பிசினஸ்... உங்கள் பிரச்னை, எங்கள் தீர்வு - 8 - ஜெயிக்க வைக்கும் தொழில்முனைவரின் டி.என்.ஏ!

வ ழக்கமான த்ரி ஸ்டார் ஹோட்டலில் தங்களது ‘சவுண்டிங் போர்டு’ மீட்டிங்கை நடத்துவதற்குப் பதிலாக, இந்தமுறை அந்த ஊரின் ஆற்றங்கரைக்குப் பக்கத்தில் உள்ள தென்னந் தோப்பில் கூட்டத்தை நடத்துவது என்று முடிவெடுக்க, சொன்ன நேரத்தில் உறுப்பினர்கள் எல்லோரும் வந்துசேர்ந்தார்கள். தென்னந் தோப்புக்குச் சொந்தக்காரன் கார்த்திகேயன். பயோ டெக்னாலஜி படித்துவிட்டு, அக்ரோபுட்ஸ் துறையில் தொழில் ஆரம்பித்து, வேகமாக முன்னேறிக்கொண்டிருக்கிறான்.

கூட்டத்துக்கு வந்திருந்த சகதொழில்முனைவர்கள் அனைவருக்கும் முதலில் இளநீரை ஒரு சொம்பு நிறையக் கொடுத்தான் கார்த்திக். இனிப்பாக இருந்த இளநீரை எல்லோரும் விரும்பிச் சாப்பிட, ‘‘ஒரு குடம் நிறைய இளநீரை வெட்டி வெச்சிருக்கேன். தாகம் எடுக்கிறப்ப எல்லாம் வெக்கப்படாம கேட்டுக் குடிங்க’’ என்று சொல்ல, எல்லோரும் ‘‘தாங்க்யூ’’ என்றார்கள்.

இந்தக் கூட்டத்துக்கு வந்திருந்த இன்னொரு இளம் தொழில்முனைவர் தீபக். தனது மனதில் இருந்த முக்கியமான கேள்வியை அன்றைய கூட்டத்தில் கேட்க வேண்டும் என்று முடிவு செய்திருந்தான். அவன் பேசத் தொடங்கினான்:

. ‘‘ஒரே பிசினஸ் சூழ்நிலை, ஒரே அளவில் முதலீடு, ஒரே அளவில் ஆட்களின் எண்ணிக்கை இருக்கும் இரண்டு பிசினஸ் நிறுவனங்களில் ஒன்று ஜெயிக்கிறது, இன்னொன்று தோற்கிறது. இதற்கு என்ன காரணம்? ஒரு தொழில்முனைவரை ஜெயிக்க வைப்பது எது?’’ என்பது அவன் கேள்வி.

நம் வாழ்க்கையிலேயே இதுமாதிரியான விஷயங்களை அடிக்கடி பார்ப்பதால், நம் எல்லோரது மனதிலும் இந்தக் கேள்வி அடிக்கடி வரும். ஆனாலும் இந்தக் கேள்விக்கான பதில் அவ்வளவு சுலபமானதல்ல. ‘‘எல்லாம் அதிர்ஷ்டம்தான் காரணம்’’ என்று ஒரு வரியில் இதற்கு விளக்கம் சொல்லி முடித்துவிட முடியுமா? முடியாது எனில், ஒரே மாதிரியான சூழலில் ஒருவர் ஜெயிக்கவும், இன்னொருவர் தோற்கவும் எதுதான் காரணமாக இருக்க முடியும்?

வழக்கம்போல சில நொடிகள் அமைதி நிலவ, அதன்பிறகு பேச ஆரம்பித்தார் திரிலோக். பேசத் தொடங்கும்முன், மீண்டுமொருமுறை இளநீரைக் குடித்தார்.

‘‘ஒரு தொழில்முனைவர் சந்திக்க வேண்டிய சவால்கள் ஒன்றிரண்டல்ல. பாதுகாப்பாக பிசினஸ் செய்வது என்பது உலகத்தில் எங்கும் இல்லவே இல்லை. தினமும் பல சவால்களைச் சந்தித்து, அவற்றைச் சமாளித்து முடிப்பதற்குள் ‘‘என்னத்துக்கு நாம் இவ்வளவு கஷ்டப்படுகிறோம்?’’ என்கிற கேள்வி நம் மனதுக்குள் எழாமல் போகாது.

ஆனால், வெற்றி பெற்ற பெரிய தொழில் நிறுவனங்களையும், தொழில் முனைவர்களையும் பார்க்கும்போதும், அவர்கள் ஜெயித்த கதையைக் கேட்கும் போதும், படிக்கும்போதும், மீண்டும் புதிய நம்பிக்கை பீறிட்டு, நாமும் ஜெயிக்க வேண்டும் என்கிற வெறி நமக்குள் உருவாவதைத் தடுக்க முடியாது.

நம்மைச் சுற்றியிருக்கும் தடைகளை உடைத்தெறிந்து ஜெயிக்கவே நாம் விரும்பு கிறோம். மற்ற தொழில்முனை வர்கள் அவர்களுக்குமுன் இருந்த தடைகளை எப்படி வித்தியாசமாக உடைத் தார்கள், அதற்காக அவர்கள் பின்பற்றிய மந்திரம்தான் என்ன, அவர்கள் புதிதாகப் பயன்படுத்தத் தொடங்கிய இ.ஆர்.பி சிஸ்டம் அவர்களை வெற்றியடையச் செய்ததா அல்லது சிக்ஸ் சிக்மா உற்பத்தி முறை அவர்களை வெற்றி காணச் செய்ததா என்றெல்லாம் யோசித்து, அதற்கான பதிலைத் தேடி அலைகிறோம்.

இப்படித் தேடித்தேடி அலையும்போது, தொழிலை நடத்தும் நாம் நிறையவே மாறுகிறோம். ஆனால், நாம் செய்யும் தொழில் சூழல் மாறுவ தில்லை. உதாரணமாக, பொருள்கள் கால தாமதமாக விநியோகம் செய்யப்படுவதை வாடிக்கையாளர் ஒன்றுக்கு இரண்டுமுறை புகார் செய்திருப்பார். ஆனால், அந்தப் புகாரை மேலிடத்துக்குக் கொண்டு செல்லாமலே அமுக்கியிருப்பார்கள் ஊழியர்கள். பொருள்களை எடுத்துச்செல்ல வெளியே லாரி தயாராக இருக்கும். ஆனால், பொருள்களைத் தவறாகத் தயாரித்ததால், அதைத் தூக்கிப் போட்டுவிட்டு, புதிய பொருள்களைத் தயாரித்துக்கொண்டிருப் பார்கள். இப்படி தொழில்முனைவர் மாறிவிட நினைத்தாலும், அவர் மாறிவிடாதபடிக்கு மற்றவர்கள் அவரைப் பின்னுக்கு இழுத்துக் கொண்டிருப்பார்கள்.

உலகம் ஒரே நாள் இரவில் மாறிவிடாது என்பது உண்மை என்றாலும், வெற்றியாளர்கள் தாங்கள் நினைத்தபடி உலகத்தை மாற்றவே செய்திருக்கிறார்கள். அந்த மாற்றங்கள் என்னென்ன என்பதைக் கவனித்து செய்ய வேண்டியது ஒரு தொழில் முனைவரின் கடமை. அந்த மாற்றங்கள் என்னென்ன என்பதை ஒரு உதாரணத்து டன் பார்ப்போம்.

. சுனில் ரெஸ்டாரன்ட் என்பது நம்மூரில் பிரபலமான ஒரு உணவகம். மெக்டொனால்ஸ் என்பது புகழ்பெற்ற வெளிநாட்டு உணவகம். இரண்டுமே பர்கரைத்தான் விற்பனை செய்கின்றன. சுனில் ரெஸ்டாரன்ட் விற்பது வடபாவ். மெக்டொனால்ஸ் விற்பது மெக்பர்கர். இத்துடன் ஒற்றுமை முடிந்துவிட்டது.

சுனில் ரெஸ்டாரன்டில் விற்கும் வடபாவ் கொஞ்சம் காரம் குறைவாக இருக்க வேண்டுமா அல்லது இனிப்பான சட்னியுடன் இருக்க வேண்டுமா என்று சொல்ல வேண்டும். உள்ளூரில் தயாரிக்கப்படும் உணவு வகைகள் இப்படி நபருக்கு நபர் மாறும் சுவை கொண்டவையாக உள்ளன.

ஆனால், மெக்பர்கர் என்பது அப்படியல்ல. அது எப்படிப்பட்ட சுவை கொண்டதாக இருக்கும் என்பது உங்களுக்கு ஏற்கெனவே தெரியும் என்பதால், அதை பிரீமியம் விலை தந்து நீங்கள் வாங்குகிறீர்கள். நம் நாட்டில் மட்டுமல்ல, உலகத்தின் எந்த மூலைக்கு நீங்கள் போனாலும், மெக்பர்கரின் சுவை ஒரேமாதிரி இருப்பதுதான் அதன் சிறப்பு. இதனால்தான் அவர்களால் உலகம் முழுக்க எளிதாகக் கடை களைத் திறக்க முடிகிறது. லட்சக் கணக்கான வாடிக்கையாளர்களின் கவனத்தையும் பெற முடிகிறது.

அதாவது, சுனில் ரெஸ்டாரன்ட் என்பது தனிப்பட்ட ஒரு தொழில் முனைவர் நடத்தும் ஒரு சிறிய நிறுவனம்தான். மெக்டொனால்ஸ் என்பது புரஃபஷனலாக நடத்தப்படும் ஒரு நிறுவனம். மெக்டொனால்ஸ்கூட ஒரு காலத்தில் சிறிய நிறுவனமாக இருந்ததுதான். ஆனால், பிற்பாடு வெற்றிகரமாக புரஃபஷனலாக மாறிவிட்டது. இதற்கு நம்மிடம் இருக்கும் திறமை என்ன என்று நாம் கண்டறிய வேண்டும்; நமக்குமுன் உள்ள வாய்ப்புகள் என்ன என்று ஆராய வேண்டும்; நமது பலத்தைப் பயன்படுத்தி, நம்மால் எவ்வளவு ரிஸ்க் எடுக்க முடியும் என்று பார்க்க வேண்டும். வாய்ப்புகள் என்பது எப்போதும் இருக்கவே செய்கின்றன. நமது பலத்தை நாம் எப்படிச் சரியாக பயன்படுத்த வேண்டும் என்பதுதான் விஷயமே.

இன்றைக்கு நம் நாட்டிலும் சிறிய நிறுவனங்கள் பெரிய நிறுவனங்களாக மாறிவருகின்றன. இந்த நிறுவனங்கள் பெரிதாக மாற என்ன செய்தன என்று பார்ப்பதைவிட, என்ன மாதிரியான அணுகுமுறையை அந்த நிறுவனங்கள் கொண்டிருந்தன என்பதைப் பார்ப்பது முக்கியம். அவர்களை வெற்றியடையச் செய்தது எது என்பதை நாம் கவனித்தாக வேண்டும்.

இதற்கு ஒரு நிறுவனத்தின் டி.என்.ஏ எப்படி என்று பார்க்க வேண்டும். ஒரு தனிப்பட்ட மனிதனின் வெற்றிக்கு அவனது டி.என்.ஏ காரணம் என்பதுபோல, ஒரு நிறுவனம் பெரிதாக வளர்வதற்கும் அல்லது சிறிய அளவிலேயே இருப்பதற்கும் அதன் டி.என்.ஏ-தான் அடிப்படை.

இந்த டி.என்.ஏ என்பது இரண்டு முக்கியமான விஷயங்களை உள்ளடக்கியதாக இருக்கிறது. ஒன்று, தொழில் செய்பவரின் தனிப்பட்ட இலக்கு. மற்றொன்று, அவர்கள் பின்பற்றும் மதிப்பீட்டுக் கொள்கைகள். ஒரு நிறுவனத்தின் எல்லா விஷயங்களிலும் இந்த இரண்டின் செயல்பாடு பலமான தாக்கத்தை ஏற்படுத்துகிறது. இந்த இரண்டு விஷயங்களிலும் எந்த சமரசமும் இல்லாமல் செயல்படும் நிறுவனங்களே நல்ல முன்னேற்றத்தைக் காண்கின்றன. இந்த இரண்டு விஷயங்களைப் பற்றிய விழிப்பு உணர்வு நம்மிடம் இருந்தால், எந்த சிறிய நிறுவனமும் பெரிய நிறுவனமாக எளிதில் மாறிவிடும்’’ என்று திரிலோக் சொல்லி முடிக்க, அவர் சொன்ன விஷயங்களை எல்லோரும் அசை போட்டபடி, மீண்டும் இளநீரைக் குடிக்க ஆரம்பித்தனர்.

(தீர்வு கிடைக்கும்)

. கேளுங்கள் சொல்கிறோம்!

மோசமான தரத்தில் செய்யப்படும் பொருள்கள் நன்கு விளம்பரம் செய்வதன்மூலம் நிறைய விற்பனை செய்து வருகின்றன. ஆனால், நான் நல்ல தரத்தில் பொருள்களைத் தயாரித்தாலும் விளம்பரம் செய்ய வழியில்லாததால், விற்பனை அளவினை உயர்த்த முடியாமல் தவிக்கிறேன். இந்தப் பிரச்னைக்கு என்ன தீர்வு?

சிவமுருகன், தூத்துக்குடி

“உங்கள் பிரச்னைக்கான தீர்வு நீங்கள் தயாரிக்கும் பொருளில்தான் இருக்கிறது. பொதுவாக, விளம்பரம் என்பது ஒரு பொருளை முதலில் வாங்குவதற்கு மட்டுமே உதவும். விளம்பரத்தின்மூலமாக மட்டுமே ஒரு பொருளை என்றைக்கும் விற்க முடியாது. ஆனால், மக்கள் வாய்மொழியாகச் சொல்லும் வார்த்தையானது ஒரு பொருளை என்றைக்கும் விற்க வைக்கும். எனவே, உங்கள் தயாரிப்பு தரமாக இருக்கிறதா என்பதை முதலில் கவனியுங்கள். உங்கள் தயாரிப்பு தரமானதுதான் என்பதை உறுதி செய்துகொண்டபின், அதைப் பற்றி வாடிக்கையாளர்கள் என்ன நினைக்கிறார்கள் என்பதைக் கேட்ட றியுங்கள். அதிகம் செலவில்லாத விளம்பர உத்திகளைக் கடைப் பிடியுங்கள். சோஷியல் மீடியாக்கள், கவுன்ட்டர்களின்முன்பு காட்சிப்படுத்துவது, ஒரு பொருளுடன் இன்னொரு பொருளைத் தருவது, இலவசமாகத் தந்து சோதித்துப் பார்ப்பது போன்ற வழிகளைப் பின்பற்றுங்கள். உங்கள் விற்பனை வளர்ச்சி எந்த வழி உதவுகிறதோ, அதைத் தொடர்ந்து செய்யுங்கள்.’’

பிசினஸில் நீங்கள் சந்திக்கும் பிரச்னைகளை navdesk@vikatan.com என்கிற மின்னஞ்சலுக்கு சுருக்கமாக எழுதி அனுப்புங்கள்! உங்கள் பிரச்னைக்கு நாங்கள் பதில் தருகிறோம்!

பிசினஸ்... உங்கள் பிரச்னை, எங்கள் தீர்வு - 8 - ஜெயிக்க வைக்கும் தொழில்முனைவரின் டி.என்.ஏ!

Vikatan Correspondent