Published:Updated:

என்.எல்.சி. பங்கு விற்பனை: எதிர்ப்பின் பின்னணியில் அரசியல்!

செ.கார்த்திகேயன், படம்: எஸ்.தேவராஜன்.

என்.எல்.சி. பங்கு விற்பனை: எதிர்ப்பின் பின்னணியில் அரசியல்!

செ.கார்த்திகேயன், படம்: எஸ்.தேவராஜன்.

Published:Updated:
##~##

நெய்வேலி லிக்னைட் கார்ப்பரேஷன் நிறுவனத்தின் ஐந்து சதவிகித பங்குகளை தனியாருக்கு விற்பனை செய்ய முடிவு எடுத்திருப்பதாக மத்திய அரசு கடந்த 21-ம் தேதி வெளியிட்ட அறிவிப்பால் வேலை நிறுத்தம் செய்கிற அளவுக்கு கொதித்துப் போயிருக்கிறார்கள் அங்கு வேலை பார்க்கும் ஊழியர்கள். மத்திய அரசின் முடிவை எதிர்ப்பது ஏன் என என்.எல்.சி. நிறுவனத்தில் உள்ள தொழிலாளர் முன்னேற்ற சங்கப் பேரவையின் பொதுச் செயலாளரும், மாநில பேரவைத் துணைத் தலைவருமான சா.ராஜவன்னியனுடன் பேசினோம்.

''1996முதலே மத்திய அரசு, என்.எல்.சி. பங்குகளை விற்பனை செய்ய முயற்சி செய்து வருகிறது. நாங்களும் இதைத் தொடர்ந்து எதிர்த்து வருகிறோம். இந்நிறுவனம் பொதுத் துறை நிறுவனமாக இருப்பதால், அந்த மாவட்ட மக்களுக்கு பல்வேறு உதவிகளைச் செய்து வருகிறது. தனியாரிடம் விற்பனை செய்தால் மக்கள் நலத் திட்டங்கள் ரத்தாகும் அபாயம் உள்ளது. என்.எல்.சி. நிறுவனம் பொதுத் துறை நிறுவனமாக இருப்பதால்தான் அங்கு வேலை செய்யும் தொழிலாளர்களுக்கு முறையான வேலையும், ஊதியமும் கிடைக்கிறது. கொஞ்சம் கொஞ்சமாக என்.எல்.சி. பங்குகளை தனியார் நிறுவனங்களுக்கு விற்றுவிட்டால் பாதிக்கப்படுவது எங்களைப் போன்ற தொழிலாளர்கள்தான். எனவே, நாங்கள் அதை தனியாருக்கு விற்க அனுமதிக்கவே மாட்டோம்'' என்றார் ஆவேசமாக.

ஒட்டுமொத்த விகடனுக்கும் ஒரே ஷார்ட்கட்!

அண்ணா தொழிலாளர் ஊழியர் சங்க செயலாளர் உதயகுமாருடன் பேசினோம். ''13,000 நிரந்தர தொழிலாளர்கள், 4,500 பொறியாளர்கள், அதிகாரிகள் மற்றும் 12,000-ற்கும் மேற்பட்ட ஒப்பந்தத் தொழிலாளர்கள் இந்த நிறுவனத்தையே நம்பி இருக்கிறார்கள். ஆனால், மத்திய அரசாங்கமோ 466 கோடி ரூபாய் வேண்டும் என்பதற்காக இந்த நிறுவனத்தின் பங்குகளை விற்க முடிவு செய்கிறது. இந்நிறுவனத்தின் மூலம் ஆண்டு டிவிடெண்ட் மட்டுமே 500 கோடி ரூபாய் கிடைப்பது மத்திய அரசுக்கு தெரியாதா? இது பொதுத் துறை நிறுவனமாக இருப்பதால்தான் அரசிடம் பேசி கோரிக்கைகளைச் சொல்லி பெற முடிகிறது. தனியார் நிறுவனங்களுக்கு பங்குகள் விற்கப்பட்டால் அவர்களுக்கே லாபம் கிடைப்பதோடு, ஊழியர்களுக்கு பணிப் பாதுகாப்பும் இருக்காது'' என்று கொதித்தார்.

என்.எல்.சி. பங்கு விற்பனை: எதிர்ப்பின் பின்னணியில் அரசியல்!

இதற்கிடையே தனியாருக்கு விற்க முடிவு செய்யப்பட்ட இந்நிறுவனத்தின் 5 சதவிகிதப் பங்குகளை தமிழக அரசே வாங்கிக்கொள்ளத் தயார் என தமிழக முதல்வர் ஜெயலலிதா, பிரதமர் மன்மோகன் சிங்கிற்கு கடிதம் எழுதி இருக்கிறார். ''தமிழக அரசுக்குச் சொந்தமான தொழில் வளர்ச்சி நிறுவனங்கள் சிப்காட், டிட்கோ மற்றும் தொழில் முதலீட்டு நிறுவனமான டிக் போன்றவற்றுக்கு விற்கலாம்'' என்றும், ஆலோசனை சொல்லி இருக்கிறார் ஜெயலலிதா. இதற்கு சில சங்கங்கள் எதிர்ப்பு தெரிவித்து வருகின்றன.

என்.எல்.சி. ஊழியர்கள், அரசியல் கட்சிகளின் எதிர்ப்பு ஒருபக்கமிருக்க, மத்திய அரசின் இந்த முடிவு பற்றி பங்குச் சந்தை ஆலோசகர் இ.எம்.சி.பழனியப்பனிடம் கேட்டோம். ''மத்திய அரசாங்கத்திற்கு பணம் வேண்டும் என்கிற கட்டாயம் ஒருபக்கம்; செபியின் புதிய விதிமுறைபடி, ஒரு நிறுவனத்தின் பங்குகளில் 10 சதவிகிதம் மக்களிடம் இருக்கவேண்டும் என்பது இன்னொரு பக்கம். கோல் இந்தியா போன்ற பொதுத் துறை நிறுவனங்களில் எல்லாம் இந்த விதிமுறையின்படி, 10 சதவிகிதப் பங்குகள் விற்பனை செய்யப்பட்டு, அவை பங்குச் சந்தையில் வர்த்தமாகியும் வருகிறது. இதே நடைமுறையைத்தான் என்.எல்.சி. நிறுவனப் பங்குகளுக்கும் பின்பற்ற மத்திய அரசு முடிவு செய்துள்ளது.

என்.எல்.சி. பங்கு விற்பனை: எதிர்ப்பின் பின்னணியில் அரசியல்!

தனியாருக்கு தரும் பங்குகளை எங்களுக்குத் தந்துவிடுங்கள் என்று கேட்க ஆரம்பித்திருக்கிறது தமிழக அரசு. என்.எல்.சி. பங்குகளின் வர்த்தகம் அதிகமாக இருக்கவேண்டும் என்பதற்காகவே மக்களுக்கு தரும் முடிவை எடுத்திருக்கிறது மத்திய அரசு. அப்படி செய்தால்தான் வால்யூம் அதிகரிக்கும். இப்போது தமிழக அரசாங்கம் கேட்கிறபடி, அவர்களுக்கே பங்குகளை விற்றால் வால்யூமானது குறைந்த அளவிலேயே வர்த்தகமாகும். என்றாலும், பணநெருக்கடியைச் சமாளிக்க என்.எல்.சி.யின் 5 சதவிகிதப் பங்குகளை தனியாருக்கு விற்கலாமா அல்லது தமிழக அரசுக்குத் தரலாமா என்பதை மத்திய அரசுதான் தீர்மானிக்கவேண்டும்'' என்று முடித்தார்.

''வங்கிகள் உள்பட அரசின் பல்வேறு பொதுத் துறை நிறுவனங் களின் பங்குகள் ஏற்கெனவே விற்கப்பட்டுவிட்ட நிலையில் என்.எல்.சி. நிறுவனத்துக்கு மட்டும் இத்தனை பெரிய எதிர்ப்பு கிளம்பி இருப்பதன் பின்னணி, அரசியல்தான். நெய்வேலியில் இருக்கும் வாக்காளர் களின் ஓட்டுகளைப் பெறவே அரசியல் கட்சிகள் இந்த பிரச்னையை கிளப்பிவிட்டு வேடிக்கை பார்க் கின்றன'' என்றார், பெயர் சொல்ல விரும்பாத ஒருவர். இது நிஜமோ, இல்லையோ, அரசாங்கம் இதில் ஒரு நல்ல முடிவை எடுக்கவேண்டும் என்பதே எல்லோரது எதிர்பார்ப்பும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism