Published:Updated:

பங்குச் சந்தை.... 2019-ல் எப்படி இருக்கும்?

பங்குச் சந்தை.... 2019-ல் எப்படி இருக்கும்?
பிரீமியம் ஸ்டோரி
பங்குச் சந்தை.... 2019-ல் எப்படி இருக்கும்?

பங்குச் சந்தை.... 2019-ல் எப்படி இருக்கும்?

பங்குச் சந்தை.... 2019-ல் எப்படி இருக்கும்?

பங்குச் சந்தை.... 2019-ல் எப்படி இருக்கும்?

Published:Updated:
பங்குச் சந்தை.... 2019-ல் எப்படி இருக்கும்?
பிரீமியம் ஸ்டோரி
பங்குச் சந்தை.... 2019-ல் எப்படி இருக்கும்?
பங்குச் சந்தை.... 2019-ல் எப்படி இருக்கும்?

- ரெஜி தாமஸ்,
பங்குச் சந்தை நிபுணர்

சீனர்கள் தங்கள் காலண்டரில் ஒவ்வோர் ஆண்டுக்கும் ஒரு விலங்கினைக் குறித்து வைக்கிறார்கள். சீன காலண்டரின்படி, 2018-ம் ஆண்டில் நியமிக்கப்பட்ட விலங்கு நாய். சீன காலண்டர்படி, பங்குச் சந்தையானது சில ஆண்டுகளைவிட மோசமாக இருக்கும் என்பது வரலாற்று உண்மை. கடந்த சில ஆண்டுகளாக சீனாவின் பங்குச் சந்தை மற்ற நாடுகளைவிட மோசமாக உள்ளது. வரும் பிப்ரவரி 15, 2019-ம் ஆண்டு முடிவடையும் ‘நாய்’ ஆண்டும், அந்த மோசமான ஆண்டுகளில் ஒன்றாகும். இந்த ‘நாய்’ ஆண்டில் ஆசிய மற்றும் அமெரிக்கப் பங்குச் சந்தைகள் சராசரியைவிடக் குறைவாகவே வருமானம் தந்துள்ளன.

உலக அளவில் பங்குச் சந்தை தந்த வருமானத்தை ஒப்பிட்டுப் பார்த்தால்,  இழப்புக்கும், லாபத்திற்குமான இடைவெளி மிகவும் பெரிதாக  இருக்கிறது. ஆப்பிரிக்காவிலுள்ள ஜாம்பியா நாடு 28% இழப்பைச் சந்தித்துள்ளது.  உக்ரைன் நாடு 79% வருமானத்தைத் தந்துள்ளது. வளர்ந்த நாடுகள் பலவற்றின் பங்குச் சந்தைகளில் வருமான இழப்பு ஏற்பட்டுள்ளது. அதேசமயம், பொருளாதாரத்தில் வளர்ந்துவரும் நாடுகளான பிரேசில், ரஷ்யா, இந்தியா, சவுதி அரேபியா, துனீஷியா மற்றும் கானா நாடுகள் நல்ல வருமானம் தந்துள்ளன. இந்த அளவிற்கு வேறுபாடுகள் ஏற்பட பல காரணங்கள். அந்தக் காரணங்கள் என்னென்ன என்பதைத் தெரிந்துகொண்டால் தான், 2019-ம் ஆண்டின் முதலீட்டு முடிவுகளை சரியாகத்  தீர்மானிக்க முடியும்.

1: வர்த்தகப் போர்கள்
அமெரிக்காவும், சீனாவும் வர்த்தகப் போரில் ஈடுபட்டுள்ளன. இரு நாடுகளும் ஒன்று மற்றொன்றின் இறக்குமதிப் பொருள்களின்மீதான வரிகளை உயர்த்தியுள்ளன. எனவே, இவற்றைச் சார்ந்த தொழில்கள் மீதான பாதிப்பு உலக அளவில் தேவைக்கும், உற்பத்திக்குமான சமநிலையைப் பெரிதும் பாதித்தது. இதனால், சந்தையில் ஏற்ற இறக்கமும் முதலீட்டாளர்களுக்கு நிச்சயமற்றதன்மையும் ஏற்பட்டது. இந்த இரு நாடுகளுக்கு இடையிலான வர்த்தகப் போர் இன்னும் 90 நாள்களில் அதாவது, வரும் மார்ச் 1, 2019 அன்று காலாவதியாகும் என்றும், அதற்குப் பிறகு வர்த்தக சமநிலை வரக்கூடும் என்றும் எதிர்பார்க்கப்படுகிறது. எனினும், அமெரிக்கக் கூட்டாட்சியின் பணிநீக்கம், சீனப் புத்தாண்டுக் கொண்டாட்டம் போன்றவை இந்தச் செயல்பாடுகளைக் கணிசமாகக் குறைக்கக்கூடும்.

ஒட்டுமொத்த விகடனுக்கும் ஒரே ஷார்ட்கட்!

பங்குச் சந்தை.... 2019-ல் எப்படி இருக்கும்?

2: வட்டிவிகித உயர்வு
உலக அளவில் 26 நாடுகளில் 15 நாடுகளின் பொருளாதார நிலை, வட்டி விகிதங்கள் உயரும் என்பதைக் காட்டுகின்றன. மற்ற 11 நாடுகளில் வட்டி விகிதங்கள் சரிவடையும் எனவும் சுட்டிக் காட்டுகின்றன. வட்டி விகித உயர்வு, பணவீக்கத்தைக் கட்டுப்படுத்தப் பயன்படுத்தப் படும் முதன்மைக் கருவியாகும். உலக அளவிலுள்ள மத்திய வங்கிகள்  பணவீக்கத்தைக் கட்டுப்படுத்த வட்டிவிகிதத்தை உயர்த்துவதையே முக்கிய நடவடிக்கையாகக் கொண்டிருக்கின்றன.

இந்தியா, ரஷ்யா உள்ளிட்ட நாடுகளில் வட்டி விகிதம் உயரும் சூழலும்,  சீனா, பிரேசில் போன்ற நாடுகளில் வட்டி விகிதம் குறையும் சூழலும்  உள்ளது. பங்குச் சந்தை முதலீடுகளை மதிப்பிடுகை யில், இந்தக் காரணி முக்கியமானதாகக் கருதப் படுகிறது. வட்டி விகித உயர்வு மற்றும் குறைப்பு நடவடிக்கைகள் முதலீட்டாளர்களின் கண்ணோட்டத்தை நிலையான வருவாய் முதலீட்டிலிருந்து பங்குச் சந்தைக்கும், பங்குச் சந்தையிலிருந்து நிலையான வருவாய் முதலீட்டுக்கும் மாற்றக்கூடியதாக உள்ளது. இதைப் பொறுத்தே பொருளாதாரம் வேகமாக வளருகிறதா அல்லது நிதானமாக வளருகிறதா என்பது தெரியும்.

இந்த நடவடிக்கையினால் கார்ப்பரேட் நிறுவனங்களின் வளர்ச்சியும், பொருளாதார விரிவாக்கமும் வேகமான மாற்றத்திற்கு உள்ளாவதால், பங்குச் சந்தை முதலீடு மூலமான வருவாய் குறைவாக இருக்கும். 15 பெரிய பொருளாதார நாடுகளில் வட்டி அதிகரிக்கப் பட்டதால், பங்குச் சந்தையிலிருந்து நிலையான வருவாய்த் திட்டங்களுக்கு  முதலீடு மாறுவதால், பங்குச் சந்தை வருமானம் குறையக்கூடும்.

பங்குச் சந்தை.... 2019-ல் எப்படி இருக்கும்?

3: தொழில்நுட்பப் பங்குகளில் ஏற்பட்ட பாதிப்பு
அமெரிக்கப் பங்குச் சந்தையான நாஸ்டாக்கில் (NASDAQ), ஃபான்க் (FAANG) எனப்படும்  ஃபேஸ்புக், ஆப்பிள், அமேசான், நெட்ஃப்ளிக்ஸ், கூகுள் ஆகிய வலுவான டெக்னாலஜி பங்குகளின் விகிதம் குறிப்பிடத்தக்கதாகும். இந்தப் பங்குகளிலிருந்து முதலீட்டாளர்கள் பெருமளவில் வெளியேறுவதால், இந்தப் பங்குகளின் மதிப்பு குறைய வாய்ப்புள்ளது. இன்றைய டிஜிட்டல் உலகில், தொழில்நுட்பப் பங்குகள் சந்தை போக்கில் பெரிய தாக்கத்தை ஏற்படுத்தும். எனவே, இந்தப் பங்குகள் இனி எப்படிச் செயல்படப்போகின்றன என்பது முக்கியமான விஷயம்.

4: கச்சா எண்ணெய் பிரச்னை
2018, டிசம்பர் 7-ம் தேதி, ‘ஒபெக்’ நாடுகள், அக்டோபர் மாதம் முதல் ஒரு நாளைக்கு 1.2 மில்லியன் பேரல்களைக் குறைக்க ஒப்புக் கொண்டன. ‘ஒபெக்’ அமைப்பின்  உறுப்பினராக உள்ள நாடுகள்  8,00,000 பேரல்களைக் குறைக்க வேண்டுமென்றும், நட்பு நாடுகள் 4,00,000 பேரல்களைக் குறைக்க வேண்டுமென்றும் முடிவானது. இந்த உற்பத்திக் குறைப்பு நடவடிக்கை அடுத்த ஆறு மாத காலத்திற்குத் தொடரும். இதன்மூலம் 2019 தொடக்கத்தில் ஒரு பேரல் விலை 70 டாலர் என்ற அளவிற்குக் கொண்டுவர வேண்டுமென்பதே ‘ஒபெக்’ நாடுகளின் எண்ணமாகும்.


சர்வதேச அளவில் கச்சா எண்ணெய் விலை நான்கு ஆண்டுகளில் உச்சமாக 2018, செப்டம்பர் 24-ம் தேதி, ஒரு பேரல் விலை 81.20 டாலர் என உயர்ந்தது. இதன்பிறகு இரண்டே மாதங்களில் விலை சரிவடைந்து நவம்பரில் ஒரு பேரல் 50 டாலர் என ஆனது. கச்சா எண்ணெய் விலையில் செப்டம்பரில் ஏற்றமும், நவம்பரில் இறக்கமுமாக  இருந்ததால், பணவீக்கத்தின் போக்கும், பணப் பரிமாற்ற விகிதாச்சாரக் கணிப்புகளும் தவறாகப் போய், சர்வதேச அளவில் பங்குச் சந்தைகளின் முதலீடுகளைப் பாதித்தது.

2019-ல் கச்சா எண்ணெய் விலை ஒரு பேரலுக்கு சுமார் 61 டாலராக இருக்குமென்று அமெரிக்க எரிசக்தி அமைப்பு கணித்துள்ளது. இது ஒரு மாதத்திற்குமுன்னர் கணித்திருந்த விலையைவிட 11 டாலர் குறைவாகும்.

பங்குச் சந்தை.... 2019-ல் எப்படி இருக்கும்?

2018-ல் இந்திய பங்குச் சந்தையின் செயல்பாடு

சர்வதேச அளவிலான காரணங்கள் ஒருபக்கம் இப்படி இருக்க, இந்தியப் பங்குச் சந்தை எப்படி இருந்தது என்று பார்ப்போம். இந்தக் கட்டுரை எழுதும்போது, நிஃப்டி 2.12% வருமானத்தை மட்டுமே தந்துள்ளது. நிஃப்டியானது நான்கு நிலைகளாகச் செயல்பட்டது.

நிலை 1: 2018 ஜனவரி

இந்த நிலை ஒரு மாத காலத்துக்கு மட்டும் நீடித்தது. 2018, ஜனவரி மாதம் பட்ஜெட் தாக்கல் செய்தபோது பங்குச் சந்தையில் ஏற்பட்ட தாக்கம் சந்தைக்குப் பாதகமாக இருந்தது. பட்ஜெட் தாக்கலுக்குப்பிறகு இரண்டே மாதங்களில் 2000 புள்ளிகள் வரை சரிந்து 9951 புள்ளிகளைத் தொட்டது.

நிலை 2: மார்ச் 23 முதல் ஆகஸ்ட் 2018 இறுதிவரை

காலாண்டு முடிவுகள் வெளியானதும் நல்லதொரு பொருளாதாரச்சூழல் ஏற்பட்டதால், அனைவருக்கும் பங்குகளை வாங்கும் ஆர்வம் அதிகரித்து வரலாற்று உச்சமாக 11760 புள்ளிகள் வரை தொட்டது.

நிலை 3: ஆகஸ்டு 2018 இறுதி முதல் அக்டோபர் 2018 இறுதிவரை

நிஃப்டியின் போக்கு சரியாக இருந்ததால், அதன் மீதான எதிர்பார்ப்புகள் அதிகரித்தது. கச்சா எண்ணெய் விற்பனையில் ஈரான் மீதான தடை அச்சுறுத்தலை அடுத்து சர்வதேச அளவில் கச்சா எண்ணெய் விலை உயர்ந்தது. இதன் காரணமாக இந்தியாவில் பெட்ரோல் விலை உயர்ந்ததது. அமெரிக்க டாலருக்கு நிகரான இந்திய ரூபாயின் மதிப்பு சரிந்தது. இந்த இரண்டு காரணங்களும் இந்தியப் பொருளாதாரத்தைப் பாதித்ததுடன், ஐ.எல்.&எஃப்.எஸ் விவகாரம் காரணமாக வெளிநாட்டு முதலீட்டாளர்கள் தங்கள் முதலீட்டை நிரந்தர வைப்பு நிதியின்  பக்கம் திருப்பினார்கள். அமெரிக்க டாலர்களில் முதலீடு செய்தவர்களும் அதிலிருந்து வெளியேறினார்கள். நிஃப்டி இண்டெக்ஸ் 10004 புள்ளிகள் வரை இறங்கி, பின்பு மேலேறி, மார்ச் 2018-ல் இருந்த உச்ச அளவைவிட 53 புள்ளிகள் மட்டுமே குறைந்த நிலையில் இருந்தது.

நிலை 4: அக்டோபர் இறுதி முதல் தற்போது வரை

ரிசர்வ் வங்கி கவர்னரின் ராஜினாமா, ஐந்து மாநிலத் தேர்தல் முடிவுகள் இரண்டும் சந்தைக்குச் சாதகமான சூழலைக் கொடுக்காததால் இந்த ஆண்டின் மிகக் குறைந்த புள்ளிகளைத் தொட்டுவிட்டு தற்போதுள்ள புள்ளிகளுக்கு இண்டெக்ஸ் மீண்டுள்ளது.

நிலை மூன்றில் திடீர்ச் சரிவும், நிலை இரண்டில் நல்ல மேல்நோக்கிய நகர்வுமாக இருந்தது. ஏறக்குறைய அடுத்த காலாண்டுக் காலம் வேறெந்த பாதகமும் நடந்துவிடக்கூடாது என்ற பதற்றமான சூழலுடன் தான் தற்போதைய சந்தை நிலவரம் உள்ளது.

பங்குச் சந்தை.... 2019-ல் எப்படி இருக்கும்?

2019: சந்தை குறித்த எதிர்பார்ப்புகள்

சீன காலண்டர்படி, இந்த ஆண்டு ‘பன்றி’ ஆண்டாகக் கருதப்படுகிறது. சீன காலண்டரில் உள்ள 12 மிருகங்களில் அதிக வருமானம் தருவதில் மூன்றாவது இடத்தில் ‘பன்றி’ உள்ளது. எனவே, சந்தை நல்ல லாபம் என்று எதிர்பார்த்தாலும், அதைப்  பாதிக்கக்கூடிய காரணிகள் பொதுத் தேர்தலும், பொருளாதார அறிகுறிகளும்தான். கடந்த 20 ஆண்டுகளின் அனுபவத்தில் பார்த்தால், பொதுத் தேர்தல்களின்போது, சந்தை பெரிதாக எந்தவிதமான தாக்கத்துக்கும் உள்ளாகவில்லை. பொருளாதாரம் முன்னோக்கிச் செல்லும். ஆனால், உலக அளவில் பொருளாதார வளர்ச்சி மந்தமாக இருப்பதாலும், வர்த்தகப் போர் காரணமாகவும் ஏற்றுமதிக்குப் பாதகமான சூழலைச் சந்திக்கக்கூடும். கச்சா எண்ணெய் விலை மேலும் குறையக்கூடும்.

இந்திய ரூபாய் மதிப்பு, அந்நிய முதலீடுகள் விலக்கல்

2018-ம் ஆண்டில் அந்நிய முதலீடுகள் ரூ.1  லட்சம் கோடி வரை திரும்பப் பெறப்பட்டுள்ளன. வரவுள்ள பொதுத் தேர்தலில் ஆட்சி மாற்றம் ஏற்பட வாய்ப்புள்ள சூழலில், பணம் பெரிதும் புழங்கும். இரண்டும் சேர்ந்து ரூபாய் மதிப்பு வீழ்ச்சிக்கு வழிவகுத்து சந்தைக்குப் பாதகமாகக்கூடும்.

சந்தையை டெக்னிக்கலாக ஆய்வு செய்தால், நிஃப்டி அடுத்தடுத்து உச்சத்தையும், தாழ்ச்சியையும் (9951 & 10004) பதிவு செய்துள்ளது. எனினும், இதனைச் சரிக்கட்டி உச்சக் கட்ட புள்ளிகளை (11095 & 11760) எட்டுவதற்கும் வாய்ப்புள்ளது. நிஃப்டி தன் வாழ்நாள் உச்சமான 12300 / 12800 / 13300 / 13760 என்ற புள்ளிகளை எட்டவும், மிகப் பெரிய சரிவாக 10004 /10900 /11340 / 11760 என்ற புள்ளிகளுக்கு இறங்கவும்கூட வாய்ப்புள்ளது.

சந்தையின் போக்கை முன் கூட்டியே கணிக்கும் டெக்னிக்கல் அனாலிசிஸில்  போல, சீன காலண்டருக்கு  எந்தவித அறிவியல் அடிப்படை யும் கிடையாது. எனினும், அது சொல்வது சரியாக இருக்கும் என்றே படுகிறது. குறிப்பாக, நல்ல வருமானம் தரும் பங்கு களை நீண்ட கால நோக்கில் முதலீட்டாளர்கள் வாங்குவது நல்லது. இனிவரும் நாள்களில் ஏற்ற இறக்கம் அதிகமாகவே இருக்கும். இதனை லாபம் ஈட்டுவதற்கு நாம் பயன்படுத்திக் கொள்ள வேண்டும். எனவே, சரியான துறை மற்றும் சரியான பங்குகளில் முதலீடு செய்து லாபம் ஈட்டுங்கள்!

 தமிழில்: தெ.சு.கவுதமன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism