்கிற பெயரில்  இந்தியப் பங்குச் சந்தையில் கடந்த காலங்களில் பெருமளவு முதலீடு செய்தனர். நமது நாட்டில் முதலீட்டுச் சூழல் நன்றாக இருக்க, நாம் ஏன் வெளிநாடுகளில் முதலீடு செய்யவேண்டும் என்பது முக்கியமான கேள்வி. 

குளோபல் ஃபண்டுகள்... என்ன சாதகம், என்ன பாதகம்?



2008-2009 காலகட்டத்தில் அமெரிக்காவில் ஏற்பட்ட மிகப் பெரிய நிதி நெருக்கடியால் பொருளாதாரம் ஆட்டம் கண்டது. அமெரிக்காவில் முதலீடு செய்வதற்கே அஞ்சிய முதலீட்டாளர்கள், இந்தியா போன்ற நாடுகளில் பெருமளவு முதலீடு செய்தனர். ஆனால், நிதி நெருக்கடிக்குப்பின் அமெரிக்கா மற்றும் முக்கிய உலக நாடுகளின் பொருளாதாரம் மெள்ள மெள்ள முன்னேறி, இப்போது சீரான நிலையை எட்டியுள்ளது. அதன் காரணமாக, அமெரிக்கா போன்ற நாடுகளின் பங்குகளும் நல்ல உச்சத்தை எட்டியுள்ளன.

வெளிநாட்டு முதலீட்டாளர்கள் நமது நாட்டின் வளர்ச்சியை எப்படி மனதில்கொண்டு இங்கு முதலீடு செய்து பயன்பெறுகிறார் களோ, அதேபோல் நாமும் வெளி நாடுகளில் உள்ள நிறுவனங்களை மியூச்சுவல் ஃபண்டுகள் மூலமாக முதலீடு செய்து பயன்பெறலாம் என்பதை முதலீட்டாளர்கள் உணரவேண்டிய தருணமிது.

ஏன் மியூச்சுவல் ஃபண்ட்?

இந்த முதலீட்டை மியூச்சுவல் ஃபண்டுகள் மூலமாகச் செய்வதற்குக் காரணம், பங்குச் சந்தைகள் மற்றும் நிறுவனங்களைக் கணிக்கும் ஆற்றல் போன்றவை நம்மிடம் போதுமான அளவுக்கு இல்லாததுதான். மேலும், வெளி நாட்டுச் சூழல் என்பது இங்குள்ளவர்களுக்கு உடனுக் குடன் தெரிய வாய்ப்புகள் இல்லை என்பதும் முக்கியக் காரணம். 

இந்தியாவில் இயங்கும் வெளிநாடு சார்ந்த மியூச்சுவல் ஃபண்டுகள்

இந்தியாவில் குளோபல் மியூச்சுவல் ஃபண்டுகள் மூன்று வகையான அமைப்பைச் சாரும். முதல் வகை, ஃபண்டுகள் தங்களின் முதலீடுகளை நேரடியாக வெளிநாட்டு நிறுவனங்களிலோ அல்லது நாஸ்டாக் போன்ற பங்குச் சந்தை குறியீடுகளில் முதலீடு செய்வது. இரண்டாவது, வெளி நாட்டிலுள்ள ஃபண்டுகளில் முதலீடு செய்வது. அவை, ‘ஃபண்ட் ஆஃப் ஃபண்ட்ஸ்’ என வழங்கப் படும். மூன்றாவது, குறிப்பிட்ட ஒரு பகுதியை மட்டும் வெளிநாட்டு நிறுவனங்களில் முதலீடு செய்வது. 

குளோபல் ஃபண்டுகள்... என்ன சாதகம், என்ன பாதகம்?

மேலும், குளோபல் ஃபண்டு களை பலவிதங்களாகப் பிரிக்கலாம். குறிப்பிட்ட நாடு அல்லது பிராந்தியம் சார்ந்த முதலீடுகள் ஒருவகை. அதாவது, அமெரிக்கா, ஐரோப்பா, ஆசியா அல்லது சீனா என்று பிராந்திய ரீதியாக ஃபண்டுகள் உள்ளன. எந்த நாட்டில் வேண்டுமானாலும் முதலீடுசெய்வது இன்னொரு வகை.  குறிப்பிட்ட வரையறைக்குள் அதாவது, தீம்களுக்குள் முதலீடு செய்வது மற்றுமொரு வகை. உதாரணமாக, பொருள் சந்தை, சுரங்கங்கள் மற்றும் விவசாயம் போன்ற தீம்களைக் கூறலாம்.

எந்தெந்த குளோபல் ஃபண்டுகள் கடந்த ஐந்தாண்டுகளில் நல்ல பலன்களை முதலீட்டாளர் களுக்குத் தந்துள்ளது என்பதை அட்டவணையைப் பார்த்துத் தெரிந்துகொள்ளலாம். இந்த அட்டவணையில் குறிப்பிட்ட ஃபண்டுகளில் பெரும்பாலானவை அமெரிக்க சந்தையைச் சார்ந்த ஃபண்டுகள் என்பது தெளிவாகப் புரியும்.

கடந்த ஐந்தாண்டுகளில் அமெரிக்கப் பொருளாதாரம் மெள்ளமெள்ள வளர்ச்சிப் பாதையை நோக்கிச் செல்வதால், பங்குச் சந்தைகளும் புதிய உச்சத்தைத் தொட்டுவருகின்றன. அதன் காரணமாக கடந்த ஐந்தாண்டுகளின் அடிப்படையில் பார்த்தால், அமெரிக்கா சார்ந்த ஃபண்டுகள் நல்ல லாபத்தை ஈட்டித் தந்துள்ளன.

இந்த ஃபண்டுகளின் வரி அமைப்பு  

இந்தியாவில் இயங்கும் குளோபல் ஃபண்டுகள் பங்குகளில் முதலீடு செய்தாலும், வரி அமைப்பில் அவை டெட் ஃபண்டுகளுக்கு நிகராக நடத்தப்படுகிறது. அதாவது, முதலீடுகளை மூன்று ஆண்டுகளுக்கு மேல் வைத்திருந்தால் அவற்றிற்கு நீண்ட கால முதலீட்டு வரியாக 20.6% (இண்டெக்சேஷன் பயன்கள் உள்ளடக்கிய) விதிக்கப்படும். மூன்று ஆண்டுகளுக்குக் குறைவாக முதலீடுகள் இருந்தால், அவரவர் வருமான வரியின் அடிப்படையில் குறைந்த கால முதலீட்டு வரி விதிக்கப்படும்.

குளோபல் ஃபண்டுகளின் சாதகங்கள்  
 
நமது சந்தைகளில் முதலீடு செய்ததுபோக ஒரு பகுதியை குளோபல் ஃபண்டுகளில் முதலீடு செய்வது பரந்துபட்ட முதலீட்டுக்கான ஓர் அருமையான வாய்ப்பு. பொதுவாகவே, வெவ்வேறு நாடுகளில் பங்கு சந்தைகளின் போக்கு மாறிக்கொண்டே இருக்கும். அதன் காரணமாக இந்தியாவில் பங்குச் சந்தையில் தொய்வு ஏற்பட்டால், சர்வதேச முதலீடுகள் கைகொடுக்கும். அதேபோல, சர்வதேச முதலீடுகளில் தொய்வு ஏற்பட்டால் இந்திய முதலீடுகள் கைகொடுக்கும்.

கடந்த கால வரலாறை எடுத்துப்பார்க்கும்போது, சர்வதேசப் பங்குச் சந்தைகள், கமாடிட்டி சந்தைகள் வெவ்வேறு காலகட்டடங்களில் வெவ்வேறு விதமாகச் செயல்பட்டுள்ளது. மேலும், இந்தியா அதி வேகமாக வளரும் பொருளாதாரமாக இருந்தாலும், வேறு சில நாடு களிலும் பொருளாதாரம் முன்னேறும்போது இதுபோன்ற குளோபல் ஃபண்டுகளில், குறிப்பாக, கடந்த ஐந்தாண்டு காலகட்டத்தில் அமெரிக்கப் பங்குகள் நல்ல லாபம் தந்துள்ளது.  

பாதகங்கள்

சந்தை சார்ந்த ரிஸ்க்தான் முக்கியமான பாதகமாக அமையும். அந்தந்த நாடுகளில் நிகழும் விஷயங்களின் அடிப்படையில் சந்தைகள் நகர்வதால், இங்கு இருந்துகொண்டு துல்லியமாக அங்கு நிகழும் விஷயங்களைத் தெரிந்துகொள்வது கடினம்தான்.

உதாரணமாக அமெரிக்காவை எடுத்துக்கொண்டால், அங்கு நிலவும் அரசியல் சூழல், பொருளாதார மாற்றங்கள், வட்டி விகித மாற்றங்கள், நிறுவனங்களின் செயல்பாடுகள், சமூக மாற்றங்கள் போன்றவற்றை உடனுக்குடன் அறிந்துகொள்வது கடினமே. அவையெல்லாம் பாண்டுகளின் செயல்பாடுகளில் தாக்கத்தை ஏற்படுத்தும். மேலும், கரன்சியில் ஏற்படும் மாற்றங்கள் மிகப் பெரிய தாக்கத்தை முதலீடுகளில் ஏற்படுத்தும் என்பதையும் கருத்தில் கொள்ளவேண்டும்.

இந்தியா வருங்காலத்திலும் பெரிய அளவில் பொருளாதார முன்னேற்றங்களைச் சந்திக்கும்; அதன் காரணமாக பங்குச் சந்தைகளும் நல்ல நிலையில் இருக்கும் என்றாலும், முதலீட்டாளர்கள் தங்களின் முதலீடுகளில் ஒருபகுதியை தகுந்த ஆலோசனைகளின் அடிப்படையில் இந்தியாவில் இயங்கும் குளோபல் ஃபண்டுகளில் முதலீடு செய்தால் பல நன்மைகளை அடையலாம்.

குளோபல் ஃபண்டுகள்... என்ன சாதகம், என்ன பாதகம்?

ரூ.300 கோடி சம்பாதித்த சஞ்சு!

ன்வீர் கபூர் நடித்து சமீபத்தில் வெளியான சஞ்சு இந்தி சினிமா ரூ.300 கோடி வசூல் செய்து சாதனை படைத்திருக்கிறது. அமீர்கான் நடித்த டங்கல் ரூ.387 கோடியையும், பி.கே ரூ.339 கோடியையும், டைகர் ஜிந்தா ஹை படம் ரூ.339 கோடியையும், பஜ்ரங்கி பைஜன் படம் ரூ.320 கோடியையும் வசூல்செய்து சாதனை படைத்திருக்க, இந்த வரிசையில் சஞ்சுவும் சேர்ந்திருக்கிறது. இந்தி நடிகர் சஞ்சய் தத்தின் வாழ்க்கையை மையமாக வைத்து எடுக்கப்பட்ட படம்தான் சஞ்சு. மும்பை குண்டுவெடிப்பு வழக்கில் சஞ்சய் தத் தண்டிக்கப் பட்டவர் என்றாலும், ரன்வீர் கபூரின் நடிப்பைப் பார்க்கவே இந்தப் படத்துக்கு பல ஆயிரம் ரசிகர்கள் கூடுகிறார்களாம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு