Published:Updated:

ஷேர்லக்: காலாண்டு முடிவுகள்... கவனம் தேவை!

ஷேர்லக்: காலாண்டு முடிவுகள்... கவனம் தேவை!
பிரீமியம் ஸ்டோரி
ஷேர்லக்: காலாண்டு முடிவுகள்... கவனம் தேவை!

ஓவியம்: அரஸ்

ஷேர்லக்: காலாண்டு முடிவுகள்... கவனம் தேவை!

ஓவியம்: அரஸ்

Published:Updated:
ஷேர்லக்: காலாண்டு முடிவுகள்... கவனம் தேவை!
பிரீமியம் ஸ்டோரி
ஷேர்லக்: காலாண்டு முடிவுகள்... கவனம் தேவை!

முந்தின நாள் வாட்ஸ்அப்பில்  ஷேர்லக் கேட்டுக்கொண்ட படி, வெள்ளிக்கிழமை மாலை நான்கு மணிக்கு நாம் கேள்விகளை மெயில் அனுப்பிவைத்தோம். அடுத்த ஒரு மணி நேரத்தில் அத்தனைக் கேள்விகளுக்குமான பதில்களை அனுப்பி வைத்தார் அவர்.

நிறுவனங்கள் பங்குச் சந்தை மூலம் நிதித் திரட்டுவது குறைந்துள்ளதே?

“நடப்பு 2018-ம் ஆண்டில் நிறுவனங்கள் பல்வேறு முறைகளில் பங்குச் சந்தை மூலம் திரட்டிய நிதி ரூ.63,744 கோடி யாகக் குறைந்துள்ளது. 2017-ம் காலண்டர் ஆண்டில் திரட்டப்பட்ட நிதி ரூ.1,60,032 கோடியாக இருந்தது. இந்த ஆண்டு புதிய பங்கு வெளியீடு (ஐ.பி.ஓ), தொடர் பங்கு வெளியீடு (ஓ.எஃப்.எஸ்)  மற்றும்  தகுதி வாய்ந்த நிறுவனங்கள் (க்யூ.ஐ.பி) முறைகள் மூலமாகத் திரட்டப்பட்ட நிதி முறையே 53.89%, 40.98% மற்றும் 72.72% அளவுக்குக் குறைந்துள்ளது. 2018-ம் ஆண்டில் 24 ஐ.பி.ஓ- களின்மூலம் ரூ.30,959 ரூபாய் நிதி திரட்டியுள்ளது. முந்தைய ஆண்டில் 36 ஐ.பி.ஓ-கள்மூலம் ரூ.67,147 கோடி நிதி திரட்டப் பட்டது. அதேபோல, ஓ.எஃப்.எஸ் மூலம் ரூ.10,678 கோடி திரட்டப்பட்டுள்ளது. முந்தைய ஆண்டில் இது ரூ.18,094 கோடியாக இருந்தது, க்யூ.ஐ.பி மூலம் முந்தைய ஆண்டில் ரூ.61,148 கோடி  திரட்டப்பட்ட நிலையில், 2018-ம் ஆண்டில் ரூ.16,677 கோடி  மட்டுமே திரட்டப்பட்டுள்ளது.”

அந்நிய முதலீட்டு நிறுவனங்களின் பதிவுகள் 2018-ல் அதிகரித்துள்ளதற்கு என்ன காரணம்?

“அந்நிய முதலீட்டு நிறுவனங்கள், பங்கேற்பு ஆவணங்கள் (பார்ட்டிசிபேட்டரி நோட்ஸ்) மூலம் இந்தியப் பங்குச் சந்தைகளில் முதலீடு செய்வதற்கான விதிமுறைகளை செபி எளிமைப்படுத்தியதன் எதிரொலியாக, 2018-ம் ஆண்டில் அவற்றின் முதலீடு வெகுவாக அதிகரித்துள்ளது. 600-க்கும் அதிகமான புதிய  அந்நிய முதலீட்டு நிறுவனங்கள், செபியில் இந்த ஆண்டு பதிவுசெய்துள்ளன. இது, கடந்த 2014-ம் ஆண்டுக்குப்பின்னர் செய்யப்பட்ட அதிகபட்ச பதிவாகும். தற்போது இந்தியாவில் 9,246 அந்நிய முதலீட்டு நிறுவனங்கள் செயல்பாட்டில் உள்ளன.”

ஷேர்லக்: காலாண்டு முடிவுகள்... கவனம் தேவை!

உலக அளவில் பங்குச் சந்தைகளில்  அதிகம் இழப்பு ஏற்பட்டுள்ளதே? 

“2018-ம் ஆண்டில், உலக அளவில் பெரும்பாலான பங்குச் சந்தைகள் சரிவைச் சந்தித்துள்ளன. இந்தப் பங்குச் சந்தைகளுக்கு ஏற்பட்ட இழப்பு 13 லட்சம் டாலராக மதிப்பிடப்பட்டுள்ளது. இது ஆசியா வின் மிகப்பெரிய பொருளாதார நாடுகளான சீனா, ஜப்பான் மற்றும் இந்தியா ஆகிய மூன்று நாடுகளின் மொத்தச் சந்தை மூலதனத்துக்கு இணையானது. இந்த இழப்பில் பாதி அமெரிக்க மற்றும் சீனப் பங்குச் சந்தைகள் மூலமாக ஏற்பட்டுள்ளது. அதேசமயம், இந்தியச் சந்தை மூலதனம் 35,000 கோடி டாலர் அளவுக்கே குறைந்துள்ளது. இது சர்வதேச இழப்பில் 2.5 சதவிகிதமாகும்.”

விதிமுறை மீறல்  வழக்குகளை முடித்து வைப்பதில் செபி வேகம் காட்டுகிறதே?

“விதிமுறை மீறல்களில் ஈடுபட்ட பல்வேறு நிறுவனங்களுக்கு எதிரான வழக்குகளை முடித்து வைப்பதில் பங்குச் சந்தை ஒழுங்குமுறை ஆணையமான செபி வேகம் காட்டுகிறது. கடந்த மூன்றாண்டுகளில் செபி முடித்துவைத்த வழக்கு களின் எண்ணிக்கை ஆறு மடங்காக அதிகரித்துள்ளது. 2018-ம் நிதியாண்டில் மட்டும் 200 வழக்குகள் தீர்த்துவைக்கப்பட்டுள்ளன. இதன் மூலம் ரூ.30.8 கோடியை செபி வசூலித்துள்ளது. ராகேஷ் ஜுன்ஜுன்வாலா, இந்தியா புல்ஸ் வென்ச்சர்ஸ், ஐ.சி.ஐ.சி.ஐ புரூடென்ஷியல்     ஏ.எம்.சி, ஹெச்.டி.எஃப்.சி ஏ.எம்.சி, ரிலையன்ஸ் கம்யூனிகேஷன்ஸ், கிரைசில் மற்றும் எல் & டி  உள்ளிட்ட நிறுவனங்கள் இதில் முக்கியமானவை. 2016-ம் நிதியாண்டில் 34 வழக்குகள் தீர்த்து வைக்கப்பட்ட நிலையில், அப்போது ரூ.4.4 கோடி  மட்டுமே வசூலானது.”

ஒட்டுமொத்த விகடனுக்கும் ஒரே ஷார்ட்கட்!

டிரேடர்ஸ் பக்கங்கள் பகுதியைப் படிக்க: https://bit.ly/2EOMwDc

  பொதுத்துறையைச் சேர்ந்த மூன்று நிறுவனங்கள் அதிக லாபம் ஈட்டி உள்ளனவே?

“இந்தியன் ஆயில் கார்ப்பரேஷன், ஓ.என்.ஜி.சி மற்றும் என்.டி.பி.சி ஆகியவை 2017-18 -ம் ஆண்டில் அதிக லாபம் பார்த்த முதல் மூன்று பொதுத்துறை நிறுவனங்களாகும். பி.எஸ்.என்.எல், ஏர் இந்தியா, எம்.டி.என்.எல் ஆகிய பொதுத்துறை நிறுவனங்கள், தொடர்ச்சியாக இரண்டாவது ஆண்டாக மிக அதிக நஷ்டத்தைச் சந்தித்துள்ளன. இந்தியாவிலுள்ள பொதுத்துறை நிறுவனங்களின் மொத்த எண்ணிக்கை 71 ஆகும்.     2017-18-ம் ஆண்டிற்கான மத்திய பொதுத்துறை நிறுவனங்களுக்கான சர்வேயில், அதிக நஷ்டத்தைச் சந்தித்த முதல் பத்து நிறுவனங்களின் நஷ்டம், ஒட்டுமொத்த நஷ்டத்தில் 84.71% எனத் தெரியவந்துள்ளது.

அதிக லாபமீட்டிய மத்தியப் பொதுத்துறை நிறுவனங்களில் இந்தியன் ஆயில் கார்ப்பரேஷன் 13.37%, ஓ.என்.ஜி.சி. 12.49%, என்.டி.பி.சி. 6.48% என்ற விகிதத்தில் லாபம் ஈட்டியுள்ளன. கோல் இந்தியா மற்றும் பவர் கிரிட் கார்ப்பரேஷன் அதிக லாபம் ஈட்டிய முதல் 10 மத்தியப் பொதுத்துறை நிறுவனங் களின் பட்டியலில் நான்காம் மற்றும் ஐந்தாம் இடத்தைப் பெற்றுள்ளன.”

ட்யூப் இன்வெஸ்ட்மென்ட்ஸ் தனது பங்குகளைத் திரும்ப வாங்குகிறதே?

“ட்யூப் இன்வெஸ்ட்மென்ட்ஸ் ஆஃப் இந்தியா நிறுவனத்தின் இயக்குநர்குழு, அந்த நிறுவனத்தின் பங்குகளைத் திரும்ப வாங்குவதற்கு ஒப்புதல் அளித்துள்ளது. இதன்படி 50 லட்சம் பங்குகளுக்கு மிகாமல் ஒரு பங்குக்கு ரூ.140 என்ற விலைக்கு விகிதாச்சார அடிப்படையில் பங்குதாரர் களிடமிருந்து வாங்க முடிவெடுக்கப்பட்டுள்ளது.”

ஷேர்லக்: காலாண்டு முடிவுகள்... கவனம் தேவை!

எஃப் & ஓ முதிர்வு என்ன சொல்கிறது?

“டிசம்பர் மாத எஃப் & ஓ வியாழக்கிழமையுடன் முடிவடைந்தது. சர்வதேசச் சந்தைகளின் சென்டிமென்ட் கரடிச் சந்தை மனநிலைக்கு ஆட்பட்டிருப்பதால், ஏராளமான வர்த்தகர்கள் டிசம்பர் மாத ஷார்ட் பொசிஷன்களை ஜனவரிக்கு கேரி ஃபார்வேர்டு செய்திருக்கிறார்கள்.

நிஃப்டி ஃப்யூச்சர்ஸ் ரோலோவர் 74 சதவிகிதமாக உள்ளது. கடந்த மூன்று மாதங்களின் சராசரி 68 சதவிகிதமாக உள்ளது. நிஃப்டி ரோலோவர் கடந்த மூன்று மாதச் சராசரியின் அளவாக 81 சதவிகிதமாக உள்ளது. ஃப்யூச்சர்ஸ் மொத்த ஓப்பன் இன்ட்ரஸ்ட் ரூ.1.29 லட்சம் கோடியாக உள்ளது.

தகவல் தொழில்நுட்பம், இரு சக்கர வாகனம், மெட்டல் நிறுவனப் பங்குகளில் அதிக சார்ட் பொசிஷன்களைக் காண முடிகிறது. கேப்பிட்டல் குட்ஸ், இன்ஃப்ரா நிறுவனப் பங்குகள் அதிக லாங்க் பொசிஷன்கள் ரோலோவர் செய்யப் பட்டுள்ளன.”

புத்தாண்டில் இந்தியப் பங்குச் சந்தையின் செயல்பாடுகள் எப்படி இருக்கும்?

“டிசம்பரில் சர்வதேசப் பங்குச் சந்தைகளில் காணப்பட்ட சரிவான போக்கினால் ஏற்பட்ட அச்சம், அடுத்த ஜனவரி மாதத்தையும் கவலை யுடன் எதிர்நோக்க வைத்துள்ளது. இதனால், ஜனவரி மாதம் இந்திய பங்குச் சந்தை மந்தமான நிலையே காணப்படும் என்கிறார்கள் அனலிஸ்ட்கள். 

புத்தாண்டில்  இந்தியச் சந்தையின் போக்கை முக்கியமாக இரண்டு விஷயங்கள் நிர்ணயிக்கும். முதல் விஷயம், சர்வதேச காரணங்கள் அதாவது, கச்சா எண்ணெய் விலை, அமெரிக்கா- சீனா வர்த்தகப் போர் போன்றவை. அடுத்தது, நிறுவனங் களின் டிசம்பர் காலாண்டு நிதி நிலை முடிவு களுக்கேற்ப சந்தையில் ஏற்றஇறக்கம் இருக்கும். மேலும், டவ் ஜோன் சந்தை இறக்கம் கண்டால், இந்தியப் பங்குச் சந்தையிலும் அது எதிரொலிக்கும்.”

கோல்டு இ.டி.எஃப் ஃபண்டிலிருந்து ரூ.280 கோடி வெளியேற்றம்!

 கோ
ல்டு இ.டி.எஃப் ஃபண்டுகளின் யூனிட்களை முதலீட்டாளர்கள் தொடர்ந்து விற்றுவருகிறார்கள். கோல்டு இடிஎஃப் ஃபண்டிலிருந்து முதலீடுகள் தொடர்ந்து வெளியேறுவது நடப்பு 2018-19-ம் நிதி யாண்டிலும் தொடர்கிறது. ஏப்ரல் முதல் நவம்பர் வரையிலான காலகட்டத்தில் கோல்டு இ.டி.எஃப் ஃபண்டிலிருந்து சுமார் ரூ.280 கோடி அளவுக்கு முதலீடு வெளியேறியுள்ளது. 2017-18-ம் நிதியாண்டில் இ.டி.எஃப் ஃபண்டுகளிலிருந்து ரூ.835 கோடி வெளியேறியுள்ளது. 2016-17-ல் ரூ.903 கோடியும்,          2014-15-ல் ரூ.1,475 கோடியும், 2013-14-ல் ரூ.2,293 கோடியும் வெளியேறியுள்ளது.

ஏற்ற இறக்கம் காணப்படுகிறபோதிலும், பங்குச் சந்தை முதலீடு சாதகமான வருவாயைக் கொடுப்பதால், அதில் முதலீடு செய்யவே முதலீட்டாளர்கள் முன்னுரிமை கொடுக்கிறார்கள். இதனால்தான் கோல்டு இ.டி.எஃப் ஃபண்டிலிருந்து முதலீடு வெளியேறுகிறது.

இந்திய முதலீட்டாளர்கள் பாரம்பர்யமாகவே தங்கத்தை இ.டி.எஃப்-ஆக வைத்திருப்பதைவிட பொருள் வடிவில் வைத்திருக்கவே அதிகம் விரும்புகின்றனர். முதலீட்டாளர்களின் கண்ணோட்டத்தில் அதுதான் சிறந்த முறையாக இருக்கிறது. முதலீட்டாளர்கள், தங்களது போர்ட்ஃபோலியோவில் 5 - 10% முதலீட்டை மட்டுமே தங்கத்துக்கு ஒதுக்குவதுதான் சிறந்ததாக இருக்கும். அப்படி இருப்பது, போர்ட்ஃபோலியோவுக்கு ஒரு பாதுகாப்பாகவும், ஒட்டுமொத்த போர்ட்ஃபோலியோவும் ஏற்ற இறக்கத்துக்கு உள்ளாகும் ஆபத்தைக் குறைப்பதாகவும் இருக்கும். இ.டி.எஃப் ஃபண்டிலிருந்து முதலீட்டாளர்கள் வெளியேறுவதற்கு இதுவும் முக்கியக் காரணமாகும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism